NATIONAL NEWS

Pangalagaan ang pagkakaibigan ng Pilipinas at China.

Ito ang mensahe ni Chinese Ambassador Huang Xilian para sa Pilipinas sa kanyang talumpati sa ika-73 Anibersaryo nang pagkakatatag ng People’s Republic of China.

Ayon kay Huang, dapat maayos ng Pilipinas at China ang differences o pagkakaiba ng mga ito at humanap ng mapayapang solusyon sa pamamagitan ng friendly consultations para sa mas magandang relasyon ng dalawang bansa.

Binigyang diin ni Huang na handa ang China na makipag tulungan sa Pilipinas upang magkatuwang na maipatupad at sundin ang blueprint tungo sa  aniya’y bagong “golden era” sa bilateral relations.

Nananatiling sarado ang siyam na kalsada sa Luzon dahil pa rin sa bagyong Karding.

Ayon sa Department of Public Works and Highways, apat na kalsada ang hindi pa rin madaanan sa Central Luzon, dalawa sa Cagayan Valley at tig-isa sa Ilocos Region, CALABARZON, at Cordillera Administration Region.

Limitado naman ang access sa tatlo pang mga kalsada dahil pa rin sa pagbaha sa Apalit-Macabebe-Masantol Road sa Pampanga; Olangapo-Bugallon Road, sections sa Sindol, San Felipe; San Rafael, Cabanang, Zambales; at Rizal Boundary-Famy-Quezon boundary Road.

Tiniyak naman ni Public Works secretary Manuel Bonoan na pinaigting na nila ang kanilang clearing operations upang maibalik ang mobility at bilang suporta na rin sa relief operations ng pamahalaan sa mga lugar na lubhang pinadapa ng bagyo.

Tinatayang aabot sa 112 million pesos ang repair cost sa mga napinsalang paaralan dahil sa bagyong Karding.

Sa preliminary assessment ng DepEd Disaster Risk Reduction and Management Service, nasa 20 eskwelahan ang nasira sa Ilocos Region, Cagayan Valley, Central Luzon, Bicol Region, National Capital Region at Cordillera Administrative Region.

Mahigit 12,174,549 estudyante sa 21,509 na paaralan ang naapektuhan ng bagyo, kabilang ang saklaw ng class suspensions.

Mayroon ding 107 school division na naapektuhan sa  Ilocos Region, Cagayan Valley, Central Luzon, Calabarzon, Mimaropa, Bicol region, NCR, at CAR.

Nasa 327 eskwelahan naman ang ginamit bilang evacuation centers, kung saan 259 sa mga ito ang kasalukuyang ginagamit.

Nasa Japan na si Vice President Sara Duterte-Carpio upang dumalo sa state funeral ni Dating Prime Minister Shinzo Abe.

Pero una rito, nag-courtesy call kahapon si VP Sara kay Japan prime minister Fumio Kishida sa Akasaka palace state guest house sa Tokyo.

Sinabi ng Ministry of Foreign Affairs ng Japan na kabilang sa mga tinalakay ng dalawa ang pagpapabuti ng agricultural at fisheries value chains.

Matatandaang inanunsyo ng bise presidente na dadalo siya sa state funeral ni Abe, upang iabot ang condolence letters mula sa ama nito na si Dating Pangulong Rodrigo Duterte at Pangulong Ferdinand Marcos Jr.

Tiniyak ng Department of Social Welfare and Development na mayroon silang sapat na pondo upang matulungan ang mga naapektuhan ng bagyong Karding.

Sa panayam ng DWIZ, sinabi ni DSWD secretary Erwin Tulfo na kanilang tututukan ang mga lugar na pinadapa ng bagyo partikular ang Central Luzon.

Inuna na aniya nilang bisitahin ang lalawigan ng Quezon, gayundin ang Aurora na unang tinamaan ng bagyo.

Sinabi pa ni Tulfo na namahagi na rin sila ng tig-5,000 pesos na cash assistance para sa pagsasaayos ng mga nasirang bahay ng mga residente.

Ngayong araw and the rest of the week ay ang focus po natin o concentration natin dyan kung sa Central Luzon tulad sa Nueva Ecija. Mayroon pa naman tayo at sapat na pondo para pantulong sa mga kababayan natin ganun din po sa mga pagkain…ready po ang DSWD…meron din po kaming naka-standby na quick reaction fund…as a matter of fact meron pa po kaming over 1 bilyon na pondo para pantulong sa mga kababayan natin na naapektuhan ng bagyong Karding.

Tinig ni DSWD secretary Erwin Tulfo sa panayam ng DWIZ.

Umabot na sa mahigit 80,000 indibidwal o katumbas ng 20,400 pamilya na ang apektado at nagsilikas dahil sa bagyong Karding.

Aabot naman sa mahigit na 700 na magsasaka ang apektado at may kabuuang 16,299 na ektaryang pananim ang nawasak.

Ayon kay NDRRMC deputy spokeperson Asec. Raffy Alejandro, pawang mga residente mula sa Regions 2,3,4-A,4-B, 5, Cordillera Administrative Region at Metro Manila ang mga apektado ng kalamidad.

Maaari naman na anyang bumalik ang mga evacuee sa kanilang mga bahay matapos clearing operation ng awtoridad.—mula sa panulat ni Jenn Patrolla

Tinututukan na ng pamahalaan ang pagpapanatili ng mga COVID-19 vaccine storage facility, lalo na sa mga lugar na nawalan ng kuryente matapos ang pananalasa ng Bagyong Karding.

Ayon kay DOH-OIC at Undersecretary Maria Rosario Vergeire, na-i-pre-position na ang mga kakailanganing generator set sa Nueva Ecija upang mapanatili ang temperatura ng mga bakuna.

Ipinag-utos na rin ni Pangulong Ferdinand Marcos Junior na magpadala na ng gen-sets sa naturang lalawigan maging sa Aurora para sa pansamantalang supply ng kuryente.

Tiniyak naman ng gobyerno na handa na ang kanilang Quick Response Fund para sa pagsasa-ayos ng ilang health facilities na napinsala ng bagyo.  —Sa panulat ni Jenn Patrolla

Inatasan ni Pangulong Ferdinand “Bongbong” Marcos Jr., ang mga irrigation at water official na mahigpit na makipag-ugnayan sa isa’t isa kapag nagpakawala ng tubig mula sa mga dam.

Ito’y upang maiwasang maulit ang malawakang pagbaha sa Cagayan Valley noong mga nakaraang taon.

Sa isinagawang situation briefing hinggil sa epekto ng bagyong Karding kahapon, pinatitiyak ni Pangulong Marcos sa pagasa na hindi na mauulit pa ang pagbaha sa Cagayan noong 2020.

Inihayag naman ni PAGASA administrator Vic Malano na ginawan na ng pre-emptive release ng tubig ang Magat Dam bago pa tumama sa bansa ang bagyong Karding.