NATIONAL NEWS

Tinututukan na ng pamahalaan ang pagpapanatili ng mga COVID-19 vaccine storage facility, lalo na sa mga lugar na nawalan ng kuryente matapos ang pananalasa ng Bagyong Karding.

Ayon kay DOH-OIC at Undersecretary Maria Rosario Vergeire, na-i-pre-position na ang mga kakailanganing generator set sa Nueva Ecija upang mapanatili ang temperatura ng mga bakuna.

Ipinag-utos na rin ni Pangulong Ferdinand Marcos Junior na magpadala na ng gen-sets sa naturang lalawigan maging sa Aurora para sa pansamantalang supply ng kuryente.

Tiniyak naman ng gobyerno na handa na ang kanilang Quick Response Fund para sa pagsasa-ayos ng ilang health facilities na napinsala ng bagyo.  —Sa panulat ni Jenn Patrolla

Inatasan ni Pangulong Ferdinand “Bongbong” Marcos Jr., ang mga irrigation at water official na mahigpit na makipag-ugnayan sa isa’t isa kapag nagpakawala ng tubig mula sa mga dam.

Ito’y upang maiwasang maulit ang malawakang pagbaha sa Cagayan Valley noong mga nakaraang taon.

Sa isinagawang situation briefing hinggil sa epekto ng bagyong Karding kahapon, pinatitiyak ni Pangulong Marcos sa pagasa na hindi na mauulit pa ang pagbaha sa Cagayan noong 2020.

Inihayag naman ni PAGASA administrator Vic Malano na ginawan na ng pre-emptive release ng tubig ang Magat Dam bago pa tumama sa bansa ang bagyong Karding.

Walang napinsalang mga dam sa paghagupit ng bagyong Karding sa Luzon.

Ito ang tiniyak ni National Irrigation Administration (NIA) administrator Benny Antiporda, batay sa kanilang monitoring.

Gayunman, mahigpit anyang binabantayan ang Pantabangan at Magat Dams sa posibleng pag-apaw.

Ayon kay Antiporda, tanging ang Bulo Dam sa San Miguel, Bulacan ang nagkaroon ng pag-apaw subalit hindi naman ito nagdulot ng matinding pagbaha.

Ang nasabing water reservoir ay isang open dam na tuluy-tuloy ang agos ng tubig mula sa lalawigan ng Nueva Ecija.

Samantala, siniguro rin ni Antiporda na patuloy ang pakikipagtulungan ng NIA sa mga Local Government Unit, lalo sa Luzon upang mahigpit na i-monitor ang kaayusan ng mga dam sa bansa.

Bahagya muling tumaas sa 37,082 ang aktibong kaso ng COVID-19 sa bansa.

Nakatapagtala kahapon ang DOH ng karagdagang 2,001 infections dahilan upang lumobo na sa 3,940,201 total case load.

Kabilang dito ang 3,840,300 recoveries at 62,819 fatalities.

Hindi pa rin natitinag ang Metro Manila sa may pinaka-maraming kaso na 13,861 sa nakalipas na dalawang linggo; CALABARZON, 5,138 at central Luzon, 2,819.

Mahigit 500 pamilya at halos 6,200 kabahayan ang napinsala sa bayan ng Dingalan, Aurora matapos ang pananalasa ng bagyong Karding.

Ayon kay Mayor Sherwin Taay, isa sa pinakamatinding hinagupit ng bagyo ang barangay Paltic na nakaharap sa dagat.

Mas malala anya ang sinapit ng mga coastal barangay ngayon kumpara nang hatawin sila ng bagyong Ulysses noong Nobyembre 2020.

Bagaman may mga nasirang ari-arian, wala namang namatay sa kanyang mga kababayan.

Samantala, kahapon ay dumating sa Dingalan si DSWD secretary Erwin Tulfo upang mamahagi ng tulong pinansyal na P5,000 hanggang P10,000 sa ilalim ng Assistance for Individuals in Crisis Program.

Pina-alalahanan ng Departments of Energy at Trade and Industry ang mga kumpanya ng langis at traders na otomatikong ipatupad ang price freeze sa mga lugar na nasa ilalim ng State of Calamity.

Sa gitna ito ng malawak na pinsalang idinulot ng bagyong Karding sa iba’t ibang lugar sa Luzon.

Nagbabala ang DOE at DTI na posibleng maharap sa reklamo o pagkakulong ang sinumang lalabag sa price freeze.

Ayon kay DOE – Oil Industry Management Bureau director Rino Abad, agad silang maglalabas ng advisory sa mga lugar na ilalagay o isinailalim sa State of Calamity.

Nakikipag-ugnayan naman ang DTI sa Office of Civil Defense upang makakuha ng suhestyon kaugnay ng price stabilization measures sa mga lugar na malubhang nasalanta ng kalamidad.

Nilinaw ni DTI undersecretary, Atty. Ruth castelo na saklaw lamang ng automatic price freeze ang basic necessities.

Ipinag-utos na ng Department of Justice (DOJ) ang pagpapasara sa 175 Philippine Offshore-Gaming Operators (POGO).

Ayon kay DOJ Secretary Jesus Crispin Remulla, kinansela na ang lisensya ng mga POGO dahil umano sa kaugnayan nito sa ilang krimen.

Mas nakababahala anya ito dahil kumakalat na sa social media ang mga video at picture ng mga insidente ng murder, kidnapping at prostitution.

Samantala, nasa kustodiya na ng kagawaran ang 280 Chinese POGO workers.  —Sa panulat ni Jenn Patrolla

Halos 90% ng mga bahay at ilang paaralan sa paanan ng Sierra Madre sa General Nakar, Quezon ang napuruhan sa pananalasa ng bagyong Karding.

Ayon kay Municipal Disaster Risk Reduction and Management officer Erberto Astrera, grabe ang sinapit ng kanilang bayan dahil halos lahat ng bubong ng mga bahay at paaralan ang winasak ng malakas na hangin.

Kabilang anya sa mga napinsala ang Umiray Elementary School sa barangay Umiray, na pinaka-malayong barangay sa General Nakar at nasa boundary ng Dingalan, Aurora.

Sa datos, halos 6k residente sa naturang bayan ang apektado ng kalamidad.

Hindi naman gaanong nagtamo ng pinsala ang iba pang barangay sa General Nakar.

Mayorya ng nasabing bayan ay bahagi ng Sierra Madre na pinaka-mahabang mountain rage sa bansa na aabot sa 540 kilometers o mula sa lalawigan ng Cagayan hanggang Quezon.

Binigyang-pugay ang limang rescuer sa Bulacan na nasawi makaraang anurin ng baha sa bayan ng San Miguel sa kasagsagan ng pananalasa ng bagyong Karding.

Kinilala ang biktimang sina George Agustin, 45-anyos; Marvy Bartolome, 36; Narciso Calayag Jr., 33; Troy Justin Agustin, 30- anyos at Jerson Resurecion.

Nasa gitna ng rescue operation ang lima nang tangayin ang kanilang bangka ng malakas na agos matapos bumagsak ang isang pader sa kalapit na gasolinahan.

Narekober ang labi ng mga rescuer dakong ala-6 kahapon ng umaga sa isang palayan.

Aminado si Bulacan Provincial Disaster Risk Reduction Management Office head Liz Mungcal na napakasakit para sa kanya ang pagkawala ng lima dahil pamilya na ang turing niya sa mga ito.

Sa kabila nito, ipinagmamalaki anya nila ang kabayanihan ng mga nasawing rescuer dahil hanggang sa huli ay nagbuwis ng buhay ang mga ito para makapagbigay-serbisyo sa mga mamamayan.

Tiniyak naman ni Governor Daniel Fernando ang paggawad ng mataas na parangal at tulong sa pamilya ng mga rescuer.

Pinamamadali na ng Senado ang pagpapatayo ng mga evacuation center sa ibat-ibang bahagi ng bansa.

Ayon kay Senator Christopher “Bong” Go, dapat pagtibayin ang Senate Bill 193 na may layuning masigurong ligtas ang mga pamilyang apektado ng kalamidad na nasa evacuation centers.

Sinabi ni Go, na mahalaga ang Disaster Resiliency sa bansa sa gitna ng kalamidad kabilang na ang bagyo, lindol, storm surge, landslide at iba pa kaya dapat din na may sapat na kagamitan ang mga evacuee.

Iginiit din ni Go na dapat ligtas, at permanente ang pagpapatayo ng evacuation center sa mga siyudad, munisipalidad at lalawigan kung saan, dapat ay kakayanin nito ang mga super typhoons na may bilis ng hanging aabot sa 300 kilometers per hour, at seismic activity o lakas ng lindol na aabot hanggang Magnitude 8.0.

Bukod pa dito, kailangan ding masiguro ang mga kakailanganin ng mga lilikas gaya ng emergency packs na inubuo ng kumot, mga damit, pagkain, tubig, personal hygiene at mga gamot.