NATIONAL NEWS

Nagpadala na ang Estados Unidos ng family food packs at shelter tarpaulins para sa mga pamilyang naapektuhan ng Super Typhoon Karding.

Ayon sa U.S. Embassy, ipinamahagi ang mga food pack at shelter tarpaulin sa mga pamilyang apektado sa CALABARZON at Central Luzon sa tulong ng World Food Programme at International for Migration-Philippines.

Tumutulong na rin ang U.S. Agency for International Development-Philippines sa National Emergency Telecommunications at Logistic Operations.

Bukod sa Amerika, nagpahayag na rin ng kahandaang tumulong ni Australian Ambassador-designate to the Philippines Hae Kyong Yu para sa recovery ng mga lugar na nasalanta ng kalamidad.

Naglabas na ng show cause order ang Land Transportation Office  laban sa mga driver at may-ari ng dalawang SUV na sangkot sa magkahiwalay na insidente ng hit-and-run sa Paranaque City.

Nilagdaan na ni Atty. Clarence Guinto, acting director ng LTO Law Enforcement Service at Regional Director ng LTO-NCR, ang mga Show cause order laban kina Raymond Zaparin, Rodolfo Cudiamat at Visitacion Hugo.

Si Zaparin ang sinasabing driver at may-ari ng Mitsubishi Pajero na may plakang UXO-295 na nakasagasa umano sa babaeng streetsweeper sa kanto ng Elizalde Avenue at Aguirre Avenue, Barangay BF Homes noong September 24.

Si Cudiamat naman ang driver habang si Hugo ang may-ari ng SUV na may plakang NCV-4752 na sangkot sa hit-and-run sa dalawang bata sa kanto ng Bodoni at Extra Streets, 4th Estate, barangay San Antonio noong September 20.

Patay sa naturang insidente ang tatlong taong gulang na babae habang sugatan ang kasama nito.

Kinondena naman ni LTO chief Teofilo Guadiz III ang mga nasabing insidente at tiniyak na mananagot sa batas ang mga sangkot at sakaling mapatunayang guilty ay hindi na papayagang kumuha ng driver’s license.

Dalawa ang patay sa pamamaril ng isang driver-security guard sa bahay ng executive ng kontrobersyal na Pharmally Pharmaceutical Corporation sa Forbes Park Subdivision, Makati City.

Kinilala ang mga biktimang sina Jay-Ar Tomenio at Eugene Sitjar habang suspek si Julius Cortez, pawang mga guwardya sa number 14 Narra Street, South Forbes Park.

Naganap ang insidente sa inuupahang bahay ni Pharmally Executive Rose Nono Lin, mag-a-alas 10 noong Lunes ng gabi.

Ayon sa National Capital Region Police Office (NCRPO)  agad silang nagpadala ng Special War and Tactics personnel at Tactical Motorcycle Riding Units upang rumesponde sa tawag ng isang concerned citizen.

Gayunman, patay na nang madatnan si Sitjar dahil sa tama ng bala sa ulo at ang kanyang kasamang si Tomenio na tinamaan sa baywang habang hindi na rin naabutan ang suspek.

Narekober ng NCRPO at Makati City Police sa crime scene ang ilang basyo ng bala ng 9-mm pistol.

Nasakote naman kahapon ng mga otoridad si Cortez at mahaharap sa kasong Murder at Theft.

Sa salaysay nina Bernard Saquing, household staff at Jomar Sol, household security, lasing ang suspek at naghahanap ng ulam sa kusina pero walang nakitang pagkain at biglang pinagbabaril ang mga biktima.

Malapit lamang din ang pinangyarihan ng insidente sa bahay ni dating Economic adviser Michael Yang, isa pang major player sa Pharmally Fiasco na nagtago.

Sa parehong kalye rin lamang ang family mansion ni Pangulong Ferdinand “Bongbong” Marcos Jr.

Ibinasura ng prosecutor ng International Criminal Court ang hiling ng Pamahalaan ng Pilipinas na ipatigil ang imbestigasyon sa War on Drugs ni dating Pangulong Rodrigo Duterte.

Ito’y kahit pa inihayag ng Marcos Administration sa ICC na walang hurisdiksyon ang ICC at iniimbestigahan na ng gobyerno ang umano’y mga krimeng may kinalaman sa giyera kontra droga.

Iginiit ni ICC Prosecutor Karim Khan na walang merito ang mga argumento ng Philippine Government kaya’t kailangang magsagawa ang prosekusyon ng impartial investigation.

Sa ilalim ng Duterte Administration, kumalas ang Pilipinas sa rome statute ng hague-based tribunal noong 2018 na nagtatag sa ICC, epektibo noong 2019.

Tinanggihan naman ng pumalit kay Duterte na si Pangulong Ferdinand “Bongbong” Marcos Jr., ang muling pag-anib ng Pilipinas sa International Court.

Tiniyak ng Land Transportation Franchising and Regulatory Board (LTFRB) ang pagbubukas ng lahat ng pre-pandemic routes sa Metro Manila para sa Public Utility Vehicles bago matapos ang taon.

Inihayag ito ni Valenzuela City 2nd District Rep. Eric Martinez sa kanyang pagharap sa plenary debates para sa 2023 budget ng Department of Transportation.

Si Martinez ang budget sponsor ng DOTr sa mababang kapulungan ng Kongreso.

Ayon sa Kongresista, habang nagpa-plano ang gobyerno para sa long-term solutions, gaya ng modernong public transportation infrastructure, dapat ilarga ang agarang solusyon sa pamamagitan ng pagbabalik ng regular na ruta.

Sa gitna anya ng mga delay sa implementasyon ng PUV Modernization Program, tiniyak ng mambabatas sa mga operator na palalawigin naman ang timeline sa pagpapatupad nito.

Tuloy pa rin anyang makabi-biyahe ang mga lumang PUV at walang huhulihin.

Kinumpirma ng Department of Health (DOH) na 21 sa kanilang mga pasilidad ang napinsala ng Bagyong Karding.

Gayunman, nilinaw ni DOH Officer-In-Charge, Undersecretary Maria Rosario Vergeire na minor damages lamang ang natamo nito.

Tiniyak naman ni Vergeire na hindi napinsala ang mga pinag-iimbakan ng mga COVID-19 vaccine.

Nakipag-ugnayan na anya sila sa kanilang regional officer upang mapabilis ang pagsasaayos ng mga napinsalang facilities. —sa panulat ni Jenn Patrolla

Ikinukunsidera na ni Pangulong “Bongbong” Marcos Jr., ang pag-aangkat ng oil products at fertilizer mula sa Russia bilang solusyon kontra sa tumataas na presyo ng krudo.

Ito’y sa kabila ng ipinataw na sanctions ng Western Nations, sa pangunguna ng Amerika, kabilang ang ipinatutupad na oil embargo laban sa Russia.

Alinsunod sa ipinatutupad na polisiya ng Russian Government na resulta ng sanctions, maaaring bumili ng langis pero russian ruble ang ipambabayad sa halip na U.S. dollar.

Ayon kay Pangulong Marcos, labis na naka-apekto sa Pilipinas ang lumulobong presyo ng oil products kaya’t kailangang maghanap ng alternatibong pagkukunan ng supply.

Kinakausap na anya ng Pilipinas ang Russia upang hilinging luwagan ang ilang polisiya sa pagbili ng fuel supply gayundin ang iba pang posibleng supplier.

Sa issue naman kung kailan darating ang supply, aminado ang Pangulo na malapit nang maselyuhan ang ilang kasunduan subalit ang tiyak ay hindi lang sa isang bansa manggagaling ang bibilhing langis.

Samantala, nilinaw ni Press secretary Trixie Cruz-Angeles na wala pang pinal na kasunduan sa posibleng pagkuha ng Pilipinas ng oil supply sa Russia.

Nagsagawa si dating DAR Secretary Bernie Cruz ng alternatibong programa para sa mga magsasakang apektado ng Bagyong Karding sa Nueva Ecija at Tarlac.

Layunin nitong ibenta sa presyong 28 pesos ang kada kilo ng bigas sa merkado.

Ito, ayon kay Cruz, ay upang matulungan ang mga magsasaka na makabangon sa epekto ng bagyo.

Positibo naman ang dating kalihim na maibaba ang presyo ng bigas sa Disyembre. —sa panulat ni Jenn Patrolla