NATIONAL NEWS

Pagpapatibay sa kasong kriminal laban sa driver na bumundol sa senior citizen na streetsweeper sa Paranaque, ipinanawagan sa PNP at LTO

Inapela ni Senior Citizen Party-list Rep. Rodolfo ‘Ompong’ Ordones sa PNP-NCRPO Southern Police District at sa Land Transportation Office (LTO) na gawing matibay ang kasong kriminal laban sa driver ng sasakyang bumundol sa 63 taong gula na si Lola Doreen Bacus isang streetsweeper sa isang subdivision sa Paranaque City

Ipinanawagan din nito sa LTO na agad na kumpiskahin at kanselahin ang drivers liscense ng suspek at i-impound ng PNP Highway Patrol Group ang sasakyang ginamit ng driver bilang ebidensya

Nabatid na kasalukuyang nasa kritikal na kondisyon si Lola Doreen ngayon at naka-confine sa Philippine General Hospital (PGH).

Habang ang suspek naman ay nakaditene sa Parañaque Traffic Management Bureau para sa imbestigasyon.

Isang magnitude 5.3 na lindol ang tumama sa bayan ng Cortes sa Surigao Del Sur.

Ayon sa Philippine Institute of Volcanology and Seismology (PHIVOLCS), tectonic ang origin ng lindol na naitala bandang 9:12 ng umaga.

May lalim itong 18 kilometers at natunton ang epicenter nito sa layong 43 kilometers silangan ng Cortes.

Naitala ang instrumental intensity ii sa Cabadbaran City, Agusan Del Norte at Intensity I naman sa nabunturan, Davao De Oro; Tandag, Surigao Del Sur.

Sinabi ng PHIVOLCS na wala namang inaasahang pinsala matapos ang pagyanig, ngunit posible ang aftershocks.

Nanawagan ang Department of Trade and Industry (DTI) sa mga manufacturer ng Christmas products, gaya ng noche buena items na limitahan sa 10% ang itataas ng presyo ng kanilang mga produkto.

Ayon kay DTI undersecretary Ruth Castelo, kung lima hanggang pitong piso lang ang itataas, posibleng kayanin pa ang presyo nito, pero kung hihigit pa rito ay mahihirapa nang bumili ang mga consumer.

Nilinaw naman ni Castelo na ang kanilang obserbasyon sa price increase ng mga produkto ay hindi kasama sa kanilang price regulation.

Sa susunod na buwan ay maglalabas ang DTI ng Suggested Retail Prices (SRP) ng mga noche buena products at iba pang Christmas items.—mula sa panulat ni Jenn Patrolla

Nasa Pilipinas na ang American boxing legend na si Floyd Mayweather.

Dumating sa bansa kagabi si Mayweather sakay ng kanyang gulfstream jet mula sa kanyang matagumpay na exhition match sa Japan.

Sinalubong siya nina Frontrow & Hotel Executives Richmond Yu at CEO Sam Versoza sa private hangar ni dating Ilocos Sur Gov. Luis “Chavit” Singson.

Nabatid na inimbitahan ang Undefeated US Boxer ng isang health and beauty product company na Frontrow upang maging brand ambassador.

Nakatakda ring bumisita si Mayweater sa ilang private resort sa bansa para sa iba pang events ng kumpanya.

Ikinatuwa naman ni Mayweather ang pagbabalik sa Pilipinas at sinabing nag-eenjoy siya sa pagbisita sa bansa. —ulat mula kay Raoul Esperas (Patrol 45)

Ipagpapatuloy ng Commission on Elections (COMELEC) ang pag-imprenta ng mga balotang gagamitin sa Barangay at Sangguniang Kabataan elections sa December 5.

Pipirma na ang COMELEC at National Printing Office (NPO) sa Memorandum of Agreement (MOA) para sa pag-imprenta ng mga balota sa Biyernes, September 30.

Ayon kay COMELEC Chairman George Garcia, kailangan ng simulan ang ballot printing upang hindi kapusin sa panahon.

Sisimulan na rin ng poll body ang training ng mga guro na magsisilbing Board of Canvassers para sa nasabing halalan.

Magugunitang inaprubahan na kahapon sa ikatlo at huling pagbasa sa senado ang panukalang ipagpaliban ang Barangay at SK polls sa December 2022 at i-atras ito sa ikalawang Lunes ng December 2023.

Aabot umano sa 18.41 billion pesos ang matitipid ng pamahalaan kung maantala ang halalan.—mula sa panulat ni Jenn Patrolla

Nilinaw ng National Disaster Risk Reduction and Management Council (NDRRMC) na nananatili sa walo ang bilang ng mga nasawi bunsod ng pananalasa ng bagyong Karding sa Luzon.

Kasunod ito ng report sa kanilang operations center na may isang nasawi sa Bataan dahil kay Typhoon Karding.

Ayon sa NDRRMC, zero casualty ang lalawigan ng Bataan at patuloy pa nilang bineberipika ang napaulat na nasawi.

Sa ngayon, walo ang opisyal na bilang ng mga nasawi sa bagyo kabilang na ang 1 sa Quezon; 2 sa Zambales; at limang rescuer na nasawi naman sa gitna ng kanilang operasyon sa San Miguel, Bulacan.

Pumalo na sa P3 million ang halaga ng pinsalang idinulot ng pananalasa ng Bagyong Karding sa sektor ng imprastraktura.

Sa datos ng National Disaster Risk Reduction and Management Council (NDRRMC), kabilang sa napinsala sa sektor ng imprastraktura ang mga tulay, kalsada at mga gusali na nasira dahil sa malakas na hangin at pagguho ng lupa.

Samantala, nasira din ang mga pananim ng mga magsasaka sa ilang lugar sa Luzon partikular na sa Nueva Ecija kung saan, pinaka naapektuhan ang palay, mais, at iba pang mga gulay.

Ayon sa NDRRMC, posible pang madagdagan ang halaga ng pinsala sakaling makuha na ang opisyal na report mula sa iba’t -ibang rehiyon na matinding hinagupit ng bagyong Karding.