NATIONAL NEWS

Nagdagdag ang pamahalaang lokal ng Muntinlupa ng mga security outposts sa National Road at city boundaries habang mas pinaigting pa ang police visibility sa lungsod.

Ang hakbang ay ginawa ni City Mayor Ruffy Biazon sa harap na rin ng mga ulat ukol sa kidnapping incidents na nagdudulot ng takot sa mamamayan lalo’t nanumbalik na ang face-to-face classes sa mga paaralan.

Matatandaang kumalat sa social media ang kidnapping scare sa ilang lungsod, tulad ng Muntinlupa, na natuklasan kalaunan na ang ilang insidente ay ‘hoax’ o hindi pala totoo.

There is definitely no truth in these reports, and the PNP has already verified that there are absolutely no cases of kidnapping in the City whatsoever as referred to by these hoax messages and posts,” wika ni Biazon.

Inatasan naman ni Biazon ang pulisya na mas palakasin pa ang police visibility maliban sa roving patrol na ginagawa ng Public Order and Safety Office (POSO) at City Security Office (CSO) upang matiyak ang kaligtasan ng mga Muntinlupeños lalo na ngayong nagbukas na muli ang mga eskwelahan at unibersidad sa siyudad.

Nabatid na ang mga security outposts ay matatagpuan sa City Alternate Route Entry and Exit (C.A.R.E.S.) Guard House sa Pleasant Ville, Bayanan; Soldier’s Hills, Putatan; at Soldier’s Hills Caltex, National Road, Putatan.

Ayon kay City Public Information Office Chief Tez Navarro, ang iba pang mga karagdagang security outposts ay ide-deploy at magiging operational na rin sa mga susunod na araw.

Ang ‘peace and order’ aniya ay nakapaloob sa 7K Agenda ni Biazon na kinapapalooban ng ‘Katarungan, Karunungan, Kalusugan, Kaunlaran, Kapayapaan/Kaayusan, Kabuhayan, at Kalikasan’ (Justice, Education, Health, Economic Progress, Peace and Order, Livelihood, Environment).

Lumalabas sa monitoring ng Private Hospitals Association (PHAPi) na marami na ang hindi nagsusuot face mask sa mga pampublikong lugar simula nang ipatupad ang voluntary mask wearing sa mga open spaces.

Ayon kay PHAPi President Dr. Jose De Grano, na sa kanilang pagmomonitor sa loob ng 2 hanggang 3 linggo na pagpapatupad nito, napansin nila na tumataas din ang virus cases sa bansa.

Pero, ayon kay De Grano, wala silang matibay na datus na magsasabing, dahil ito sa maluwag na implementasyon ng pagsusuot ng facemask.

Gayunman, kung pagbabasehan aniya ang kanilang obserbasyon, kapansin-pansin na talagang bahagyang tumaas ang active cases at ang daily cases sa mga pribadong pagamutan. - sa ulat ni Jopel Pelenio

Tinanggal na ng PAGASA hydrometeorology division ang flood warning sa Magat River Basin.

Ayon sa abiso ng PAGASA, itinigil na kasi ng Magat Dam ang pagpapakawala ng tubig dahil sa mababa na ang inaasahang mga pag-ulan sa Magat Watershed.

Sa ngayon ay wala nang banta ng anumang pagbaha mula sa Magat Dam

Sa talaan ng NASA,  umabot na sa 188.28 meters kaninang ala-6 ng umaga ang lebel ng tubig ng Magat Dam.

Hindi na rin nagpapakawala ng tubig ang Ipo Dam dahil sa bumaba na rin ang lebel nito na nasa 101.01 meters ang lebel ng Ipo dam kaninang umaga.

Bagama’t tatlong buwan pa bago matapos ang taong 2022, nalagpasan na ng National Telecommunications Commission (NTC) ang kanilang 2022 collection target ng mahigit P1.05 billion o 18.71 percent.

Nabatid na itinakda ng Development Budget Coordination Committee (DBCC) ang target collection ng komisyon ngayong taon sa P5.58 bilyon.

Subalit as of Sept. 27, ang kanilang actual collection ay pumalo na sa P6.63 bilyon.

“The NTC’s systematic collection effort is the Agency’s modest way of contributing to the public service programs of our dear President Ferdinand R. Marcos, Jr. – priorities of which are on food security, free and universal primary education, and public health,” ayon kay NTC Commissioner Gamaliel Cordoba.

Bukod dito, kinilala rin ni Cordoba ang kontribusyon ng mga empleyado ng ahensya at hinimok ang mga ito na ibigay ang final push sa paglikha ng mas mataas na income bago matapos ang taon.

Pinasalamatan din ng komisyoner si Secretary Ivan John Uy at ang buong DICT sa suportang ibinibigay sa NTC.

Ang tagumpay aniya ng NTC ay bunga ng pagsisikap ng kanilang personnel na istriktong ipatupad ang pagtalima ng stakeholders sa pagre-remit ng spectrum users’ fees, supervision at regulation fees at penalties.

Ang NTC ang nagre-regulate sa cable at commercial television operators, broadcast radio stations, telecommunications companies at commercial at portable radio operators.