HOT STORIES OF THE WEEK

Natuloy pa rin ang pagdinig ng Senate Committee on Civil Service and Government Reorganization sa pangunguna ng chairman nitong si Senador Antonio Trillanes.

Ito ay kahit pa binawi na ni Pangulong Rodrigo Duterte ang amnesty ni Trillanes at ipinaaaresto ito.

Ayon kay Trillanes, ang naturang pagkilos ay paraan ng administrasyon para pigilan ang pag imbestiga laban kay Solicitor General Jose Calida at sa mga kontratang pinasok nito sa mga ahensya ng gobyerno.

Tinutukan ng imbestigasyon ang 358. 3 milyong pisong kontrata na pinasok ng security agency ni Calida sa pamahalaan.

Nakita ng House Committee on Justice na sufficient in form ang impeachment complaint laban kay Chief Justice Teresita De Castro at anim na iba pang mahistrado ng korte na bumoto para mapatalsik si Dating Chief Justice Maria Lourdes Sereno.

Pinaburan ng 21 mambabatas ang mosyon na nagsasabing mayroong suffiency in form ang mga impeachment complaints na isinampa laban kina Supreme Court Chief Justice Teresita De Castro, SC Associate Justices Diosdado Peralta, Luzas Bersamin, Andres Reyes, Francis Jardeleza, Noel Tijam at Alexander Gesmundo.

Nahaharap sa Culpable Violation of the Constitution at Betrayal of Public Trust ang mga nabanggit na mahistrado ng Korte Suprema matapos na bumoto pabor sa quo warranto petititon laban kay Sereno.

Sina Albay Rep. Edcel Lagman, Ifugao Rep. Teddy Baguilat at Magdalo Partylist Rep.  Gary Alejano ang siyang naghain ng reklamo.

Tinawag na political prosecution ng kaalyado ni Senador Antonio Trillanes ang ginawang pagbawi ng pangulo sa amnesty nito.

Ayon kay Partylist Rep. Gary Alejano, matagal na nilang naririnig na gustong gawin ito ng administrasyon.

Iginiit naman ni Alejano na kinakailangan na dumaan sa Kamara at Senado ang pagbawi sa amnesty ni Trillanes.

Aniya, dumaan muna sa concurrence ng Kamara at Senado ang proclamation ni Dating Pangulong Noynoy Aquino bago napagkalooban ng amnesty si Trillanes at iba pa nitong mga kasama.

Sinabi ni Alejano, kinakailangang dumaan ito sa kongreso taliwas sa ginawa ng pangulo na naging unilateral lamang ang desisyon nitong pag bawi sa amnesty ni Trillanes.

(with report from Jill Resontoc)

Binawi ni Pangulong Rodrigo Duterte ang ibinigay na amnestiya ng nakaraang administrasyon kay Senador Antonio Trillanes IV dahil sa umano’y kabiguang tumupad sa mga hinihinging requirement nito, ayon sa Malacañang.

Batay sa proclamation number 572 na nilagdaan ni Pangulong Duterte, hindi naghain ang senador ng Official Amnesty Application Form nang siya ay pagkalooban nito noong 2010.

Ibinigay na amnestiya kay Senator Antonio Trillanes IV, binawi na ng Malacañang | via @jopel17 @blcb pic.twitter.com/Hr5jYGDhaM

— DWIZ Newscenter (@dwiz882) September 4, 2018

Hindi rin umano kailanman umamin o nagkaroon ng ‘admission of guilt’ sa panig ni Trillanes sa kinasangkutan niyang Oakwood Mutiny noong 2003 at Manila Peninsula Hotel siege noong 2007.

Dahil dito, agad na inatasan ang Department of Justice (DOJ) at Armed Forces of the Philippines court martial na ituloy ang lahat ng “criminal at administrative cases” laban sa senador may kaugnayan sa mga inilunsad na kudeta.

Habang inatasan naman ang AFP at PNP na arestuhin si Trillanes para madala siya sa bilangguan at maharap niya ang paglilitis.

Inilahad na ‘effective immediately’ ang pagpapatupad sa nasabing kautusan.

Reaksyon ni Trillanes

Tinawag namang political persecution ni Senador Trillanes ang inilabas na kautusan ng Palasyo.

Aniya, dahil wala nang maibato sa kanya ay nag-imbento na lamang ng kaso ang Pangulong Duterte.

“Hindi mo puwedeng bawiin ang amnesty. Amnesty is an act of Congress, hindi ‘yan puwedeng baliin ng isang EO.”
“Hindi maga-grant ang amnesty kung walang application. Kaya I will not dignify ang kalokohang ‘yan, imbento lang nila ‘yan.” Ani Trillanes

Gayunman, nanindigan ang senador na hindi siya magtatago at haharapin niya ang mga kaso laban sa kanya

“Kung ipaaaresto, sasama ako, mag-iimpake. I will not resist arrest. I will not escape, haharapin ko ito. Ang tanong ko kay Mr. Duterte kapag dumating ang panahon niya, makakaharap kaya siya?” Dagdag ni Trillanes

Hindi rin umano siya natatakot sa Pangulo bagkus ay mas ginaganahan pa siya na maging kritiko ng administrasyon.—AR

____

Iminungkahi ni Department of Agriculture (DA) Secretary Manny Piñol ang pagpapatupad ng reporma sa National Food Authority (NFA) sa halip na buwagin ito.

Sa gitna na rin ito ng mga panawagang buwagin ang ahensiya dahil sa kawalan umano nito ng aksyon para maresolba ang problema sa bigas sa bansa.

Ayon kay Piñol, mas makabubuti kung mas magagamit ang potensiyal ng nfa bilang natatanging trading agency sa bansa na kinilala ng World Trade Organization (WTO).

Iginiit ni Piñol, makabubuti aniya kung magagamit ang NFA bilang export agency ng iba pang produktong pang-agrikultura ng bansa at maalis ang imahe nito na nakadikit lamang sa bigas.

Inihirit din ni Piñol na muling maisailalim sa DA ang NFA para sa mas maayos na koordinasyon ng dalawang ahensiya.

—-

Nagbabadya umano ang food crisis sa Pilipinas sa gitna ng patuloy na pagtaas ng presyo ng bigas, isda at iba pang pangunahing bilihin.

Ito ang babala ni Senador Panfilo Lacson kung hindi tututukan ng gobyerno partikular ni Pangulong Rodrigo Duterte ang ekonomiya.

Ayon kay Lacson, halos lahat na ng basic food ay tumaas ang presyo at hindi na ito kayang bilhin ng mga mahirap na pamilya.

Magugunitang hinimok ng senador si Pangulong Duterte na bigyang-pansin na ang ekonomiya sa halip na tutukan ang ‘war on drugs’ na maaari namang ipaubaya na lamang sa Philippine National Police (PNP).

Dapat lamang patalsikin sa pwesto ang mga malupit at sira-ulong leader tulad ni dating German Chancellor Adolf Hitler.

Ito ang inihayag ni Pangulong Rodrigo Duterte sa kanyang pagbisita sa Yad Vashem Holocaust Memorial sa Jerusalem, Israel.

Ayon kay Pangulong Duterte, marami nang natutunan ang tao sa nakalipas na World War I (WWI) at World War II (WWII) kung saan anim na milyong Hudyo ang ipinapatay ni Hitler.

“I could not imagine of a country obeying an insane leader. And I could not ever fathom the spectacle of a human being going into a killing spree murdering old men, women, men, children, mother. ” Pahayag ni Duterte.

Kaisa aniya ang Pilipinas sa mga bansang tumututol sa digmaan at pag-massacre ng isang lahi dahil lamang sa pagkamuhi at tinitiyak niyang hindi na mauulit ang mga pangyayari noong WWII.

“I would like to say that we are one in saying that it will not happen again. And my country will be the first to voice such I said a massacre of a race just because of hate.” Ani Duterte.

---

—-

Mainit na tinanggap si Pangulong Rodrigo Duterte ng Filipino community sa Israel.

Sa pagharap 1,400 na Pinoy sa Ramada Hotel sa Jerusalem, inamin ng pangulo na napaluha siya dahil naramdaman niya ang pagmamahal ng mga Pinoy sa Holy Land.

Dahil dito, tiniyak ni Pangulong Duterte na babalik siya sa Israel para muling bisitahin ang mga kababayan.

Nasa 28,000 Pilipino ang naninirahan at nagtatrabaho sa israel na karamiha’y caregiver.

“Napaluha ako kanina not exactly you’re better off than the rest of your brothers and sisters in the region. Pero napaluha lang ako at nagtingin ako sa inyo, happy kayo and it gives me one of the greatest pleasure is not really that I have done something to make my Filipino brothers and sisters happy.” Pahayag ni Duterte.

Samantala, pinasalamatan naman ng pangulo ang Israel sa mabuting pagtrato sa mga Pinoy sa naturang bansa.

“Tignan ko ano ang maitulong ko para to better manage the huge number of my countrymen here. And after that I will go to Jordan…48,000 doon, mga 28,000 kayo dito. It beholds upon me to see to it na yung mga kababayan ko mga Pilipino are in the best of help and state of living na maganda. One of the best places that here too, and I don’t mind isa sa mga pinaka magandang lugar na pwede mo talagang mapuntahan and you are as a human being. If Israel would want ipadala ko doon lahat ng Pilipino dito kasi mas maganda ang buhay dito.” Ani Duterte.

Nagpasalamat din si Israeli Prime Minister Benjamin Netanyahu sa pagbisita ni Duterte kasabay ng pag-alala sa pagtulong ng Pilipinas sa mga Jewish refugee na tumakas sa pagmamalupit ng Nazi regime noong World War II (WWII).

“We remember the exceptional role of the Philippines that received Jews refugees during the Holocaust. We remember that the Philippines was the only Asian country that voted for the establishment of the State of Israel in the UN resolution in 1947.” Pahayag ni Netanyahu.

Idinepensa ni Pangulong Rodrigo Duterte ang kanyang rape joke matapos itong umani ng mga batikos.

Sa harap ng Filipino community sa Israel, inihayag ng pangulo na mali ang naging pagkakaunawa sa kanyang biro na kaya tumaas ang kaso ng rape sa Davao City ay dahil sa dami ng magandang babae sa lungsod.

Kasabay nito iginiit ni Pangulong Duterte ang kanyang naging pahayag ay bahagi ng demokrasya at karapatan sa pagpapahayag.

“Sabihin na naman nila na misogynist ako…kahit itong mga ano magsabi ka lang maraming rape sa Davao. Sabi ko siguro kasi maraming maganda sa Davao hindi ko naman sinabi ni-rape lahat yan.” Pahayag ni Duterte.

Samantala, sa hindi inaasahang pagkakataon ay humingi ng paumanhin ang punong ehekutibo kay dating US President Barack Obama.

Kaugnay ito sa kanyang mga banat at pagmumura kay Obama na bumatikos sa ‘war on drugs’ ng Duterte administration.

“I am sorry for uttering these words. No it was just a play na, talkatist or so like yours we have learned our lessons very well. Nagkakaintindihan tayo so if it is to your heart to forgive, you forgive. I have forgiven you.” Ani Duterte.