HOT STORIES OF THE WEEK

Tinawag na baliw ni Communist Party of the Philippines (CPP) founding chairman Jose Maria Sison si Pangulong Rodrigo Duterte.

Kasunod ito ng ginawang pagbawi ng pangulo sa amnestiya ni Senador Antonio Trillanes IV.

Ayon kay Sison, maituturing na double jeopardy at paglabag sa alituntunin sa pagbibigay ng amnestiya ang ginawa ng pangulo.

Iginiit pa ni Sison hindi maaaring bawiin ni Pangulong Duterte ang ipinagkaloob na amnestiya ni dating Pangulong Benigno “Noynoy” Aquino III sa mga miyembro ng Magdalo lalu’t sinang-ayunan ito ng Korte at ng Kongreso.

Aminado ang Malakanyang na posibleng may sumunod pang Oakwood mutineer na mapawalang bisa rin ang amnestiya.

Kasunod ito nang pag balewala ng Pangulong Rodrigo Duterte sa amnesty na ibinigay ni dating Pangulong Benigno “Noynoy” Aquino III kay Senador Antonio Trillanes IV.

Ayon kay Presidential Spokesman Harry Roque, nauna lamang napagpasyahan ang kaso ni Trillanes batay na rin sa mga dokumentong nagsasabing wala itong application for amnesty at hindi pag-amin ng kasalanan.

Lahat aniya ng mga amnesty na ipinagkaloob sa mga nag-alsa sa gobyerno ay bubusisiin din kung sumunod sa mga requirements.

Sinabi ni Roque na walang ibang sisihin si Trillanes kundi ang sarili dahil sa hindi pagtupad sa mga kinakailangang proseso at requirement ng amnesty.

Inihirit ni Albay 1st District Rep.  Edcel Lagman sa House Committee on Appropriations na tapyasan ang contigency fund ni Pangulong Rodrigo Duterte na ginagamit para sa mga foreign trip.

Ito’y sa gitna ng ulat na apatnaraang delegado umano ang bitbit ni Pangulong Duterte sa Israel bagay na itinanggi naman ng Malakanyang.

Ayon kay Lagman, lumobo na sa P13 billion ang contingency fund ng pangulo ngayong taon na dapat ay unti-unting tapyasan.

Masyado aniyang malaki ang nabanggit na pondo para sa mga hindi inaasahang pangyayari.

Agosto 29 nang aprubahan ng kumite panukalang six billion pesos budget ng Office of the President sa loob lamang ng sampung minuto nang walang kuwestyon mula sa mga miyembro.

Nakatakdang busisiin ng Commission on Human Rights (CHR) ang pagbawi ng Pangulong Rodrigo Duterte sa amnesty na ibinigay kay Senador Antonio Trillanes IV.

Ayon kay CHR Chairman Chito Gascon, interesado sila sa nasabing usapin at pag aaralan nila ang mga implikasyon dito.

Ang alam aniya nila ay bilang isang constitutional office mayruong mga requirements para mabigyan ng amnesty, may proseso at mga aspeto nito na naaayon sa konstitusyon.

Binigyang diin ni Gascon na hindi u ubrang bawiin ang amnesty kung naibigay na ito sa isang indibidwal.

Sinabi pa ni Gascon na kailangan ding dumaan sa pagbusisi ng kongreso ang ibinigay na amnesty at dumaan ito sa tamang proseso bago naipagkaloob kay Trillanes nuong panahon ng dating Pangulong Benigno “Noynoy” Aquino III.

Umalma ang kampo ng dating administrasyon sa pagbawi ng Pangulong Rodrigo Duterte sa amnesty na ibinigay kay Senador Antonio Trillanes IV.

Mismong ang dating Pangulong Benigno “Noynoy” Aquino III ang nagsabing valid ang ibinigay niyang amnesty kay Trillanes.

Tinukoy ng dating pangulo ang resolusyon mula sa ad hoc committee ng Department of National Defense (DND) na nag-a-apruba sa application for amnesty ng senador.

Sa isang post, inilabas ni Atty. Abigail Valte, dating spokesperson ng dating pangulo, ang video at larawan ng application nuon ni Trillanes para patunayang nakasunod ito sa requirements kayat nabigyan ng amnesty.

Ayon naman kay Vice President Leni Robredo, malinaw na ang nasabing hakbang ng pangulo ay bilang pagpapatahimik sa mga kumokontra sa administrasyon at isa rin aniyang taktika para mailihis ang atensyon ng taumbayan mula sa tunay na isyu ng bansa.

Binigyang diin ni dating Solicitor General Florin Hilbay na walang nakasaad sa konstitusyon na may kapangyarihan ang pangulo para ipawalang bisa ang nasabing amnesty na ibinigay ng dating Pangulong Aquino at pinagtibay ng Kongreso.

Tiniyak ng dating pangulo ang ayuda kay Trillanes at iba pang nasa kaparehong sitwasyon para igiit ang kanilang mga karapatan.

Tikom ang bibig ni Solicitor General (SolGen) Jose Calida kaugnay sa umano’y papel niya para bawiin ng Pangulong Rodrigo Duterte ang amnesty na ibinigay kay Senador Antonio Trillanes IV.

Binigyang diin ni Calida ang lawyer client privileged communication kaugnay sa naging partisipasyon niya sa usapin dahil abogado siya para sa bansa.

Una nang inihayag ni Department of Justice (DOJ) Secretary Menardo Guevarra, officer in charge (OIC) habang nasa Israel ang pangulo na ang review sa amnesty ni Trillanes ay posibleng ginawa ng Office of the Solicitor General (OSG).

Ang tila gusot sa pagitan nina Trillanes at Calida ay nag ugat sa imbestigasyon ng Senado hinggil sa umanoy conflict of interest na sangkot sa kontratang nakuha sa gobyerno ng security agency na pag-aari ng pamilya ni Calida.

Inihirit ng grupong Federation of Jeepney Operators and Drivers Association of the Philippines (FEJODAP) na maging P12 na ang minimum fare sa jeep.

Kasunod na rin ito ng patuloy na pagsipa ng presyo ng produktong petrolyo.

Ayon kay FEJODAP President Zenaida Maranan, napapanahon na para itaas ang singil sa pasahe upang makagapay ang mga dryaber at operator sa mataas na presyo ng diesel.

Aniya, ilang taon na ang nakalipas nang humirit sila sa Land Transportation Franchising and Regulatory Board (LTFRB) ng dalawang pisong dagdag sa minimum fare at pinagbigyan ito nuong hulyo sa pamamagitan ng provisional fare increase na dating walo ay ginawang siyam na piso.

Ang dati anilang hirit na P10 ay batay lamang sa presyuhan ng langis nuong mga nakalipas na taon habang ang dagdag na dalawang piso ay para naman ng presyuhan ng langis sa ngayon.

“Naibigay muli itong piso na ito nuong pa. Pero ngayon ayan inabutan nanaman tayo na halagang P11 na itinataas muli ng presyo ng krudo dapat ho magiging P12 na ang ating pamasahe.” Pahayag ni Maranan.

Hindi epektibo ang ‘pantawid pasada program’ ng gobyerno upang makaagapay ang mga drayber sa patuloy na pagtaas ng presyo ng mga produktong petrolyo.

Ayon kay FEJODAP President Zenaida Maranan, tanging ang mga operator lamang ang nakikinabang sa P5,000 ayuda ng gobyerno sa gasolina.

Sa halip, ayon kay Maranan ay bigyan na lamang sila ng diskwento para maramdaman ito ng pareho ng drayber at operator.

“kadalasan mag tanong ka sa mga tsuper ngayon tanong mo kung may natatanggap sila, walang natatanggap.” Ani maranan.

(Balitang Todong Lakas Interview)

Mariing binatikos ng NUPL o National Union of People’s Lawyers ang ginawang pagbawi sa amnesty at pag papaaresto ni Pangulong Rodrigo Duterte kay Senador Antonio Trillanes.

Ayon kay NUPL Secretary General Edre Olalia, malinaw ang mensahe ng pangulo sa mga kritiko nito na sumunod o umalis na lamang upang maiwasan ang anumang panggigipit ng pamahalaang Duterte.

Masaklap aniya ang ginagawa ng pangulo na binabago ang batas para maisulong lamang ang kanyang political agenda.

Binanggit ni Olalia ang mga nakaranas na ng panggigipit sa pangulo tulad nina Senadora Leila De Lima, Dating Chief Justice Maria Lourdes Sereno, Sister Patricia Fox at ngayon si Trillanes naman.

Kaya naman ang tanong ni Olalia ay sino kaya ang isusunod ng administrasyong Duterte.