HOT STORIES OF THE WEEK

Tiniyak ng economic managers ni Pangulong Rodrigo Duterte na kumikilos sila upang solusyunan ang patuloy na pagsipa ng inflation.

Sa harap ito ng mga panawagang sibakin na ang economic managers ng pangulo matapos na pumalo sa 6.4 percent ang inflation rate nuong Agosto na siyang pinakamataas sa loob ng siyam na taon.

Ayon kay Finance Assistant Secretary Tony Lambino, inaasahan na nilang sisipa ang inflation ngayong third quarter ng taon ngunit inaasahan namang bababa simula sa huling bahagi ng 2018.

“The economic team is working very hard. Kasama po yung ibang mga ahensya hindi lang po yung economic cluster para talagang makapag-rollout po kaagad ng ating mga agriculture initiatives itong solusyon po natin sa pagtaas ng presyo ng pagkain.” Pahayag ni Lambino.

Sinabi ni Lambino na malaking bahagi ng mabilis na inflation ay dulot ng pagtaas ng presyo ng mga pagkain.

“Ang nakita po natin sa datos ay malaki po ang pagtaas sa food inflation. Particularly meat, rice, fish atsaka vegetables ayan po yung commodity groups na nag drive doon sa food inflation. Yung non-food actually nag slow down ang inflation talagang sa agrikultura po ang mga solusyon na kailanganh natin ipatupad kaagad.” Ani Lambino.

Dahil sa kaliwat kanang pagtaas ng presyo ng mga bilihin, umapela ang pamahalaan sa publiko na sabayan ng pagtitipid ang mga ginagawa nilang hakbang para solusyunan ang problem sa inflation.

“Kasama po ang konting pagtipid, kasama din ang mga measures na nabanggit ko kanina sa agrikultura. Yung food inflation ulitin ko po diyan po talaga sumipa ang mga presyo kailangan po diyan din po tayo maghanap ng mga solusyon.” Dagdag ni Lambino.

Binantaan ni Senador Antonio Trillanes IV ang lahat ng nasa likod ng panggigipit sa kanya ngayon.

Tinitiyak ng senador na hindi niya palalagpasin at kanyang hahabulin ang lahat ng mga opisyal na nagpapagamit aniya sa mga kagustuhan ni Pangulong Rodrigo Duterte para siya ay harasin at pilit na gumagawa ng mga paraan para siya ay makulong.

Samantala, nagbigay din ng mensahe si Trillanes sa mga opisyal ng Armed Forces of the Philippines.

“Huwag na kayong sumawsaw dito pulitika ito, ginagamit lang kayo ngayon ‘yung magpapagamit, ‘yung mga abogadong magsasalita diyan, ako talaga hahabulin ko ang mga ito.” Pahayg ni Senador Trillanes

Trillanes: Sinasabi nila ang basehan ng revocation ay hindi ako nag-file personally sa DND and second is hindi raw ako nag-admit ng guilt. Babasagin natin ‘yan ngayon.

— DWIZ Newscenter (@dwiz882) September 6, 2018

---

 

Second night at the Senate

Samantala, nakapagpahinga naman si Senador Antonio Trillanes sa ikalawang gabi niyang pananatili sa Senado.

Ayon ito sa isang miyembro ng Magdalo taliwas sa unang gabi ni Trillanes sa Mataas na Kapulungan.

Nanatili naman sa labas ng tanggapan ni Trillanes ang ilang supporter niya at ilang miyembro ng media.

Samantala, wala namang miyembro ng PNP-CIDG sa area at tanging mga tauhan na lamang ng Office of the Senate Sergeant at Arms ang nasa labas ng Senado.—Judith Larino 

—-

Ibinabala ni Bayan Muna Representative Carlos Isagani Zarate na lalo pang tataas ang inflation rate sa hinaharap.

Ito ay matapos na pumalo sa 6.4 percent ang inflation noong Agosto.

Iginiit ni Zarate na dapat isisi kay Pangulong Rodrigo Duterte at economic managers nito ang patuloy na pagtaas ng mga bilihin.

Gayunman, hindi pa aniya matatapos ang pasakit na nararanasan ng publiko dahil sa susunod na taon ay dodoble pa ang itataas ng presyo ng mga bilihin kapag hindi naibasura ang TRAIN 1 at 2.

Kaugnay nito, nanawagan si zarate sa pamahalaan na isantabi muna ang pamumulitika at pang ha harass sa oposisyon at pagtuunan ng pansin kung paano maibaba ang presyo ng mga bilihin.

Ilang senador naalarma sa pagtaas ng inflation rate

Nagpahayag din ng pagkaalarma ang ilang senador sa muling pagtaas ng inflation rate na umabot sa 6.4 percent para sa buwan ng Agosto.

Ayon kay Senador Sherwin Gatchalian, chairman ng Senate Committee on Economic Affairs, sapul ng pagtaas ng inflation ang pinakamahihirap sa bansa.

Aniya, dapat kumilos na ang Malakanyang sa pamamagitan ng pagbuo ng counter inflation task force para gumawa ng paraan para mapahupa ang inflation rate.

Samantala, naniniwala naman si Senador Bam Aquino na ang tanging paraan para bumama ang inflation ay pagsuspinde sa excise tax sa ipinapataw sa mga produktong petrolyo sa ilalim ng TRAIN law.

—-

Itinakda na ng Commission on Elections (COMELEC) ang plebesito na magdedesisyon sa magiging kapalaran ng Bangsamoro Organic Law (BOL).

Ayon kay COMELEC Spokesman James Jimenez, ang plebiscite period ay mula Disyembre 2, 2018 hanggang Pebrero 5, 2019.

Maari naman mangampanya para sa magiging plebesito mula Disyembre 7, 2018 hanggang Enero 19, 2019.

Nakatakda naman na magsagawa ng special voters’ registration ang COMELEC sa Bangsamoro core territories sa Setyembre 11 hanggang 13 ngayong taon.

—-

Higit $83 milyon ang halaga ng investment na nakuha ni Pangulong Rodrigo Duterte sa kanyang pagbisita sa Israel.

Ayon kay Trade Secretary Ramon Lopez, higit 20 pribadong kumpanya ang nakipagkasundo at nagkaloob ng letter of intent na mamuhunan sa bansa.

Handa ang mga kumpanya mula sa Israel na mamuhunan sa iba’t ibang industriya sa bansa tulad ng agriculture, military, hardware, information technology, infrastructure, software systems, tourism at health.

Ipinagmalaki ni Lopez na ang naturang mga investment ay posibleng makalikha ng halos 800 mga trabaho sa bansa.

Pagpapakita aniya ito na malaki ang kumpyansa ng mga Israeli investor sa papalagong ekonomiya ng Pilipinas.

Dinepensahan ng Philippine National Police (PNP) ang presensya ng mga tauhan ng Criminal Investigation and Detection Group (CIDG) sa Senado.

Ito’y kasunod ng pananatili ni Senador Antonio Trillanes IV sa Senado matapos bawiin ni Pangulong Rodrigo Duterte ang kaniyang amnesty.

Ayon kay PNP Spokesman Senior Supt. Benigno Durana, nasa Senado ang ilang tauhan ng CIDG para magbigay ng alalay sa kanilang counterpart sa Armed Forces of the Philippines (AFP) sakaling arestuhin na si Trillanes.

Ngunit dahil wala pa aniyang warrant of arrest laban sa senador kaya sila ay nakaantabay lamang umano.

Tiniyak din ni Durana, na susunod ang mga pulis kung hindi rin naman maglalabas ang korte ng arrest warrant laban kay Trillanes.

Maghihigpit na ang Senado sa mga pulis at sundalong nais pumasok sa Senado.

Ito ayon kay Senate President Vicente “Tito” Sotto III matapos dumagsa ang mga armadong pulis at sundalo na naatasang umaresto kay Senador Antonio Trillanes IV.

Sinabi ni Sotto na ayaw na niyang maulit ang naturang kaganapan kaya kailangan muna aniyang magpaalam ng mga sa senate sergeant of arms bago ito makapasok sa Senate compound.

Bagama’t nilinaw ng pinuno ng Senado na walang problema sa presensya ng mga pulis at sundalo dahil dagdag pa aniyang seguridad ito, nais lamang umano niya ng kaayusan.

Pumalo sa 6.4 percent ang inflation o bilis ng pagtaas ng presyo ng mga bilihin at serbisyo nitong Agosto.

Ito na ang pinakamabilis na inflation rate na naitala sa loob ng sampung taon.

Malaki ang itinaas nito kumpara sa 5.7 percent na inflation noong Hulyo.

Nalagpasan din nito ang 5.9 percent na pagtaya ng Department of Finance na posibleng inflation rate ng Agosto.

Matatandaang naitala ang pinakamabilis na inflation noong March 2009 na nasa 6.6 percent.

—-

Bumaba ang bilang ng mga walang trabaho sa bansa nitong Hulyo.

Batay sa Labor Force Survey ng Philippine Statistics Authority o PSA , naitala ang 5.4 na unemployment rate nitong Hulyo na mas mababa kumpara sa 5.6 percent na bilang ng mga walang trabaho sa kaparehong period noong nakaraang taon.

Sa kabila nito, tumaas naman ang underemployment ang mga manggagawang naghahanap ng dagdag na oras sa pagtatrabaho o mismong dagdag na trabaho para madagdagan din ang kanilang kita.

Mula 16.3 na underemployment noong Hulyo ng nakaraang taon, umakyat sa 17.2 percent ang underemployment nitong Hulyo.

Ayon kay Ateneo Graduate School of Business Professor Wilfrido Arcilla, nakakabaha ang pagtaas ng underemployment sa bansa.

Nangangahulugan aniya ito na marami sa mga kasalukuyang empleyado ang naghahanap pa ibang trabaho para ibsan ang patuloy na pagtaas ng presyo ng mga bilihin at serbisyo.

—-

Agad na aarestuhin ng pulisya si Senador Antonio Trillanes IV oras na magpalabas na ng warrant of arrest ang Makati Regional Trial Court (RTC).

Ito ang inihayag ni Department of Interior and Local Government (DILG) Spokesperson Jonathan Malaya alinsunod na rin aniya sa Proclamation No. 572 ni Pangulong Rodrigo Duterte kung saan inatasan nito ang Philippine National Police (PNP) at Armed Forces of the Philippines (AFP) na arestuhin ang senador.

Ayon kay Malaya, nakikipag-ugnayan na sila sa Department of Justice (DOJ) kaugnay ng inihirit na alias warrant ng DOJ sa Makati RTC.

Binigyang diin din ni Malaya na kinakailangan din nilang sundin ang kautusan ng pangulo sa DOJ at AFP na ipagtuloy ang lahat ng kasong kriminal at administratibo laban kay Trillanes.

Paligid ng Senate building guwardyado pa rin mga sundalo at pulis

Nananatili sa loob ng Senate building sa Pasay City si Senador Antonio Trillanes IV matapos ilabas ang arrest order o bawiin ni Pangulong Rodrigo Duterte ang amnesty na iginawad sa mambabatas.

Simula kagabi ay nagtipon sa labas ng Senado ang mga supporter ni Trillanes subalit karamihan ay nag-uwian kaninang madaling araw habang nagpakita rin ng suporta ang mga kasamahan tulad ni Magdalo Party-list Representative Gary Alejano.

Bagaman nasa paligid lamang ng Senate building ang ilang sundalo at pulis sa pangunguna ng mga tauhan ng PNP-CIDG, hindi pa agad maaaresto si Trillanes.

Ito’y dahil tinanggihan ni Makati Regional Trial Court Judge Andres Soriano sa mosyon ng Department of Justice o DOJ na mag-issue ng alias warrant of arrest at hold departure order laban sa senador.

Hindi naman matiyak ni Soriano kung kailan siya makapaglalabas ng arrest warrant laban kay Trillanes na nasa kustodiya pa rin ng Senado.—Drew Nacino

 (Ulat ni Gilbert Perdez)