HOT STORIES OF THE WEEK

Tiniyak ni Senador Antonio Trillanes IV na hindi siya manlalaban sakaling siya ay arestuhin ng mga otoridad.

Ayon kay Trillanes, ito ay kung masisigurong legal ang gagawing pag-aresto sakaniya at dumaan sa protocol ng Senado.

Paliwanag pa ng senador, ayaw niyang may masaktan o magkagulo pa kapag siya ay ipinag-utos nang dakpin.

Handa na rin umano siya sa kung ano pang posibleng mangyari sa kaniya.

Dagdag pa ni Trillanes, maging ang kaniyang pamilya ay nakahanda na rin sa sakaling bumalik siya sa bilangguan.

Magugunitang nakulong na nuon si Trillanes bunsod ng kudeta laban sa administrasyon ni dating Pangulo at ngayo’y House Speaker Gloria Macapagal-Arroyo.

Bumagsak ang kumpiyansa ng mga Pilipino sa ekonomiya ng bansa sa ikatlong bahagi ng taon.

Batay sa consumer index, sumadsad sa negative 7.1 percent ang consumer confidence ng mga Pilipino sa ekonomiya ng bansa mula sa 3.8 percent nuong ikalawang bahagi ng 2018.

Ayon sa Bangko Sentral ng Pilipinas (BSP), ito ang unang pagkakataon na muling nag negatibo ang kumpiyansa ng mga Pilipino sa ekonomiya mula nuong kalawang bahagi ng 2016.

Ipinaliwanag ni BSP Department of Economics Statistics Head Redentor Paolo Alegre Jr., na mas dumami ang nawalan ng kumpiyansa o tiwala sa ekonomiya ng bansa sa ikatlong quarter ng 2018 dahil sa patuloy na pagtaas ng presyo ng mga bilihin mababang pasahod sa mga manggagawa mataas na gastusin sa bahay walang karagdagang kita at mataas na bilang ng mga Pilipinong walang trabaho.

Sa kabila nito, tiniyak ni BSP Deputy Governor Diwa Guinigundo na ginagawa ng pamahalaan ang lahat para masigurong maibabalik ang inflation rate sa target ng pamahalaan na 2 hanggang 4 percent pagsapit ng 2019 at pigilan ang tuloy-tuloy na pagbulusok ng piso.

Nanindigan si Pangulong Rodrigo Duterte na nararapat lamang na makulong si Senadora Leila De Lima.

Sa pagharap ng pangulo sa Filipino community sa Jordan, iginiit nito na ang pagkakasangkot ni De Lima sa ilegal na droga at hindi dahil sa pulitika ang dahilan ng pagkakakulong ng senadora.

Dahil dito hindi aniya maituturing na “prisoner of conscience” si De Lima.

Matatandaang Pebrero ng nakaraang taon nang madetine sa Philippine National Police (PNP) Custodial Center si De Lima dahil sa umanoy naging pakinabang nito sa operasyon ng iligal na droga sa New Bilibid Prison.

Pumalag ang Malakanyang sa biro ng isang pari laban kay Pangulong Rodrigo Duterte.

Ito ay matapos sabihin ni Father Noel Gatchalian sa misa sa Senado para kay Senador Antonio Trillanes IV na sana ay magkasakit ang pangulo upang makapagpahinga na ito.

Ayon kay Presidential Spokesperson Harry Roque, hindi gawain ng isang kristiyano ang magdasal na magkasakit ang isang tao.

Nakakahiya aniya ang ginawa ni Father Noel kaya’t nararapat lang na magbitiw na ito sa pagkapari.

Isinisi ni Pangulong Rodrigo Duterte kay US President Donald Trump ang pagsipa ng inflation sa Pilipinas.

Sa kanyang pagharap sa Filipino community sa Jordan, sinabi ng pangulo na bahagi ng inflation na nararanasan sa bansa ay epekto aniya ng mga polisiyang ipinatutupad ng pangulo ng Amerika.

Matatandaang nitong Agosto, pumalo sa 6.4 percent ang inflation rate na pinakamataas sa loob ng siyam (9) na taon.

“Inflation is dahil yan kay Trump when he raised yung mga tariff and banned other items.” Pahayag ni Duterte.

Samantala, tiniyak rin ng pangulo na kumikilos ang pamahalaan para ibsan ang patuloy na pagtaas ng presyo ng mga bilihin at serbisyo.

“I am not apologizing. There is really inflation in the Philippines and we are trying to control it.” Ani Duterte.

Kumpiyansa si Senador Antonio Trillanes IV na hindi siya aarestuhin ng mga tauhan ng Criminal Investigation and Detection Group (CIDG) gayundin at ng military police.

Ito ang reaksyon ni Trillanes makaraang umugong ang balitang sasamantalahin umano ng mga pulis at sundalo ang kawalan ng sesyon mula ngayong araw hanggang sa linggo para siya’y dakpin.

Batay sa impormasyong nakarating sa DWIZ, pinulong umano ni Solicitor General (SolGen) Jose Calida ang mga pulis mula sa CIDG at mga sundalo para ikasa umano ang pag-aresto sa mambabatas.

Giit naman ni Trillanes, umaasa siyang tatalima ang mga pulis at sundalo sa napagkasunduan nila ng liderato ng Senado na walang mangyayaring pag-aresto.

Hindi ibibigay si Trillanes sa kustodiya ng otoridad

Nanindigan si Senate President Vicente “Tito” Sotto III na hindi nila ibibigay sa kostudiya ng mga pulis at militar si Senador Antonio Trillanes IV.

Iyan ang ipinabatid ni Sotto kasunod ng umugong na balitang aarestuhin anumang oras mula ngayon ng mga tauhan ng Criminal Investigation and Detection Group (CIDG) at ng military police ang senador.

Ayon kay Sotto, hindi niya papayagang makapasok sa paligid ng Senado ang mga sundalo kahit ito’y may basbas pa mula sa Malakanyang.

Una nang nagpaabot ng mensahe si Sotto sa Malakanyang na hindi kumikilala sa inilabas na kautusan ni Pangulong Rodrigo Duterte na nagpapa-aresto kay Trillanes.

Nagpahayag ng suporta si Vice President Leni Robredo kay Senador Antonio Trillanes IV.

Sa pagbisita ni Robredo kay Trillanes, sinabi niya umano sa senador ang pakikiisa nito sa kaniyang laban.

Naniniwala aniya ang pangalawang pangulo na mali ang ginagawa ng administrasyon kay Trillanes.

Giit pa ni Robredo, ginagamit na ang kapangyarihan ng kasalukuyang administrasyon para patahimikin ang oposisyon o kung sinuman ang kumakalaban sa kanila.

Dahil dito, bagama’t hindi umano sila magkapartido ni Trillanes ay kaisa nito siya sa kaniyang ipinaglalaban.

Si Robredo ay kabilang sa Liberal Party habang si Trillanes naman ay miyembro ng Nacionalista Party.

VP Robredo on the situation of Sen. Trillanes: Mali ang paraan na ito. Dapat sana pinagtutulungan natin kung paano maharap ang kahirapan na pinagdadaanan natin, hindi ‘yung aasikasuhin ang pulitika

— DWIZ Newscenter (@dwiz882) September 6, 2018

Dinepensahan ng Malakanyang ang umano’y pag-ungkat ni Solicitor General (SolGen) Jose Calida sa record ng amnesty grant at mga kaso ni Senador Antonio Trillanes IV.

Ayon kay Presidential Spokesperson Harry Roque, walang nakakitang mali rito ang Malakanyang dahil ginawa lamang ni Calida ang kaniyang trabaho.

Sinabi ni Roque na may karapatan si Calida na busisiin ang mga naging kaso ni Trillanes kahit wala itong kautasan mula sa Malakanyang.

Una nang sinabi ng Defense Department na si Calida ang nakipag ugnayan sa kanila upang alamin ang estado ng amnestia ni trillanes kung saan natuklasan na walang makitang record ng aplikasyon ng senador.

Ito ang nagbunsod kay Pangulong Rodrigo Duterte na maglabas ng Proclamation No. 572 na nagpapawalang bisa sa amnesty grant ng senador.