HOT STORIES OF THE WEEK

Mariing itinanggi ng National Economic and Development Authority o NEDA ang mga alegasyong minamanipula ng gobyerno ang datos ukol sa August 2018 inflation rate.

Ayon kasi sa ilang mga ekonomista, pumalo sa 6.6 percent ang inflation noong nakaraang buwan ngunit mas mababa anila ang ibinabang figure ng gobyerno.

Gayunman, iginiit ni Socio-economic Planning Secretary Ernesto Pernia, na hindi nila minamanipula ang mga datos at wala aniya silang anumang itinatago.

Ipinaliwanag ng opisyal na anumang preliminary figures ay maaari pang mabago.

Inihalimbawa ni Pernia ang GDP report noong 2016 kung saan naitala ang 6.8 percent na kalaunan ay itinaas din sa 6.9 percent habang lumago naman ang ekonomiya ng bansa ngayong taon sa 6.6 percent na binago rin sa huli nang hanggang 6.4 percent.

—-

Tiwala si Magdalo Partylist Rep. Gary Alejano na pinapahamak lamang ni Solicitor General Jose Calida si Pangulong Rodrigo Duterte.

Ito’y makaraang irekumenda ni Calida sa pangulo na ipawalang bisa ang iginawad na amnesty ng nakalipas na administrasyon kay Senador Antonio Trillanes IV.

Ayon kay Alejano, napakaraming butas ang inilabas na Executive Order 572 ng pangulo na aniya’y isang malinaw na pamumuntirya lamang sa mga kalaban ng estado.

Dahil dito, ipinanawagan ni Alejano kay Pangulong Duterte na dapat nang sibakin nito si Calida dahil sa hindi na nito binibigyan ng magandang reputasyon at dignidad ang tanggapan ng pangulo.

Walang nakikitang ligal na batayan si dating afp chief of staff at dating mambabatas na si Rodolfo Biazon sa pagpapawalang bisa ni Pangulong Rodrigo Duterte sa amnesty kay Senador Antonio Trillanes IV.

Ayon kay Biazon, kung sa tingin ng pangulo na mali ang paggagawad ng amesty kay Trillanes, posibleng mali rin ang iginawad na amnesty kina Dating B/Gen. Danilo Lim, Dating Capt. Nicanor Faeldon, Gerardo Gambala, Gary Alejano at Milo Maestrecampo.

Dahil dito, sinabi ni Biazon nagbukas lang umano si Pangulong Rodrigo Duterte ng pagdududa hinggil sa kredibilidad ng mga institusyon sa pamahalaan.

Sa huli, nanindigan si Biazon na dumaan sa tamang proseso ang pagbibigay ng amnestiya kay Trillanes dahil ito’y may basbas o concurrence na nagmula sa dalawang kapulungan ng kongreso at inaprubahan ng pangulo na siyang commander – in – chief.

Nilinaw ng pamunuan ng Philippine National Police o PNP na buo ang suporta ng kanilang hanay kay Pangulong Rodrigo Duterte.

Sa panayam ng DWIZ, sinabi ni PNP Chief Director General Oscar Albayalde na walang katotohanan na mayroong mga ‘disgruntled’ o dismayadong police officers.

Huwag po tayong maniwala diyan, walang katotohanan iyan as far as the PNP is concerned, although I can’t speak in behalf of the AFP. Paliwanag ni Albayalde

Ang pahayag ay ginawa ni Albayalde sa gitna ng isyu ng pagbawi ni Pangulong Duterte sa amnestiya ni Sen. Antonio Trillanes.

Una nang tinawag na guni-guni ng Palasyo ang pahayag ni Trillanes na naghihintay lamang ang mga kakilala niyang aktibo sa militar ng sentimiyento ng taumbayan para magpasimula ng panibagong rebolusyon.

Ipinangako ni Pangulong Rodrigo Duterte sa mga negosyante sa bansang Jordan na hindi sila mahihirapan sakaling maglagak sila ng negosyo sa Pilipinas.

Sa ginanap na intercontinental forum sa Amman, Jordan, siniguro ng pangulo sa mga dayuhang mamumuhunan na wala silang mararanasang kurapsyon at katiwalian habang siya ang nakaupong pangulo ng bansa.

I tell you now, I give you my solemn commitment that if you go there, it will be business with ease. I will guarantee you the return [on investment]. There will be no corruption. And if you ask anything, even a toothpick, I will guarantee you, you can have my audience any time of the day…or night. Pahayag ni Pangulong Duterte

Muli namang hinimok ng chief executive ang mga dayuhang mamumuhunan na agad ipaalam sa kanya sakaling may ma-encounter silang anumalya o katiwalian.

Dagdag ng pangulo, mapayapang bansa ang Pilipinas at napakarami rin aniyang lugar dito ang maaring mapagtayuan ng negosyo.

Ikinakasa na ang panibagong kasong isasampa laban kay Sen. Antonio Trillanes IV.

Ayon kay Labor Undersecretary Jacinto Paras, sa susunod na linggo na nila isusumite sa korte ang kasong inciting to sedition o inciting to coup d’etat laban sa naturang mambabatas.

Kasunod ito ng napipintong pag-aresto kay Trillanes matapos na ipawalang-bisa ni Pangulong Rodrigo Duterte ang kanyang amnesty.

Nag-ugat aniya ang panibagong kaso ng senador sa kanyang mga pahayag sa media na hinihikayat ang mga sundalo na mag-aklas laban sa gobyerno, at ang pagtawag nito sa pangulo na ‘insane’ o wala sa tamang pag-iisip.

Bilang isa aniyang Pilipino na nanunungkulan sa bayan, kailangan niyang manindigan laban sa isang tao na binabastos ang gobyerno at ang punong ehekutibo.

Balik bansa na si Pangulong Rodrigo Duterte matapos ang halos isang linggong pagbisita sa Israel at Jordan.

Sa kanyang pagdating sa Davao City, ipinagmalaki ni Pangulong Rodrigo Duterte ang mga accomplishment sa pagbisita sa mga nasabing bansa. Kabilang dito aniya ang mga programang magbibigay ng trabaho sa maraming Pilipino.

The government will continue to do its part to ensure that the rights of our nationals working abroad are protected. We also conducted a government to government and business to business sector agreements. Investments generated our value at over 140 million dollars and expected to generate over 1,200 new jobs.

Nagpasalamat din ang Pangulo sa mga gobyerno ng Israel at Jordan sa nasabing makasaysayang pagbisita niya.

Allow me again to express my gratitude to the government of Israel and Jordan. We assure you that the Philippines is indeed a friend to all and an enemy to no one.

Calida, itinurong nasa likod ng pagbawi ng amnesty ni Trillanes

Samantala, itinuro ni Pangulong Rodrigo Duterte si Solicitor General Jose Calida na nasa likod nang ipinalabas niyang proklamasyon para bawiin ang amnesty ni Senador Antonio Trillanes.

Binigyang diin ng Pangulo na hindi niya matatanggihan kung anuman ang irekomenda ni Calida bilang government agency hindi lamang sa kaso ni Trillanes kundi maging sa usapin sa pagpapatalsik kay dating Supreme Court Chief Justice Maria Lourdes Sereno.

‘Yung kay Trillanes, ang totoo niyan ang nagresearch ay si Calida. Kapag sinabi ng SolGen na may mali and this has to be corrected, I cannot refuse. He is the government lawyer. I cannot insist on the view of fact that it was already recorded as a public document. So kung ano ang sinabi niya roon, ‘yun ang paniwalaan ko. In the matter of granting pardon, it’s a Constitutional mandate of the president. It cannot be delegated to anybody else.

Gayunman, muling pinanindigan ng Pangulo na tatalima ito sa magiging desisyon ng Korte Suprema hinggil sa kaso ng opposition senator.

If the Supreme Court will say that my declaration is null and void then let it fall.  I’m just sticking to what is right and constitutional.

Kinuwestiyon din ni Pangulong Duterte ang naging ambag ni Trillanes para sa kapakanan ng kasundaluhan sa bansa, tulad ng pagpapataas ng suweldo ng militar.

I hope that it would not go to this far. It was Trillanes pretending a crusading soldier but as a matter of fact wala rin naman silang ginawa. Andiyan si Trillanes, nagkaroon ba ng increase sa suweldo sa militar? Itong si Trillanes, sundalo. Ako nagkampanya sa mga sundalo, I will double your salary. Ginawa ko talaga ‘yan.

Kampo ni Trillanes, iginiit na dapat sibakin na ng Pangulo si Calida

Nananawagan si Atty. Reynaldo Robles, legal counsel ni Sen. Trillanes kay Pangulong Duterte na sibakin si Solicitor General Jose Calida dahil sa maling impormasyon na ibinigay nito hinggil sa amnestiya ng senador.

Sa panayam ng DWIZ, sinabi ni Robles na tila ‘isinubo’ ng Solicitor General ang Punong Ehekutibo sa ginawa nitong pagsasaliksik na pawang kasinungalingan lamang at walang basehan.

Siguro dapat sibakin na ng Pangulo itong si SolGen Calida dahil hindi totoo ang mga akusasyon nito. Apparently, isinubo ni Calida si Pres. Duterte na pirmahan ang dokumento na puro kasinungalingan ang laman.

Sa huli, sinabi ni Robles na ang batas pa rin ang mananaig at pinanindigan na hindi puwedeng arestuhin basta-basta ang senador.

Balak ng admin na illegally arestuhin si Trillanes. Hindi po puwede ‘yan, ang mananaig ay ang batas. Delikado kasi si Sen. Trillanes ay isang sitting senator. Meron itong impact sa rule of law.

Kampante ang Malakanyang na hindi mag-aaklas ang mga sundalo laban kay Pangulong Rodrigo Duterte.

Ito ay sa harap ng pahayag ni Senador Antonio Trillanes IV na naghihintay lamang ang mga kakilala niyang aktibo sa militar sa sentimiyento ng taumbayan para magpasimula ng panibagong EDSA revolution.

Ayon kay Presidential Spokesperson Harry Roque, guni-guni lamang ni Trillanes ang palagay nitong may sasama sa kanyang mag-aklas laban sa pangulo.

Naniniwala si Roque na mas bibigyang bigat ng mga sundalo ang pagmamalasakit ng pangulo para sa Armed Forces of the Philippines (AFP) kaysa aniya kay Trillanes na wala naman aniyang nagawa para kapakanan ng mga sundalo.

Samantala, sinabi ni Roque na wala silang balak patulan ang hamon ni Trillanes na ipaaresto siya sa live camera.

Walang dahilan para mag-panic.

Ito ang reaksyon ng Malakanyang sa pagsipa ng inflation sa 6.4 percent para sa buwan ng Agosto.

Ayon kay Presidential Spokesperson Harry Roque, normal lamang ito at walang dapat ikabahala ang ating mga kababayan.

“Itong 6.4 hindi po ito unprecedented in our history. We had inflation rate of 70 percent during GMA’s time it was double digit. And during her time, it was only eight years ago, so it’s not the reason to have any sort of panic.” Pahayag ni Roque.

Kasabay nito, tiniyak ng Malakanyang na ginagawa ng pamahalaan ang lahat upang tugunan ang inflation.

Kabilang nga sa mga aksyon ng pamahalaan ay ang pag-aangkat ng produkto.

“It’s not that we are ignoring it we are addressing it. Kaya lang hindi naman overnight yung resulta ng mga anti-inflationary measures na ginagawa ng gobyerno.” Ani Roque.

Samantala, inaasahan naman na ng Malakanyang na sasamantalahin ng mga taga oposisyon ang isyu ng inflation para atakihin ang administrasyon.

“It was a given because they’re doing it now that’s what Vice president Robredo said. So ouf course they will take advantage of this.” Dagdag ni Roque.

Bahagyang bumaba ang bilang ng Pilipinong nagtitiwala kay Pangulong Rodrigo Duterte.

Batay sa pinakahuling survey ng Social Weather Stations (SWS), 70 porsyento ng mga Pilipino ang nagtitiwala kay Pangulong Duterte. 13 porsyento ang wala masyadong tiwala habang 16 na porsyento ang undecided.

Dahil dito, nakapagtala ang pangulo ng 57 percent na net trust rating na mas mababa ng walong (8) porsyento kumpara sa 65 net trust score nito nuong Marso.

Ang naturang survey ay isinagawa sa may 1,200 respondents bago pa man pumutok ang isyu ukol sa biunukbok na tone-toneladang bigas na inangkat ng pamahalaan at pagsipa ng inflation rate sa 6.4 percent.