HOT STORIES OF THE WEEK

Pinangalanan na ng Partido Demokratiko ng Pilipinas-Lakas ng Bayan o PDP-Laban ang mga personalidad na posibleng mapabilang sa kanilang senatorial lineup para sa may 2019 midterm elections.

Inianunsyo ito sa assembly ng PDP-Laban sa Pasay City na dinaluhan ni Pangulong Rodrigo Duterte na chairman ng partido.

Kinumpirma ni PDP-Laban President at Senador Aquilino “Koko” Pimentel III, na bukod sa kanya ay kabilang sa initial list sina Special Assistant to the President (SAP) Christopher “Bong” Go, Presidential Spokesman Harry Roque; Davao City Representative Karlo Nograles, Makati City Representative Monsour Del Rosario, Quirino Representative Dakila Cua, Maguindanao Representative Zajid Mangudadatu; dating MMDA Chairman at ngayo’y Presidential Political Adviser Francis Tolentino.

Bagaman apat (4) na slots na lamang ang natitira at wala pang katiyakan kung mapapabilang din sa lineup, tiniyak ni Pimentel ang endorsement ng kanilang partido sa mga reelectionist senator na sina Sonny Angara, Nancy Binay, JV Ejercito, Grace Poe at Cynthia Villar.

—-

Isang press conference ang ipapatawag ng Pangulong Rodrigo Duterte mamayang alas tres ng hapon.

Ipinabatid ito ni Presidential Spokesman Harry Roque bagamat hindi tinukoy kung anong partikular na paksa ang ihahayag ng pangulo.

Matapos ang press conference, inihayag ni Roque na magpapatawag ng pangulo ng cabinet meeting sa Malakanyang.

Ikinukunsidera na ni Pangulong Rodrigo Duterte ang pagtatalaga ng full-time official sa Bureau of Customs (BOC) na mangangasiwa sa issuance ng import permits upang mapadali ang proseso ng pag-aangkat ng bigas.

Ito, ayon kay Presidential Spokesman Harry Roque, ang nakikitang solusyon ni Pangulong Duterte sa sinasabing rice crisis.

Isa aniya sa mga rason nang pagkaantala ng delivery ng imports ang kawalan ng mga opisyal na pipirma sa tambak na permit.

Bagaman hindi na idinetalye ni Roque kung sino ang nais italaga ni Pangulong Duterte na mangangasiwa sa issuance of permits, posibleng magmula mismo ito sa BOC.

—-

Limitado pa rin sa dalawang (2) kilo kada customer ang bentahan ng National Food Authority (NFA) rice sa ilang pamihilihan dahil sa kakapusan ng supply.

Sa Pritil Market sa Tondo, Maynila at Balintawak Market sa Quezon City, aminado ang ilang NFA retailer na hindi sila maaaring magbenta ng hanggang limang kilo P27 hanggang P32 na bigas.

Sa Legazpi City, Albay naman, walang magawa ang mga customer kundi bumili ng “binukbok” na bigas dahil P50 na ang kada kilo ng NFA rice.

Tumaas naman ng limang piso ang presyo ng kada kilo ng commercial rice sa ilang palengke sa Novaliches, Quezon City.

Samantala, P48 naman ang presyo ng kada kilo ng bigas ng NFA sa Zamboanga City mula sa dating P60.

Lusot na sa Kamara ang second package ng Tax Reform for Acceleration and Inclusion (TRAIN) law sa gitna ng patuloy na pagtaas ng presyo ng mga bilihin.

Sa botong 187-14 at 3 abstenstion, inaprubahan ng Kamara sa ikalawa at huling pagbasa ang House Bill 8083 o Tax Reform for Attracting Better and High-quality Opportunities (TRABAHO) bill.

Kabilang sa mga tumutol nina represantatives Miro Quimbo ng 2nd District of Marikina; Edcel Lagman ng 1st district of Albay; Gary Alejano ng Magdalo Party-list at Carlos Isagani Zarate ng Bayan Muna Party-list.

Layunin ng bill na makahikayat ng investments sa pamamagitan ng pagpapaba sa corporate income tax rate sa 20 mula sa 30 percent at i-modernize ang investment tax incentives upang mas maging patas at competitive.

Tinitiyak din sa panukalang ini-akda ni Quirino Lone District Rep. Dakila Cua, chairman ng House Committee on Ways and Means, karagdagang trabaho at pinaghusay na teknolohiya.

Japanese investors at businessmen nababahala sa TRAIN 2

Ikinabahala ng mga Japanese investor at businessmen ang paglusot sa Kamara ng second package ng Tax Reform for Acceleration and Inclusion (TRAIN) law 2.

Ayon kay Japanese Chamber of Commerce and Industry in the Philippines (JCCIP) Vice President Nobuo Fujii, maaaring ikalugi o magsara ang mga negosyong pag-aari ng mga Hapones sa Pilipinas.

Ito, aniya, ay kung aalisin ng gobyerno ang tax concessions o fiscal incentives ng mga Japanese company.

Nangangamba rin si Fujii na patawan ng karagdagang buwis ang mga nabanggit na kumpanya na nag-o-operate sa loob ng mga special economic zone sa kabila ng exemption sa 12 percent tax.

Kalahati ng halos 700 miyembro ng JCCIP ay matatagpuan sa mga special economic zone partikular sa Subic Freeport Zone at mga industrial park sa mga lalawigan ng Pangasinan at Batangas.

(Ulat ni Jill Resontoc) 

Train2 nakapasa na sa 3rd reading sa Kongreso @dwiz882

— Jill Resontoc – DWIZ -882 AM radio (@JILLRESONTOC) September 10, 2018

Dating Presidential Candidate Manuel “Mar” Roxas II, dating Chief Justice Maria Lourdes Sereno at actor Dingdong Dantes.

Ilan lamang ito sa mga lumutang na pangalan na sinasabing nasa listahan ng Liberal Party (LP) para isabong sa senatorial elections sa susunod na taon.

Ayon sa source, pasok din sa senatorial slate ng LP led coalition sina Magdalo Representative Gary Alejano, Senador Paolo Benigno “Bam” Aquino IV, dating Chief Justice Hilario Davide Jr., Human Rights Lawyer Chel Diokno, dating Akbayan Party-list Representative Barry Gutierrez, Marawi based aid worker Samira Gutoc, dating Solicitor General (SolGen) Florin Hilbay.

Nasa line up din umano ang aktres na si Agot Isidro, dating Presidential Spokesman Edwin Lacierda, Atty. Romulo Macalintal, dating Deputy Speaker Lorenzo Tañada III, dating Palace Undersecretary Manolo Quezon III, dating DSWD Secretary Dinky Soliman, Singer-Activist Leah Navarro at Jim Paredes.

Sa 18 na nasa listahan, apat (4) ay miyembro ng LP at ang nalalabing 14 ay dating opisyal ng Aquino administration o masugid na supporters ng dating Pangulong Benigno “Noynoy” Aquino III.

Sinabi ng source na bahala na ang party leaders na magpasya sa pinal na listahan ng senatoriables ng oposisyon.

Inamin ni Department of National Defense (DND) Secretary Delfin Lorenzana na hindi siya kinunsulta kaugnay sa ginawang pagbawi sa amnesty ni Senador Antonio Trillanes IV.

Ipinabatid ni Lorenzana na personal siyang tinawagan ni Solicitor General (SolGen) Jose Calida nuong Agosto 16 para hingin ang ilang dokumento kaugnay sa amnesty application ni Trillanes at mga kasamahan nito na hindi nito tinukoy kung sinu-sino.

Hindi naman binanggit ni Lorenzana kung anong mga dokumento ang ibinigay niya kay Calida.

Una nang inihayag ng DND at Armed Forces of the Philippines (AFP) na nawawala ang dokumento o ang amnesty application ni Trillanes na naging basehan nang pag-revoke ng amnesty nito.

No comment naman si Lorenzana sa pahayag ng Malakanyang na posibleng makulong si dating Defense Secretary Voltaire Gazmin dahil sa ‘usurpation of authority’.

Nagbabala ang Integrated Bar of the Philippines (IBP) ng posibleng kaguluhan na maaring mangyari dahil umano sa pagsisikap at pagtutulungan ng mga ahensiya ng gobyerno para mapakulong si Senador Antonio Trillanes IV.

Matatandaang humirit ng arrest warrant ang Department of Justice (DOJ) sa Makati Regional Trial Court (RTC) Branch 148 at 150 na una nang nagbasura ng rebellion at coup d’ etat case laban kay Trillanes.

Nangangamba ang IBP sa ginagawang forum shopping ng gobyerno na posibleng maglagay sa alanganin ang Hudikatura.

Una nang dumulog si Trillanes sa Korte Suprema upang ipawalang bisa ang kautusan ng Pangulong Rodrigo Duterte na pagbawi sa ipinagkaloob sa kanyang amnestiya.

Handa ang AFP o Armed Forces of the Philippines na ipagpaliban ang court martial proceedings laban kay Senador Antonio Trillanes habang hinihintay ang magiging ruling ng Supreme Court.

Ayon kay AFP Chief of Staff Gen. Carlito Galvez, iginagalang ng AFP ang Korte Suprema at ang magiging desisyon nito sa legalidad ng Presidential Proclamation Number 572 na bumabawi sa amnesty ng senador.

Bilang dating sundalo, kasama sa ipinag uutos ni Pangulong Rodrigo Duterte ang muling pagbuhay sa kaso ni Trillanes sa court martial.

Inaasahan naman na bukas, September 11 diringgin ng Korte Suprema ang petisyon ni Trillanes.

Sinabon ni Senate Committee on Agriculture and Food Chairperson Cynthia Villar si Agriculture Secretary Manny Piñol kaugnay ng nararansang problema sa supply ng bigas at nagtataasang presyo ng mga produktong agrikultural.

Sa budget hearing para panukalang budget ng Department of Agriculture o DA sa susunod na taon, nanindigan si Piñol na walang rice shortage sa bansa.

Sa taya ni Piñol, magsisimula nang tumatag ang presyo ng bigas pagsapit ng Nobyembre.

Gayunman, hindi kumbinsido dito si Villar at iginiit na dapat magpatupad na ang pamahalaan ng price ceiling upang hindi aniya ang mga negosyante ang kumokontrol sa presyo ng mga produkto.

Binigyang diin ni Villar na ang mga magsasaka ang dapat na siyang kumikita at hindi ang mga negosyante sa mataas na presyuhan ngayon ng bigas.

Ipinaalala ni Villar na tungkulin ng DA na proteksyunan ang mga magsasaka at ang mga mamimili na hindi aniya nangyayari sa ngayon.

—-