Muling pinanindigan ng Pangulong Rodrigo Duterte na mali ang ibinigay na amnesty kay Senador Antonio Trillanes IV.
Ito ayon sa pangulo ay dahil si dating Department of National Defense (DND) Secretary Voltaire Gazmin lamang na tinawag niyang kaibigan ang nakapirma sa certificate of amnesty ng senador.
Una na ring inihayag ng pangulo na igagalang niya ang hukuman at hindi ipapaaresto si Trillanes hanggang walang inilalabas na arrest warrant ang korte.
Hinamon ng Pangulong Rodrigo Duterte ang mga miyembro ng Magdalo na maglunsad ng kudeta laban sa administrasyon.
Kasunod na rin ito nang pahayag ng Pangulo hinggil sa hawak nilang mga ebidensya na nakikipag-sabwatan ang grupo ni Senador Antonio Trillanes IV sa iba’t ibang grupo para guluhin ang administrasyon.
Kinuwestyon pa ng Pangulo si Trillanes kung may nagawa ito para sa mga sundalo kaya’t hinamon din ang mga ito na sumama sa rebolusyon ng grupo ng senador kung may naitulong ito sa kanila.
“Just be careful sa pagsabwatan ninyo sa Magdalo. Magdalo is not all in agreement to destabilize or overthrow the government.” Pahayag ni Duterte.
Hindi na ikinagulat ng Malakanyang ang desisyon ng Korte Suprema na ibasura ang hirit ni Senador Antonio Trillanes IV na temporary restraining order (TRO) at preliminary injunction.
Kaugnay ito sa Proclamation No. 572 ng Pangulong Rodrigo Duterte na nagpapawalang bisa sa amnesty ni Trillanes.
Sinabi ni Chief Presidential Legal Counsel Salvador Panelo na sa una pa lamang ay batid na ng Malakanyang na walang matibay na pundasyon ang hirit ni Trillanes.
Ayon kay Panelo, maaaring idagdag na rin ngayon sa comment ng gobyerno ang hindi pag-aapply ni Trillanes ng amnesty at hindi pag amin sa kaniyang pagsasagawa ng kudeta nuong 2003 at 2007 kahit hindi naman ito nakasaklaw sa proklamasyon.
Kasabay nito, ipinauubaya nas aniya ng Malakanyang sa Makati RTC ang pagpapasya sa kapalaran ng senador.
Hinikayat ni dating Sundalo at Senador Rodolfo Biazon ang mga sundalo na arestuhin lamang si Senador Antonio Trillanes IV kapag may warrant of arrest.
Ayon kay Biazon, dapat na alalahanin ng mga sundalo ang kanilang oath na tanging ang mga ligal na kautusan lamang mula sa kanilang superiors ang dapat nilang sundin.
Iginiit pa ni Biazon na walang legal basis ang naging proklamasyon ng pangulo na pagbawi sa amnesty ni Trillanes.
Aniya, may say ang kongreso sa pagbawi ng amnestiya kaya hindi ito maaring desisyunan nag-iisa ng pangulo.
Inihirit ng oposisyon sa Senado na imbestigahan ang inilabas na proklamasyon ni Pangulong Rodrigo Duterte na bumabawi sa amnestiya ni Senador Antonio Trillanes IV.
Batay ito sa inihaing resolusyon nina Senate Minority Leader Franklin Drilon, mga senador Bam Aquino, Francis Pangilinan, Risa Hontiveros at Leila De Lima.
Tinukoy ng mga senador ang Proclamation No. 572 bilang fraudulent at erroneous.
Nais ng mga senador imbestigahan ang naging proklamasyon para magkaroon ng remedial legislation para maiwasan na ang presidential abuse of power sa hinaharap.
Hinamon ng ilang labor group si Presidential Spokesperson Harry Roque na mag-ikot sa palengke upang makita ang tunay na epekto ng patuloy na pagpalo ng inflation rate.
Kasunod ito ng pahayag ni Roque na walang dapat na ipag-alala ang publiko kahit pa umabot sa 6.4 percent ang inflation rate nitong Agosto.
Ayon sa grupong Sentro ng mga Nagkakaisa at Progresibong Manggagawa Secretary General Josua Mata, tinawag na insensitibo ng naging pahayag ni Roque.
Aniya, karamihan ng mga Pilipino ay apektado na ng mataas na bilihin, may trabaho man o wala.
Sinabi naman ni ALU-TUCP Spokesperson Alan Tanjusay, nagdudulot na ng depresyon at labis na pagkabahala ang nararanasang matinding kahirapan sa ngayon.
Para naman kay Nagkaisa Labor Coalition Spokesperson Rene Magtubo, tila sa ibang planeta nakatira si Roque dahil hindi niya alintana ang hirap gayong maraming Pilipino na ang umaaray sa sitwasyon ng ekonomiya ng bansa.
Ibinasura ng korte suprema ang hiling na temporary restraining order o TRO ni Senador Antonio Trillanes IV laban sa Proclamation Number 572 ni Pangulong Rodrigo Duterte na nagpapawalang bisa sa amnestiya ng senador.
Ayon sa tagapagsalita ng Korte Suprema na si Atty. Victoria Gleoresty Guerra, ipinauubaya na ng Kataas-taasang Hukuman sa Makati Regional Trial Court ang pagresolba sa usapin dahil nagsampa naman na ng mosyon ang Department of Justice o DOJ sa mababang hukuman hinggil sa usapin.
Maliban dito, kinikilala rin ng Korte suprema ang pahayag ni Pangulong Duterte na susundin ang rule of law at hindi dadakpin si Trillanes hanggat walang warrant of arrest mula sa korte.
Nakaalerto na ang lahat ng mga Disaster Risk Reduction offices na hahagupitin ng napakalakas na bagyong binabantayan ngayon ng PAGASA.
Ganap na alas-8:00 ngayong umaga, itinaas na ng National Disaster Risk Reduction and Management Council o NDRRMC sa “red alert” ang kanilang status.
Ibig sabihin, kinakailangan na ng mga puspusang paghahanda para sa papalapit na super typhoon na may international name na “Mangkhut” na sa sandaling pumasok na sa Philippine Area of Responsibility (PAR) ay tatawagin nang “Ompong”.
Ayon kay NDRRMC Spokesman Director Edgar Posadas, nais pa rin nilang makamit ang zero casualty lalo’t malakas na bagyo ang paparating kaya’t ngayon pa lamang ay kukulitin na nila ang publiko na maghanda.
Kasabay nito, tiniyak din ni Posadas na may mga naka-posisyon nang ayuda sa mga pamilyang maaapektuhan ng bagyo prtikular na sa iyong mga nasa silangang bahagi ng bansa na unang direktang makalalasap ng hagupit nito.
Payo naman ni Posadas sa mga residente na nasa mabababang lugar na magplano na sa posibleng paglikas at ilipat na sa matataas na lugar ang mahahalagang kagamitan.
Batay sa pagtaya ng PAGASA, inaasahan ang posibleng pagragasa ng daluyong o storm surge pag lumapit na ang bagyo sa kalupaan, iyon ay kung hindi magbabago ang forecast track ng bagyo.
Nagbabadya na rin ang dagdag pasahe sa eroplano matapos katigan ng gobyerno ang hirit ng mga local airline company na ibalik ang fuel surcharge dahil sa pagtaas ng presyo ng mga produktong petrolyo.
Sa Senate hearing kahapon, inihayag ni Civil Aeronautics Board (CAB) Executive Director Carmelo Arcilla na posibleng 80 hanggang 100 pesos ang maging fare increase ng mga airline company.
Ayon kay Arcilla, hangga’t hindi bumabalik sa 70 dollars per barrel ang presyo ng aviation fuel sa international market ay mananatili ang fuel surcharge.
Sa ngayon anya ay umaabot na sa 90 dollars per barrel ang presyo ng aviation fuel kaya’t hindi rin masisisi ang mga airline magtaas ng singil upang maiwasan ang pagka-lugi.
Tiniyak naman ni Arcilla na pinag-aralan nilang mabuti at pinulong ang mga airline company bago pahintulutan ang kanilang hiling.
Muling nagpatupad ng dagdag presyo sa oil products ngayong araw na ito.
Epektibo ngayong alas-6:00 ng umaga, ipinatupad ng mga kumpanya ng langis ang ika-limang serye ng oil price hike.
Ayon sa Department of Energy (DOE), papalo sa 65 sentimo ang dagdag sa presyo ng kada litro ng diesel, gasolina at kerosene.
Isinisisi sa mataas na presyo ng petrolyo sa world market ang panibagong dagdag presyo.
Batay sa record ng DOE, ang presyo ng gasolina sa Metro Manila ay naglalaro sa pagitan ng P47 hanggang P64.
Ang diesel ay nasa P42. 30 hanggang P48.10 at nasa P47. 42 hanggang P52. 66 naman ang presyo ng kerosene.