HOT STORIES OF THE WEEK

Tiniyak ng Philippine National Police (PNP) ang katapatan at suporta nito sa watawat ng Pilipinas.

Ito ang inihayag ni PNP Chief Director/General Oscar Albayalde sa pulong balitaan kahapon sa Kampo Krame bilang tugon sa sinabi ni Pangulong Rodrigo Duterte na may ilang nasa militar umano ang tila nagpakalbo na bilang pagsuporta kay Senador Antonio Trillanes IV.

Ayon kay Albayalde, walang pangangailangan na magsagawa ng loyalty check sa kanilang hanay dahil tiyak namang malalaman aniya nila kung mayroon mang hindi sinasangayunan ang sinuman mula sa kanilang kasamahan na mga aktibo at maging sa mga retirado.

Pabiro naman sinabi ng opisyal na ang pagiging kalbo sa kanilang hanay ay sumisimbolo ng pagnanais na pamunuan ang pambansang pulisya tulad niya at ng sinundan nitong si Bureau of Corrections (BuCor) Chief Ronald Bato Dela Rosa.

—-

Handa na rin ang Metropolitan Manila Development Authority (MMDA) sa posibleng pagbaha dulot ng inaasahang malakas na ulang dala ng Bagyong Ompong.

Ayon sa MMDA, nakaantabay na ang 60 emergency personnel na kanilang i-dedeploy upang sumaklolo sa publiko anumang oras.

Pitong ambulansya, dalawang trucks, dalawang military trucks, dalawang fire trucks at isang boom truck din ang naka-standby.

Pinayuhan naman ng ahensya ang publiko na magtungo sa MMDA emergency stations sa Edsa-Roxas Boulevard, Edsa-Orense, Edsa-Ortigas, Edsa-Timog, C5-Libis, Commonwealth-Tandang Sora at Nagtahan sakaling magkaroon ng aberya.

Panimulang hakbang pa lamang umano para maisaayos ang National Food Authority (NFA) ang pagbibitiw sa pwesto ni Administrator Jayson Aquino.

Ayon kay Senate President Pro Tempore Ralph Recto, bukod sa pagbibitiw ni Aquino, marami pa rin ang dapat na gawin upang masiguro ang sapat na suplay na bigas para hindi na maulit ang krisis na naranasan dito.

Kabilang aniya sa mga hakbang na dapat gawin ng pamahalaan ay ang tarrification ng mga agricultural products, pagpapahintulot sa pagpasok ng mga dagdag na private investment sa agrikultura kabilang na ang teknolohiya at mechanization at iba pa.

Una rito, pinanawagan din ni Pangulong Rodrigo Duterte ang tuluyang pagbuwag sa NFA.

Ipinaubaya na ng National Disaster Risk Reduction and Management Council (NDRRMC) sa mga local chief executives ang pagsasagawa ng pre-emptive evacuation sa lahat ng kanilang nasasakupan.

Ayon kay NDRRMC Executive Director Ricardo Jalad, ngayon pa lamang ay posible nang maramdaman ang mga pag ulang dala ng bagyo dahil sa inaasahang pagpapaigting nito sa hanging habagat.

Sa ganitong sitwasyon aniya ay dapat nang makaroon ng disaster preparedness plan ang bawat Local Government Units (LGUs) para maiwasan nang maulit pa ang pinsalang idinulot ng Super Typhoon Yolanda na tumama sa bansa nuong 2013.

Pinaalalahanan ng Malakanyang ang publiko na maging alerto at ligtas sa inaasahang pananalasa ng Bagyong Ompong sa ilang bahagi ng Pilipinas.

Kasabay nito tiniyak ni Presidential Spokesperson Harry Roque na nakahanda na ang pamahalaan sa pangunguna ng National Disaster Risk Reduction and Management Council (NDRRMC) at Department of Social Welfare and Development (DSWD) para tugunan ang mga kakailanganing ayuda ng mga posibleng maapektuhan ng bagyo.

Hinimok din ni Roque ang publiko na manatiling umantabay sa mga ulat, abiso at anunsyo mula sa mga estasyon ng gobyerno maging sa social media accounts ng mga ahensya ng pamahalaan.

Nagpaalala rin ang tagapagsalita sa mga mahahalagang kagamitan na dapat ihanda sa ganitong sitwasyon tulad ng flashlight, radyo na may bagong baterya, sapat na pagkain, maiinom na tubig, gas at first aid supplies.

Nanawagan din si Roque sa taumbayan na sama-samang manalangin para sa kaligtasan ng lahat.

Nais muna umanong makausap ni dating Chief Justice Maria Lourdes Sereno si Vice President Leni Robredo bago ito magpasyang tumakbo sa pagka-senador.

Ito ang inihayag ni Liberal Party (LP) Senador Francis “Kiko” Pangilinan sa pakikipag pulong nito kahapon sa dating punong mahistrado ng Korte Suprema para pag-usapan ang senatorial line up ng partido para sa magaganap na eleksyon sa susunod na taon.

Ayon kay Pangilinan, hindi pa nakakapagdesisyon si Sereno kung tatanggapin nito ang alok ng LP bilang isa sa pambato sa pagka-senador.

Samantala, binisita rin ni Sereno ang dati nitong estudyante sa University of the Philippines na si Senador Francis “Chiz” Escudero.

Ipinabatid ni Escudero na sinabi rin sa kanya ni Sereno na hindi pa ito tiyak sa pagsabak sa pulitika sa 2019 elections.

Nanumpa na bilang bagong miyembro ng Partido Demokratiko Pilipino–Lakas ng Bayan (PDP-Laban) sina Bureau of Corrections (BuCor) Director Ronald “Bato” Dela Rosa, dating Bureau of Customs (BOC) Commissioner Nicanor Faeldon at aktor na si Philip Salvador.

Sabay-sabay dumating ang tatlo sa Senado at nanumpa sa pangulo ng partido na si Senador Aquilino “Koko” Pimentel III.

Samantala, inamin ni Dela Rosa na interesado siyang tumakbo sa 2019 elections bilang senador habang posible namang tumakbo bilang kongresista si Salvador.

Ipinabatid naman ni Faeldon na nais lamang niyang tumulong sa kampanya para sa isinusulong ng pamahalaan na federalism.

(Ulat ni Cely Bueno)

Oathtaking of former PNP chief Ronald “Bato” dela Rosa, former customs commissioner Faeldon & actor Philip Salvador as new members of PDP Laban. @dwiz882 pic.twitter.com/FgNmRBdCnS

— cely bueno (@blcb) September 12, 2018

Nakahanda na ang pamahalaang panlalawigan ng Batanes para sa inaasahang pananalasa ng nagbabantang super typhoon Mangkhut na tatawaging bagyong Ompong oras na pumasok sa Philippine Area of Responsibility (PAR).

Batay sa tinatahak na direksyon ng bagyo, ang Batanes ang inaasahang isa sa mga direktang tatamaan ng naturang super typhoon.

Sa panayam ng DWIZ, sinabi ni Batanes Governor Marilou Cayco, naka-red alert na ang kanilang lalawigan habang naka-preposition na rin aniya ang mga relief goods.

Maliban dito, nakapagsimula na rin ang pamahalaang lokal na makapamahagi ng non-food items sa kanilang mga mamamayan.

“Ngayon lalo kagabi ay umuulan na po dito, ngayon makulimlim na palatandaan na talagang dadaan dito ang bagyo pero pinapanalangin naming n asana ay lumihis itong bagyong Ompong.” Ani Cayco

Samantala, sinabi ni Cayco na landslides at pagbaha ang idinulot naman sa kanila ng nagdaang bagyong Neneng.

“Napakalakas po ng ulan at nagkaroon ng mga landslides sa ilang lugar ditto at kahapon na-clear na po natin ang mga affected areas, tumaas din ang tubig sa mga creek ngunit hindi naman nag-overflow.” Pahayag ni Cayco

---

NFA Supply

Nanawagan din ang pamahalaang panlalawigan ng Batanes ng dagdag na supply ng NFA rice.

Sa panayam ng DWIZ, sinabi ni Batanes Governor Marilou Cayco, kakaunti na lamang ngayon ang imbak nilang NFA rice at inaasahang bababa pa ito oras na magsipagbilihan ngayon ang kanilang mga residente bilang paghahanda sa paparating na bagyo.

Nangangamba si Cayco na maubusan ng supply ng bigas ang lalawigan kung hindi agad magpapadala ng tulong ang pamahalaan.

(Ratsada Balita Interview)