HOT STORIES OF THE WEEK

Kinakailangang paigtingin pa ang ugnayan sa pagitan ng mga ahensya ng pamahalaan para mapaghandaan ang mga hindi inaasahan sa pananalasa ng Bagyong Ompong.

Iyan ang binigyang diin ni Pangulong Rodrigo Duterte nang pangunahan nito ang command conference kahapon sa tanggapan ng National Disaster Risk Reduction and Management Council (NDRRMC) sa Kampo Aguinaldo.

Ayon sa Pangulo, kinakailangang pakatandaan ng mga ahensya ng pamahalaan ang Murphy’s Law na anumang bagay na mali ay magiging mali lalo na sa paghahanda.

“Actually if any crisis you have to reckon with the Murphy’s Law, we have the estimates, projections, reckonings and all but it ain’t there until it is there. So pagka ganun anything can go wrong outside of the projection or sudden shift of that typhoon crawling towards North Luzon.” Pahayag ni Duterte.

Kasunod nito, inatasan ni Pangulong Duterte ang tatlong miyembro ng gabinete na sina Presidential Adviser on Political Affairs Sec. Francis Tolentino, Transportation Sec. Arthur Tugade at Labor Sec. Silvestre Bello III na magtungo sa mga lugar na tatamaan ng bagyo para personal na tingnan ang sitwasyon duon.

Tiniyak naman ni tolentino sa pangulo na magtatayo sila ng command center sa provincial office ng PNP sa Cagayan para duon bantayan ang sitwasyon.

Nakatakdang umalis ngayong araw ang mga inatasang kalihim sa pamamagitan ng eroplanong ipagagamit sa kanila ng defense department.

“So the best way to proposition the most accurate way of finding out ano talaga nangyari is for Tugade who comes from Cagayan and Bello from Isabela to go home there now,” Ani Duterte.

---

Pinangunahan ni Pangulong Rodrigo Duterte ang isinagawang command conference sa National Disaster Risk Reduction and Management Council (NDRRMC) kaugnay sa paghahanda sa pananalasa ng Bagyong Ompong.

Iginiit ng pangulo ang pangangailangan ng komunikasyon partikular sa mga ahensyang kaugnay sa ganitong kalamidad upang maging mabilis ang pagbibigay ng ayuda sa mga maaapektuhan ng bagyo.

Sinabi rin ni Pangulong Duterte na mahalagang magkaroon na ng pagtaya sa mga posibleng mapipinsala ng bagyo para agad na itong mapaghandaan.

Bukod dito inatasan din ng pangulo ang ilan sa mga cabinet member kabilang na si Department of Transportation (DOTr) Secretary Arthur “Art” Tugade at Department of Labor and Employment (DOLE) Secretary Silvestre “Bebot” Bello III na i-check ang mga lugar na direktang maapektuhan ng bagyo.

(Ulat ni Jill Resontoc)

Duterte nangunguna sa Typhoon Ompong Command Conference na nagaganap sa NDRRMC @dwiz882 pic.twitter.com/Quzo93qB9g

— Jill Resontoc – DWIZ -882 AM radio (@JILLRESONTOC) September 13, 2018

Hindi natuloy ang balak ni Senador Antonio Trillanes IV na subukang lumabas sa gusali ng Senado kahapon.

Ayon kay Trillanes,nakakuha siya ng impormasyon na tuloy ang pag-aresto sa kaniya ng tauhan ng mga militar kaya hirap aniya siyang pagtiwalaan ang binitawang pahayag ng liderato ng Armed Forces of the Philippines (AFP) na hindi siya ipaaresto ng mga ito.

Kasabay nito, nilinaw ni Trillanes na hindi kumokunsumo ng kuryente ang pananatili niya sa Senado dahil nakapatay aniya ang air-conditioning unit ng naturang gusali.

Naniniwala din umano ang kaniyang mga tauhan na mas magiging ligtas siya kung mananatili sa Senado.

Ito’y makaraang sundan umano ng ilang intelligence agents ng militar ang kaniyang mga tauhan na nagpakarga lamang sa gasolinahan nuong isang gabi.

Bumaba ang bilang ng mga Pilipinong walang trabaho sa ikalawang quarter ng taong ito.

Tinukoy ng Social Weather Stations (SWS) na “very high” ang net optimism ng mga Pilipino sa job availability batay na rin sa isinagawa nilang survey mula June 27 hanggang 30 sa may 1, 200 respondents.

Ayon sa SWS, 19.7% ng respondents o nasa halos 9 na milyon lamang ang walang trabaho.

Sinabi ng SWS na ito ay 4.2% na mas mababa sa halos 24% o tinatayang 11 million na naitala sa kanilang survey noong March 2018.

Ang joblessness rate ay binubuo ng 9.5% o 4.2 million na nag-boluntaryong umalis sa kanilang trabaho, 6.8% o 3 million ang nawalan ng trabaho at 3.4% o 1.5 million naman ang naghahanap ng bagong trabaho.

—-

Ipinalabas na ng United Nations ang listahan ng mga bansang tinatarget ang mga nagtatanggol at nagsusulong nang pagkilala sa karapatang pantao.

Pasok ang Pilipinas, China at Russia sa tinawag ng UN na shameful countries na kinabibilangan ng 38 bansa.

Nakasaad sa taunang report na inilabas ni UN Secretary General Antonio Guterres ang mga bansang kasama sa listahan na hindi maganda ang pagtrato, nagsasagawa ng surveillance, krimen at public stigmatization campaigns laban sa mga human rights defenders.

Ayon sa UN, maituturing na shameful practice ang ginagawa ng mga bansa na pinarurusahan ang mga indibiduwal na nagsusulong sa karapatang pantao.

Sa naturang bilang, siyam na bansa ang dati nang nasa listahan ng UN samantalang 29 na bansa kasama ang Pilipinas ang bago sa listahan.

—-

Hindi pa rin nagpalabas ng arrest warrant ang korte laban kay Senador Antonio Trillanes IV.

Kasunod ito nang ginawang pagdinig ng Makati RTC Branch 148 sa petisyon ng Department of Justice (DOJ) na humihiling ng agarang pagpapalabas ng arrest warrant at hold departure order laban sa senador.

Sa naturang pagdinig, hiniling ng kampo ni Trillanes na mabigyan sila ng sapat na panahon para makapagsumite ng rejoinder at dagdag na komento sa mosyon ng DOJ.

Pinagbigyan naman ng korte ang nasabing hiling ni Trillanes na binigyan ng sampung araw para magsumite ng rejoinder at supplemental comments.

Mayroon namang limang araw ang DOJ para tumugon sa ihahaing supplemental comments ng senador.

—-

Ilang mga lokal na pamahalaan ang maaga nang nag-anunsyo ng kanselasyon ng klase bilang paghahanda sa Bagyong Ompong.

Sa Metro Manila, kanselado na ang klase simula ngayong araw hanggang Sabado, Setyembre 15 sa lahat ng antas sa mga pampubliko at pribadong paaralan sa Parañaque City habang sa Quezon City wala namang pasok simula sa Biyernes, Setyembre 14 hanggang Sabado, Setyembre 15.

WALa na ring pasok sa lahat ng antas ngayong araw at bukas Setyembre 13 at 14 sa mga lalawigan ng Abra, Cagayan, Ilocos Norte, Ilocos Sur, Zambales maliban sa Olongapo City at Masantol sa Pampanga.

Habang ngayong araw pa lamang ang inanunsyong kanselasyon ng klase sa lahat ng antas sa  lalawigan ng Sorsogon, sa mga bayan ng Marilao, Obando at Calumpit sa Bulacan at mga bayan ng Balaoan, Aringay at Bangar sa La Union at Albay na mula pre-school hanggang high school lamang.

Gayundin sa lalawigan ng Apayao na tatagal naman hanggang Setyembre 16, linggo.

wala naman pasok simula ngayong araw hanggang Sabado, Setyembre 15 sa Dagupan sa Pangasinan, Sudipen at San Fernando sa La Union at Sta. Rita sa Pampanga.

Sa bayan naman ng Angadanan sa Isabela, walang pasok sa Setyembre 14, Biyernes.

Bukas hanggang Sabado ang kanselasyon ng pasok sa lalawigan Camarines Sur.

Siniseryoso ng Philippine National Police (PNP) ang pahayag ni Pangulong Rodrigo Duterte na ilan sa kanyang mga kritiko ang nagpaplanong ipapatay siya.

Ayon kay PNP Chief Director General Oscar Albayalde, bagama’t wala silang natatanggap na impormasyon sa umano’y planong pagpatay sa pangulo, kanila pa rin ito itinuturing na seryosong akusasyon lalo’t nanggaling mismo ito sa punong ehekutibo.

Dagdag ni Albayalde, may mga iba pang ahensiya ng pamahalaan ang maaaring makapagbigay ng mga impormasyon kay Pangulong Duterte at hindi lamang mula sa PNP.

Magugunitang sa isinagawang interview ni Chief Presidential Legal Counsel Salvador Panelo, sinabi ni Pangulong Duterte na may ilang personalidad aniya ang nagpaplanong isabotahe ang kanyang administrasyon.

Dagdag ng pangulo, posibleng umabot din anito sa assassination o pagpatay sa kanya na posibleng isagawa kasabay ng anibersaryo ng deklarasyon ng Martial Law sa Setyembre 21.