HOT STORIES OF THE WEEK

Nakahandang tumulong sa Pilipinas ang mga bansang miyembro ng Association of Southeast Asian Nations (ASEAN) kung kakailanganin.

Ito ang pagtitiyak ng ASEAN sa harap ng pananalasa ng Bagyong Ompong.

Ayon kay NDRRMC Executive Director Ricardo Jalad, mayruon namang nilagdaang kasunduan si Pangulong Rodrigo Duterte kasama ang iba pang pinuno ng ASEAN na bahagi ng “One ASEAN, One Response”.

Sinabi din ni Jalad na hindi magdadalawang isip ang pamahalaan na humingi ng international assistance kung mahihirapan ang pamahalaan sa pagresponde sa posibleng epekto ng malakas na bagyo.

Suspendido ngayong araw, September 15 at bukas, September 16 ang Physicians Licensure Examination.

Batay sa abiso ng Professional Regulation Commission (PRC), pansamantalang kinansela ang nasabing pagsusulit na gaganapin sa Maynila, Baguio, Cebu at Davao dahil sa pananalasa ng Bagyong Ompong.

Sinabi ng PRC na kanilang iaanunsyo na lamang kung kailan muli itatakda ang naturang licensure examination.

Ibinababa ng National Disaster Risk Reduction and Management Council (NDRRMC) sa 4.2 milyong residente ang tinatayang maapektuhan ng Bagyong Ompong sa buong bansa.

Ito ay mula sa naunang pagtaya ng ahensya na 5. 2 milyong residente.

Ayon kay NDRRMC Spokesman Edgar Posadas, ito ay dahil sa pababago-bagong track ng bagyo kung saan ngayon ito ay bumaba.

Gayunman sinabi ni Posadas, na mas magiging partikular ang estimasyon sa oras na tumama sa kalupaan ang naturang bagyo.

Umaasa din ang NDRRMC na makakamit ang zero casualty dahil sa lahat ng paghahandang ginawa ng pamahalaan hanggang sa local government units (LGUs).

Tumama na sa kalupaan ng Baggao, Cagayan ang Bagyong Ompong kaninang 1:40 a.m.

Ramdam ng mga taga Cagayan ang bagsik ng bagyo dahil sa malakas na hangin at pagbugso ng pag-ulan na dala ng bagyo.

Ilang puno ang nabuwal, nagtuklapang mga bubong habang nagtumbahan na rin ang ilang outpost.

Ayon sa ulat, nasa mahigit 10,000 residente sa buong Cagayan ang lumikas bago pa man tumama ang Bagyong Ompong.

Magdamag ding nabalot sa dilim ang Cagayan matapos putulin ang suplay ng kuryente dakong 10:00 p.m.

Umapela ang Malakanyang sa publiko partikular sa mga residenteng maaapektuhan ng Bagyong Ompong na habaan ang kanilang pasensya sa paghihintay ng ayuda mula sa pamahalaan.

Ito ang inilabas na pahayag ng Malakanyang sa harap ng inaasahang pananalanta ng Bagyong Ompong sa malaking bahagi ng Luzon.

Ayon sa Malakanyang, ang mga maghahatid ng tulong ay posible ring maging biktima ng masamang panahon.

Gayunman, tiniyak ng Malakanyang na ginagawa ng pamahalaan ang lahat upang mabilis na maiparating ang tulong na kakailanganin ng mga tatamaan ng hagupit ng bagyo.

Sa katunayan umano ay may una nang naipadalang tulong sa mga mahahagip ng bagyo gaya sa Batanes kung saan nakarating na ang mga relief goods.