HOT STORIES OF THE WEEK

Welcome para sa Department of Justice (DOJ) ang naging pasya ng korte sa kaso ni retired Major General Jovito Palparan.

Matatandaang hinatulang guilty ng Malolos Regional Trial Court (RTC) Branch 5 si Palparan pagdukot sa University of the Philippines (UP) students na sina Karen Empeno at Sherlyn Cadapan nuong 2006.

Ayon kay DOJ Secretary Menardo Guevarra, patunay lamang ito na darating pa ang hustisya kahit gaano katagal ito hinintay.

Hinatulan si Palparan at dalawang iba pa ng habambuhay na pagkabilanggo.

Guilty ang naging hatol ng Malolos Regional Trial Court kay Retired General Jovito Palparan at dalawang iba kaugnay ng pagkawala ng dalawang UP students noong 2006.

Si Palparan kasama sina Lt. Col. Felipe Anotado at Staff Sgt. Edgardo Osorio ay hinatulan ng habang buhay na pagkabilanggo dahil sa kasong kidnapping at serious illegal detention dahil sa pagkawala nina Karen Empeño at Sherlyn Cadapan na hanggang ngayon ay hindi pa natatagpuan.

Inatasan ng korte ang tatlo na magbayad ng tig-P100,00 pisong civil indemnity at P200,000 para sa moral damages.

July 2011 pa nang simulang dinggin ng korte ang kaso laban kay Palparan na noong panahong yun ay nagtatago pa sa batas.

Nakulong lamang si Palparan nang mahuli ito noong 2014 sa Sta. Mesa Manila.

Samantala, napuno ng emosyon ang sala ni Judge Alexander Tamayo ng Malolos Regional Trial Court Branch 15 matapos nyang hatulan ng guilty si Retired Major General Jovito Palparan at dalawang iba pa.

Tuwa ang makikita sa mga kaanak at taga-suporta nina Karen Empeno at Sherlyn Cadapan dahil sa nakamit nilang hustisya.

Samantala, habang binabasa ang sentensya ay sinigawan pa ni Palparan si Judge Tamayo ng …”duwag ka Judge, napakaduwag mo.”

Binalaan ni Judge Tamayo ng contempt si Palparan subalit sumagot pa ang dating heneral na makukulong rin naman sila sabay mura pa sa hukom.

Sa kanyang desisyon, ipinag-utos ni Judge tamayo na ilipat na sa New Bilibid Prison (NBP) si Palparan at dalawang kapwa akusado mula sa kanilang Custodial Center sa Fort Bonifacio.

Gayunman, umapela ang mga abogado ni Palparan na panatilihin mula sila sa Fort Bonifacio dahil may nakabinbin pa silang kaso sa Malolos RTC.

Sitwasyon sa labas ng Malolos RTC kung saan hinatulang guilty si Palparan at 2 pang kapwa akusado sa kasong kidnapping at serious illegal detention. | via @jaymarkdagala pic.twitter.com/ZhJZX0Irl9

— DWIZ Newscenter (@dwiz882) September 17, 2018

PANOORIN: Paglabas ni Retired Major General Palparan at 2 pang kapwa akusado sa Malolos RTC matapos na hatulang guilty sa kasong kidnapping at serious illegal detention | via @jaymarkdagala pic.twitter.com/z6g0jBolls

— DWIZ Newscenter (@dwiz882) September 17, 2018

(May Ulat mula kina Jaymark Dagala at Jill Resontoc)

Idineklara na ang state of calamity sa mga lugar na labis na hinagupit ng bagyong Ompong.

Kabilang sa mga isinailalim sa state of calamity ang lalawigan ng Cagayan kung saan nag-landfall sa bayan ng Baggao ang bagyo noong Sabado ng madaling araw; Kalinga kung saan pinaniniwalaang aabot sa isang bilyong piso ang halaga ng pinsala; bayan ng Mayayao sa Ifugao Province maging sa Abra at Benguet.

Inihayag naman ni Civil Defense Cordillera and Cordillera Regional Disaster Risk Reduction and Management Council Chairman Ruben Carandang na wala pa silang detalye hinggil sa halaga ng pinsala sa agrikultura at imprastraktura.

Ito, anya, ay dahil hindi pa tuluyang napapasok ng mga awtoridad ang iba pang lugar makaraang matabunan ng lupa habang putol ang linya ng komunikasyon at walang supply ng kuryente.

—-

Nakatakdang bisitahin ngayong araw ni Pangulong Rodrigo Duterte ang iba pang lugar na nasalanta ng bagyong Ompong sa Cordillera Administrative Region o CAR.

Sa press briefing sa Tuguegarao City, Cagayan, tinukoy ni Pangulong Duterte ang isang gumuhong simbahan sa Barangay Ucab sa Itogon, Benguet na kabilang sa kanyang pupuntahan.

Apatnapu’t tatlo (43) katao aniya ang sinasabing na-trap sa kasagsagan ng paghagupit ng bagyo noong Biyernes hanggang Sabado.

Bibisita rin ang Pangulo sa Baguio City at iba pang bahagi ng Cordillera na labis na napinsala ng kalamidad.

Kasama ng Punong Ehekutibo sa kanyang pagbisita si Presidential Political Affairs Adviser at DWIZ host Francis Tolentino na itinalagang point person kaugnay sa epekto ng bagyo.

—-

Halos isandaang small-scale miners ang pinangangambahang nalibing sa landslide sa Itogon, Benguet sa gitna ng pananalasa ng bagyong Ompong.

Ayon kay Itogon Mayor Victorio Palangdan, na-trap ang mga minero sa isang bunkhouse ng dating Benguet Corporation na nasa paanan ng bundok.

Nasa tatlumpung (30) bangkay na aniya ang narekober ng mga rescuer mula sa natabunang bunkhouse.

Nagpapatuloy ang search at rescue operations ng mga awtoridad sa pag-asang makuhang buhay ang mga na-trap na minero.

‘Ompong’ death toll

Sumampa na sa limampu’t siyam (59) ang bilang ng nasawi sa pananalasa ng bagyong Ompong.

Ayon kay National Disaster Risk Reduction and Management Council at Office of Civil Defense Chief Ricardo Jalad, nasa limampu (50) pa ang nawawala sa Northeran Luzon na matinding hinagupit ng bagyo.

Pawang mga biktima anya ng landslides ang naitalang casualties lalo sa Cordillera Administrative Region o CAR.

Tinaya naman ni Jalad sa 128,000 pamilya na ang apektado ng kalamidad sa Regions 1, 2, 3, CAR, National Capital Region, Calabarzon at Mimaropa.

Sa naturang bilang, halos 52,000 pamilya ang nananatili sa 1,900 evacuation centers.

—-

25 katao ang nasawi sa pananalasa ng bagyong Ompong nitong Sabado.

Ayon kay Political Adviser Sec. Francis Tolentino, 20 ang nasawi sa Cordillera Administrative Region, apat mula sa Nueva Vizcaya at isa mula sa Ilocos Sur.

Dagdag pa ni Tolentino, walang naitalang nasawi sa mga probinsya ng Cagayan at Isabela kung saan unang naglandfall si Ompong.

Matatandaan na itinalaga ni Pangulong Duterte si Tolentino bilang point person sa isinasagawang assessment ng pamahalaan sa pinsalang idinulot ng nasabing bagyo.

Tolentino: Ang Cagayan at Isabela, casualty free, sa Cordillera, na tinaman ng landslide, 20 na ang casualty, Nueva Vizcaya, 4 patay. Sa Ilocos Sur, isa.

— DWIZ Newscenter (@dwiz882) September 16, 2018

Pangulong Duterte, nakatakdang bumisita sa hilagang Luzon

Samantala, nakatakdang bisitahin naman ng Pangulo ngayong araw ang mga lalawigang matinding hinagupit ng bagyong Ompong.

Gayunman, tumangging si Presidential Spokesman Harry Roque na idetalye ang mga pupuntahang lugar ng Pangulo.

Subalit, ibinunyag naman ni Special Assistant to the President Cristopher Bong Go na magsasagawa ng aerial inspection ang Pangulo sa mga lalawigan ng Cagayan at Ilocos Norte ngayong tanghali.

Una rito, maraming flights ang nakansela papunta at pabalik ng Tuguegarao, Cagayan mula maynila makaraang masira ang paliparan dito nang mag-land fall ang bagyong Ompong sa Baggao.

Higit 56,000 mga residente ang inilikas na dahil sa pananalasa ng Bagyong Ompong.

Ayon sa National Disaster Risk Reduction and Management Council, una nang nagpatupad ng preemptive evacuation ang probinsyang apektado ng bagyo tulad sa Kalinga, Apayao, Mt. Province, Ilocos Norte, Ilocos Sur, Isabela at Cagayan.

Maliit aniyang bilang ito kumpara sa projected na bilang ng residenteng maapektuhan na aabot sa 4.9 na milyon.

Una nang nag landfall ang bagyo sa Baggao, Cagayan kaninang 1:40 ng umaga habang noong 7:00 ng umaga ay naitala ang bagyo sa Kabugao, Apayao.