HOT STORIES OF THE WEEK

Tiniyak ni Pangulong Rodrigo Duterte na makakamtan ng 19-anyos na si Ashley Abad ang hustisya na namatay dahil sa drug overdose habang dumadalo sa isang party sa Sinulog Festival sa Cebu, noong Enero.

Sa kanyang talumpati sa Albay, inihayag ni Pangulong Duterte na mananagot sa batas ang boyfriend ni Ashley na itinuturing nang suspek dahil sa pagtanggi umano nitong makipagtulungan sa imbestigasyon.

Hindi naman naiwasan ng Pangulo na muling batikusin ang Commission of Human Rights (CHR) o kahit anong human rights group dahil sa pananahimik ng mga ito sa issue.

Una nang kinumpirma ng mga awtoridad na ecstasy ang drogang inihalo sa inumin ng biktima batay sa autopsy mula sa Philippine Drug Enforcement Agency (PDEA).

—-

Kasado na ang inilatag na paghahanda ng NCRPO o National Capital Region Police Office para sa pormal na pagsisimula ng panahon ng kampaniya sa Martes, Pebrero 12.

Ayon kay NCRPO Chief P/Dir. Guillermo Eleazar, mahigpit ang kanilang pagbabantay sa Metro Manila bagama’t wala namang naitalang election hotspot dito.

Layon nito na tiyaking magiging maayos at mapayapa ang darating na midterm elections sa buwan ng Mayo ngayong taon.

Inihayag din ni Eleazar, isolated case lamang ang nangyaring pagpatay kay Brgy. Bagong Silangan, Quezon City Chairwoman Criselle Beng beltran na inihatid na sa huling hantungan kahapon.

Samantala, tiniyak din ni Eleazar na sasakupin na ng kanilang pagbibigay seguridad ang pagdiriwang naman ng araw ng mga puso o valentine’s day sa ika-labing apat ng buwang ito.

Ikinaalarma na rin maging ng WHO o World Health Organization ang idineklarang measles outbreak ng DOH o Department of Health sa Pilipinas.

Ayon kay Dr. Gundo Weiler, kinatawan ng WHO sa bansa, nuong isang taon pa nila binabantayan ang outbreak ng tigdas kung saan, aabot sa dalawampung libong mga pasyente na ang napaulat.

Gayunman, sinabi ni Dr. Weiler na hindi naman na sila nagulat na lumala ang kaso ng tigdas sa Pilipinas dahil sa kulang ang kumpiyansa ng mga pilipino na tanggapin ang vaccination program.

Batay sa tala ng WHO, aabot lamang sa pito mula sa sampung mga bata na may edad labing pito pababa ang nabakunahan kabilang na riyan ang bakuna kontra tigdas.

Sa panig naman ng DOH, ipinagmalaki ni Health Secretary Francisco Duque III na mas dumami na umano ang mga magulang na nagpupunta sa mga health centers para pabakunahan ang kanilang mga anak.

Sa panayam ng DWIZ kay Duque, sinabi nito na resulta ito ng ginagawa nilang pag-iikot sa mga komunidad upang ipaunawa ang kahalagahan ng bakuna kontra sa iba’t ibang karamdaman.

“Sa wakas yung kanilang takot doon sa mga dating isyu tungkol sa dengvaxia mukhang nawawala na. At ito naman takot sa measles ang ngayong namamayapgpag kaya sila naman ay nagpapabakuna ngayon, pero nakakalungkot lang may mamatay pa para lang maintindihan ang measles vaccine. So, kaya tuloy-tulou an gating pakikipag-ugnayan sa mga LGUs para paigtingin an gating immunization.” Pahayag ni Sec. Duque

(interview from IZ Balita Nationwide Linggo)

Tinanggal na ang sinasabing pitumpu’t limang bilyong pisong (P75 billion) isiningit na pondo ng DBM o Department of Budget and Management sa DPWH o Department of Public Works in Highways.

Ito ang ginawang pagtitiyak ni House Appropriations Committee Chairman Rolando Andaya matapos aprubahan na ng dalawang kapulungan ng Kongreso ang bicameral conference committee report sa panukalang pambansang budget sa 2019.

Ayon kay Andaya, natukoy na rin nila kung sino at kailan isiningit ang nasabing pondo.

Tinanggal na po namin ng dalawang kapulungan itong 75 billion na siningit ng DBM ng alas kuwatro ng umaga, tinanggal na po namin lahat. Nararapat lang na ibigay ito sa ibang proyekto. Pahayag ni Andaya

Samantala, nilinis naman ni Andaya si DPWH Secretary Mark Villar sa usapin ng umano’y isiningit na pondo sa ahensiya.

Aniya, sinadya ng mga sangkot na opisyal at empleyado ng DPWH na hindi ipaalam sa kalihim ang nabanggit na budget insertion.

Inamin ng mga testigo na walang kaalam-alam si Sec. Villar at lower rank ang kasama rito. Mukhang sindya talaga na ipaalam sa kanya kaya panahon na para imbestigahan ni Sec. Villar ang pangyayari. Paliwanag ni Andaya

Discretionary fund para sa mga kongresista, tiniyak

Aminado si House Appropriations Committee chairman Rolando Andaya na makatatanggap ng discretionary fund o pork barrel ang bawat kongresista mula sa panukalang 2019 national budget.

Ayon kay andaya, kabuuang isang daan animnapung milyong piso (P160 million) ang nakalaan para sa bawat kongresista na kinuha mula sa tinapyas na pitumpu’t limang bilyong pisong (P75 billion) isiningit umanong pondo sa DPWH.

Paliwanag ni Andaya, hindi lamang kamara ang makakakuha ng discretionary fund kundi maging ang ilang senador.

Binigyang diin naman ni Andaya na kanilang isasapubliko ang detalye at pinaggamitan ng nasabing pondo na nakalaan sa kani-kaniyang programa at proyekto ng mga kongresista.

Meron alokasyon ang lahat ng distrito. Ipapakita sa publiko kung ano ang napuntahan ng proyekto. Utos iyan ng Speaker Arroyo para maliwanagan kung sino ang nakakuha ng malaki o maliit. Ani Andaya

Magugunitang si Senador Panfilo Lacson ang unang nagsiwalat kaugnay ng matatanggap na discretionary funds ng ilang mga senador at kongresista mula sa 2019 national budget.

Ayon kay Lacson nasa dalawampu’t tatlo (P23 billion) hanggang dalawampu’t limang bilyon (P25 billion) ang naisingit dito para sa ilang kapwa niya senador.

Nawala nga ‘yung 75 billion at merong pinuntahan iyon, napunta sa DOH, sa Universal Healthcare, lahat institusyon. Pero P60 billion, meron pang 23 or 35 billion na ininsert ng kapwa ko senador, items like flood control. Kinuwestyon ko iyon. Pork ito. Pahayag ni Lacson

(Todong Nationwide Talakayan Interview)

Plano ngayon ng Department of Health o DoH na gawing mandatory ang pagpapabakuna sa mga bata.

Ito’y kasunod ng paglobo ng bilang ng mga kaso ng tigdas sa iba’t-ibang bahagi ng bansa.

Ayon kay DoH Secretary Franciso Duque III, kailangan na muling ipatupad ang executive order o EO na pinirmahan noon ni dating pangulo at ngayo’y House Speaker Gloria Macapagal-Arroyo hinggil sa dapat na pagpapabakuna ng mga bata bago pumasok sa preschool at primary school.

Nagkaroon lamang anya ng problema sa pagpapatupad nito dahil wala itong kaakibat na karampatang parusa sa mga magulang na hindi susunod sa naturang kautusan.

Nananatili pa rin sa inaprubahang panukalang P3.7 trillion 2019 national budget ng bicameral conference committee ang mga isiningit na pondo.

Ito ang iginiit ni Senador Panfilo Lacson na una nang nagsiwalat ng mga umano’y anomalya sa pambansang budget.

Ayon kay Lacson, maituturing na reciprocal consensus ang ginawa ng Kamara at Senado dahil pareho aniyang may insertions ang dalawang kapulungan ng Kongreso.

“I-dedescribe ko na lang as reciprocal consensus ibig sabihan parang kamutan na lang ng likod…parehong meron, so paano na magtatanggalan. Noong nag small group bicam, alam ko na ganoon mangyayari, kasi noong una iniisip ni Andaya na hindi eh, ang small group bicam natin we not go lower by this number. Ibig sabihin silang lahat. So sabi ko, mainam din yun lalo na tinugunan niya yung panawagan na gawin natin transparent nandiyan ang media, maski sino naandiyan at nakikinig sa ating pinag-uusapan.” Pahayag ni Lacson.

Samantala, umaasa naman si Lacson na bubusisiing mabuti ng malakanyang ang isusumite panukalang pambansang budget ng kongreso para mai-line item veto ni Pangulong Rodrigo Duterte ang mga makikitang pork bago ito mapirmahan.

Sinabi pa ni Lacson, naktitiyak siyang muling patutunayan ng pangulo ang political will nito lalo na sa mga malalaking usapin sa bansa.

“Mabuti na rin na nagkaroon ng usapin dito dahil naging conscious ang Malakanyang na posible nga maraming pork na nakaloob sa 2019 budget.” Ani Lacson.

(Interview from Sapol)

Ikinatuwa ng Malakanyang ang pagkakapasa ng 2019 national budget sa dalawang kapulungan ng kongreso.

Ayon kay Presidential Spokesperson Salvador Panelo, ikinalugod ng Palasyo na nagkasundo na ang Senado at Kamara para aprubahan ang pambansang budget.

Sinabi ng kalihim na mahalaga para sa bansa at sambayanan ang 2019 budget dahil dito nakasalalay ang mga budget priorities ng pamahalaan gaya ng infrastructure, development, pagpapalawig ng programa sa human development, poverty reduction at pagpapabuti sa social  services at iba pa.

Kasabay nito, ipinabatid ni Panelo na titiyakin ng gobyerno na matutupad ang pangakong genuine at makabuluhang pagbabago ni Pangulong Rodrigo Duterte.