HOT STORIES OF THE WEEK

Inatasan na ng Department of Environment and Natural Resources o DENR ang 178 city at municipal mayors na linisin ang Manila Bay maging ang mga ilog at estero sa paligid nito.

Ayon kay DENR Secretary Roy Cimatu, 47 estero ang “contributor” ng polusyon sa look ng Maynila hindi lamang sa Metro Manila kundi sa mga karatig lalawigan ng Bulacan, Bataan, Pampanga at Cavite.

Dapat anyang tumalima ang mga alkalde sa Ecological Solid Waste Management Act of 2000 na nagsasaad na ang mga local government unit ang dapat manguna sa waste segregation at disposal.

Kabilang sa mga dapat linisin ang Pasig River na dumadaloy mula sa Laguna Lake hanggang Manila Bay; Tullahan at Parañaque Rivers.

Mistulang piyesta ang unang araw ng campaign period ng mga senatorial at partylist candidate para sa 2019 midterm elections.

Sinimulan ng regional political party ni Davao City Mayor Sara Duterte-Carpio na Hugpong ng Pagbabago ang kanilang kampanya sa San Fernando, Pampanga na balwarte ni House Speaker at dating pangulong Gloria Arroyo.

Labin-tatlong (13) kandidato ang inendorso ng Hugpong na sina re-electionist senators Koko Pimentel, Cynthia Villar, JV Ejercito, Sonny Angara, dating senador Jinggoy Estrada, Pia Cayetano; Bong Revilla Jr., Ilocos Norte Governor Imee Marcos, dating Special Assistant to the President Christopher “Bong” Go, dating Presidential Adviser on Political Affairs Francis “Tol” Tolentino, dating PNP Chief Ronald Dela Rosa, Maguindanao Rep. Zajid Mangudadatu at dating journalist na si Jiggy Manicad.

Nagbahay-bahay naman sa Caloocan City ang “Otso Diretso” ng oposisyon sa unang araw ng kanilang kampanya kasama sina Vice President Leni Robredo at dating pangulong Noynoy Aquino.

Gayunman, pito lamang ang sumabak sa kampanya na sina re-electionist senator Bam Aquino, Magdalo Rep. Gary Alejano, Human Rights Lawyer Chel Diokno, dating Deputy Speaker Erin Tañada, dating Solicitor-General Florin Hilbay, dating Bangsamoro Transition Commission member Samira Gutoc at election lawyer Romulo Macalintal na dumalo pa sa isang media briefing malapit sa San Roque Cathedral habang sa Roxas City, Capiz nagsagawa ng sariling campaign activity si dating interior secretary Mar Roxas.

‘Kontra-Daya’

Samantala, nagpaalala ang election watchdog na Kontra Daya sa lahat ng mga kandidato ngayong nagsimula na ang campaign period.

Ayon sa grupo, dapat tiyakin ng mga kandidato na walang pondo o resources ng gobyerno ang magagamit para sa kani-kanilang pangangampanya.

Kinuwestiyon din ng grupo ang tila pangangampaniya mismo ni Pangulong Rodrigo Duterte sa mga kandidatong kaniyang ini-endorso nito.

Magugunita aniyang ipinaalala pa ng Pangulo sa mga miyembro ng kaniyang gabinete na huwag ikampaniya ang sinumang kandidato.

Hindi rin pinalampas ng kontra daya ang mga poster at campaign materials ng mga kandidato na nakapaskil pa rin sa kani-kanilang tanggapan.

Giit ng grupo, batay sa Section 7 ng Comelec Resolution No. 10488, bawal ang pagpapaskil at paglalagay ng campaign o propaganda materials sa mga pampublikong lugar kabilang na ang mga paarala,n, barangay hall at mga tanggapan ng gobyerno.—Jennelyn Valencia 

—-

Aminado ang Department of Health (DOH) na kabilang sa mga apektado ng measles outbreak ang mga lugar kung saan isinagawa ang kontrobersyal na pagbabakuna ng dengvaxia.

Ayon kay Health Secretary Francisco Duque, ang Central Luzon, Calabarzon, Mimaropa, NCR at Central Visayas ang mga may pinakamakataas ng kaso ng tigdas.

Ang mga naturang lugar aniya ay Dengvaxia-implementing regions at mayroon ding mababang immunization rates o kaunti ang mga nabigyan ng kahit anong bakuna tulad ng anti-measles vaccine.

Marami anyang magulang sa mga nabanggit na rehiyon ang natakot na pabakunahan ang kanilang mga anak dahil sa epekto ng kontrobersya sa dengvaxia.

Sa ngayon ay nasa  4,300 na ang tinamaan ng tigdas kabilang ang 70 namatay simula Enero 1 sa buong bansa.

Mga sanggol na anim na buwang gulang pababa dapat i-isolate

Pinayuhan ni Health Secretary Fransisco Duque III ang publiko lalo ang mga magulang na i-isolate muna ang mga sanggol na anim na buwang gulang pababa lalo’t kung mayroong measles outbreak sa kanilang lugar.

Ayon kay Duque, peligroso pang bigyan ng anti-measles vaccine ang mga sanggol na anim na buwang gulang pababa dahil hindi pa fully developed ang immune system ng mga ito.

Mayroon naman anyang natural protection laban sa tigdas ang mga sanggol na nakuha nila sa kanilang mga nanay.

Magugunitang pinalawak na ng Department of Health ang kanilang vaccination campaign sa pamamagitan ng pagsama sa mga sanggol na anim na buwan hanggang siyam na buwan sa mga binabakuhan kontra tigdas.

—-

Malamig ang NCCA o National Commission for Culture and Arts sa naging pahayag ni Pangulong Rodrigo Duterte na ikinukunsidera nitong palitan ng maharlika ang pangalan ng bansa.

Ayon kay Rolando Borrinaga, secretary ng National Committee on historical research ng NCCA, walang magiging epekto at kabuluhan ito sa mga pilipino.

Paliwanag ni Borrinaga, nagsimula ang panukalang palitan ng republika ng maharlika ang pangalan ng Pilipinas noong panahon ni dating Pangulong Ferdinand Marcos dahil sa pag-aakalang nagkakahulugan ito ng pagiging aristocrat o may mataas na estado sa buhay.

Binigyang diin ni Borrinaga, iba ang tunay na kahulugan ng maharlika.

“Hindi talaga iyon ‘royalty’, yung maharika parang middle class yun, a political middle class na conditional na sumusunod sa datu noon pwede ring hindi. Ito ang nakalimutan na social class sa ating mga textbooks. Ang equivalent niyan sa Visayas ay ‘tumawu’ parang sila yung tumatao sa mga social functions ng mga datu.” Pahayag ni Borrinaga.

interview from Balitang Todong Lakas

Nanganganib na mas tumaas pa ang presyo ng produktong petrolyo pagsapit ng Abril.

Ayon sa Department of Energy o DOE, inaasahan na matutuloy na ang pagpapatupad ng Amerika ng sanctions nito sa Iraq na isa sa pinakamalaking exporter ng langis.

Gayunman, umaasa ang ahensya na gagawa ng hakbang ang Organization of the Petroleum Exporting Countries o OPEC at mga kaalyado nito para hindi lubusang magmahal ang langis.

Dahil dito, pinayuhan ng DOE ang mga motorista na maging wais sa pagkonsumo ng kanilang langis.

Ngayong araw, muling inilarga ng mga kumpanya ng langis ang taas presyo sa kanilang mga produktong petrolyo.

Epektibo kaninang alas-6:00 ng umaga ang ang siyamnapung sentimos (P0.90) na dagdag sa kada litro ng gasolina ng kumpanyang Petron, Shell at Sea Oil.

Habang walumpu’t limang sentimos (P0.85) naman ang taas presyo sa kada litro ng kerosene at limampu’t limang sentimos (P0.55) sa kada litro ng diesel.

Magpapatupad din ng kaparehang taas presyo sa kada litro ng gasolina at diesel ang mga kumpanyang Phoenix Petroleum, Unioil, PTT Philippines, Total Philippines at Jetti, Eastern Petroleum at Petro Gazz.

Ayon sa DOE, ang taas presyo ay bunsod ng pagbabawas ng langis sa pandaigdigang merkado dahil sa dami ng supply bago natapos ang 2018.

—-

Maaaring ikunsidera ni Pangulong Rodrigo Duterte “balang-araw” ang pagpapalit ng pangalan ng Pilipinas.

Sa kanyang talumpati sa pamahahagi ng certificates of land ownership award sa Buluan, Maguindanao, aminado si Pangulong Duterte na hindi malayong gamitin niya ang “maharlika” bilang kapalit sa pangalan ng bansa.

Ayon sa punong ehekutibo, mas akma ang “maharlika”  dahil nananalaytay ang dugong  “malay” sa mayorya ng mga Pilipino.

“Philippines because it was discovered by Ferdinand Magellan using the money of King Philip kaya pagdating, ginawa nang “PHILIPpine”, pero okay na yan. Balang araw, palitan natin. Actually, tama si Marcos. Gusto niyang palitan ng “Maharlika”, “Republic of Maharlika”, because “Maharlika” is a malay word and it means serenity.”

Kung hindi anya dahil sa pananakop ng mga espanyol ay maaaring may kapayapaan sa bansa at walang hidwaan ng mga Kristyano at Muslim lalo sa Mindanao.

“Eh di sana pumunta kayo doon at pinatay ninyo ang mga kastila. Sila yung nagdala ng kanyon, ng baril. Okay lang yang rehiyon kung sino ang maniwala. Sila yung pumunta dito ng hindi naman nila lupa kaya naglagot si Lapu-Lapu, pinagtataga yung mga g****g… dapat sa kanila yon. Bakit siya punta punta rito? Hindi naman namin kasalanan yan, eh dumating yung mga p****g ****g yon, pinagpapapatay kami eh walang magawa eh. So for over 400 years, nawala talaga yung pagka-malay natin.”