HOT STORIES OF THE WEEK

Lumobo na sa 115 ang bilang ng mga nasawi dahil sa tigdas habang umabot na sa halos 7,000 ang naitalang kaso nito.

Ayon kay Health Secretary Francisco Duque III, naitala ang mga naturang bilang mula January 1 hanggang February 13 ng kasalukuyang taon.

25 porsyento naman ng mga kaso ng tigdas ay nagmula sa Metro Manila.

Samantala, patuloy pa rin ang pag-iikot at pagmo-monitor ng kalihim sa iba’t ibang lugar kung saan dumarami ang bilang ng kaso ng tigdas.

NDRRMC makikipagtulungan na sa DOH kontra tigdas

Makikipagtulungan na ang NDRRMC o National Disaster Risk Reduction and Management Council sa DOH o Department of Health para mapabilis ang pag-resolba sa lumalalang kaso ng tigdas sa bansa.

Ayon kay NDRRMC spokesman Edgar Posadas, nais ng kanilang konseho na mapabilis pa ang tinatayang dalawa hanggang tatlong buwan pang panahon bago mawala ang malawakang kaso ng tigdas.

Tutulong na aniya sila sa DOH sa pagmomonitor at pagbabantay sa mga naitatalang kaso.

Dagdag pa ni Posadas, tiniyak din naman ng DOH na manageable ang mga naturang kaso.

Mayorya ng mga Filipino ang naniniwalang bumaba na ang bilang ng mga gumagamit ng iligal na droga sa nakalipas na taon.

Batay ito sa resulta ng SWS o Social Weather Station sa huling bahagi ng 2018, kung saan lumabas na 66 na porsyento ng mga Filipino ang nagsabing bumaba na ang mga drug addicts sa kani-kanilang lugar.

14 na porsyento naman ng mga Filipino ang nagsabing dumami pa ang bilang mga drug users habang pitong porsyento ang naniniwalang walang pinagbago sa bilang ng mga ito.

Sa kapareho ding survey, lumabas na mayorya o katumbas ng 95 porsyento ng mga filipino ang nagsabing mahalagang mahuli ng buhay ang drug suspect habang limang porsyento naman ang nagsabing hindi ito mahalaga.

Isinagawa ang nabanggit na survey sa 1,444 adult respondents mula Disyembre 16 hanggang 18 ng taong 2018.

Nanganganib na mahawaan o magkaroon ng tigdas ang aabot sa 2.6 million mga bata sa Pilipinas.

Ito ang naging babala ng WHO o World Health Organization kasunod ng pagdedeklara ng measles outbreak sa ilang lugar sa bansa.

Ayon kay WHO Expanded Program on Immunization Technical Officer Maricel Castro, batay sa nakuha nilang datos mula sa DOH o Department of Health, aabot sa mahigit 2 million batang Filipino na may edad limang taon pababa ang hindi pa nababakunahan kontra tigdas.

Sinabi ni Castro, nangungunang dahilan rito ay ang malaking pagbaba ng tiwala ng mga Filipino sa programa sa bakuna ng pamahalaan.

Batay aniya sa pag-aaral ng London School of Hygiene and Tropical Medicine, 32 percent lamang ng mga Filipino ang nananatiling may tiwala sa bakuna nitong 2018.

Habang bumulusok naman sa 22 percent ang bilang ng mga Pinoy na nagniniwalang epektibo pa rin ang mga bakuna kumpara noong taong 2015.

Inilabas ng COMELEC o Commission on Elections listahan ng mga kandidato na mayroon pa ring iligal na campaign posters.

Sa pamamagitan ng twitter post ni COMELEC Commissioner Rowena Guanzon, tinukoy nito ang 40 mga kandidato sa pagkasenador kabilang ang mga re- electionist senator na sina Koko Pimentel, Cynthia Villar, Bam Aquino, JV Ejercito, Nancy Binay at iba pa.

Kasama rin sa mayroon pa ring mga iligal na campaign posters sina Freddie Aguilar, Neri Colmenares, Francis Tolentino, Atty. Larry Gadon at iba pa.

May ilan namang netizens ang nagtanong kung bakit hindi kabilang sa listahan si dating special assistant to the president Christopher Bong Go.

Ilang kandidato pumalag

Pumalag ang ilang mga tumatakbong kandidato sa pagka senador matapos na makasama ang kanilang pangalan sa inilabas na listahan ng COMELEC na mayroong illegal campaign posters.

Ayon kay Senador Koko Pimentel, dapat na tukuyin ng COMELEC ang mga lugar upang matanggal ito.

Depensa ni Pimentel, marami siyang mga supporters kaya hindi namomonitor kung saan – saan naglalagay ang mga ito ng tarpaulin.

Nagulat naman si Senador Nancy Binay nang makasama sa listahan ang kanyang pangalan.

Aniya, sa kanyang pagkakaalam ay hindi pa sila naglalabas at nagkakabit ng mga posters at tarpaulin.

Samantala, mariin namang kinuwestiyon ni Teddy Casiño ang campaign manager ni Neri Colmenares kung hindi kabilang sa naturang listahan ang manok ng administrasyon.

Bagama’t hindi binaggit ang pangalan ay sinabi ni Casiño na kaliwa’t kanan ang posters ng naturang kandidato bago pa man ang kampanya .

Habang si Colmenares na walang masyadong campaign materials dahil sa limitadong budget ay nakasama pa sa listahan.

Mahigit 30 reklamo na laban sa mga kandidatong lumabag sa election campaign ang natanggap ng COMELEC.

Tatlong araw ito nang simulan ang kampanya para sa mga tatakbo sa national position tulad ng senador at party list.

Sinabi ni COMELEC Commissioner Rowena Guanzon na nagpadala na sila ng notice sa mga kandidatong may illegal posters.

Ilang election officers nila ang nakakita sa paglabag partikular sa laki ng campaign materials at paglalagay nito sa hindi otorisadong lugar.

Sumampa na sa 87 ang kabuuang bilang ng mga nasawi dahil sa tigdas habang pumalo na sa mahigit 5,000 ang naitalang kaso ng tigdas sa bansa simula Enero ngayong taon.

Ito’y makaraang masawi ang lima pang bata habang naka-confine sa San Lazaro Hospital sa Maynila.

Nagkaloob naman ng 50 kama, personal hygiene kits at mga kumot ang Philippine Red Cross sa San Lazaro Hospital para sa dumadami pang bilang ng mga pasyente roon.

Panibagong kaso rin ng pagkasawi dahil sa tigdas ang naitala mula naman sa bayan ng pinamungahan sa Cebu.

Magugunitang sinabi ni Health Undersecretary Eric Domingo na inaasahang tatagal pa ang measles outbreak hanggang Marso.

Ipinag-utos na ng Department of Health o DOH sa lahat ng ospital na buksan ang kani-kanilang measles fast lane.

Ito’y sa gitna ng projection ng DOH na posibleng sa Abril o Mayo ay maaaring kontrolado na ang tigdas outbreak.

Ayon kay Health Secretary Francisco Duque, sa ngayon ay mayroong “rising trend” o papataas pa rin ang bilang ng nagkakasakit kaya’t mahalagang magsimula sa mga ospital ang hakbang kontra tigdas.

Sa datos ng kagawaran, umabot na sa 5,600 ang measles cases kung saan umakyat na sa 87 ang namatay sa buong bansa simula Enero 1.