HOT STORIES OF THE WEEK

Patuloy na magpapatrolya ang militar sa West Philippine Sea.

Ito ang tiniyak ni Armed Forces of the Philippines (AFP) Chief Benjamin Madrigal Jr. sa gitna na rin ng ulat ng presensiya ng daan-daang mga Chinese vessel sa paligid ng Pagasa Island.

Ayon kay Madrigal, may mga ginagawang hakbang na ang militar at maging ang iba pang ahensya tulad ng Philippine Coast Guard (PCG) para matugunan ang nasabing usapin.

Aniya, nagpadala na rin sila ng mga military reports sa mga kinauukulang ahensya para agad na maresolba ang gusot.

Nilinaw rin ni Madrigal na umaabot lamang sa mahigit dalawang daang (200) mga Chinese vessel ang namataan na pabalik-balik malapit sa Pagasa Island batay na rin sa mga nakalagay na numero sa mga bangka.

Una nang isiniwalat ng Western Command na umaabot sa animnaraang (600) mga Chinese vessels ang naispatan sa Pagasa Island sa unang bahagi ng taon.

Palace

Samantala, tinawag na exaggerated ni Presidential Spokesperson Salvador Panelo ang lumabas na ulat na umaabot sa animnaraang (600) mga barko ang namataan sa paligid ng Pagasa Island sa South China Sea.

Ayon kay Panelo, umaabot lamang sa dalawang daan at pitumpu’t lima (275) ang mga kabuuang bilang ng mga nakitang barko ng China sa Pagasa Island batay na rin aniya sa kumpirmasyon ng AFP Western Command.

Dagdag pa ni Panelo, naka-istambay lamang at hindi nag-iikot ang mga namataang barko ng China.

Kasabay nito, tiniyak naman ni Panelo na pormal nang naghain ng diplomatic protest ang Department of Foreign Affairs (DFA) laban China kaugnay ng usapin.

—-

Ibinasura ng Sandiganbayan ang mosyon ng umano’y pork barrel fund scam queen na si Janet Napoles na baligtarin ang hatol na guilty laban sa kanya.

Sa halip ay pinagtibay ng 1st Division ng Anti-Graft Court ang hatol kay Napoles at Richard Cambe, dating aide ni dating Senador Ramon Revilla Jr., kaugnay sa kasong plunder sa pamamagitan ng priority development assistance fund scam.

Ipinunto ng negosyante sa kanyang motion for reconsideration na walang main plunderer sa naturang kaso matapos maabswelto si Revilla.

Iginiit ni Napoles na hindi siya ang main plunderer dahil isa siyang pribadong indibidwal at hindi rin dapat plunder ang inihaing kaso laban sa kanya.

Gayunman, sa resolution ng Sandiganbayan na “promulgated” noong March 13, isinampa ng Office of the Ombudsman ang plunder case  laban kay Revilla “at” sa staff nitong si Cambe kung saan binigyang-diin ang salitang “at.”

Samantala, nilinaw ng Sandiganbayan na bagaman walang nakitang sapat na ebidensya upang ideklarang guilty si Revilla, mayroon namang malakas na pruweba na ang kapwa akusado nitong si Cambe na isang government official kasama si Napoles ang mga main plunderer sa kaso.

(with report from Jill Resontoc)

Minaliit ni Ambassador Zhao Jianhua ang kasong isinampa ng isang grupo ng mga Pilipino laban kay Chinese President Xi Jinping sa International Criminal Court o ICC.

Naniniwala si Zhao na hindi uusad ang kaso laban kay President Xi dahil hindi naman kinikilala ng Tsina ang ICC at wala itong hurisdiksyon sa kanilang bansa.

Isang uri lamang ng pamumulitika ang isinampang kaso nina dating Foreign Affairs Secretary Albert Del Rosario at dating Ombudsman Conchita Carpio-Morales.

Kathang isip lang din aniya ang naging batayan ng kaso at nagkaroon ng maling paggamit sa mandato ng ICC.

—-

Nagsampa na ng diplomatic protest ang gobyerno laban sa China.

Ipinabatid ito ni Presidential Spokesman Salvador Panelo matapos i-protesta ng DFA ang halos tatlong daang Chinese vessels na naispatan ng militar na nasa paligid ng pag asa island sa South China Sea mula Enero hanggang nitong nakalipas na Marso.

Hindi naman masabi ni Panelo kung kailan inihain ang nasabing diplomatic protest laban sa China.

Tinawag namang exaggerated ni Panelo ang aniya’y report ng media na 600 barko ng China ang nakapalibot sa Pag-asa Island.

Maraming ebidensyang hawak ang gobyerno para patotohanang ginagamit ng mga grupong konektado sa NPA ang nakukuhang pondo mula sa Belgium at European Union (EU).

Sinabi ito sa DWIZ ni AFP PIO Chief Coronel Noel Detoyato kaya’t inilobby nila sa EU at Belgium ang pagpapatigil sa pagbibigay ng pondo sa ilang non-government organizations (NGOs) sa Pilipinas.

Binigyang diin ni Detoyato na pawang lehitimong usapin tulad ng climate change ang ginagamit ng mga naturang grupo para makakuha ng pondo at sinisiraan ang gobyerno na hindi nagpapairal ng demokrasya.

“Marami tayong nakalap na mga ebidensya at affidavit ng mga nagbabalik loob na. ‘Yun nga ang magiging scheme. Double funding scheme kung minsan triple pa magpapadala sila ng request ng funding sa isa or dalawang project or tatlong countries for the same project. Then ang hatian pa nila ay 60-40 minsan baliktad 40 doon sa project 60 doon sa armado. May mga double fund scheme silang ginagawa.” Pahayag ni Col. Detoyato.

Ayon kay Detoyato, tiniyak ng EU at Belgium ang imbestigasyon kung paano ginamit ang pondong ibinigay nila sa mga nasabing grupo matapos nilang ipaabot sa mga ito na ginagamit sa terorismo at paglaban sa gobyerno ang ayudang galing sa labas ng bansa.

“Nachachannel nila ‘yun papunta sa ating mga kalaban na grupo yung mga grupong na gustong ibagsak an ating gobyerno. Yung grupong CPP-NPA-NDF eh listed yung NPA as terror group beware of them at magpapadala sila ng imbestiga kung saan napunta yung mga perang pinadala nila.” Ani Col. Detoyato.

Interview from Ratsada Balita

Nanindigan ang PNP na hindi masaker ang pagpatay sa 14 na magsasaka sa Negros Oriental nuong Sabado.

Tiniyak ng PNP ang kahandaang sagutin ang mga imbestigasyon sa alegasyon laban sa kanila ng mga militante.

Iginiit ni PNP Chief Police General Oscar Albayalde na nanlaban sa mga otoridad ang mga naturang magsasaka habang isinisilbi sa kanila ang arrest warrant.

May isang pulis pa aniya ang nasugatan habang 12 ang naaresto kaya’t nanindigan ang PNP chief na lehitimo ang operasyon.

Sinabi pa ni Albayalde na may mga kasong kinasasangkutan ang mga target ng operasyon tulad ng pananambang sa mga pulis at sundalo kayat aarestuhin sila.

May ulat mula kay Jaymark Dagala (Patrol 9)

Tiniyak ni QCPD o Quezon City Police District Director P/BGen. Joselito Esquivel Jr ang isang ligtas at mapayapang pagdaraos ng kampanya ng mga lokal na kandidato sa lungsod.

Inatasan ni Esquivel ang 12 police station commanders ng QCPD na paigtingin ang paglalagay ng mga dagdag na public checkpoints sa mga strategic areas upang mapigilan ang posibleng aktibidad ng mga wanted persons o mga criminal gangs na maaaring magamit na gun-for-hire.

Humihingi naman ng pang unawa ang QCPD sa publiko sa lilikhaing abala ng mga checkpoints habang iniutos din niya sa mga operatiba na gawing tuloy-tuloy ang mga operasyon sa lahat ng uri ng kriminalidad partikular ang laban sa illegal drugs at sa paglipana ng mga loose firearms.

Pinayuhan din ni Esquivel ang mga lokal na kandidato sa Quezon City na makipag coordinate sa QCPD sa kanilang mga gagawing political rallies para sa ipatutupad na hakbanging panseguridad.

Nanindigan ang pambansang pulisya na lehitimo ang ginawang operasyon ng militar at pulisya sa Negros Oriental na ikinasawi ng labing apat na magsasaka.

Ayon kay PNP Spokesman Col. Bernard Banac, tumupad lamang sa kanilang tungkulin ang mga awtoridad at iginiit nitong walang nalabag na batas ang kanilang mga tauhan sa ikinasang operasyon.

Sumusunod lamang aniya sila sa kung ano ang i-utos ng korte tulad ng pagsisilbi ng search warrant laban sa sinumang ipinagharap ng reklamo sa korte.

“Yung pag-implement ng search warrant ay bahagi lamang ng duty or function ng Philippine National Police (PNP). At dahil sa pag-implement natin ng search warrants may mga casualties, narekober na mga baril at ito ay isinagawa ng PNP ayon sa madanto ng court natin.” Pahayag ni Banac.

Kasunod nito, sinabi ni Banac na handa ang pulisya na sagutin ang lahat ng mga reklamo at alegasyong ibinabato sa kanila ng mga militanteng grupo sa tamang oras, panahon at lugar.

Una nang kinilala ng Kabataan Party list ang mga nasawi na sina Ismael Avelino, Edgardo Avelino, Melchor Pañares, Rogelio Ricomuno, Mario Pañares, Gonzalo Rosales, Genes Palmarea at Ricky Ricomuno.

Habang aabot naman sa labing dalawa ang naaresto ng mga awtoridad sa magkakahiwalay na operasyon.

“Kung may katanungan man at may mga alegasyon, well, sasagutin naman ito ng PNP sa tamang panahon at venue. Sa ngayon, ginampanan ng PNP ang tungkulin nito bilang tagapagpatupad ng batas at magpapatupad ng peace and order sa ating bansa.” Ani Banac.

Interview from Todong Nationwide Talakayan (TNT)