HOT STORIES OF THE WEEK

Hihilingin ni Senadora Risa Hontiveros na imbestigahan ng Senado ang balita na daan-daang mga Chinese vessel ang namamataan sa Panatag Shoal.

Ayon kay Hontiveros, maghahain sya ng resolution hinggil dito para maibestigahan at malaman ng publiko ang tunay na sitwasyon sa lugar at kung ano ang hakbang na ginagawa ng ating pamahalaan.

Mahalaga aniyang malaman kung humingi na ng tulong ang ating pamahalaan sa international community kaugnay ng aniya’y illegal, unreported at unregulated fishing ng China.

Nais ding malaman ng senadora ang kabuuang foreign at security policy direction ng administrasyon sa patuloy na panghihimasok ng China sa katubigan ng Pilipinas.

Malaking katanungan din sa senadora kung kontrolado pa ba ng administrasyong Duterte ang ating territorial waters o isinuko na ito sa China.

May ulat mula kay Cely Ortega-Bueno (Patrol 19)

Nakatakda nang lagdaan ni Pangulong Rodrigo Duterte ang 2019 national budget.

Ayon kay House Speaker Gloria Macapagal Arroyo, ipinabatid na sa kanila ang petsa kung kailan sila magtutungo ng Malacañang para sa pagpirma ng Pangulo sa pambansang budget.

Sinabi ni Arroyo, sa ngayon ay inaayos na lamang ng Malacañang ang mga bahagi o probisyon sa panukalang budget na ibi-veto ni Pangulong Duterte.

Samantala, hindi pa rin tumitigil ang patutsadahan ng dalawang kapulungan ng Kongreso sa nilalaman ng panukalang budget.

Sinalag ni Senate President Vicente Sotto III ang alegasyon ni House Committee on Appropriations Chairman Rolando Andaya na sinasabotahe ng Senado ang mga proyektong pang-imprastrsaktura ng Pangulo nang galawin ang mahigit pitumpu’t limang (75) bilyong piso sa 2019 budget.

—-

Binalaan ni Pangulong Rodrigo Duterte ang mga pulitikong gumagamit ng ‘goons’ ngayong eleksyon upang manakot ng mga botante.

Sinabi ng Pangulo na tatapatan niya ng isang batalyong army ang mga goons ng mga pulitiko.

Tiniyak pa ng Pangulo na ipapahuli din niya ang mga goons na mayroong mga armas.

“Huwag kayong magkamali diyan maggamit ng mga goons, mga ganon kasi papadalhan ko kayo dito ng isang batalyon na army, totoo lang. I will order the Armed Forces to go sa Malabon and hulihin lahat ‘yung mga may armas.” Ani Pangulong Duterte

Mahigpit na pinaalalahanan din ng Pangulo ang mga pulis at militar na manatiling non-partisan o hindi kumikiling o sumusuporta sa anumang partido politikal.

 “Mag-neutral kayo o ipaalis ko kayo dito. You must be in the middle. I will not allow the police or the military to be used by anybody – kapartido ko man o kalaban sa politika.”

“Their job is to maintain law and order without fear or favor. Iyan ang utos ng Constitution, iyan ang sundin natin.” Pahayag ni Pangulong Duterte

—-

Asahan na ang mas mainit pang panahon sa Metro Manila sa buwang ito.

Ito ang babala ng PAGASA sa mga taga-Metro Manila dahil posibleng pumalo sa 38 degrees Celsius ang temperatura sa kalakhang Maynila.

Samantala, ipinabatid ni Analiza Solis, Hepe ng Climate Impact Monitoring and Prediction Section ng PAGASA na inaasahan namang papalo sa 39.5 degrees Celsius ang pinakamataas na temperatura sa Tuguegarao, Cagayan.

Sinabi ni Solis na ang mainit na panahon ay dulot ng El Niño phenomenon na patuloy na mararanasan sa mga susunod pang buwan.

Dahil dito, pinayuhan ng PAGASA ang publiko na gumawa ng mga hakbang para makaiwas sa heat stress at tipirin ang paggamit ng tubig.

Ang pinakamataas na temperatura sa Metro Manila ay naitala sa 38.5 degrees Celsius noong May 14, 1987 samantalang nasa 42.2 degrees Celsius sa Tuguegarao City na naramdaman noong May 11, 1969.

—-

Kinumpirma ng Department of Foreign Affairs (DFA) na naghain na nga ang bansa ng diplomatic protest kaugnay sa mahigit animnaraang (600) mga sasakyang pandagat ng China na umaaligid sa Pag-asa Island.

Sa pamamagitan ng kanyang Twitter, sinabi ni DFA Secretary Teddy Boy Locsin Jr. na inihain niya ang protesta bago pa man siya magtungo sa China.

Nagkaroon ng official visit si Locsin sa China noong March 18 hanggang 21.

Sinabi ni Locsin na ginawa niya ito para hindi naman siya maakusahang hindi sinsero kung ipapasa niya ang protesta pagkatapos ng kanyang naging pagbisita.

Sa kabila nito ay nanindigan naman si Locsin na hindi niya isasapubliko ang naturang diplomatic protest.

Sa huling ulat, hindi lamang mga mangingisdang Tsino ang nasa katubigang sakop ng bansa bagkus ay mga Chinese militia.

Samantala, nais lamang ng China na makipag-kaibigan at magkaroon ng maayos na relasyon sa Pilipinas.

Ito ang naging pahayag ni Pangulong Rodrigo Duterte sa gitna ng mga ulat ng pagdami ng mga barko ng China sa paligid ng Pag-asa Island sa pinagtatalunang teritoryo sa South China Sea.

Sa kanyang talumpati sa campaign rally ng PDP-Laban sa Malabon City, ipinunto ni Pangulong Duterte ang pagbibigay ng mga armas at bala ng China nang walang hinihinging kapalit bilang patunay ng kanilang pakikipag-kaibigan.

Ito ay matapos aniyang mabigo ang Amerika na i-deliver ang mga biniling baril ng bansa.

Binanggit din ng Pangulo ang suporta ng China sa proyektong pang-imprastraktura ng kanyang administrasyon.

—-

Pirmado na ang implementing rules and regulations (IRR) ng Republic Act 11203 o Rice Tariffication Act.

Ito ang inihayag ni Presidential Spokesman Salvador Panelo matapos ang cabinet meeting na pinangunahan ni Pangulong Rodrigo Duterte sa Malakanyang, noong Lunes.

Ayon kay Panelo, ang IRR ng Rice Tariffication Law ang lilikha sa isang rice industry road map na layuning paunlarin ang nasabing sektor.

Ang IRR ay nilagdaan ng National Economic and Development Authority at Department of Budget and Management habang nakabinbin ito sa legal department ng Department of Agriculture.

Sa ilalim ng Rice Tariffication Law, aalisin na ang import restrictions sa bigas upang mapababa ang presyo nito sa pamilihan.

—-

Sa susunod na buwan ay posibleng maibsan na ang problema sa tubig.

Ito ayon sa PAGASA ay dahil sa darating na buwan partikular sa huling bahagi nito ay mararanasan na ang pag-ulan.

Kasabay nito, sinabi ng PAGASA na nakabawi na ang ilang probinsya sa Mindanao dahil umulan na sa rehiyon.

Department of Water

Tinutukan sa idinaos na cabinet meeting ang paglikha ng Department of Water.

Ipinabatid ni Presidential Spokesman Salvador Panelo na tinalakay din sa pulong ang panukalang pagtatag sa Department of Disaster Resilience para matugunan ang epekto ng El Niño at kakapusan ng supply ng tubig.

Pinag-usapan aniya ang immediate, medium at long term interventions tulad nang pagpapaigting ng water at energy conservation.

Bukod dito, inihayag ni Panelo na pinag-usapan din sa cabinet meeting ang dredging ng waterways, replacing tunnels and aqueducts, paglalagay ng water tank systems sa lahat ng DOH hospitals at pagbibigay ng pondo para sa pagtatayo ng water treatment plants.

Inilatag naman ni NEDA Undersecretary Adoracion Navarro ang panukalang executive order na magpapaigting sa National Water Management Council.

Sa ilalim ng panukalang EO, pag-iisahin na ang NWRB at river basin control office bilang national water management council.

Dahil dito, magkakaroon na ng streamlining at mapag-uusa ang planning at regulation sa lahat ng water at river basins sa buong bansa at kalaunan ay babalangkasin ang national water management framework plan.

—-

Posibleng maramdaman hanggang Hunyo ang epekto ng El Niño sa bansa.

Ito ay ayon sa Philippine Atmospheric Geophysical and Astronomical Services Administration (PAGASA) kasabay na rin ng patuloy na pagbaba ng lebel ng tubig sa mga dam bunsod ng nararanasang matinding init.

Gayunman, tiniyak ng ahensya na hindi pa umaabot sa critical level ang mga pangunahing dam sa bansa at kasalukuyan pa ring nananatili ang mga ito sa operational status.

Ayon Pagasa Senior Weather Specialist Jorybell Masallo, kaya pa ng mga dam na mag-supply ng tubig sa mga kailangang patubig at mga kabahayan.

Dagdag ni Masallo, nakatulong din ang mga naranasang local thunderstorms nitong Marso sa ilang lugar sa bansa tulad sa Mindanao.

Samantala, posibleng magkaroon din ng epekto sa paglago ng ekonomiya ng bansa ang El Niño phenomenon batay sa naging pagtaya ng World Bank.

Ayon sa World Bank, dahil sa matinding init ay maaring magkaroon ng supply constraint sa pagkain na makaaapekto sa mga mahihirap.

25 areas under ‘state of calamity’

Dalawampu’t limang (25) lugar na ang isinailalim sa state of calamity dahil sa El Niño phenomenon.

Ipinabatid sa DWIZ ni National Disaster Risk Reduction and Management Council (NDRRMC) Spokesman Edgar Posadas na kabilang sa mga tinamaan ng matinding tagtuyot ang mga lugar sa Regions 1 hanggang 12 gayundin ang Bangsamoro Autonomous Region in Muslim Mindanao o BARMM at Cordillera Administrative Region o CAR.

Sinabi ni Posadas na pumapalo na sa mahigit apat na bilyong piso na ang pinsala partikular sa agrikultura ng matinding tagtuyot.

“Regions 2 po, Cagayan Valley, Region 3, Calabarzon, Mimaropa, 5, 6, 7 Regions 8, 9, 10, 11, 12 at BARMM kasama din ang CAR kasama rin ang Region 1, naglalaro po tayo ngayon between 4.384 billion pero maaari pang magbago, ito po ay base sa datos ng Departmnet of Agriculture.” Ani Posadas

Ayon kay Posadas, matapos maideklarang nasa state of calamity magagamit ng mga LGU ang kanilang pondo para makatugon din kontra El Niño phenomenon.

“Puwede po silang mag-mobilize ng local farms nila para humanap sila ng solusyon base na rin sa kanilang lokal na pagpapalano, local game plan nila para magastos ang available funds nila para tugunan as first responder ‘yung kanilang mga pangangailangan at kung saka-sakaling kulang nandun nnaman ang regional at national resources natin.” Pahayag ni Posadas

Cloud seeding

Malaking tulong ang cloud seeding operations para maibsan ang problema sa El Niño phenomenon.

Sinabi sa DWIZ ni Edgar Posadas na pitong beses nang nakapagsagawa ng cloud seeding operations ang gobyerno sa mga lugar na apektado ng matinding tagtuyot partikular sa Region 2.

Tiniyak ni Posadas ang patuloy na pagkilos ng gobyerno para masolusyunan ang El Niño phenomenon.

“Isa po ito sa pinaka-importanteng efforts natin ngayon at a national level, meron din pong efforts kagaya ng paghahanap ng alternatibong sources of water o tubig kagaya ng paghuhukay ng mga wells at paghahanap ng iba pang sources ng tubig sa mga karatig lugar na malapit sa Metro Manila na posibleng makadagdag sa supply ng tubig natin.” Dagdag ni Posadas

—By Judith Larino / (Balitang Todong Lakas Interview)

—-