HOT STORIES OF THE WEEK

Naaresto ng pinagsanib na puwersa ng CIDG o Criminal Invesitgation and Detection Group –ARMM at Cotabato City Police Office ang isa sa mga nasa likod ng madugong Mamasapano Massacre noong Enero 2015.

Kinilala ni Plt/Col. Mary Grace Madayag, spokesperson ng CIDG ang naarestong si Tamano Esmail Sabpra na kilala rin sa pangalang Tamano Sabpra Esmael.

Inaresto si Esmael sa bisa ng mandamiyento de aresto na inilabas ni Judge Alandrex Betoya ng 12th Judicial Region, Branch 15 ng Cotabato City noong January 25, 2017 dahil sa kasong direct assault with murder.

Kabilang si Esmail sa mga miyembro ng MILF o Moro Islamic Liberation Front na nasangkot sa madugong engkuwentro sa Tukanalipao, Mamasapano kung saan 44 SAF o Special Action Force troopers ang nagbuwis ng buhay.

Kasunod iyan ng ikinasang ‘Oplan Exodus’ ng PNP – SAF para tugisin at arestuhin ang Indonesian bomb maker na si Zulkifli Binhir alyas ‘Marwan’ na napatay naman sa bakbakan.

Walang inirekumendang piyansa ang korte para sa pansamantalang kalayaan ni Esmael habang patuloy na nililitis ang kaniyang kaso.

Apat (4) sa bawat sampung (10) Pilipino ang hindi kumbinsido sa magandandang intesnyon ng China sa Pilipinas.

Ito ang lumabas sa survey ng Social Weather Stations o SWS, lumilitaw na apatnapu’t apat (440 na porsyento ng mga Pinoy ang hindi naniniwalang para sa kabutihan ng mga Pilipino ang nais ng China.

Tanging nasa dalawampu’t pitong (27) porsyento lamang ang naniniwala habang dalawampu’t siyam (29) na porsyento ang undecided.

Ginawa ang naturang survey noong Disyembre 16 hanggang 19 noong nakaraang taon sa may isanlibo apatnaraan at apatnapung (1,440) respondents.

Lumabas ang naturang survey sa harap ng napaulat na daan-daang Chinese vessel na nakapaligid sa Pag-asa Island at dredging vessel na inirereklamo naman ng mga taga-Lobo, Batangas.

—-

Bumagal pa ang pagtaas ng presyo ng mga pangunahing bilihin sa bansa nitong Marso.

Batay sa datos ng Philippine Statistics Authority (PSA), pumalo lamang sa 3.3 percent ang inflation rate nitong Marso, mababa sa 3.8 percent na naitala nuong Pebrero.

Pangunahing dahilan ng pagbagal ng pagtaas ng presyo ng bilihin ang halos hindi gumagalaw na presyo ng pagkain at non-alcoholic beverages.

Ang inflation rate na naitala nitong marso ay pasok sa 3.1 hanggang 3.9 percent na pagtaya ng Bangko Sentral ng Pilipinas (BSP).

Ayon kay PSA Asst. Secretary Josie Perez, ito na ang pinakamababang inflation rate mula nuong Enero ng 2018.

Sa kabuuan ng NCR, naitala ang 3.2 percent na inflation rate.

Pinamataas naman ang inflation rate sa MIMAROPA na 4.8 percent samantalang pinakamababa naman sa Zamboanga Peninsula Region (Region IX) na nakapagtala ng two percent inflation rate.

—-

Hiniling ng Public Attorney’s Office (PAO) na mailipat sa iisang korte sa Quezon City ang pagdinig sa lahat ng kasong may kaugnayan sa kontrobersiyal na Dengvaxia vaccine.

Sa kanilang inihaing petisyon sa Korte Suprema, iginiit ni PAO Chief Atty. Persida Rueda-Acosta na mas mabilis ang pag-usad sa mga nasabing kaso kung ililipat ang pagdinig nito sa iisang venue.

Dagdag ni Acosta, posibleng maging magkakaiba rin aniya ang desisyon sa mga kaso dahil magkakahiwalay itong isinampa sa iba’t ibang korte.

Umaasa naman ang PAO na didinggin ng Korte Suprema ang kanilang kahilingan at mag-aatas ito ng special court na lilitis sa lahat ng kasong may kaugnayan sa Dengvaxia.

Magugunitang isinampa sa iba’t ibang korte ang mga isinampang kaso hinggil sa Dengvaxia dahil mula sa magkakahiwalay na lugar ang mga umano’y biktima ng kontrobersiyal na bakuna.

—-

Lumobo ang bilang ng nagkakasakit ng dengue sa bansa ngayong taon.

Ayon sa Department of Health (DOH), mahigit limampu’t dalawang libo (52,000) ang nagkasakit ng dengue mula noong January 1 hanggang March 23, 2019 kung saan mahigit dalawang daan (200) dito ang nasawi.

Higit na malaki ito kumpara sa naitalang bilang ng nagka dengue sa parehong panahon noong 2018.

Nagbabala naman ang DOH na posibleng mas lumobo pa ang bilang ng tatamaan ng dengue ngayong tag-init.

Paliwanag ng DOH, mas agresibo ang mga lamok sa mangangagat kapag mainit ang panahon.

Dagdag pa dito, ngayong taon tatama ang mas maraming bilang ng may dengue dahil na rin sa 3-year cycle ng dengue kung saan noong dalawang nakalipas na taon ay nagkaroon ng pagbaba sa bilang na susundan naman ng biglaang pagdami ng nagkakasakit ng dengue.

—-

Malamig si Pangulong Rodrigo Duterte sa mga panukalang isapubliko ang pangalan ng mga artistang sinasabing sangkot sa iligal na droga.

Sa kanyang naging talumpati sa Puerto Princesa City Palawan, sinabi ng Pangulo na walang pangangailangan para ilabas ang listahan ng mga artistang sangkot sa iligal na droga at iba pang drug users dahil hindi naman aniya tumatakbo ang mga ito sa halalan.

“If they ought to be arrested, but if I will… release it without a reason… people have nothing to do with their crimes. But if you tell me that I will release it without any purpose at all, that is bad.”

“I will release those seeking public office. People have the right to know the people they are electing.” Pahayag ni Duterte

Pag-amin pa ni Pangulong Duterte, hindi rin siya humihingi ng kopya ng listahan ng mga celebrities na isinasangkot sa iligal droga.

Una nang inihayag ni Philippine Drug Enforcement Agency (PDEA) Director General Aaron Aquino na nasa tatlumpu’t isang (31) mga celebrities ang kabilang sa kanilang narco-list.

—-

Nakaambang maramdaman ang dagdag singil ng Manila Electric Company (Meralco) ngayon buwan.

Ayon kay Meralco Spokesperson Joe Zaldarriaga, maliit lamang na adjustment ang kanilang ginawa.

Inaasahang sa Lunes ay mag-iiba na ang galaw ng singilan para sa Arpil bill.

Samantala sa ika-apat na sunod na araw itinaas muli ang yellow alert sa Luzon grid na nanagangahulugang manipis ang reserbang kuryente.

Maraming planta kasi ang pumalya at ang iba naman ay nagbabawas sa produksyon ng kuryente.

Gayunman tiniyak pa rin ng Department of Energy (DOE) na sapat pa rin ang supply ng kuryente sa buong tag-init at hindi mauuwi sa brownout.

—-

Sinabi ni Pangulong Rodrigo Duterte na sususpindihin nito ang writ of habeas corpus matapos ang naging pahayag ng isang senador kaugnay ng government contracts.

Ang naging banta ng punong ehekutibo ay kasunod ng komento ni Senate Minority Leader Franklin Drilon kaugnay sa paghimok nito na maingat na busisiin ng pamahalaan ang mga government contracts.

Ayon sa Pangulong Duterte, maraming problema ang bansa at dahil sa mga ito nagbanta siya na magdedeklara ng suspensyon ng writ of habeas corpus at ipaaaresto niya ang kanyang mga kritiko.

“I have enough problems with criminality, drugs, rebellion and all. Pero pag ako ang pinaabot ninyo nang sagad but if you push me to limit, I will declare the suspension of writ of habeas corpus and I will arrest all of you. Kasama kayo sa mga rebelde, mga kriminal pati mga durugista” Pahayag ni Pangulong Duterte.

Dagdag din ni Pangulong Duterte may posibilidad din aniya na magdeklara siya ng revolutionary war hanggang sa pagtatapos ng kanyang termino kapag siya ay sinagad.