HOT STORIES OF THE WEEK

Itinaas na ng Department of Foreign Affairs (DFA) sa alert level 3 ang kanilang alarma sa ilang distrito ng Libya partikular sa Tripoli.

Kasunod ito ng rekomendasyon ng Embahada ng Pilipinas sa Tripoli dahil sa nagpapatuloy na kaguluhan doon bunsod ng nararanasang civil war.

Sa abiso ng DFA, bukod sa kapitolyo ng Libya, sakop din ng alert level 3 ang labing tatlo (13) pang distrito sa paligid ng Tripoli na hanggang sa 100 kilometer radius ang layo.

Samantala, kasabay ng pagtataas ng alerto, magpapatupad na ang pamahalaan ng voluntary repatriation sa mga Filipinong nagtatrabaho sa mga nabanggit na lugar sa Libya.

Hindi na rin papayagan ang mga nagbabakasyong Overseas Filipino Workers (OFWs) sa Pilipinas na makabalik ng Libya hangga’t hindi ibinababa sa alert level 2 ang alarma doon.

Maaari namang makipag-ugnayan sa embahada ng Pilipinas sa Tripoli ang mga OFW na nais nang umuwi ng bansa.

—-

Ginugunita ngayong araw, Abril 9 ang ika-77 Araw ng Kagitingan.

Alinsunod ito sa bisa ng Executive Order Number 203 na naglalaan sa Abril 9 bilang araw ng pagbibigay parangal sa kagitingan ng mga Filipinong nagsilbi at nagtanggol sa bansa sa panahon ng giyera.

Gayundin ang pag-alala sa pagbagsak ng Bataan noong Ikalawang Digmaang Pandaigdigan.

Ngayong taon, may tema ang Araw ng Kagitingan ng “Sakripisyo ng Beterano ay Gunitain, Gawing Tanglaw ng Kabataan Tungo sa Kaunlaran”.

Kaalinsabay nito ang Philippine Veterans week na nagsimula noong Abril 5 at magtatapos sa Abril 11.

Sa ipinalabas na pahayag ng Philippine Veterans Affairs Office (PVAO), kanilang binigyang diin ang papel at pagsusumikap ng mga war veterans para matamo ang kalayaang tinatamasa ng bansa sa kasalukuyan.

—-

Inaasahang lagdaan ni Pangulong Rodrigo Duterte ang 2019 proposed national budget ngayong linggo.

Ito’y ayon kay Cabinet Secretary Karlos Nograles.

Pinag-aaralan pa aniya ng pangulo ang panukalang pondo at tinatapos pa ang kanyang veto message.

Ito aniya ay inihahanda na ng Malakanyang, Department of Budget and Management at Office of the President noong nakaraang linggo.

Samantala, sa gitna ng naganap na usapin sa pagitan ng Senado at Kamara hinggil dito, ay magugunitang sinabi ni Senate President Sotto III na nasa kamay pa rin ng pangulo ang desisyon ukol sa pambansang pondo.

Wala pang natatanggap na abiso ang Senado kung kailan nakatakdang lagdaan ni Pangulong Rodrigo Duterte ang 2019 national budget.

Ito’y ayon kay Senate President Vicente Sotto III kaugnay ng naging pahayag ni Cabinet Sec. Karlo Nograles na posibleng lagdaan na ni Pangulong Duterte ang pambansang pondo ngayong linggo.

Ayon kay Sotto, hindi pa rin niya batid kung malalagdaan na ang nasabing panukalang budget bago sumapit ang Semana Santa dahil hanggang ngayon ay wala pa silang natatanggap na anumang impormasyon mula sa Malacañang.

Samantala, kumpiyansa naman si Sotto na i-ve-veto ni Pangulong Duterte ang mga aniya’y illegal re-alignment na ginawa ng Kamara De Representantes sa 2019 proposed national budget.

Contributor: Ashley Jose

Pinag-iingat ng Department of Foreign Affairs (DFA) ang mga Pinoy na naghahanap ng trabaho sa ibang bansa laban sa mga manpower at recruitment agency na nag-ooperate lamang sa social media tulad ng Facebook.

Ito ay matapos matuklasan ng DFA ang bagong paraan ng mga human traffickers na nambibiktima gamit ang social media at nag-aalok ng mga trabahong may mataas umanong sweldo sa Dubai at Iraq.

Ayon sa DFA, ilang mga kaso na ng human trafficking ang namonitor ng embahada ng Pilipinas sa Baghdad nitong mga nakalipas na buwan.

Kabilang anila dito ang isang human trafficking victim na nakulong ng tatlong buwan sa Basra Prison sa Iraq at napakawalan na para maipa-deport pabalik ng Pilipinas noong Abril 3.

Gayundin ang dalawa pang Pinoy na nailigtas ng mga opisyal ng embahada at sampung iba pa na nasa kanilang kustodiya na rin noong pang Enero ng kasalukuyang taon.

—-

Pinasususpinde ni Pangulong Rodrigo Duterte ang pagpapatupad ng kontrobersiyal na Motorcycle Crime Prevention Act o ‘doble-plaka law’ na kanyang nilagdaan noong nakaraang buwan.

Ito ang inihayag mismo ni Pangulong Duterte sa kanyang talumpati sa harap ng mga motorcycle riders sa Iloilo City noong Sabado.

Ayon sa Pangulo, kukumbinsihin niya ang Land Transportation Office (LTO) na itigil muna ang pagpapatupad ng batas dahil mapanganib aniya ang maglagay ng plaka sa harapan ng motorsiklo.

Aniya, mas mahalaga ang plaka sa likod kaya kanyang imumungkahing lakihan ng one fourth ang kasalukuyang sukat nito.

Dagdag ng Pangulo, hihilingin niya ring babaan ang multa na ipapataw sa mga lalabag sa nasabing batas.

Samantala, ipinaliwanag naman ni Pangulong duterte ang dahilan kung bakit niya nilagdaan ang ‘doble plaka law’.

“Alam mo kasi bakit pinirmahan ko, ang pulis tao ko yan, ang military tao ko, anong irekomenda nila, I will adopt it. Basta maglagay lang ng rationale.” Pahayag ni Pangulong Duterte

Motorcycle groups rejoice

Ikinatuwa naman ng isang grupo ng mga motorcycle riders ang anunsyo ni Pangulong Rodrigo Duterte na kanyang sususpendihin ang implementasyon ng ‘doble plaka law’ o Motorcycle Crime Prevention Act.

Ayon kay Atoy Sta. Cruz, pangulo ng Motorcycle Federation of the Philippines, noong una pa lamang, umasa na silang ivi-veto ni Pangulong Duterte ang nasabing batas.

Aniya, posibleng pag-aralang muli ng Pangulo ang ‘doble plaka law’ matapos bigyang paglilinaw hinggil sa panganib na posibleng idulot paglalagay ng plaka sa harapan ng motorsiklo.

Sinabi ni Sta. Cruz, inaantabayanan nila ngayon kung matutuloy ang nakatakdang konsultasyon para sa pagbuo ng implementing rules and regulations (IRR) sa nasabing batas o hihintayin ang resulta ng pag-uusap nina Pangulong Duterte at Senador Richard Gordon.

Gordon answers

Samantala, iginiit ni Senador Richard Gordon na kanya lamang ipinagtatanggol ang mga biktima at pinatay ng mga kriminal na riding in tandem sa pag-akda niya ng Motorcycle Crime Prevention Act o ‘doble plaka law’.

Kasunod ito ng naging anunsyo ni Pangulong Rodrigo Duterte na kanya munang ipasususpendi ang implementasyon ng nasabing batas.

Ayon kay Gordon, layon ng doble plaka law ang mabawasan o maiwasan ang mga pagpatay o anumang krimen na isinasagawa ng mga salaring nakasakay sa motorsiklo.

Binigyang diin pa ni Gordon, walang kapangyarihan ang sinumang Pangulo na suspendihin ang anumang batas.

Aniya, maaaring hinahabol lamang ni Pangulong Duterte ang pagsasagawa ng implementing rules and regulations (IRR).

—-

Naitala ng Philippine Atmospheric Geophysical and Astronomical Services Administration o PAGASA, kahapon, ang pinakamataas na heat index o init na nararamdaman ng katawan ng tao sa Metro Manila ngayong tag-init.

Ito matapos pumalo sa 42.1 degrees Celsius ang heat index na naitala ng PAGASA NAIA Station sa Pasay City.

Habang umabot naman sa 34.9 degrees Celsius ang kanilang naitalang pinakamataas na temperatura sa Pasay City pasado alas-2:00 ng hapon kahapon.

Ayon sa Department of Health (DOH), ang heat index na 41 hanggang 54 degrees Celsius ay posible nang magdulot ng heat cramps, heat exhaustion at posibilidad ng heat stroke.

Samantala, binabantayan ng PAGASA ang isang low pressure area (LPA) sa loob ng Philippine Area of Responsibility (PAR) at huling namataan sa layong 900 kilometro silangan ng Davao City.

Sa pagtaya ng PAGASA, mababa ang tiyansa na maging ganap itong bagyo bagama’t magdadala pa rin ito ng ulan sa bahagi ng Visayas at Mindanao.

Posibleng umabot sa 38 degrees Celsius ang temperatura o alinsangan na mararamdaman ng katawan ng tao sa araw na ito sa Metro Manila.

Batay sa pagtaya ng PAGASA, maaaring umabot sa 35 degrees Celsius ang maximum na temperatura sa Metro Manila na magbibigay ng mas mainit na pakiramdam sa katawan ng tao.

Maaari umanong maramdaman ang sobrang init ng panahon ngayong ala-1:00 at alas-4:00 ng hapon.

Dahil dito, pinayuhan ng PAGASA ang publiko na huwag na munang lumabas at manatili sa loob sa mga nabanggit na oras.

—-

Inutusan ni Pangulong Rodrigo Duterte ang militar at pulisya na pag-aralan ang art of assassination o paraan ng pagpatay sa pamamagitan ng pananambang.

Sa kanyang talumpati sa Iloilo City, sinabi ng Pangulo na ibinigay niya ang nasabing utos bilang bahagi ng pagsugpo sa sparrow unit ng New People’s Army (NPA).

Aniya, sangkot ang NPA sa iba’t-ibang serye ng pagpatay sa ilang bahagi ng bansa, kaya’t marapat lang aniya na mas paigtingin pa ng mga awtoridad ang hakbang sa pagsugpo sa mga ito.

Dagdag pa ni Pangulong Duterte, patuloy ding tinatarget ng NPA ang militar para mapabagsak ang gobyerno.

Magugunitang noong nakaraang taon binanggit ni Pangulong Duterte ang muling pagbuhay ng sparrow unit ng NPA matapos na mabigo ang usapang pangkapayapaan sa pagitan ng pamahalaan at komunistang grupo.

Samantala, tinawag na psychopath o baliw ni Communist Party of the Philippines (CPP) Founding Chairman Joma Sison si Pangulong Rodrigo Duterte matapos nitong himukin ang mga sundalo at pulis na pag-aralan ang art of assassination.

Ayon kay Sison, nababaliw na si Pangulong Duterte dahil sa serye nito ng mga pagpatay, kapangyarihan at ng gamot na fentanyl.

Binigyang diin ni Sison, hindi na matatakasan ni Pangulong Duterte ang command responsibility matapos na utusan nitong direktang pumatay ang aniya’y mga armadong minions nito.

Dagdag ni Sison, makalulusot na lamang sa pag-iimbestiga ng International Court si Pangulong Duterte kung aaminin nitong wala na siya sa katinuan.

Magugunitang nitong nakaraang linggo, sinimulan na ng ICC ang preliminary investigation kay Pangulong Duterte kaugnay ng isinampang kasong crimes against humanity laban dito.

—-