HOT STORIES OF THE WEEK

Pinalalayas ng Malacañang ang Chinese vessels na nasa Kota Island.

Ang Kota o Loaita Island ay ika-sampu sa mga malalaking isla sa Spratlys na sakop ng Pilipinas.

Ayon kay Presidential Spokesman Salvador Panelo, walang official business ang Chinese vessels sa nasabing isla na ang sukat ay nasa halos pitong ektarya at may layong 35 kilometro sa Thitu o Pag-asa Island na nauna nang pinaligiran ng ilang Chinese militia vessels.

Malinaw aniyang pag-atake sa soberanya ng Pilipinas ang ginagawa ng China kaya’t kailangang maghain ng diplomatic protest ang Department of Foreign Affairs (DFA) kapag natapos na ang verification.

Tiniyak ni Panelo na hindi kukunsintihin ng Pilipinas ang pananatili ng Chinese vessels sa teritoryo ng bansa bagama’t kinikilala ng Malakanyang ang magandang ugnayan ng Pilipinas at China sa sektor ng kalakaran.

—-

Mapapasakamay na simula sa Mayo 1 ng mahigit 10,000 martial law victims ang halos $10 million na bahagi ng settlement amount.

Ipinabatid ito ni American lawyer at class counsel Robert Swift na nagsabi ring padadalhan ng sulat ang mga beneficiary ng pondo para sa kaukulang detalye ng kanilang kumpensasyon.

Ayon pa kay Swift, makakatanggap ng $1,500 ang kada eligible martial law victim.

Una nang inatasan ng US Federal Court sa New York si sWIFT na mamahala sa pamamahagi ng claims matapos ang isinagawang artwork litigation sa ilang high value paintings na dating pag-aari ni dating First Lady Imelda Romualdez Marcos.

Sinabi naman ng martial law compensation claimants na karamihan sa mga makikinabang sa pera ay matatanda na at gagamitin na lamang ito na pambili ng kanilang mga gamot.

Sa kabuuan naman ay umaabot sa $4 million ang mapupunta sa serbisyo ng mga abogado pati na rin ang gastusin sa claims distribution.

—-

Nakatakdang pirmahan ng Pangulong Rodrigo Duterte sa susunod na linggo ang 2019 national budget.

Ayon kay Cabinet Secretary Karlo Alexei Nograles, lalagdaan ito ng Pangulong Duterte sa Abril 15 matapos ang ilang buwan pagkaantala nito dahil sa hindi pagkakasundo ng Senado at Kamara de Representantes hinggil sa usapin na ito.

Samantala, hindi pa tiyak kung may iveveto ang punong ehekutibo sa nasabing panukala.

Matatandaan ang panukalang P3.757 trillion 2019 budget ay naantala dahil sa umano’y insertion nito na wala sa pinag-usapan ng mga senador at mambabatas.

Bumaba ang bilang ng mahirap na pamilyang Pilipino sa unang bahagi ng 2018.

Batay sa datos ng Philippine Statistics Authority, labing anim (160 na porsyento ng pamilyang Pilipino ang maituturing na mahirap sa unang bahagi ng 2018, mas mababa sa mahigit dalawampu’t dalawang (22) porsyento noong 2015.

Ayon kay PSA Assistant Secretary Josie Perez, ibig sabihin, mayroong labing anim (16) mula sa isandaang (100) pamilyang Pilipino na may limang miyembro ang kumikita ng mas mababa kumpara sa kinakailangang halaga para makabili ng pagkain at iba pang pangangailangan.

Sinabi ni Perez na batay sa kanyang pag-aaral, noong unang bahagi ng 2018, ang isang pamilya na mayroong limang miyembro ay nangangailangan ng P10,481 kada buwan para sa pagkain at iba pang pangangailangan kasama na ang upa sa bahay, bayad sa kuryente, tubig at iba pa.

Tinatayang aabot sa apat na milyon ang bilang ng pamilyang Pilipino na maituturing na mahirap noong unang bahagi ng 2018 samantalang nasa limang milyon naman sa pareho ring panahon noong 2015.

Samantala sa bilang naman ng indibiduwal na Pilipino, sinabi ni Perez na mayroong dalawampu’t isa (21) mula sa isandaang (100) indibiduwal ang maituturing na mahirap at walang kakayang makabili ng sapat na pagkain at iba pang pangangailangan.

—-

Mariing itinanggi ng Embahada ng Pilipinas ang ulat na umalis na ng Libya ang kanilang mga opisyal at inabandona ang mga Filipino sa gitna ng kaguluhan sa Tripoli.

Ayon kay Ambassador to Libya Elmer Cato, mananatili sila sa Tripoli at sasamahan ang Filipino community doon na tulad na ginawa ng mga naunang opisyal ng embahada.

Sinabi ni Cato, ikinagulat nila ang kumalat na kuwentong ilang tauhan ng embahada ang inutusan umanong lumipat sa Tunis.

Aniya, nasa loob lamang sila ng embassy at patuloy na minomonitor ang sitwasyon at kalagayan ng mga Filipino sa Tripoli.

Binigyang diin pa ni Cato, kahit noong nangyari ang pinakamarahas na sitwasyon sa kasaysayan ng Libya, hindi isinara ang Embahada ng Pilipinas sa Tripoli o inutusan ang mga kawani nito na umalis na sa nasabing lugar.

—-

Naitala ng Philippine Atmospheric Geophysical and Astronomical Services Administration o PAGASA sa Dagupan City Pangasinan ang pinakamataas na heat index na 51.7 degrees Celsius, alas-2:00 ng hapon kahapon.

Ayon sa PAGASA, maituturing na itong mapanganib dahil makapagdudulot na ito ng heat cramps o heat exhaustion.

Posible rin itong makapagdulot ng heat stroke kung aktibo ang isang tao.

Bukod sa Dagupan, labing tatlong (13) iba pang lugar sa bansa ang nakapagtala rin ng mapanganib na heat index, kabilang ang Cuyo Palawan, Tuguegarao Cagayan at Pasay City na umabot sa 42 degrees Celsius.

Ang heat index ay ang init na nararamdaman ng katawan ng tao.

El Niño

Posibleng tumindi pa hanggang Mayo ang nararanasang mainit na panahon.

Ayon sa Climate Monitoring and Prediction Section ng PAGASA, posibleng pumalo pa 35 degrees hanggang 38 degrees Celsius ang actual air temperature sa bansa.

Anila mararamdaman ito sa Mayo at tatagal hanggang bago pumasok ang panahon ng tag-ulan.

Magugunitang noong weekend, naitala ng PAGASA ang pinakamataas na actual temperature na 35.4 degrees Celsius sa Metro Manila.

Samantala, apektado na rin ng nararanasang El Niño ang taniman ng strawberry sa La Trinidad, Benguet.

Ayon sa mga nagtatanim ng strawberry, karamihan ng mga bunga ng nasabing prutas ay maliliit at mabilis ding masira.

Isa anila sa dahilan nito ang kakulangan ng pandilig dahil hindi nasusunod ang schedule ng irigasyon.

—-

Ipinangalan sa tatlong Filipino high school students ang tatlong minor planets.

Sa Facebook post ng Department of Education (DepEd), kinilala ang tatlong estudyante na sina Eugene Rivera, Joscel Kent Manzanero at Keith Russel Cadores ng Camarines Sur National High School sa Naga City.

Ang naturang mga estudyante ay nasungkit ang second place sa 2018 Intel International Science and Engineering Fair na ginanap sa Pennsylvania, United States.

Kinatawan nila ang bansa sa international science fair matapos ang tagumpay sa 2018 national science and technology fair.

Binigyan ng certificate ang mga nabanggit na estudyante kung saan tinukoy ang sarili nilang minor planet at orbital plot na nagpapakita sa lokasyon nito.

—-

Magsisimula na sa Sabado, Abril 13 ang overseas absentee voting o ang isang buwang botohan para sa mga Pinoy na nasa ibang bansa.

Batay sa datos ng Commission on Elections (Comelec), mahigit 1.8 million ang nakarehistrong overseas absentee voters mula sa iba’t ibang bansa sa mundo.

Pinakamarami dito ay nasa Middle East ar African Region na sinusundan ng Asia Pacific Region, North at Latin America at Europe.

Ayon sa Comelec, maaaring bumoto ang mga overseas absentee voters ng labing dalawang (12) senador at isang party-list group.

Tatagal naman ang overseas absentee voting hanggang May 13, 2019, mismong araw ng eleksyon sa Pilipinas.

—-