HOT STORIES OF THE WEEK

Pangkalahatang naging maayos ang pagsisimula ng overseas absentee voting o OAV para sa mahigit 1.8 million na mga rehistradong Pilipinong botante na naninirahan o nagtatrabaho sa iba’t ibang mga bansa noong Sabado.

Sa Hong Kong kung saan may mahigit 87,000 ang mga nakarehistrong botante, sinabi ni Philippine Consul General Antonio Morales na wala silang na-monitor na anumang aberya sa simula ng botohan.

Maayos at gumagana aniya ang lahat ng makinang ginagamit para sa absentee voting sa Hong Kong.

Ayon naman kay Kuwait Philippine Charge d’ Affaires Mohd Noordin Pendosina Lomondot, nasa 200 mga botanteng Pilipino ang kanilang naitalang bumoto sa unang araw ng OAV.

Samantala, inihayag ng Commission on Elections o Comelec na walang isasagawang overseas absentee voting sa Damascus, Syria, Baghdad, Iraq at Tripoli, Libya dahil sa nangyayaring kaguluhan sa mga nabanggit na lugar.

Patuloy ding hinihimok ng Comelec ang lahat ng rehistradong Overseas Filipino Workers (OFWs) na makibahagi sa halalan at bumoto hanggang Mayo 13 o mismong araw ng eleksyon dito sa Pilipinas.

—-

Ikinukunsidera ni Pangulong Rodrigo Duterte ang bumuo ng bagong panel na makikipag-usap sa Communist Party of the Philippines (CPP) para sa kapayapaan.

Ito ay matapos na i-anunsyo mismo nito ang permanente at tuluyan nang pagtatapos sa peace talks noong Marso.

Sa kanyang naging talumpati sa campaign rally ng PDP-Laban sa Bukidnon, sinabi ni Pangulong Duterte na nais niyang dalawang sibilyan at tatlong opisyal ng militar ang bubuo sa nasabing bagong peace panel.

Iginiit din ng Pangulo na nais niya ng bagong pamamaraan ng usapang pangkapayapaan lalo’t kanyang ikinainis ang mabagal na takbo ng nakaraang peace talks.

Inabot aniya ng tatlong taon bago makaroon ng resulta ang pakikipag-usap ng government peace panel sa CPP-NPA-NDF na hindi rin nagtagumpay.

—-

Patuloy na binabantayan ng Department of Environment and Natural Resources (DENR) ang kalinisan sa lahat ng mga kilalang tourist destinations sa bansa.

Ito ay bilang paghahanda na rin ng ahensya sa inaasahang pagdagsa ng mga turista ngayong Semana Santa.

Ayon kay DENR Undersecretary Jonas Leones, partikular na kanilang minomonitor ang kalinisan sa mga lugar paliguan sa lahat ng mga tourist destinations sa bansa at matiyak na hindi kontaminado ang mga ito.

Bukod dito, minomonitor din ng DENR ang tamang pagtatapon ng mga basura sa mga kilalang destinasyon sa bansa.

Maliban sa Boracay, kabilang sa mahigpit na binabantayan ng DENR ang mga popular na tourist destinations sa Palawan, Mindoro, Aurora, Zambales at Siargao kung saan may ipinatutupad na rehabilitasyon.

—-

Nagbabala si Pangulong Rodrigo Duterte na mas marami pa siyang sisibaking mga opisyal ng gobyerno bago ang kanyang biyahe patungong China.

Sa naging talumpati ng Pangulo sa PDP-Laban campaign rally sa Bacolod City, sinabi nitong sisibakin niya ang mga government official na mayroong bahid sa korupsyon.

Nakatakdang magtungo ang Pangulong Duterte sa Beijing sa Abril 26 hanggang Abril 27 para sa second belt and road forum.

“Next week, when I fly back to report to work, before I leave for China, marami akong tatanggalin.”

“I vowed to lessen the corruption but I will fire more next week. I am just waiting for [the] report. I told them, ‘You give me your report and if I find it justifiable, you can stay. But if there is corruption, I’m sorry.” Pahayag ni Pangulong Duterte

—-

Nagbanta si Pangulong Rodrigo Duterte na i-veto ang panukalang 3.757 trillion pesos na 2019 national budget.

Sa kanyang talumpati sa campaign rally ng PDP-Laban sa Bacolod City, sinabi ni Duterte na hindi siya magdadalawang-isip na i-veto ang nasabing pondo kung makitaan niya ito umano ng butas.

Aniya, sa ngayon ay pinag-aaralan pa niya ang laman ng pambansang budget kabilang na maging ang mga umano’y insertion dito.

Natanggap ng Palasyo ang kopya ng 2019 General Appropriations Bill noong March 26 matapos ang hindi pagkakasundo ng Senado at Kongreso sa nilalaman nito.

“Eh hindi magkasundo ang Congress pati ang Senado eh, pati yung mga insertions diyan titignan ko. Pagka tagilid talaga, I will not hesitate to veto the entire budget. Eh ‘di pasensya tayong lahat.” Pahayag ni Duterte

—-

Isang bagong species ng sinaunang tao ang natuklasan sa isang kuweba sa Cagayan.

Ayon sa ulat ng New York Times, ang mga fossil bones at ngipin ay natuklsan sa Callao Cave sa Peñablanca Cagayan at pag-aari ng mga sinaunang tao na Homo Luzonensis.

Lumilitaw na mula sa tatlong indibiduwal ang naturang mga buto ng mga sinaunang tao na may taas na nasa 3 ½ feet lamang.

Taong 2007, 2011 at 2015 pa natagpuan ang naturang mga buto ng tao at ngayon lamang lumabas ang resulta ng pag-aaral dito.

—-

Binabantayan na ng Department of Trade and Industry o DTI ang epekto ng El Niño sa produksyon ng pagkain partikular sa mga gulay.

Ipinabatid ni DTI Undersecretary Ruth Castelo na asahan na ang bagsak na produksyon ng gulay sa mga susunod na buwan bunsod ng epekto ng matinding init na panahon at tagtuyot.

Hindi rin umano malayong sumipa ang presyo ng gulay dahil na rin sa mataas na demand.

Dahil dito, nakatakda nang pag-usapan sa pulong ng national price coordinating council kung anong hakbang ang maaaring gawin upang matulungan ang mga magsasakang tiyak na maaapektuhan.

Price hike

Tumaas ang presyo ng manok at ilang klase ng isda sa ilang pamilihan sa Metro Manila.

Ito aniya ay dahil sa mainit na panahon kaya’t apektado ang bentahan ng isda at manok.

Batay sa ulat, sa Sampaloc Market pumalo sa 160 pesos ang presyo ng kada kilo ng bangus mula sa 140 hanggang 150 pesos.

Aabot naman sa 140 pesos ang presyo ng galunggong mula sa dating 120 hanggang 130 pesos.

Sa Kamuning Market naman sa Quezon City, nasa 160 pesos na ang bangus at 180 sa galunggong.

Nasa 150 pesos naman ang kada kilo ng manok.

Ngunit kinuwestiyon naman ni Trade Undersecretary Ruth Castelo ang pagtaas ng presyo ng manok.

Paliwanag ni Castelo mababa dapat ang presyo ng manok sa merkado dahil sa mababa rin ang farm gate price nito na naglalaro lamang aniya sa 62 hanggang 70 pesos.

—-

(Updated)

Ipinatupad na ng Department of Labor and Employment (DOLE) ang total deployment ban sa Libya.

Ayon kay Labor Secretary Silvestre Bello III, hindi muna papayagan ang mga Pilipinong manggagawa na magtungo sa Libya kahit na ang mga balik manggagawa o mga nagbabakasyon lamang sa bansa.

“Saan ba talaga ang problema diyan sa Libya, hindi naman buong Libya ang may problema eh, may mga identified places lang diyan na may bakbakan, pero otherwise marami namang safe places, kaya gaya ng sinasabi ko pinag-aaralan ng aming opisina doon , ng aming Labor attache, at pinag-aaralan din ng Foreign Affairs, and we’re waiting for the final report.” Ani Bello

Kasabay nito, tiniyak ni Bello na nakahanda ang DOLE, anumang oras para sa mga Overseas Filipino Workers (OFW) na gusto munang umuwi ng bansa habang umiiral pa ang kaguluhan sa Libya.

Sinabi ni Bello na lagi ring handa ang DOLE para ayudahan ang mga OFW na ayaw nang magbalik sa Libya.

“Lalo na ang mga nurses madaling hanapan alternative work opportunity ‘yan, maaari nating i-deploy sila sa Japan, Israel, Germany, in demand sila diyan, ‘yung mga ayaw namang bumalik may programa naman tayo para sa kanila, may livelihood at immediate financial assistance para sa kanila.” Pahayag ni Bello

(Balitang Todong Lakas Interview)

Tumaas ang net satisfaction rating ni Pangulong Rodrigo Duterte ngayong unang bahagi ng 2019.

Ito ay batay sa resulta ng Social Weather Stations o SWS survey na isinagawa noong March 28-31, 2019 sa isang libo apatnaraan at apatnapung (1,440) adults nationwide.

Lumabas sa resulta na nadagdagan ng anim na puntos ang net satisfaction rating ng Pangulo sa nakuha nitong positive 66.

Mas mataas ito kumpara sa positive 60 na nakuhang net satisfaction rating noong December 2018.

Sa kaparehas na survey, lumabas din na pitumpu’t siyam (79) na porsyento ng mga Pinoy ang masaya sa performance ng Pangulo.

Ito naman ay mas mataas ng limang porsyento kumpara sa pitumpu’t apat (74) na porsyento noong December 2018 survey.

—-