HOT STORIES OF THE WEEK

Muling binanatan ng Malakanyang si Rappler CEO Maria Ressa matapos ituro ang administrasyong Duterte na nasa likod ng panibagong warrant of arrest at pag-aresto sa kanya.

Ayon kay Presidential Spokesperson Salvador Panelo, hindi maaaring magtago na lamang habang buhay si Ressa sa tinatawag na freedom of the press sa tuwing siya ay makakasuhan dahil sa mga paglabag sa batas.

Hindi rin aniya maaaring gamitin sa lahat ng oras ni Ressa ang paglabag sa freedom of the press bilang bahagi ng pag-atake ng pamahalaan para hindi siya mapanagot sa kanyang mga paglabag na tinukoy mismo ng mga piskal at hukuman.

Iginiit pa ni Panelo, dapat na pagtuunan na lamang ng pansin ni Ressa ang mga kinakaharap na kaso sa halip na gamitin ang kanyang propesyon para magpakalat ng mga baluktot na impormasyon.

Dagdag pa ni Panelo, patunay ang pagpipiyansa ni Ressa para sa kanyang pansamantalang kalayaan na sinusunod ng pamahalaan ang presumption of innocence na nakasaad sa konstitusyon.

Una nang tinawag ni Ressa na kalapastanganan sa hustisya ang ginawang pag-aresto sa kanya pagdating pa lamang sa NAIA Terminal 1 kahapon.

Aabot sa P90,000 ang inilagak na piyansa ni Rappler CEO Maria Ressa para sa kasong may kinalaman sa anti-dummy law sa Pasig City Regional Trial Court Branch 265 kaninang umaga.

Kanina ay bahagyang tumagal ang booking procedure kay Ressa dahil sa may isinasagawang pagdinig nuon si Judge Acerey Pacheco kaya’t inilipat ito sa branch 268 sa sala ni Presiding Judge Laqui Ceguera.

Una nang nakapaglagak ng kahalintulad na halaga ng piyansa ang mga board members ng Rappler na sina Manuel Ayala, Nico Jose Nolledo, Glenda Gloria, James Bitanga, Felicia Atienza, at James Velasquez.

Subalit tanging si Ressa lamang ang hindi nakapaghain ng kaniyang piyansa para sa nasabing kaso dahil siya’y nasa ibang bansa at kararating lamang  niya kaninang umaga.

Samantala, itinakda naman ng korte ang pagbasa ngsakdal gayundin ang pre-trial conference kay Ressa para sa nasabing kaso sa Abril 10, ganap na alas otso y medya ng umaga.

Nag-ugat at kasong paglabag anti-dummy law na inihain laban kina Ressa makaraang madiskubreng pagmamay-ari umano ng isang dayuhang kumpaniya ang Rappler, bagay na mariin namang nilang itinatanggi.

Sakaling mapatunayan ang pagkakasala, posibleng makulong sina Ressa at ang mga board members ng Rappler ng hanggang labing limang taon.

May ulat mula kay Jaymark Dagala (Patrol 9)

Palasyo pinayuhan si Ressa

Pinayuhan ng Malakanyang si Maria Ressa, chief executive officer ng Rappler na tantanan na ang pagrereklamo at tutukan na lamang ang pagtatanggol sa kanyang sarili sa hukuman.

Binigyang diin ni Presidential Spokesman Salvador Panelo na hindi naman naiiba si Ressa sa ibang may kinakaharap na kaso na dumadaan sa due process.

May nakita anyang matibay na batayan ang korte na may nilabag na batas si Ressa kaya ito naglabas ng warrant of arrest kayat wala itong koneksyon sa press freedom. -(written by Len Aguirre)

May ulat mula kay Jopel Pelenio (Patrol 17)

Kuha at Ulat ni Raoul Esperas (Patrol 45)

Agad na inaresto ng mga awtoridad si Rappler CEO at Editor in Chief Maria Ressa pagkalabas pa lamang ng arrival gate ng Ninoy Aquino International Airport Terminal 1 galing California dakong alas-7:00 kaninang umaga.

Kasunod ito ng pagpapalabas ng warrant of arrest ng Pasig City Regional Trial Court Branch 265 sa kasong paglabag sa Anti-Dummy Law.

Agad ding inihatid si Ressa ng mga umarestong pulis sa Pasig City Police para sa dokumentasyon gayundin sa Pasig City Regional Trial Court para makapag-piyansa.

Batay sa Twitter post ni Ressa, ito na ang ika-pitong beses na paglalagak niya ng piyansa para sa mga kasong isinampa laban sa kanya.

Nag-ugat ang kasong paglabag sa Anti-Dummy Law at Securities Regulations Code laban kay Ressa at iba pang executives ng Rappler dahil sa umano’y pagsuway sa itinatakda ng konstitusyon sa foreign ownership.

Tinawag naman ni Rappler CEO Maria Ressa na isang uri ng paglapastangan sa hustisya ang muling pag-aresto sa kanya ng pulisya pagkarating pa lamang ng bansa kaninang umaga.

Muling iginiit ni Ressa, wala siyang ginagawang mali at hindi siya kriminal.

Gayunman, itinuturing aniya siyang isang kriminal.

Samantala, inilarawan naman ni Atty. Francis Lim, abogado ni Ressa bilang harassment ang pag-aresto sa kanyang kliyente.

Ayon kay Lim, hindi na nila ikinagulat at kanila na ring napaghandaan ang ipinalabas na arrest warrant laban kay Ressa.

Tiniyak naman ni Lim na hindi nito mapipigilan si Ressa sa pagtupad ng kanyang tungkulin bilang isang journalist.

—-

Nilinaw ng Metropolitan Manila Development Authority (MMDA) na magsasagawa muna sila ng dry run bago tuluyang hilingin sa mga local government unit (LGU) na ikansela na ang business permit ng mga provincial bus terminal sa EDSA.

Ayon kay MMDA General Manager Jojo Garcia, susubukan muna nila kung magiging epektibo ang naturang hakbang at upang malaman kung ano ang mga lilitaw na problema kauganay rito.

Nasa halos 50 provincial bus terminals aniya sa EDSA ang nag-aambag sa mas mabigat na daloy ng trapiko sa naturang kalsada.

Idinadaing din ni Garcia ang ginawang pamimihasa ng mga bus operators sa mga pasahero na pinapayagang bumaba sa bahagi ng West Avenue, Cubao, Ortigas at Ayala mga lugar aniya na hindi pinapayagang gawing babaan sa ilalim ng kanilang franchise.

Paliwanag ni Garcia, point to point lang talaga ang prangkisa ng mga provincial buses mula sa pinanggalingang probinsya hanggang sa kanilang terminal lamang.

Samantala, nakatakda namang isagawa ang dry run para rito pagkatapos ng Holy Week at inaasahang ipatupad ang naturang provincial bus terminal closure sa Hunyo.

Valenzuela integrated terminal

Handa na ang bagong Valenzuela integrated bus terminal sa lahat ng bibiyaheng Norte sa oras na ipatupad ang pagbabawal sa mga provincial bus sa EDSA.

Ayon saMMDA, isang dry run muna ang isasagawa matapos ang Semana Santa.

Kailangan nang bumaba ang mga pasahero mula Norte sa Valenzuela Gateway Complex sa Paso de Blas Road kung saan sila sasakay ng city bus patungo sa kanilang destinasyon sa Metro Manila vice versa.

Pagdating naman sa integrated terminal, kailangan munang magpa-book ng biyahe “on-line” gamit ang mga kiosk habang puwede ring bumili ng mga reloadable card o bumili ng ticket sa cashier.

Gayunman, nagrereklamo ang mga mananakay dahil dagdag oras at gastos ito sa kanilang biyahe.

—-

Patuloy na bumababa ang lebel ng tubig sa mga dam sa bansa partikular na sa Luzon.

Batay sa PAGASA Hydrology Division, nasa 194.38 meters ang water level ng Angat dam kaninang umaga mas mababa ito kumpara sa 194.79 meters kahapon.

Bahagya ring bumaba ang water level ng La Mesa dam mula 68.55 meters kahapon ay nasa 68.54 meters naman kaninang umaga.

Samantala, pawang nabawasan din ang antas ng tubig sa Ipo dam, Ambuklao dam, San Roque dam, Pantabangan dam, Caliraya dam at Magat dam.

Ikinakasa na ng Commission on Elections (Comelec) ang mga kaso laban sa mga national candidates na lumabag sa mga campaign rule para sa darating na halalan.

Ayon kay Comelec Spokesman James Jimenez, bago pa magsimula ang election period ay paulit-ulit na ang paalala nila sa mga kandidato na sumunod sa mga campaign guideline ng poll body.

Partikular na aniya rito ang mga alituntunin hinggil sa campaign posters bahagi aniya na madalas na nilalabag ng mga kandidato.

Target aniya ng Comelec na makapaghain ng isang kaso kada rehiyon depende sa bilang ng ebidensya na makapagpapatibay sa kaso.

Gayunman, bigo naman aniya sila na mapabilis ang paghahain ng kaso dahil isinasaalang-alang aniya nila ang pagsunod sa due process at naging abala din aniya ang kanilang mga lokal na tauhan sa paghahanda para sa nalalapit na halalan.

Mga local candidates hinimok na kontrolin ang kanilang mga taga-suporta

Hinimok ng Commission on Elections (Comelec) ang mga lokal na kandidato na mahigpit na kontrolin ang kanilang mga taga-suporta at maging mahinahon para maiwasan ang anumang uri ng iskandalo sa panahon ng kampanya para sa darating na halalan.

Ito ang paalala ni Comelec Spokesman James Jimenez isang araw bago magsimula ang opisyal na campaign period sa local polls.

Mahalaga aniya na magkaroon ng kaayusan ang kanilang mga taga-suporta lalo na sa kanilang mga aktibidad gaya ng pag-iikot sa mga bahay-bahay para mangampanya.

Dagdag pa ni Jimenez, mas mainit ang labanan sa local elections kumpara sa national elections dahil sa magkakalapit lang aniya ang mga magkakatunggaling mga partido.

Comelec dapat magtalaga ng special precinct para sa mga senior citizens

Dapat magtalaga ang Commission on Elections (Comelec) ng special precinct para sa mga senior citizens.

Ito’y pinatitiyak ni Senior Citizen Representative Francisco Datol upang masigurong maayos ang sitwasyon sa pagboto ng mga nakatatanda sa darating na halalan.

Pakiusap ni Datol, kung maari ay sa ibabang bahagi na lamang ng paaralan na nagsisilbing mga polling center ang mga itatalagang special precincts.

Dapat din aniya na payagan na makagamit sa naturang pasilidad ang mga buntis maging ang mga may kapansanan.

Dagdag pa ng kongresista, mainam din na magkaroon ng medical team na naka-stand by sa mga polling centers para sa agarang pagtugon sakaling may mangailangan sa kanilang serbisyo.