HOT STORIES OF THE WEEK

Binabantayan ng mga doktor mula sa iba’t ibang ospital sa Central Luzon ang mga Overseas Filipino Workers (OFWs) na galing ng Wuhan, China at ngayon ay nakaquarantine na sa New Clark City.

Ayon kay Department of Health (DOH) secretary Francisco Duque III, walang kahit isa sa 32 na nagparepatriate ang nakitaan ng kahit na anong sintomas ng sakit.

Hindi ko alam kung saan nanggaling ‘yung 30, ang sa amin kasi 32 [OFWs]. 32 ang bigay na report sa akin,” paglilinaw ni Duque.

Maliban anya sa mga OFWs, kasama nilang nakaquarantine ngayon ang limang doktor ng DOH na kasama sa sumundo sa Wuhan, tatlo mula sa consulate office, anim na plane crew, dalawang driver at isang porter.

Kasabay nito ay iginiit ni Duque na walang basehan ang takot ng mga nakatira sa paligid ng lugar na ginagamit bilang quarantine area.

Karamihan, pag nagkaroon ng sintomas, malamang pagkatapos mong i-test, doon mo ma-e-establish kung talagang meron o wala (positibo o negatibo sa virus). Hindi mo masasabing siguradong-sigurado ka without doing the testing,” ani Duque. —sa panayam ng Ratsada Balita

Dumating na sa Pilipinas ang nasa 30 Pilipino na inilikas mula sa Wuhan, China ngayong umaga ng Linggo, ika-9 ng Pebrero —dahil sa banta ng 2019 novel coronavirus acute respiratory disease (2019 nCoV-ARD) outbreak sa China.

BREAKING: Eroplanong sinasakyan ng mga repatriated OFW mula sa Wuhan, China, lumapag na sa Clark International Airport, ayon sa @DFAPHL https://t.co/NsnQi9EBsS

— DWIZ Newscenter (@dwiz882) February 8, 2020

Bago mag-alas-7 ng umaga ay lumapag ang Royal Air plane, eroplanong sinasakyan ng mga naturang Pinoy, sa Clark sa Pampanga.

Didiretso naman ang mga ito sa Haribon Hangar ng Philippine Air Force at hindi dadaan sa terminal ng Clark International Airport.

Matatandaan na pumalo na sa mahigit 800 katao na ang binawian ng buhay dahil sa 2019 nCoV-ARD at mahigit 34,000 na iba pa ang dinapuan nito, matapos ianunsyo ang virus outbreak sa Wuhan City, China noong nakalipas na buwan.

Guilty ang hatol ng Sandiganbayan kay dating MRT-3 General Manager Al Vitangcol lll sa dalawang kaso ng paglabag sa anti-graft and practices act.

Ang kaso ay nag-ugat sa di umano’y pabor na ibinigay ni Vitangcol sa kumpanya na pinatatakbo ng kanyang kamag-anak.

Matatandaan na noong 2012, nakuha ng PH Trams CB&T Joint Venture ang interim maintenance contract para sa mga sirang linya ng tren ng MRT-3 kung saan isa sa mga incorporators si Arturo Soriano na tiyuhin ng maybahay ni Vitangcol.

Si Vitangcol ang head ng negotiating team noon na tumanggap ng bids at namili ng contractor para sa proyekto.

Tig-anim na taon hanggang walong taong pagkakulong ang sentensya ng Sandiganbayan sa bawat kaso ni Vitangcol kasama si Soriano. —ulat ni Jill Resontoc (Patrol 7)

BASAHIN: Bahagi ng resolusyon ng 3rd Division Sandiganbayan sa pag-convict kay Vitangcol | via @JILLRESONTOC pic.twitter.com/B4eoOTKuAu

— DWIZ Newscenter (@dwiz882) February 6, 2020

Isang Pinoy ang nagpositibo sa 2019 novel coronavirus acute respiratory disease (2019 nCoV-ARD) sa Japanese cruise ship na naka-quarantine sa Yokohama, Japan.

Ang Pinoy ay napag-alamang crew member ng Diamond Princess.

Samantala, syam (9) pang pasahero ng cruise ship ay ang kumpirmadong positibo sa 2019 nCoV-ARD.

Tatlo sa mga ito ang mula sa Hong Kong, tatlo mula sa Japan, dalawa sa Australia at isa ang mula sa Estados Unidos.

Isang 60-taong gulang na babeng Chinese ang ikatlong kaso ng 2019 novel coronavirus acute respiratory disease (2019 nCoV-ARD) sa Pilipinas.

Ito mismo ang kinumpirma ng Department of Health (DOH) sa kanilang pulong-balitaan ngayong Miyerkules, ika-5 ng Pebrero.

Ayon sa DOH, sa ngayon (as of 12NN), mayroon nang kabuuang 133 persons under investigation (PUIs) dahil sa naturang virus.

Sa nabanggit namang bilang, 115 sa mga ito ay naka-admit sa ospital; habang 16 naman ang nakalabas na; at dalawa ang nasawi.

Binubuo naman ng 63 Pinoy, 54 Chinese at 16 na mula sa ibang nationalities ang mga naturang PUIs.

Dagdag pa ng DOH, 32 sa 133 PUIs ay nagtungo sa Wuhan, China; ang iba naman ay galing sa Hong Kong, at ang nalalabi naman ay nakasalamuha ang mga nauna nang kumpirmadong nagpositibo sa 2019 nCoV-ARD.

This is a developing story. Please refresh page for updates.

Pumapalo na sa mahigit 400 ang death toll sa 2019 novel coronavirus acute respiratory disease (2019 nCoV-ARD) sa China.

Ayon sa Chinese health authorities, nasa 426 ang bilang ng mga nasasawi sa 2019 nCoV-ARD kung saan nadagdagan pa ng mahigit 60 ang bilang ng mga nasawi sa loob lamang ng halos isang araw.

Nakapagtala naman ng dagdag na 2,400 na panibagong kaso ng 2019 nCoV-ARD kaya’t umaabot na sa halos 20,000 ang bilang ng kaso nito sa iba’t ibang bahagi ng mundo.

Samantala, sa Amerika, nadagdagan pa ang naitatalang kaso at nasa 13 na ang kumpirmadong 2019 nCoV-ARD cases sa kasalukuyan.

Nasa 12 na rin ang kumpirmadong kaso ng 2019 nCoV-ARD sa Germany.

Patuloy ang ginagawang contact tracing ng Department of Health (DOH) at iba pang ahensya ng pamahalaan sa mga nakasalamuha ng nasawing 2019 novel coronavirus (nCoV) patient.

Ayon kay Health Secretary Francisco Duque III, nakipag-ugnayan na sila sa mga lugar na pinuntahan ng biktima at kasama nito sa Cebu, Dumaguete at dito sa Maynila.

Nakuha na rin anya ang manifesto ng Philippine Airlines (PAL) at Cebu Pacific at tukoy na ang mga nakasakay nito sa eroplano.

Sinabi ni Duque na kailangang i-quarantine ng 14 na araw ang lahat ng nakasalamuha ng biktima.

Kasama din natin d’yan ang DILG, nCoV Task Force sa bawat mga komunidad at dito ‘yung mga pinuntahan sa Cebu, sa Dumaguete, dito sa Manila –tinutukoy sa kasalukuyan, kinikilala ‘yung mga tao, at binibigyan sila ng abiso bago ang quarantine at kunan sila ng temperature araw-araw, for 14 days,” ani Duque.

Kasabay nito, ipinaliwanag ni Duque na normal na nangyayari ‘yung biglang bumabagsak ang kundisyon ng isang pasyente na papagaling na sana mula sa sakit na tulad ng nCoV.

Tinukoy ni Duque ang pasyenteng namatay sa nCoV na nagpakita na ng magandang kundisyon subalit kalaunay bumagsak rin at nasawi.

Nangyayari ‘yan, nagpapakita ng improvement tapos no’ng last 24 hours biglang bumagsak. Gano’n din naman ang nangyari sa mga pasyente sa Wuhan, China, nagkaroon ng massive pneumonia, severe pneumonia,” ani Duque. —sa panayam ng Balitang Todong Lakas

3 sa mga nakasalamuha ng nasawing nCoV patient sa PH na-ospital

Na-ospital ang tatlo sa mga taong nakasalamuha ng Chinese national na namatay dahil sa 2019 novel coronavirus (nCoV) sa Pilipinas.

Ang tatlong pasyente ay napag-alamang nakasalamuha ng mag asawang kapwa positibo sa nCoV noong sila ay nasa Dumaguete.

Ayon kay Dr. Ferchito Avelino, director ng Department of Health-Epidemiology Bureau, tuluy-tuloy ang ginagawang tracing sa kung sinu-sino ang nakasalamuha ng mag partner na turista sa Cebu, Dumaguete at Maynila.

Kinumpirma ng Department of Health (DOH) na ikalawang kaso ng 2019 novel coronavirus sa bansa at kauna-unahang kaso naman ng pagkamatay dahil sa naturang sakit sa labas ng China.

Ayon kay Health Secretary Francisco Duque III, kahapon, February 1 namatay na ang 44 year old na lalaking Chinese na nobyo ng babaeng chinese na unang kaso ng nCoV sa bansa.

In his last few days, the patient was stable and showed signs of improvement however the condition of the patient deteriorated within the last 24 hours resulting in his demise. We are currently working with the Chinese embassy to ensure the dignified management of the remains according to national and international to contain the deceased,” ani Duque.

Samantala, 24 na itinuturing na patient under investigation ang nagnegatibo sa nCoV habang apat na iba pa ang hinihintay pa rin ang resulta mula sa Research Institute for Tropical Medicine (RITM).

Currently there are no reports of community spread of the virus within the country however, the public are still reminded to practice preventive measures,” ani Duque.

Ipinag-utos ni Pangulong Rodriog Duterte ang pagpapatupad ng temporary travel ban sa lahat ng turistang magmumula sa mainland China, Hong Kong at Macau.

Ito ay sa gitna pa rin ng pagkalat ng 2019 novel coronavirus mula sa Wuhan, Hubei Province.

Ayon kay Senador Christopher Bong Go, binigyang konsiderasyon ng Pangulo ang mga concern na ipinaabot ng mga opisyal ng gobyerno at ilang health experts.

Nagpasya ang Pangulo na pakinggan ang mga suhestiyon para magrekomenda at agad na magpatupad ng precautionary measure para protektahan ang mga Filipino.

Una nang ipinagbawal ng Pangulo ang pag babawal sa pagpapasok sa bansa ng mga biyahero na mula sa Hubei Province kung nasaan ang Wuhan City na siyang pinagmula ng bagong coronavirus.