HOT STORIES OF THE WEEK

Kinumpirma ng Department of Health ang kauna – unahang kaso ng novel corona virus sa bansa.

Ayon kay Health Secretary Francisco Duque III, isang 38 anyos na babaeng Chinese na mula sa Wuhan, China bago nagtungo sa Hong Kong at dumating dito sa Pilipinas nuong January 21, 2020.

Na – admit sa isang government hospital ang babae nuong January 25 matapos siyang makaranas ng mild cough.

Sa kabila ng pagiging positibo ng dayuhan sa NCov ay hindi anila ito nagpapakita ng anomang sintomas o asymptomatic.

Ayon naman kay DOH epidemiology Bureau Chief Dr. Chito Avelino, dumating ang dayuhan sa bansa bilang isang turista at bumisita na sa Cebu at Dumaguete.

Sa ngayon ay nagsasagawa na ng contact tracing para matukoy ang sinakyang eroplano, mga lugar na pinuntahan at mga nakahalubilo ng biktima.

Pumapalo na sa 131 ang death toll sa 2019 novel coronavirus (nCoV) sa China.

Nabatid na mahigit 800 bagong kaso ang naitala kaya’t nasa 5,571 ang kabuuang bilang ng kaso ng nCoV.

Maliban sa China, nakapagtala na rin ng nCoV cases sa Hong Kong, Macau, Taiwan, Cambodia, Thailand, Europe, North America, Germany at Australia.

Tiniyak ng Department of Health (DOH) na mas magiging mabilis na ang pagproseso para sa confirmatory test ng mga posibleng infected ng novel coronavirus (2019-nCoV) sa bansa.

Ayon kay Health Undersecretary Eric Domingo, ito ay sa oras na dumating na sa Pilipinas ang kinakailangan nilang primer para sa nCoV ngayong linggo.

Paliwanag ni Domingo, wala pa silang kakayanan na matukoy kung apektado ng nCoV ang isang persons under investigation (PUI) sa bansa dahil sa kawalan ng nabanggit na primer.

Sa sandaling dumating na ito sa bansa, aabutin na lamang aniya ng dalawa hanggang tatlong araw ang pagsasailalim sa test ng mga PUI.

Sinabi ni Domingo, sa ngayon aniya ay umaabot ng halos isang linggo bago nila makuha ang resulta ng confirmatory test para sa nCoV mula sa isang laboratoryo sa Australia bunsod na rin ng ipinatutupad na mahigpit na seguridad.

We already identified a supplier outside of China that produces the primers and we already got the import permit from FDA. So, we believe in the next 48 hours we’re going to have the text available here,” ani Domingo.

Sinuspinde ng Bureau of Immigration (BI) ang Visa Upon Arrival (VUA) na ibinibigay sa mga Chinese nationals.

Ayon kay Immigration Commissioner Jaime Morente, layon nito na mabawasan ang pagdagsa ng group tours mula sa China.

Ang VUA ay ibinibigay sa mga turista sa ilalim ng Department of Tourism (DOT) accredited operators, mga kuwalipikadong businessmen, atleta at convention exhibit delegates.

Kasabay nito ay nilinaw ng Immigration Bureau na hindi nila pinipigilan ang pagpasok ng mga Chinese nationals sa bansa.

Kinukumpirma ngayon ng Department of Health (DOH) kung positibo sa novel coronavirus (nCoV) ang anim katao dito sa Pilipinas.

Ayon kay Health Secretary Francisco Duque III, ipadadala nila sa Australia ang anim na specimen para sa kumpirmasyon.

Samantala, nasa 14 na ngayon ang persons under investigation (PUI) mula sa dating 11, kahapon.

Sa kabila nito, kumbinsido si Duque na kayang lampasan ng Pilipinas ang hamon ng nCoV tulad ng matagumpay na paglaban noon sa SARS at maging sa MERS-CoV.

Samantala, nakatakdang pag-usapan sa pulong ng Inter-Agency Task Force ang panukalang ipagbawal muna ang pagpasok ng mga magmumula sa China.

Sinabi ni Duque na tatalakayin rin nila ang kahilingan ng mga Pilipinong nasa China, lalo na sa Wuhan City, na makauwi ng bansa.

Ayon kay Duque, ang kanilang magiging desisyon sa isyu ay nakadepende lagi sa ipapayo sa kanila ng World Health Organization (WHO).  —sa panayam ng Ratsada Balita

Lumobo na sa 106 ang bilang ng mga namamatay dahil sa bagong strain ng coronavirus o novel coronavirus (nCoV) sa China.

Ito’y ayon sa pamahalaan ng China kung saan, tinatayang nasa 1,300 naman ang napaulat na bagong kaso nito.

This is a developing story. Please refresh page for updates.

Isinapubliko na ng Department of Health (DOH) ang mga lugar kung saan mayroong itinuturing na Persons Under Investigation (PUI) dahil sa posibleng Novel Coronavirus (nCoV) infection.

Sinabi ni DOH Secretary Francisco Duque III na ang mga PUIs ay pawang may kasaysayan sa pagbiyahe sa Wuhan City kaya’t kailangang suriin at bantayan.

Ayon kay Duque, kabilang sa mga lugar kung saan mayroong nakaconfine na PUI:

• Metro Manila
  • Asian Hospital sa Muntinlupa City —78 years old, lalaki
  • Adventist Medical Center sa Pasay City —44 years old, lalaki
• MIMAROPA 
  • El Nido, Palawan —10 years old, babae
• Northern Mindanao
  • Camiguin General Hospital sa Mambajao, Camiguin —29 years old, lalaki
• Western Visayas
  • Dr. Rafael S. Tumbokon Memorial Hospital sa Kalibo, Aklan —32 years old, babae —6 years old, lalaki —24 years old, babae
• Eastern Visayas
  • Tacloban City Hospital, Leyte —36 years old, lalaki
• Central Visayas 
  • Vicente Sotto Memorial Medical Center sa Cebu City —5 years old, lalaki —18 years old babe
  • Allied Experts Medical Center sa Cebu Cuty —61 years old, babae

TINGNAN: 11 katao, iniimbestigahan ng DOH dahil sa hinihinalang kaso ng 2019-nCoV | @DOHgov photo pic.twitter.com/3IZscqRCDh

— DWIZ Newscenter (@dwiz882) January 27, 2020

Inihayag pa ni Duque na ang mga naturang indibidwal ay isolated sa mga ospital at karamihan sa mga ito ay Chinese at mayroon ding Brazilian at American nationals.

Ang mga sample na kinuha sa mga naturang PUIs na una nang sinuri ng RITM ay ipapadala rin sa Australia para masuri.

Nananatiling ‘novel coronavirus free’ ang Pilipinas.

Binigyang diin ito ni Health Secretary Francisco Duque III sa harap ng pagkalat ng mga reports hinggil sa mga pasyente na di umano’y positibo sa novel coronavirus.

Ayon kay Duque, mayroon sila ngayong 11 dayuhan na Persons Under Investigation (PUI) mula sa orihinal na 13 dayuhan na pawang mga galing ng Wuhan, China.

Kabilang sa mga PUIs ang apat na dayuhang nasa isolation room sa isang ospital sa Palawan.

Nanawagan si Duque sa publiko na huwag maging bahagi ng “infodemic” dahil mas delikado anya ang maling impormasyon kaysa sa novel coronavirus.

Ibinaba na ng PHIVOLCS ang alerto ng Bulkang Taal sa alert level 3.

Ito ay bunsod na rin ng bumababang aktibidad na naitatala sa Taal Volcano sa nakalipas na dalawang linggo.

Gayunman, binigyang diin ni PHIVOLCS Director Underscretary Renato Solidum na hindi pa rin ito nangangahulugang wala nang panganib para isang malakas na pagsabog.

Ayon kay Solidum, may posibilidad pa rin ng biglaang steam explosion o pagbubuga ng mainit na singaw at volcanic gas, mararanasang volcanic earthquake at paggalaw ng magama.

Inirerekomenda naman ng PHIVOLCS ang pananatiling no man’s land ng Taal Volcano island gayundin sa mga lugar na pasok 7 kilometer radius danger zone mula sa main crater ng bulkan.

Merong pagbaba sa mga binabantayan nating parametro at nangangahulugang ang posibilidad na magkaroon ng malakas at mapanganib na eruption ay bumaba pero hindi nangangahulugang tapos na ang aktibidad ng bulkan at ang panganib sa isang malakas na pagsabog ay nawala, bumaba yun. Wala na pong tao ating inirerekomenda sa volcano island at wala din sa 7 kilometer radius from the main crater at ang local government na-advise natin sa labas ng 7 km na i-assess kung anong mga areas ang pwedeng balikan at mga nasira para masiguradong maayos ang pagpunta at kung  magpapabalik sila sa mga tao sa bahay,” ani Solidum.