HOT STORIES OF THE WEEK

Nagbanta ang Pangulong Rodrigo Duterte na ipawalang-bisa ang Visiting Forces Agreement (VFA), isang kasunduan sa pagitan ng Pilipinas at Amerika.

Binigyan ng pangulo ng isang buwan ang U.S. Embassy para ayusin ang kinansela nilang visa ni Senador Ronald “Bato” Dela Rosa.

Ayon sa pangulo, hindi sya mangingiming ipatigil ang pagpapatupad ng VFA kung hindi susunod ang U.S. Embassy.

Inulit rin ng pangulo ang kanyang babala na pagbabawalan nyang magtungo ng Pilipinas ang mga U.S. senators na naghain ng resolusyon na nagbabawal naman sa mga opisyal ng Pilipinas na magtungo sa Amerika.

Pormal nang nanungkulan bilang PNP Chief si Police Lt. General Archie Francisco Gamboa.

Ito ay matapos na sabitan ni Pangulong Rodrigo Duterte si Gamboa ng kanyang ika – apat na Estrella sa isang seremonya sa PUP – Batangas Campus, Sto. Tomas, Batangas kahapon.

Si Gamboa ay dalawang buwang namuno sa PNP bilang Officer-in-Charge matapos lisanin ni dating PNP Chief Oscar Albayalde ang kanyang pwesto isang linggo bago ang kanyang tuluyang pagreretiro noong Nobyembre nakalipas na taon.

Matapos ang ilang buwang pagsasabi ng Pangulo na hindi siya makapili ng bagong hihiranging PNP Chief noong Biyernes ay inanunsiyo nito na si Gamboa na ang bagong PNP Chief matapos na niyang mapatunayan ang kanyang sinseridad sa Pangulo. — ulat mula kay Jaymark Dagala (Patrol 9)

TINGNAN: PNP Chief Archie Gamboa, nanumpa na kay Pangulong Rodrigo Duterte bilang ika-23 Hepe ng Pambansang Pulisya | via @jaymarkdagala pic.twitter.com/iYZH9trtXh

— DWIZ Newscenter (@dwiz882) January 20, 2020

Inanunsiyo na ni Pangulong Rodrigo Duterte ang susunod na magiging pinuno ng Philippine National Police.

Sa thanksgiving gathering ng The Fraternal Order of Eagles sa SMX Convention Center sa Davao City kagabi, sinabi ng Pangulo na itatalaga niya si PNP Officer in Charge Police Lt. General Archie Gamboa bilang PNP Chief.

Anya,  ipinakita ni Gamboa ang kanyang sinseridad sa Pangulo.

Una nang itinalagang acting PNP Chief si Gamboa matapos ang napaagang pagreretiro ni dating PNP Chief Oscar Albayalde matapos na masangkot ang pangalan nito sa isyu ng ninja cops.

I’m going to appoint you as the regular PNP. But you and Sec Año and I will have a long, long talk first. Pinakita mo sa akin yong sincerity mo, and I’d like you to leave something that you will be remembered by the country.—ani Pang. Duterte

Winelcome ni dating Philippine National Police (PNP) Chief Oscar Albayalde ang resolusyon ng Department of Justice (DOJ) na kasuhan siya ng graft kaugnay sa umano’y ma-anomalyang anti-drugs operation sa Pampanga noong 2013.

Sinabi ni Albayalde na may pagkakataon na siyang malinis ang kaniyang pangalan sa tamang forum.

Binigyang-diin ni Albayalde na mapapatunayan niyang malinis ang kaniyang konsensya at tiwala siyang lalabas ang katotohanan sa isyung ito.

Magugunitang napaaga ang pagreretiro ni Albayalde noong November 2019 matapos madawit sa ‘ninja cops controversy’.

Halos 11,000 na o mahigit 40,000 indibidwal ang naitalang naapektuhan nang pag-aalburuto ng Bulkang Taal.

Ayon sa National Disaster Risk Reduction and Management Council (NDRRMC), mahigit 9,000 pamilya ang nananatili sa mga evacuation center.

Karamihan sa mga apektadong pamilya ay mula sa mga munisipalidad ng Batangas na labis na naapektuhan ng ash fall tulad ng Alitagtag, Balayan, Bauan, Calaca, Calatagan, Lian, San Pascual, Sto. Tomas, Tuy at Batangas City.

Halos 76% ng mga Pilipino ang naniniwalang mayroong paglabag sa karapatang pantao ang anti-drug war ng Gobyernong Duterte.

Batay ito sa survey ng Social Weather Stations (SWS) mula December 13 hanggang December 16, 2019, kung saan 42% ang nagsabing maaaring maraming human rights abuses at 33% naman ang nagsabing maraming paglabag sa karapatang pantao sa pagpapatupad ng illegal drugs campaign ng gobyerno.

Sa 24% na naniniwalang kakaunti lamang ang human rights violations sa nasabing kampanya –21% ang naniniwalang mayroong iilan at 3% ang nagsasabing  kakaunti lamang ang human rights abuses.

Batay sa police record, mahigit 6,700 drug suspects ang nasawi simula nang ilarga ang drug war noong July 2016.

Ibinabala ng PHIVOLCS ang posibilidad ng volcanic tsunami oras na umakyat na sa alert level 5 ang Bulkang Taal.

Ayon kay Ma. Antonia Bornas, chief ng Volcano Monitoring and Eruption Prediction Division ng PHIVOLCS, kanilang nakikitang “worst case scenario” ang matagal at tuloy-tuloy na mga aktibidad ng Taal.

Aniya, karaniwang nagsisimula sa maliliit ang aktibidad ng Bulkang Taal kung saan nagsimula ito sa phreatic eruption at sinundan ng lava fountaining kaninang umaga.

Sinabi ni Bornas, ilan sa mga palatandaan din ng pag-aalburuto ng Taal ang inaasahang lalabas sa ilang mga bayan na nakapaligid dito.

Tulad aniya ng pagbibitak-bitak ng lupa dahil sa paglalabas ng magma na naitala na noon sa bayan ng Lemery, Taal at San Nicolas.

Dagdag ni Bornas, may panganib din ng pagguho at pag-liquify o paglabot ng lupa sa paligid ng lawa.

Sakaling maging maulan din aniya, may posibilidad din ng pagkakaroon ng lahar.

Itinaas na sa Alert Level 4 ng Philippine Institute of Volcanology ang Seismology (Phivolcs) ang status ng bulkang Taal.

Ito’y matapos lumakas ang aktibidad ng bulkan dakong 5:30 p.m. ngayong araw ng Linggo, Enero 12.

Batay sa pinaka-bagong abiso ng Phivolcs, nagpapatuloy ang pagbuga ng steam-laden tephra column, volcanic ash, at may kasabay na malalakas na pagkidlat sa bulkan.

Bukod dito ay nagpapatuloy rin ang pagtala ng volcanic tremor o paglindol simula pa kaninang umaga.

Ito ang pinaka mataas na alert level status kaya naman ay posible ang mapanganib na pagputok ng bulkang Taal sa loob ng ilang oras haggang ilang araw.

Pinangangambahan din ang pyroclastic density current o ang mabilis na daluyong ng napakainit na usok at abo, maging ang volcanic tsunami sa mga katabing lawa ng bulkan partikular sa Taal lake oras na pumutok ang bulkan.

Pinalilikas na ng Phivolcs ang mga residente na nasa high-risk na lugar sa loob ng 14-kilometer radius mula sa Taal Main Crater.

Nanawagan sa mga kabataan si Manila Archbishop Luis Cardinal Tagle na maging mas aktibo sa simbahan at pagpapakalat ng salita ng Diyos.

Ginawa ng kardinal ang panawagan sa kanyang huling midnight mass sa fiesta ng Itim na Nazareno bilang Arsobispo ng Maynila.

Ayon sa kardinal, ang pagganap sa tungkulin sa simbahan ay hindi lamang dapat maging obligasyon kundi dapat ay gawin itong debosyon ng bawat Katoliko.

Sa unang bahagi ng kanyang homily ay nanawagan si Tagle sa lahat ng Pilipino na ipagdasal ang pag-iral ng kapayapaan sa harap ng umiinit na tensyon sa Gitnang Silangan.

Ipinalangin po natin na maging ligtas ang ating mga kapwa sa Middle East. Humupa ang mga pagnanais na sirain ang kapwa, humupa ang mga hangarin na maghiganti,” ani Tagle.