HOT STORIES OF THE WEEK

Inihayag ng Commission on Elections (COMELEC) na hindi na gagamitin sa mga susunod na eleksyon ang mga Vote Counting Machines (VCMs) ng Smartmatic.

Kasunod ito ng mga reklamo hinggil sa mga nasira at naglokong VCMs sa iba’t ibang polling precincts sa bansa.

Ayon Comelec commissioner Marlon Casquejo, ito na ang huling beses na gagamitin ng kanilang ahensya ang mga nasabing makina na unang ginamit noong taong 2010.

Sa huling datos ng Comelec nasa 940 na ang bilang ng problema sa pagkakaroon ng paper jam; 606 ang na-reject na mga balota; 158 ang naging problema sa mga VCM scanner; 87 ang mga VCM na ayaw mag-imprenta; at 76 naman na mga VCM ang hindi maayos ang pag-iimprenta.

Bukod sa naging aberya sa mga VCM, problema din ang kawalan ng kuryente sa mga polling precinct sa ilang lugar sa bansa kabilang na Navotas, Valenzuela at Marawi dahilan para maantala ang botohan.

Samantala, sinabi naman ni Casquejo na kanilang hihilingin sa Kongreso na magkaroon ng karagdagang pondo para sa pagbili ng mga bagong makina para sa susunod na eleksyon.

Nagmistulang “Blockbuster” na pelikula ang naganap na botohan kahapon sa bansa dahil sa haba ng pila ng mga botante.

Ayon kay COMELEC Commissioner George Garcia, ang mahabang pila ay indikasyon na nais ng mga Pilipino na marinig ang kanilang mga tinig sa pamamagitan nang paglahok sa halalan.

Nagsimula ang botohan alas-6 ng umaga hanggang alas-7 ng gabi pero mag a-ala-5 pa lamang ng madaling araw ay pumila na ang mga botante.

May ilan namang nakaranas ng mga aberya, kabilang na ang problema sa Vote Counting Machines kaya’t bahagyang naantala ang botohan.

Una nang inihayag ng poll body na dahil pampanguluhan ang halalan ay inaasahan nilang magiging mataas ang voter turnout ngayong taon.

Iniimbestigahan na ng National Telecommunications Commission ang umano’y hacking ng mobile phone number ni dating MMDA Chairman Benhur Abalos na kasalukuyang campaign manager ni presidential bet Ferdinand Marcos Jr.

Ayon sa NTC, nakikipag-ugnayan na sila sa Globe Telecom na naniniwalang isang uri ng “SMS spoofing” ang naganap na hacking.

Sa isang Facebook post noong linggo, inilahad ni Abalos na na-hack ang kanyang Globe cellphone number.

Nagpapadala anya ang kanyang numero ng mga hindi kanais-nais na mensahe kaya’t nagpasaklolo siya sa globe at agad sinuspinde ang numero.

Nagbigay ng 24/7 election task force support ang Department of Education (DepEd) para sa mga guro at paaralan.

Ayon kay Education Secretary Leonor Briones, ang 24/7 election task force (ETF) operation and monitoring center ang magbibigay pansin sa mga isyu, alalahanin at problema na may kaugnayan sa election.

Magsisilbi rin ang Operation and Monitoring Center bilang institutional link ng DepEd sa mga boluntaryong organisasyon, indibidwal, at katuwang na mga ahensiya para sa 2022 National at Local Elections.

Sinabi ni Briones na nakipag-ugnayan na ang deped sa Comelec at iba pang ahensya hinggil sa mga aberya sa halalan.

Nanawagan din si Briones sa lahat ng mga opisyal at tauhan ng DepEd na panatilihin ang pagiging neutral o pagkakapantay-pantay, at maging non-partisan sa pagbigay ng serbisyo sa publiko.

Hindi dapat ika-alarma ang mga napaulat na mga palyadong Vote Counting Machine sa halalan 2022.

Aminado si Parish Pastoral Council for Responsible Voting National Chairperson Myla Villanueva na mayroon talagang maliit na porsyento ng mga VCM na pumapalya kahit noon pang mga nakaraang eleksyon.

Bagaman mayroon anyang ilang makinang pumalya kahapon ay kaunti lamang naman ang mga ito at hindi dapat ikabahala.

51 VCM ang itinuring na depektibo habang 102 SD card ang pinalitan kumpara sa mahigit 81K makinang gumana kahapon.

Pangkalahatang naging mapayapa ang idinaos na national at local elections, kahapon.

Ito, ayon kay Interior Secretary Eduardo Año, ay sa kabila ng mga insidente ng patayan, partikular sa Ilocos Sur at Maguindanao.

Nagpapatuloy anya ang kanilang monitoring kasabay ng pagrereport ng mga pulis ng mga nagaganap sa iba’t ibang bahagi ng bansa.

Bukod pa ito sa mga isinampang kaso laban sa mga rogue political bets kahit pagkatapos ng national at local elections.

Patay ang isang guro na dapat sanang magsisilbi bilang support staff sa electoral board ngayong araw ng Halalan 2022 matapos na pagbabarilin ng hindi pa nakikilalang suspek sa Negros Occidental.

Ayon kay PNP-Police Regional Office 6 Public Information Officer Chief, Police Lieutenant Colonel Arnel Solis, nangyari ang pamamaril dakong 8:30p.m kahapon sa Himamaylan City sa nasabing lalawigan kung saan tinamaan sa tiyan ang biktimang si Mercy Miguel.

Agad naman itong isinugod sa ospital ngunit idineklarang dead on arrival.

Samantala, patuloy ang imbestigasyon ng otoridad sa naturang insidente.

Nakaboto na rin si Manila Mayor at Aksyon Demokratiko Standard-Bearer Francisco “Isko Moreno” Domagoso para sa 2022 Elections.

Sa Magat Salamat Elementary School sa Tondo, Maynila bumoto si Moreno bandang alas-11 ng umaga.

Pinaalalahanan naman ng alkalde ang mga botante na habaan ang pasensiya sa pagboto.

Samantala, napansin naman ng ilan ang hindi pagsusuot ni Moreno ng face mask habang bumoboto, na isang paglabag sa pandemic protocols na itinakda ng Commission on Elections.

Dakong 9:55 ng umaga naman ng dumating sa Carangcang Elementary School sa bayan ng Magarao, Camarines Sur si presidential aspirant Vice President Leni Robredo.

Hindi rin tumanggap si Robredo ng special treatment at pumila nang 20 minuto.

Samantala, ang running-mate ni Robredo na si Senador Francis “Kiko” Pangilinan ay matiyaga ring pumila upang makaboto.

Sa Inchican Elementary School sa Silang, Cavite bumoto ang senador.

Kasama ni Pangilinan ang kanyang asawa na si Sharon Cuneta, at sinabing handa silang tanggapin ang magiging resulta ng halalan basta’t patas ito.