HOT STORIES OF THE WEEK

Hinimok ng Bagong Alyansang Makabayan (BAYAN) ang Commission on Elections(COMELEC) na palawigin ang oras ng botohan ngayong araw ng election sa gitna ng mga naitatalang aberya sa vote counting machines (VCMs).

Ayon kay BAYAN Secretary General Renato Reyes, nakatanggap sila ng mga ulat hinggil sa mga VCM na pumalya.

Giit pa niya na ang mga botante ay hinihingan ng permiso na lumagda sa isang waiver at iiwan ang mga balota sa presinto.

Samantala, nanawagan si Reyes sa mga botante na i-report ang posibleng kaso ng electoral fraud.

Inihayag ng Philippine National Police (PNP) na mayroon nang mga naiulat na mga kaso ng hinihinalang “vote-buying” sa ilang mga lalawigan.

Ayon kay PNP OIC PLTGEN. Vicente Danao Jr., ang mga ito ay sumasailalim na sa masusing pagsisiyasat upang masampahan ng kaukulang kaso ang mga posibleng sangkot dito.

kasabay nito, muling nagbabala sa publiko si Danao kaugnay sa umiiral na liquor ban hanggang mamayang alas 12 ng hating-gabi.

Samantala, nanawagan din ang PNP OIC sa publiko na maging mahinahon ngunit alerto sa lahat ng mga aktibidad ngayong araw ng eleksyon hanggang sa mga susunod na oras at araw ng bilangan at maging sa pagpapahayag ng resulta ng halalan.

Bumoto rin nang maaga si Labor leader at presidential candidate Leody De Guzman sa Cainta, Rizal para sa 2022 polls.

Bandang alas-8 ng umaga nang dumating sa Cainta Elementary School si Ka Leody kasama ang mga miyembro ng partido Lakas ng Masa.

Si De Guzman ang chairperson ng bukluran ng manggagawang Pilipino at miyembro ng party-list na Partido Manggagawa.

Tumangging gumamit ng Emergency Accessible Polling Precint (EAPP) ang mga Person with Disability  (PWDs) at senior citizens sa voting centers sa Tondo, Manila.

Ito ay dahil nais ng mga ito na personal na ipasok ang kanilang balota sa Vote Counting Machines (VCMs) at tignan ang mga resibo.

Sa ilalim ng COMELEC resolution 10761, ang EAPPs ay itatayo sa mga voting center at piling lugar para sa senior citizens, PWDs at pregnant voters.

Pinili ng ilang guro sa Cotabato City na hindi magsilbi sa mga poll duty ngayong araw ng halalan dahil sa kalituhan at pangamba sa kanilang seguridad.

Ayon kay Commission on Elections (COMELEC) acting spokesperson John Rex Laudiangco, ito ay nag-udyok sa ahensya para palitan ang mga guro ng mga tauhan ng Philippine National Police (PNP).

Dagdag pa niya na sa lahat ng sitwasyon ay may contingency plan ang COMELEC.

Binigyang diin naman ni Laudiangco na trained personnel ng PNP ang mga magsisilbi bilang special electoral boards sa 175 clustered precints sa Cotabato City.

Inihayag ng Commission on Elections (COMELEC) na tuloy pa rin ang eleksyon sa ilang lugar na nakakaranas ng aberya sa kanilang Vote Counting Machines (VCM).

Ayon kay COMELEC acting spokesperson John Rex Laudiangco, “all systems go” na ang ahensya sa 2022 national election na nagaganap ngayong araw.

Tiniyak din niya na lahat ng mga nakarehistrong botante na pupunta sa mga presinto ay makakaboto.

Samantala, hinihintay ng COMELEC ang report ng 47 clustered precints sa Bangsamoro Autonomous Region in Muslim Mindanao (BARMM) kaugnay sa final testing and sealing ng mga VCM.

Nanawagan ang Philippine National Police (PNP) sa mga botante na maging wais sa pagboto ngayong araw ng eleksyon.

Sinabi ni PNP OIC Police LTGEN. Vicente Danao Jr., na mahalagang bumoto at samantalahin ang pagkakataong maiboto ang mga karapat dapat na kandidato.

Nagbabala naman si Danao na hindi sila mangingiming ipatupad ang buong pwersa ng mga batas sakaling may manggulo habang ginaganap ang halalan at kahit pagkatapos nito.

Nangako rin ang pambansang pulisya na babantayan nila ang mga polling precinct mula sa botohan hanggang sa magkaroon ng proklamasyon ng mga nanalo.

Nagpaalala rin ang PNP sa mga botante na magsuot ng facemask, magdala ng ID at ballpen sa kanilang pagboto at sumunod sa health protocols. —ulat mula kay Gilbert Perdez (Patrol 13)

Maaga ring bumoto si dating senador at presidential candidate Ferdinand “Bongbong” Marcos Jr. para sa eleksyon 2022.

Dumating sa Mariano Marcos Memorial Elementary School sa Batac City ang dating senador bandang 7:20 ng umaga, kasama ang kanyang kapatid na si Irene.

Si Marcos ang standard-bearer ng Partido Federal ng Pilipinas at nanguna sa iba’t ibang pre-election presidential surveys. —ulat mula kay Ronald Domingo (Ronda Patrol)

Handa na ang lahat ng voting precints sa lungsod ng Quezon para sa national at local election ngayong araw.

Ayon sa Quezon City LGU, naihatid na ng Department of Public Order and Safety sa lahat ng polling precints ang mga election paraphernalia.

Nagtalaga na rin ang City Government ng Law and Order Cluster na nakatutok sa pagpapanatili ng mapayapang halalan.

Naglatag na ng emergency medical posts ang Quezon City Disaster Risk Reduction and Management sa ilang paaralan sa lungsod.

Kabilang na rito ang san Bartolome Elementary School, Old Balara Elementary School at Commonwealth Elementary School.

Posible paring magbago ang isip ng nasa 20% ng mga botante hinggil sa kanilang iboboto sa susunod na pangulo ng bansa.

Ito ang inihayag ni Dindo Manhit, CEO  at Managing Director ng Strat Base Group, kung saan, nananatili paring undecided ang mga botante ngayong eleksiyon.

Sa ngayon, umarangkada na ang botohan sa mga polling precinct sa buong bansa kung saan, inaasahang boboto ang nasa 65 milyong botante.