HOT STORIES OF THE WEEK

Nakahanda na ang tanggapan ng mga resulta ng mga boto sa mga kandidato para sa 2022 Elections.

Ayon sa Commission on Elections (COMELEC), naging maganda ang kanilang preparasyon ngayong halalan kung saan, kanilang ipinasilip sa mga tauhan ng media ang set up ng Philippine International Convention Center (PICC) sa Pasay City.

Makikita sa PICC ang mga nagtatrabahong National Board of Canvassers na tatanggap ng resulta ng boto mula sa ibat-ibang lugar sa bansa.

Ininspeksiyon naman ni COMELEC Chairman Saidamen Pangarungan kasama ang mga tauhan ng Philippine National Police (PNP) at Armed Forces of the Philippines (AFP) ang buong PICC para masigurong walang magiging aberya ngayong eleksiyon.

Naantala ang final testing at sealing ng mga vote counting machine (VCMs) sa Cotabato City matapos magkaroon ng gulo sa pagitan ng ilang supporters ng mga kandidato sa main gate ng Bangsamoro Government Center.

Bantay sarado ng mga tauhan ng Philippine National Police (PNP) at Armed Forces of the Philippines (AFP) ang main gate ng Bangsamoro Government Center ilang Metro ang layo sa mismong tanggapan ng Commission on Elections (COMELEC) sa Mindanao.

Dahil dito, dalawa ang hinuli matapos paulanan ng mga bato ang ng grupo ng mga lalaki ang isang SUV na nakaparada sa nasabing lugar.

Agad namang isinara ang gate ng tanggapan ng COMELEC at itinigil ang operasyon dahil sa tensiyon kung saan, pinull-out ang mga VCMs at iba pang election paraphernalias gamit ang military vehicle mula sa tanggapan ng COMELEC.

Sa ngayon, dinala na sa Cotabato City Central Pilot Elementary School at iba pang mga presinto ang mga VCM na babantayan naman ng mga electoral board ng Philippine National Police (PNP).

Hindi exempted si Pangulong Rodrigo Duterte sa ipinatutupad na health and safety protocols sa mga polling precinct sa bansa.

Nabatid na nakatakdang bumoto ngayong araw si Pangulong Duterte at ang kaniyang anak na si vice presidential aspirant at Davao City Mayor Sara Duterte-Carpio sa Daniel R. Aguinaldo National High School sa Davao City.

Sakaling makitaan ng symptoms, dadalhin ang pangulo sa isolation polling centers para doon bumoto.

Ayon kay Margarita Castillo ng Administration Office II ng Daniel R. Aguinaldo National High School, mayroong itinalagang mga PSG, doctors at nurses na magbabantay para sa mga magpopositibo sa COVID-19.

Samantala, inilatag narin ang security protocols para sa pagboto ng pangulo kung saan, may designated area narin na inilaan para sa mga mamamahayag upang hindi maabala ang mga botante sa eleksiyon.

Irerequire naman sa lahat ng posibleng magiging close contact ng pangulo na magpakita ng negative RT-PCR test para masiguro ang kaligtasan ng bawat isa laban sa COVID-19.

Mas hinigpitan pa ang pagbabantay sa Mariano Marcos Memorial Elementary School sa Batac, Ilocos Norte na pagbobotohan ni presidential aspirant Ferdinand “Bongbong” Marcos Jr. at nang iba pa niyang pamilya.

Inasahang makakaboto ngayong araw ang pamilya Marcos kabilang na dito si dating first lady Imelda Marcos at pamangkin ni BBM na si re-Electionist Gov. Matthew Manotoc habang sa Laoag City naman boboto ang kaniyang anak na si Sandro Marcos.

Hindi naman papayagan ang mga miyembro ng media na makalapit sa mismong classrooms kung saan nagaganap ang botohan ng mga botante.

Nabatid na binigyan na lamang ng designated area ang mga mamamahayag upang maging maayos ang daloy ng mga bobotong botante.

Samantala, inaasahan namang aabot sa mahigit 400,000 ang bilang ng mga botanteng nakapagparehistro na at inaasahang boboto ngayong araw.

Sa ngayon, wala pang oras kung kailan boboto si Ferdinand “Bongbong” Marcos Jr., pero inaasahan ito ngayong umaga kung saan, isasabay siya sa siyam na botanteng boboto sa kada silid ng paaralan.

Handa na ang mga eskwelahan sa National Capital Region (NCR) sa pagsisimula ng 2022 National and Local Elections.

Matatandaang sinimulan nang linisin ang bawat silid sa mga paaralan sa Metro Manila upang magamit ng mga botante ngayong araw ng eleksiyon.

Nabatid na 10 lamang ang papayagan sa loob ng classroom at 10 naman sa labas ng classroom para makaboto habang ang iba naman ay maghihintay sa mga court o gym na ginawang holding area.

Sa ngayon, mahigpit na ipinatutupad sa bawat paaralan sa Metro Manila ang health and safety protocols upang maiwasan ang muling pagtaas ng kaso ng COVID-19.

Nilinaw ng Commission on Elections (COMELEC) na hindi sakop ang mga taga-suporta sa pagbabawal sa pangangampaniya ng mga kandidato para sa May 9 elections.

Ayon kay Commissioner George Garcia, ang pagbabawal sa pangangampaniya ay mahigpit lamang ipinaiiral para sa mga kandidato at partido politikal.

Sinabi ni Garcia na hirap silang pagbawalan ang mga supporters dahil mayroon silang karapatan na ihayag ang mga katangian ng kanilang iboboto sa halalan.

Dagdag pa ni Garcia, hindi maaaring hulihin ang mga taga-suporta dahil ang illegal campaigning rules ay aplikable lamang sa mga kandidato at political parties.

Iginiit ni Garcia na kahit umabot sa 50 milyong Pilipino ang magpo-post para sa kanilang ibobotong kandidato ay hindi na ito sakop ng prohibisyon ng kanilang ahensya.

Sa ngayon, patuloy na minu-monitor ng COMELEC kung mayroong nagaganap na “mass at group texting” bilang uri ng pangangampanya dahil mahigpit itong ipinagbabawal lalo na kung sangkot dito ang mga kandidato.

Inaasahan naman na aabot sa 65 milyong botante ang boboto ngayong araw.

Hinimok ni Department of Foreign Affairs (DFA) Undersecretary Brigido Dulay ang overseas voters na agahan ang kanilang pagboto bago matapos ang overseas absentee voting (OAV) ngayong araw.

Ayon kay Dulay, mainam na bumoto ng mas maaga at huwag nang maghintay ng huling minuto bago bumoto.

Ito ay upang hindi masayang ang ating iboboto at maihalal ang nararapat na susunod na administrasyon sa bansa.

Matatandaang sa naging twitter post na ni-retweet ni DFA Secretary Teodoro Locsin Jr., 10 vote-counting machine sa isang post sa United Arab Emirates (UAE) ang hindi nagamit dahilan para magresulta ng mahabang pila ng mga Pinoy workers.

Dahil dito, marami ang nawalan ng Malay dahil sa init ng panahon kung saan, sumampa na sa 45 degrees celsius ang init ng panahon sa UAE.

Iniimbestigahan na ng COMELEC Task Force ang sampung insidente ng vote buying na naiulat ng Commission on Elections (COMELEC) sa gitna ng eleksiyon.

Kasunod ito ng report na natatanggap ng komisyon sa kanilang official email address at facebook page hinggil sa pagbebenta at pagbili ng boto.

Katuwang ng ahensya ang Department of the Interior and Local Government (DILG), Philippine National Police (PNP), at ang Inter-Agency Task Force (IATF) Kontra Bigay upang matukoy ang nagaganap na dayaan ngayong halalan.

Sa ngayon, nangangalap narin ng ebidensya at testigo ang anti-vote buying teams para matugunan ang nasabing isyu.

Iniimbestigahan na ng Ilocos Sur Provincial Police ang naganap na shooting incident sa bayan ng Magsingal na ikinasawi ng apat katao na pawang supporter ng ilang local candidate.

Kinilala ang mga biktimang sina Lerry Torda, kwarenta’y uno anyos ng Barangay Maratudo; Recto Bagani, 65 anyos ng Manabo, Abra; Jovito Tomaneng, 61 ng Dingras, Ilocos Norte na retiradong sundalo;

At William Bulil-Lit, 61 anyos dating barangay chairman ng Barbaquezo sa Carasi, Ilocos Norte at retiradong Cafgu Member.

Si Recto ay kabilang sa mga supporter ni Mayoralty Candidate Alrico Favis, na asawa ni Incumbent Mayor Victoria Favis ng magsingal habang si Torda ay supporter ng kalabang si Lory Salvador Junior ng kilusang bagong lipunan.

Sugatan naman sina Teofilo Taasin, 39 anyos ng Barangay Maratudo; mga suspek na sina Kenneth Salvador at Albert Bañez, na driver ni Favis at Romnick Villanueva, 25 anyos ng Barangay Patong.

Naaresto ang anim na supporter ni Favis na sina Guillermo at Agustin Unciano, Dante Tolentino, Archie Garcia, Menelio Oliver Junior na pawang taga-barangay Patong at Bañez ng Barangay San Ramon at pawang mahaharap sa kasong murder at frustrated murder.

Mahaharap din sa katulad na kaso ang mga supporter ni Salvador na sina Kenneth Salvador, 40 anyos ng Barangay Napo at Teofilo Taasin ng Barangay Maratudo.

Ayon kina Ilocos Sur Police Provincial Director, Col. Wilson Doromal at Ilocos Sur Provincial Election Supervisor Alipio Castillo, nag-ugat ang insidente sa alegasyon ng vote-buying noong Sabado ng umaga.

Nagtungo anila ang mga supporter ni Salvador sa Barangay Labut upang beripikahin ang umano’y vote-buying activity at kinompronta ang mga supporter ni Favis.

Narekober mula sa grupo ni Favis ang caliber 45 pistol at mga bala habang nagdagdag na ng pwersa ang pulisya at militar sa magsingal.

Samantala, nilinaw ni Castillo na hindi pa kailangang isailalim sa COMELEC control ang nasabing bayan dahil tiniyak naman ng mga otoridad na nakalatag ang lahat ng hakbang at seguridad upang maiwasan ang mga kahalintulad na insidente.

Itinanggi ng kampo ni senatorial candidate Greco Belgica ang ulat na “perpetually disqualified” na siyang humawak ng anumang pwesto sa gobyerno.

Ayon kay Atty. Melchor Jaemond Aranas, legal counsel ni Belgica, wala namang inilalabas na anumang resolusyon ang comelec upang idiskwalipika ngayong May 9 elections ang dating chairman ng Presidential Anti-Corruption Commission (PACC).

Mali at misleading anya ang media reports hinggil sa estado ng kandidatura ni Belgica at nakabinbin pa rin ang kasong inihain laban sa kanya sa poll body.

Binigyang-diin ni Aranas na nakapagsumite naman ang dating PACC Official ng Statement of Contributions and Expenditures nito nang tumakbo rin sa pagka-senador noon namang 2013.