HOT STORIES OF THE WEEK

Umaabot na umano sa 3,000 hanggang 5,000 pesos ang  bilihan ng boto sa Bacolod City, Negros Occidental batay sa mga natanggap na alegasyon at ulat ng Commission on Elections (COMELEC).

Nilinaw ni Bacolod City Election Officer, Atty. Revo Sorbito na aaksyon lamang ang COMELEC sa sandaling may pormal na magrereklamo at may hawak na matibay na ebidensya tulad ng video.

Ayon kay Sorbito, wala pa kahit isang complainant na lumalabas at handang magreklamo.

Tiniyak naman ni Negros Occidental Provincial Election Officer, Atty. Roberto Salazar na may mga personnel ang  PNP, AFP at NBI na sumailalim sa training upang humawak at tumulong kapag may kasong isasampa kaugnay sa vote-buying.

Iba’t ibang terminal ng bus sa Metro Manila ang dinagsa ng mga pasaherong naghabol makauwi sa kani-kanilang probinsya para doon bumoto.

Kahapon pa lamang ng umaga ay mahaba na ang pila ng mga pasahero sa Parañaque Integrated Terminal Exchange (PITX).

Ilan sa kanila ay hindi naka-absent sa trabaho kaya kahapon lang nakabiyahe habang karamihan ay nagbabalak na bumalik din bukas o pagkatapos ng botohan, na pinaghahandaan na rin ng PITX.

Tiniyak naman ni PITX Spokesman Jason Salvador na sapat ang bilang ng mga bus na gagamit ng PITX upang ma-accommodate ang mga pasahero.

Maliban sa PITX, marami ring pasahero na patungo namang Central at Northern Luzon ang sumakay sa mga terminal sa Cubao, Quezon City.

Inaasahang ilalabas na bukas ng Commission on Elections (COMELEC) ang desisyon sa apela kaugnay ng mga inihaing disqualification (DQ) case laban kay presidential candidate Ferdinand “Bongbong” Marcos Junior.

Ayon kay COMELEC Chairman Saidamen Pangarungan, nilagdaan na ang tatlong consolidated cases pero nagpasya silang hintayin muna ang promulgation sa ikaapat na kaso na noong Huwebes lang natanggap ng en banc.

Bagaman promulgated at napirmahan na anya ang tatlong consolidated cases, dumating naman ang ika-apat na DQ case noong huwebes kaya’t nagpasya silang pagsabayin na lang ang release.

Una nang idineklarang special non-working holiday ang araw ng halalan ngayong lunes kaya’t kinabukasan na ilalabas ang desisyon ng poll body.

Ang mga petisyon ay inihain ng Akbayan Party-list, Partido Federal ng Pilipinas, Campaign Against the Return of the Marcoses and Martial Law at Pudno Nga Ilokano.

Ikinatuwa ng environmental group na EcoWaste Coalition ang hindi pagsunog ng Commission on Elections (COMELEC) sa nasa 933K defective at roadshow ballots.

Ayon kay Aileen Lucero, national coordinator ng EcoWaste Coalition, napigilan ang polusyon dahil sa hindi pagsira at pagsunog sa mga depektibong balota.

Noong Sabado sinimulan ng COMELEC ang pagsira sa higit 900K balota.

Binubuo ito ng halos 600K offical ballot at higit 300K roadshow ballots.

Nilinaw ng Commission on Elections na puwede pa ring i-promote o ikampanya ng mga taga-suporta ang kanilang nais na kandidato para sa halalan 2022.

Ito ay matapos ang ipatupad ang pagbabawal sa mga kandidato at political parties na mangampanya simula ngayong araw, May 8 hanggang bukas, Mayo 9 o ang mismong araw ng eleksyon.

Ayon kay Comelec commissioner George Garcia, mahirap pigilan ang publiko dahil ang pagpapakita ng suporta sa kanilang mga kandidato ay bahagi ng kanilang karapatan at freedom of expression.

Aniya, hindi nila kakasuhan ang mga taga-suporta dahil ang nasabing batas ay sumasakop lamang sa mga kandidato at political parties.

Pero ibang usapan na raw kung magsasagawa ng house-to-house visits ang mga taga-suporta dahil maaari nila itong ikategorya bilang pangangampanya ng mga campaign team.

Maliban dito, mino-monitor na rin ng ahensya ang “mass and group texting” na may kaugnayan sa mga kandidato dahil isang uri raw ito ng pangangampanya gayundin ang pamamahagi ng mga sample ballots.

Paalala ng Comelec, sakaling may mag-abot sa kanila ng sample ballots, puwede nila itong tanggihan at mas makakabuti kung magdadala na lamang ng sariling listahan.

Dagsa pa rin kahapon sa Parañaque Integrated Terminal Exchange (PITX) ang mga pasaherong nais umuwi sa kanilang probinsya upang doon bumoto sa halalan bukas.

Ayon kay PITX spokesperson Jason Salvador, punuan na ang mga bus na limitado ang bilang, dahil karamihan ay ginamit sa miting de avance ng mga kandidato kahapon.

Pero hindi aniya ito naging hadlang sa mga pasahero na pumila pa rin ng mahaba para makauwi sa lugar na kanilang pagbobotohan.

Patuloy namang nakikipag-ugnayan ang PITX sa MMDA, DOTr at LTFRB para magkaroon ng karagdagang units ng mga bibiyaheng bus.

Handa na rin ang pamunuan ng  Manila – Cavite toll Expressway o CAVITEX at Cavite-Laguna Expressway o CALAX para sa dagsa ng mga uuwi sa kanilang probinsya ngayong weekend para bumoto sa halalan bukas.

Ayon sa pamunuan ng dalawang expressway, suspendido ang lahat ng “lane closure” at pag-aayos ng daan para sa mabilis na biyahe ng mga motorista.

Nagpaalala naman ang CAVITEX at CALAX sa lahat na tiyaking nasa kondisyon ang Breaks, Lights, Oil, Water, Battery, Air, Gas, Engine, Tires at Sarili (BLOW BAGETS) para sa ligtas na pagbiyahe.

Idineklara ni Pangulong Rodrigo Duterte na special non-working holiday ang araw ng Lunes.

Ipatutupad na simula ngayong araw ang liquor ban para sa seguridad ng halalan bukas.

Ayon sa Philipppine National Police (PNP), bawal na ang pagbebenta, pagbili at pag-inom ng alak simula ngayong araw hanggang sa bukas.

Sinumang makikitang lumabag ay mahaharap sa parusa nang pagkakakulong na hindi bababa sa isang taon ngunit hindi hihigit sa anim na taon at walang piyansa.

Pinaalalahanan naman ang mga may-ari ng establisimyento na iwasan ang pag-display ng alak para hindi matukso ang publikong bilhin ito.

Nanawagan ng tatlong araw ng pagdarasal ang Catholic Bishops Conference of the Philippines (CBCP) para sa maayos at malinis na halalan bukas, Mayo a-9.

Ayon kay CBCP president Pablo Virgilio David, hinimok nito ang mga obispo na magsagawa ng pagdarasal simula ngayong araw, Mayo a-8 hanggang a-10.

Ito ay para alisin ang masasama na manggugulo sa Halalan.

Hinikayat naman ni David ang mga pari na panatilihing buksan ang simbahahan para sa mga mananampalataya.

Dakong alas-6 ng umaga bukas, patutunugin sa loob ng sampung minuto ang kampana sa lahat ng simbahan bilang hudyat na pagsisimula ng Halalan 2022.

HINDI napigilang maluha ni Susan ‘Toots’ Ople, ang pinakabata sa pitong anak ni dating Labor Secretary at Senador Blas Ople, matapos banggitin ni presidential frontrunner dating Sen. Ferdinand ‘Bongbong’ Marcos Jr., na ang ama nito ay ‘champion of labor.”

Si Blas ay nagsilbing labor chief sa loob ng 17 taon noong panahon ni dating Pangulong Ferdinand Marcos Sr., at nakilala sa kanyang malaking ambag sa sektor ng paggawa kabilang ang pagkakaroon ng trabaho ng mga Pinoy sa abroad, bukod pa diyan na siya ang isa sa pinakamagaling na taga-payo ni Marcos noon.

Sa town hall meeting kamakailan kasama ang mga kinatawan ng Trade Union Congress of the Philippines (TUCP) sa Quezon City, siniguro ni Marcos na magtatalaga siya ng magaling at pro-labor na kalihim sa labor department.

“Siyempre, ang pinakauna maghanap tayo, makikinig ako sa inyo, sino ang mga dapat na maging secretary, undersecretary diyan sa mga departments na iyan at mga ahensya ng government para talagang represented kayo,” ani Marcos.

“Yung champion ng labor talaga noon si Ka Blas, Blas Ople hindi ba? Yun talagang naiitindihan talaga nya at saka nakikita ko pinapaliwanag nya sa matanda, sa father ko. Talagang pinaglalaban nya nang mabuti. Mahusay naman talaga kaya nakikinig yung aking ama. Ganon din ang gagawin natin,” dagdag niya.

Nasa 40 taong gulang pa lamang noon si Ople, nang italaga siya ni Marcos noong 1967 bilang kalihim ng labor department at hinawakan niya ang pwesto sa loob ng 17 taon.

Noong 1975, si Ople ang kauna-unahang Filipino president ng International Labor Organization. Hinangaan siya dahil sa kanyang acceptance speech na gumamit ng purong Filipino ang salita.

Dumalo rin si Susan sa naturang town hall meeting at umamin na hindi niya napigilang maiyak nang banggitin ni Marcos ang pangalan ng kanyang ama.

“Naiyak talaga ako, kasi na-recognize niya ang ginawa ng aking ama,” saad ni Susan.

Pagkatapos ng okasyon, agad itong nakipagkita ng personal kay Marcos para magpasalamat at magpa-litrato. “Salamat po sa pagbanggit sa pangalan ng ama ko,” ani Susan kay Marcos.

“Magaling naman talaga ang father mo,” sagot naman ni Marcos.

Si Susan ang pangulo ngayon ng Blas Ople Policy Center na tumutulong sa mga inaaping OFW

Sa naturang town hall meeting, siniguro ni Marcos Jr. na ang kanyang prayoridad ay protektahan ang mga manggagawa bilang bahagi pa rin ng kanyang programa para makabangon mula sa pandemya.

“When it comes to labor, my number one priority is to protect the labor force, doon natin unahin and from there magpo-flow na basta’t maayos ang ating pagtrato sa ating mga workers, I think the rest of all of the issues will flow from that,” ani Marcos, na sinalubong ng sigawan at palakpakan ng mga manggagawa.

Napag-usapan din sa pulong ang iba pang mga isyu at pangangailangan ng mga manggagawa kasabay ang paglalatag ni Marcos ng kanyang mga programa para sa kanila.

Nagpahayag din ng interes si Marcos para gawing priority bill ang Security of Tenure Act, na naglalayong amyendahan ng Labor Code para ma-protektahan ang mga karapatan ng mga manggagawa.