HOT STORIES OF THE WEEK

Pumalo sa 71 election-related incidents ang naitala ng Philippine National Police (PNP) hanggang magsara ang botohan kagabi.

Ayon kay PNP Spokesperson Police Colonel Jean Fajardo, 16 sa mga ito ang kumpirmadong may kaugnayan sa halalan.

Kabilang aniya dito ang naganap na barilan ng mga tagasuporta ng mga lokal na kandidato sa Magsingal, Ilocos Sur at Gen. Tinio, Nueva Ecija.

Matatandaang nagkabakbakan ang kampo ng dalawang mayoral candidate sa bayan ng San Antonio, Nueva Ecija na kinabibilangan nina incumbent Mayor Alvin Salonga at katunggaling si Agripino Javier.

Napag-alamang may mga bitbit na baril ang mga tauhan ng dalawang kandidato kaya’t kapwa sasampahan ng kaukulang kaso ang mga ito.

May mga naitala ring mga insidenteng may kaugnayan umano sa pulitika sa ilang lugar sa Mindanao. —sa ulat ni Gilbert Perdez (Patrol 13)

Iprinoklama na rin bilang panalo sa mayoralty elections sa lungsod ng Laoag si Michael Marcos Keon.

Nakakuha si Keon 25,502 votes habang ang kanyang kalabang si dating alkalde na si Chevylle Fariñas, ay  mayroong 25,342.

Pinasalamatan naman ni Keon ang lahat ng mga sumuporta sa kanya at sinabing ipagpapatuloy niya ang mga naumpisahang pagbabago sa lungsod.

Wagi pa rin si incumbent mayor Joy Belmote bilang alkalde ng Quezon City.

Tinalo ni Belmonte ang kanyang katunggali na si Mike Defensor, na nakakuha ng  617,908 votes habang si  Defensor naman ay may 389,336 votes.

Maging ang incumbent vice mayor  at running mate ni Belmonte na si Gian Sotto ay nanalo rin na mayroong  553,949 votes, kumpara sa running mate ni Defensor at incumbent councilor na si Winnie Castelo, na may 405,539 votes.

Naniniwala ang kampo ni presidential candidate Bongbong Marcos na kayang sugpuin ng Commission on Elections (COMELEC) ang tangkang dayaan sa halalan.

Ayon sa tagapagsalita ni Marcos na si Atty. Vic Rodriguez, kumpiyansa ang BBM-Sara UniTeam na tutugunan ng komisyon ang anomang pandaraya sa botohan.

Nabatid na nakatanggap ng iba’t ibang reklamo ang Comelec hinggil sa depektibong mga balota at palyadong mga Vote Counting Machines (VCMs) sa Northern Luzon at iba’t ibang polling precinct sa bansa.

Umaasa ang UniTeam na magiging mahigpit sa pagbabantay ang awtoridad upang hindi makaapekto sa resulta ng halalan.

Bahagyang naantala ang botohan sa Malate, Maynila makaraang sumiklab ang sunog kahapon.

Nagsimulang kumalat ang apoy sa Room 234 ng Aurora Elementary School sa San Andres Street, dakong alas-9:30 ng umaga.

Ayon sa Bureau of Fire Protection, faulty wiring ang sanhi ng sunog na tumagal lamang ng sampung minuto.

Nasa kasagsagan ng pagboto ang mga tao sa naturang paaralan nang matupok ang kwarto kaya’t agad inilabas ang mga vote counting machine sa gusali at nagsilikas ang mga botante.

Nagpatuloy ang botohan pero sa ibang polling precinct na ito isinagawa.

Wala namang nasaktan at wala ring nasirang mga makina sa nasabing sunog.

Posibleng i-akyat sa Supreme Court ang magiging pasya ng COMELEC En Banc sa disqualification cases laban kay presidential candidate Ferdinand “Bongbong” Marcos Junior.

Ito ang inamin ni COMELEC Commissioner George Garcia sa gitna ng ilalabas na desisyon ng poll body na inaasahan ngayong araw.

Anuman anya ang maging pasya ng COMELEC En Banc sa mga legal issue ay ang Korte Suprema pa rin ang may pinal na sagot.

Una nang inihayag ni COMELEC Chairman Saidamen Pangarungan na ang ruling sa tatlong consolidated cases ay pirmado na at nagpasya ang poll body na hintayin ang promulgation ng ika-apat na kaso.

Walang nakitang panibagong pagtaas ng COVID-19 cases ang Department of Health sa bansa sa kabila ng election season.

Ito, ayon kay DOH Undersecretary Myrna Cabotaje, ay dahil sa pagsunod ng publiko sa Minimum Public Health Standards (MPHS).

Gayunman, kung susuway ang publiko sa MPHS ay asahan na ang mahigit 200 panibagong kaso ng COVID-19 kada araw sa kalagitnaan ng buwan o sa Mayo a – 15.

Ito’y base sa projections ng feasibility analysis of syndromic surveillance.

Pero kung patuloy na susundin ang MPHS, maaaring bumaba sa 28 per day ang COVID cases sa kalagitnaan ng Mayo.

Ilang re-electionist mayors sa Metro Manila ang nanguna sa partial, unofficial results ng Halalan 2022.

Panalo sa mayoralty elections sa lungsod ng Makati si Incumbent Mayor Abby Binay matapos makakuha ng 338,819 votes, habang ang kanyang kalabang si Joel Hernandez ay mayroong 16,640.

Sa Pasig City, nare-elect din si Mayor Vico Sotto na nakakuha ng 335,851 votes kumpara sa 45,604 na botong nakuha ni Vice Mayor Iyo Bernardo.

Gayundin sina San Juan Mayor Francis Zamora, na nakakuha ng 66,883 votes; Mayor Ike Ponce ng Pateros, 28,534; at Marikina Mayor Marcy Teodoro, na may 183,878 votes.

Samantala, nanguna naman sa Las Piñas si Imelda Aguilar na mayroong 108,644 votes kumpara sa mahigit 70,000 votes ni Ferds Eusebio.

Sa Malabon, halos dikit ang laban nina Former Vice Mayor Jeannie Sandoval at Enzo Oreta, kung saan nakuha ni Sandoval ang 94,826 votes habang 93,547 vote naman kay Oreta.

Si Rep. Eric Olivarez naman ang bagong alkalde ng Parañaque, matapos makakuha ng 174,397 na boto.

Namayagpag si Rep. Wes Gatchalian sa Valenzuela City na mayroong 275,650 votes, at si Ruffy Biazon naman sa Muntinlupa City na mayroong  173,674 votes.

Iprinoklama na bilang panalo sa mayoralty elections sa Lungsod ng San Juan si incumbent Mayor Francis Zamora ng PDP-Laban.

Hanggang alas-11 pasado kagabi, nasa 100% na ang election returns sa San Juan, kung saan nakakuha si Zamora ng 66,883 votes habang ang kanyang kalabang si Jun Usman ng PMP ay mayroong 9,413.

Nare-elect din bilang bise alkalde si Warren Villa na mayroong 55,920 votes kumpara sa 16,608 votes ni Philip Cezar na kapartido at running mate ni Usman.

Nakakuha naman ng 49,334 votes si Atty. Bel Zamora ng PDP-Laban para sa pagka-kongresista kumpara sa 27,133 votes ni Jana Ejercito ng NPC.