HOT STORIES OF THE WEEK

Unti-unti nang umuusad ang manual counting ng election returns ng Parish Pastoral Council for Responsible Voting (PPCRV).

Matapos ang dalawang batches ng election returns noong Lunes, inihayag ni Dr. William Yu, Co-IT Director ng PPCRV na may hawak na silang 10,000 ERs, hanggang alas-10 kagabi.

Inaasahan anya nilang darating ngayong araw ang malaking bulto ng ERs.

Samantala, dumoble na ang volunteer encoders ng nasabing poll watchdog sa Quadricentennial Pavilion sa University Of Santo Tomas, Maynila.

Ikinagulat ng isang political analyst ang mabilis na paghahatid ng resulta ngayong Halalan 2022 kumpara noong nakalipas na eleksyon.

Ayon kay Prof. Ramon Casiple, Executive Director ng Institute for Political and Electoral reform, posibleng magresulta ng konklusyon at diskusyon ang maagang datos.

Pinayuhan naman ni Casiple ang publiko na maging mapagbantay dahil wala pang opisyal na resulta.

Batay sa partial at unofficial results, nangunguna pa rin si presidential aspirant Ferdinand ‘Bongbong’ Marcos Jr. na may higit 31M votes kumpara sa halos 15M ni Vice President Leni Robredo.

Planong bumalik sa pagiging abogado ni dating presidential spokeperson Harry Roque matapos ang naganap na 2022 elections.

Nabatid na bigong makalusot si Roque sa “magic 12” ng pinakahuling partial and unofficial tally ng botohan sa pagka-senador.

Sa naging tweet ni Roque, kaniyang pinasalamatan ang lahat ng nagpakita ng suporta sa kaniyang kandidatura.

Binati din ni Roque ang tagumpay ng nangungunang tandem nina dating senador Bongbong Marcos Jr. at Davao City Mayor Inday Sara Duterte-Carpio sa pinakahuling unofficial and partial tally ng presidential and vice presidential race.

Sa kasalukuyan, nasa ika-17 si Roque sa partial and unofficial tally of votes ng Commission on Elections (COMELEC) na mayroong halos 11M boto.

Mayroon nang sapat na bilang ng volunteers ang Parish Pastoral Council for Responsible Voting (PPCRV) para sa pagbibilang ng boto hanggang Mayo a-15.

Ayon kay PPCRV Chairperson Myla Villanueva, karamihan ay nagboluntaryo sa pamamagitan ng online sign-up sheet na dumagsa matapos ang Halalan.

Marami rin ang nagwalk-in at pumila kagabi sa labas ng PPCRV sa UST campus mula Lacson Avenue hanggang España.

Nagpasalamat naman si Villanueva sa lahat ng tumulong para sa Halalan 2022.

Sa ngayon, pagkain na lamang ang pinoproblema ng PPCRV para sa kanilang volunteers.

Sinimulan na ng Comelec en banc na siyang national board of canvassers ang pag-canvass ng boto para sa senatorial at partylist elections.

Mismong si COMELEC Chairman Saidamen Pangarungan ang namuno sa canvassing of votes na nagsimula alas-7 kagabi.

Ang mga rehiyong nakapagpadala na ng boto sa COMELEC en banc ay ang Cordillera Administrative Region, National Capital Region, Regions 1, 2, 3, 4A, 4B, 5, 6, 7, 8, 10, 11, 12 at 13.

Ang mga rehiyong natapos na sapag-canvass ng boto ay ang Abra, Kalinga, Apayao, Mt. Province, Benguet, Ifugao at Malabon City.

Sa ngayon, mayroon nang partial at kompletong resulta ang COMELEC mula sa Overseas Absentee Voting (OAV).

Ikinatuwa ng kampo ni presidential frontrunner Ferdinand ‘Bongbong’ Marcos Jr. ang pagbasura ng COMELEC sa lahat ng Disqualification cases laban sa kanya.

Ayon kay Atty. Vic Rodriguez, tagapagsalita ni Marcos, tama ang ginawa ng poll body dahil wala namang basehan ang mga petisyon.

Una nang ibinasura ang apat na kaso sa Division level ng COMELEC pero iniakyat ang mga ito sa En Banc para sa Motion for Reconsideration.

Umaasa naman ang kampo ng dating senador na mananatiling totoo ang COMELEC sa pagpapatupad ng kanilang mandato.

Iprinoklama na kahapon ng City Board of Canvassers si Marcelino “Marcy” Teodoro bilang mayor muli ng Marikina City.

Sa panayam ng DWIZ sinabi ni Teodoro na kasama niyang prinoklama ang kaniyang mga partido sa pagka bise-alkalde, konsehal at dalawang district representative.

Ayon kay Teodoro, naging mabilis ang proseso at walang naitalang aberya sa kanilang lungsod.

Nangako naman si Teodoro sa mga Marikenyo na kaniyang ipagpapatuloy ang kaniyang nasimulan tungo sa maunlad na komunidad.

Sinabi pa ni Teodoro na kaniyang tututukan ang problema at hinanaing ng kaniyang nasasakupan partikular na ang pagbibigay ng solusyon sa Marikina River upang maiwasan ang palaging pagbaha tuwing umuulan.

Nakaantabay pa rin ang senado para sa turn-over ng Certificate of Canvass (COC) at Elections Returns (ER).

Ayon sa Senate Public Relations and Information Bureau, kahapon pa nila inaasahan ang mga dokumento pero hindi pa ito dumarating.

Ang senado ang tatanggap at mag-iimbak ng COC at ER para sa pagkapangulo at pangalawang pangulo.

Sa pamamagitan ng Joint Public Session, dapat tumanggap at magbukas ng COC ang senado na hindi lalagpas sa 30 araw matapos ang Halalan.

Mismong si Senate President Vicente Sotto III ang tatanggap ng mga dokumento.

Target ng Kongreso na mai-proklama sa May 27 o May 28 ang bagong Pangulo at pangalawang Pangulo ng bansa.

Ayon ito kina house speaker Lord Allan Velasco at senate president Vicente Sotto III matapos isagawa ang initialization ng CCS o Consolidation and Canvassing System machines na siyang magka-canvass ng COCs mula sa mga lalawigan, lungsod at ibayong dagat.

Sinabi ni Velasco na pipilitin nilang tapusin ang lahat sa buwan ng Hunyo at masyado aniyang mahaba na ang lima hanggang pitong araw na canvassing lalo pat computerized na ngayon.

Sa pinakahuling unofficial at partial result, nangunguna pa rin si dating senador Ferdinand “Bongbong” Marcos, Jr. sa presidential race.

Tinatayang nasa 1,800 vote counting machines (VCMs) ang nagkaroon ng aberya sa mismong araw ng halalan.

Sa panayam ng DWIZ, sinabi ni Atty. Marcelo Bragado Jr. ng DepEd Election Task Force, iba’t iba ang naging dahilan ng pagpalya ng mga VCM.

Kaugnay nito, sinabi ni Bragado na inirerekomenda nila na huwag nang gamitin ang mga nasabing VCM sa susunod na eleksyon dahil maaari aniyang hindi na ito gumana.

Maliban dito, ilang problema rin ang naranasan kahapon na agad naman aniyang naresolba.