HOT STORIES OF THE WEEK

Patay ang isang lola matapos umanong ma-heat stroke habang boboto sana sa Dasmariñas City, Cavite, noong Lunes.

Kinilala ang babae na si Erlinda Cahindoy Lachica, 72 anyos, residente ng Barangay Sta. Cristina 2.

Ayon sa Dasmariñas City Police, mag-a-alas-8 ng umaga nang makaramdam ng paninikip ng dibdib at tuluyang nag-collapse hanggang sa bawian ng buhay ang biktima.

Inihayag ni Perlita Lachica na ilang hakbang na lang ang kanyang biyenan at makaboboto na sana sa polling precinct nang mahilo ito at himatayin.

Agad itinakbo sa pagamutan ang lola pero idineklarang dead-on-arrival.

Isang lola sa Quezon City ang matiyagang pumila ng isang araw para lamang makaboto.

Ala-5 pa lang ng madaling araw noong Lunes ay pumila na si Milagros Ymas, 71 anyos sa Lagro Elementary School sa Novaliches sa pag-asang makaboboto nang maaga.

Gayunman, inabot siya ng ala-6 kinaumagahan na nakaboto makaraang pumalya ang mga vote counting machine.

Sanhi ng delay ang naglokong corrupted SD cards na ginamit sa vote-counting machines sa polling precinct.

Una nang inihayag ng COMELEC na luma na ang mga VCM at hindi rin nakabili ng mga bagong makina ang poll body dahil kulang ang pondong inilaan ng Kongreso.

Nanindigan ang Parish Pastoral Council for Responsible Voting (PPCRV) na walang anumang iregularidad sa voting turnout na mino-monitor ng kanilang mga personnel.

Ito’y sa kabila ng obserbasyon ng mga netizen na mayroon umanong 68 to 32 ratio transmission pattern ng mga boto sa presidential contenders na sina Ferdinand Marcos Junior at Vice President Leni Robredo.

Ayon kay PPCRV Chairperson Myla Villanueva, tinitingnan na nila ang mga reportna naobserbahan ng mga  social media users.

Nagpasaklolo na anya sila sa ilang academic institutions, tulad ng University of Santo Tomas at Ateneo De Manila University na wala rin namang nakitang anumang iregularidad sa pattern.

Gayunman, nanawagan si Villanueva sa publiko ng kaunti pang panahon upang masilip ang datos.

Dapat nang bumuo agad ng economic team si dating senador Bongbong Marcos, na presumptive winner sa presidential race sa katatapos lamang na halalan.

Ito’y upang maiwasan ang pangambang mag-alisan ang mga investor dahil sa kawalan ng tiwala sa kanyang magiging administrasyon.

Ayon kay dating presidential spokesman Edwin Lacierda, na isa ring Political Analyst, ang pagbulusok ng Philippine Shares ay indikasyon ng kawalang tiwala ng mga investor.

Dapat anyang mapagkakatiwalaan, propesyunal at respetado sa larangan ang mga kukuning miyembro ng economic team ni Marcos.

Binigyang-diin ni Lacierda na kailangang unahin muna ang economic team dahil ito ang problema ngayon.

Magugunitang lumagpak sa 3.1% hanggang 6,500 level ang benchmark Philippine Stock Exchange Index bago magsara sa .58%.

Nakikipag-ugnayan ngayon sa mga eksperto ang kampo ni Vice President Leni Robredo hinggil sa alegasyong lumalabas sa social media kaugnay sa resulta at bilangan ng mga boto sa Halalan.

Ayon kay Vice President Leni Robredo, pinag-aaralan na ng kanilang kampo ang naging boto ni dating senador Ferdinand “Bongbong” Marcos Jr. sa partial and unofficial count of votes ng Commission on Elections (COMELEC).

Matatandaang maraming naiulat na aberya sa mga Vote Counting Machines (VCMs) sa mga polling precinct sa ibat-ibang lugar sa bansa sa naganap na botohan noong Mayo a-9 dahilan para magsagawa ng prayer rally ang mga residente sa Naga City at iba pang lugar sa bansa.

Hindi kasi makapaniwala ang mga taga-suporta ni VP Leni sa naging resulta ng botohan kung saan, bumaba umano ang kanilang moral.

Sa huli, pinasalamatan ni Robredo ang lahat ng sumuporta sa kaniyang kandidatura at nangakong ipagpapatuloy ang kaniyang nasimulan at naitulong sa bansa.

Tinanggap na ng ilang mga tumakbong kandidato ang partial and unofficial tally of votes ng Commission on Elections (COMELEC).

Magkahiwalay na nag-anunsiyo ng pag-concede sina Senator Manny Pacquiao, Manila City Mayor Isko Moreno, Senator Ping Lacson, Faisal Mangondato, at Partido Lakas ng Masa standard bearer Leody De Guzman sa 2022 presidential elections.

Batay sa partial and unofficial tally of votes ng COMELEC, pangatlo si Pacquiao sa presidential race na mayroong mahigit 3.6M na boto, pang-apat si Moreno na may mahigit 1.8M na boto, pang-lima si Lacson na may mahigit 881K na boto, pang-anim si Mangondato na may mahigit 255K na boto, habang nasa ika-walong pwesto naman si De Guzman na mayroong mahigit 91K na boto.

Samantala, tinanggap nadin ni Senate President Vicente “Tito” Sotto III ang naging kagustuhan ng taumbayan matapos pumangatlo sa vice presidential race na mayroong mahigit 8.1M na boto.

Sa kasalukuyan, nangunguna pa rin si Ferdinand “Bongbong” Marcos Jr. sa presidential race na mayroong mahigit 31M na boto na sinundan naman ni Vice President Leni Robredo na may mahigit 14.8M na boto sa partial and unofficial count of votes.

Nangunguna naman si Sara Duterte-Carpio sa vice-presidential race na mayroong mahigit 31M na boto na sinundan naman ni Kiko Pangilinan na may mahigit 9.2M na boto sa partial and unofficial count of votes.

Nasa 31 botante ang pinauwi pagkatapos bumoto para isailalim sa Isolation.

Ito ay matapos magpapakita ng mga sintomas ng COVID-19 sa mismong araw ng Halalan.

Ayon sa Department of Health (DOH), kabilang ang mga indibidwal sa 644 kaso na natukoy ng health workers sa mga polling precinct.

Ayon kay Health Undersecretary Maria Rosario Vergeire, mayroon pang 57 pasyente ang dinala sa ospital matapos ding magpakita ng sintomas ng nakakahawang sakit.

Sa ngayon, mahigpit na minomonitor ng DOH ang sitwasyon sa mga polling precinct kabilang na ang mahigpit na pagpapatupad ng physical distancing, maayos na bentilasyon ng mga classrooms at tamang pagsuot ng face mask.