Naka antabay na ang mga investor sa anunsyo ni dating senador Ferdinand Bongbong Marcos hinggil sa economic team nito.
Ito ayon sa mga investor ay dahil nakasalalay sa mga bagong cabinet members partikular sa economic team ang pag rekober ng ekonomiya ng bansa mula sa pandemya.
Tiwala ang mga ekonomista na pawang best economic managers ang itatalaga ni presumptive president Ferdinand Bong Bong Marcos, Jr.
Sinimulan nang baklasin ng mga lokal na pamahalaan ang mga campaign poster sa kanilang lugar.
Sa Sangandaan, Rizal Avenue sa Caloocan City, inumpisahan nang alisin ang mga poster sa mga pader at poste.
Gayundin sa Valenzuela City, kung saan pinagtatanggal na rin ang iba’t ibang paraphernalia sa mga pampublikong lugar at gilid at tabi ng polling precincts.
Mababatid na nagbigay ng tatlong araw ang Department of the Interior And Local Government (DILG) sa lahat ng local government units at mga kandidato para alisin ang lahat ng campaign waste materials sa kanilang nasasakupan.
Iprinoklama bilang alkalde ng bayan ng Bamban sa Tarlac si Alice Leal Guo, na kauna-unahang babaeng mayor ng nasabing bayan.
Si Guo ay isang neophyte politician at businesswoman.
Ang kanyang running mate na si dating Bamban Mayor Leonardo “Ding” Anunciacion ay hinirang naman na vice mayor.
Sa bayan ng Capas, nanalo bilang alkalde si Roseller “Boots” Rodriguez at vice mayor naman si Alex Espinosa.
Sa bayan naman ng Paniqui, wagi ang mag-amang Max Roxas at Bien Roxas, bilang alkalde at bise-alkalde.
At sa bayan ng Samuel, nanguna pa rin si incumbent mayor Donya Tesoro at Sir Benjamin Tesoro bilang vice mayor.
Katanggap-tanggap ang paliwanag na ibinigay ni Cotabato City Police Director Police Colonel Rommel Javier sa video ng pagpunit ng dalawang pulis sa mga balota na nag-viral sa social media.
Ito ang sinabi ni PNP Officer in Charge PLt. General Vicente Danao kaugnay ng insidente, na ayon sa Police Regional Office Bangsamoro Autonomous Region, ay nangyari sa Datu Ayunan Elementary School, MB Kalanganan, Cotabato City.
Nagsilbi aniyang miyembro ng Special Board of Election Inspector (SBEI) ang mga pulis sa Clustered Precincts Number 69 na awtorisado ni Atty. Nasroding Mustapha, Cotabato City Election Officer.
Sa paliwanag ng Cotabato PNP, mandato ng mga PNP-SBEI na punitin ang mga hindi nagamit na balota sa pagtatapos ng botohan alinsunod sa COMELEC Omnibus Election Code – Article 17 ng Section 204.
Ang pagpunit ng mga ballota ay sinaksihan ni Mr. Arfaj-Erven Ahmad, ang designated election supervisor officer at watchers ng Partidong One Cotabato at UBJP.
Paalala ni Danao sa publiko na maging mapanuri sa impormasyong kumakalat mula sa “unverified sources” sa social media upang hindi mabiktima ng “disinformation.”
Samantala, nilinaw ng PNP na iniimbestigahan pa ang isyu hinggil sa ilang shaded ballots na pinunit din. —sa ulat ni Gilbert Perdez (Patrol 13)
“God bless the new administration, the Filipino people, and the Philippine Republic.”
Ito, ayon sa kampo ni dating presidential spokesperson Ernesto Abella, kasunod ng pag-concede nito sa presidential race.
Ayon kay Johnwin Dionisio, Campaign Manager ni Abella, iginagalang nila ang resulta ng eleksyon at kinikilala si frontrunner former senator Ferdinand “Bongbong” Marcos Jr. bilang ika-17 pangulo ng bansa.
Mababatid na nasa ika-7 pwesto sa presidential race si Abella na may 113,238 votes hanggang kaninang 8:47 ng umaga, batay sa partial-unofficial results mula sa COMELEC Transparency Server.
Tinanggap na rin ng ekonomistang si Manny Lopez ang kanyang pagkatalo sa vice presidential race.
Hindi man aniya nanalo sa Political competition, ay naihatid naman niya ang mensahe para sa pagbabago at reporma.
Binati rin nito sina Ferdinand “Bongbong” Marcos Jr. at running mate nito na si Davao City Mayor Sara Duterte sa pangunguna sa 2022 elections.
Nanawagan naman sa publiko si Lopez na irespeto ang resulta ng Halalan.
Mababatid na nasa ika-6 na pwesto si Lopez na may 157,710 votes batay sa partial at unofficial count ng mga boto, hanggang kaninang 10:32 ng umaga.
Pumalo sa record-high na 88% ang voter turnout para sa Local Absentee Voting (LAV) sa Halalan 2022.
Ito, ayon kay Acting COMELEC Spokesperson John Rex Laudiangco, ay kumpara sa 74% LAV turnout noong 2010, 64% noong 2013 at kapwa 77% noong 2016 at 2019.
Umarangkada ang LAV simula Abril 27 hanggang 29.
Una nang iniulat ng COMELEC na mayroong 93,819 LAV applicants, na karamihan’y galing sa PNP na sinundan ng Philippine Army.
Nanindigan ang Commission on Elections (COMELEC) na walang nangyaring dayaan sa gitna ng botohan.
Ito ay matapos mapuna ng mga netizen ang komisyon hinggil sa naging partial and unofficial count of votes kung saan, nangunguna sa presidential race si Ferdinand “Bongbong” Marcos Jr. na sinundan ni Vice President Leni Robredo.
Nabatid na naging mabilis ang transmission ng botohan dahilan para kuwestiyunin ang opisyal na bilangan ng boto.
Kumalat sa social media ang isang post kung saan, marami ang nagduda at nagsabing may nakaprogram o may nakatanim na daya sa mga Vote Counting Machine (VCMs).
Dahil dito, nagrally ang ilang mga estudyante at mga militanteng grupo sa COMELEC sa Maynila upang kuwestiyonin ang naturang isyu.
Ayon kay Commissioner Marlon Casquejo, hindi papasa sa mga pagsusuri ang mga automated election system kung may nakaprogram ng pandaraya.
Mahirap umanong patunayan na mayroong naganap na pandaraya sa botohan dahil ang lahat ng system ay dumaan sa certification ng kanilang ahensya.
Nilinaw ni Casquejo na sa kada limang minuto, nakabase ang unofficial count sa transmission ng mga presinto ng transparency server at hindi na kailangang hintayin pa ang mga resulta sa mga presinto para makapaglabas ng resulta sa mga boto.
Nagpasalamat si Davao City Mayor Sara Duterte-Carpio sa mga tumanggap sa Unity Movement kasabay ng kanyang pangunguna sa partial at unofficial count sa vice presidential race.
Ayon kay Duterte-Carpio, ang Uniteam ang magsisilbing simbolo ng katapangan at pagkakaisa ng mga Filipino.
Pinasalamatan din ng presidential daughter ang mga naniwala at nagtiwala sa kanyang desisyong tumakbo sa pagka-bise presidente at running mate ni dating senador Bongbong Marcos, na nangunguna naman sa presidential race.
Patuloy anya nilang babantayan ang mga boto hanggang sa proklamasyon.
Samantala, nanawagan ang alkalde sa publiko na magpa-booster na laban sa COVID-19.
Sa susunod na dalawang linggo pa makikita ang posibleng epekto ng halalan sa COVID-19 cases sa bansa.
Inihayag ni Health Undersecretary Maria Rosario Vergeire na nasunod naman nang maayos ang health protocols sa ilang polling centers.
Gayunman, may ilan ding lumalabag sa public health safety standards, gaya ng physical distancing rules.
Tinatayang 67 milyong katao ang bumoto noong Lunes na nagresulta sa napakahabang pila at siksikan sa mga polling center.
Hangga’t naka-facemask at bakunado ang mga botante ay maaaring maliit lamang anya ang maging epekto ng halalan sa COVID cases pero hindi nila isinasantabi ang posibilidad na magkaroon muli ng surge.