HOT STORIES OF THE WEEK

Mababakante na ang mga posisyon sa COMELEC, Commission on Audit at Civil Service Commission na na-bypass ng Commission on Appointments, ngayong araw.

Ito ang nilinaw ni Deputy Speaker Rufus Rodriguez, batay aniya sa Saligang batas at sa panuntunan ng CA, ang naturang mga posisyon ay mababakante oras na mag-adjourn ang kongreso.

Bagamat isinara na ng senado at kamara ang sesyon noong June 1, ang Official Adjournment ng kongreso base sa legislative calendar ay kahapon kaya’t ngayon ang huling araw ng naturang mga opisyal.

Naniniwala si Rodriguez na hahayaan na ni Pangulong Duterte si incoming President Bongbong Marcos na mamili ng papalit sa nabakanteng mga pwesto.

Laya na mula sa Pasay City Jail ang dalawang opisyal ng Pharmally Pharmaceutical Corporation.

Sina Mohit Dargani at Linconn Ong ay lumabas ng bilangguan pasado alas-9 kaninang umaga.

Ayon kay BJMP Spokesperson Chief Inspector Xavier Solda, alas-8 ng umaga nang matanggap nila ang release order na pirmado ni Senate President Vicente Sotto, III.

Magugunitang November 2021 nang ilipat sa Pasay City Jail sina Dargani at Ong matapos magmatigas na ibunyag kung nasaan ang mga financial documents ng kumpanya na hinihingi ng Senate Blue Ribbon Committee.

Si Ong ay hawak na ng senado nuon pang September 21, 2021 matapos i-contempt dahil sa pag iwas sa mga tanong ng mga senador at pagsisinungaling samantalang naaresto si Dargani nuong November 14 nang tangkaing lumabas ng bansa sa Davao City International Airport.

Nakatakdang idaos sa National Museum of the Philippines ang inagurasyon ni President-Elect Ferdinand “Bongbong” Marcos Jr.

Ayon kay Incoming Presidential Management Staff Secretary Zenaida “Naida” Angping, ang naturang lugar ang mainam na venue para sa oath-taking ni Marcos kasunod ng isinagawang ocular inspection ng inaugural committee members.

Sinabi pa ni Angping na puspusan na ang paghahanda para sa panunumpa ni Marcos sa Hunyo 30 bilang ika-17 pangulo ng Pilipinas.

Mababatid na ang National Museum of the Philippines ang nagsilbi ring venue ng inagurasyon ng mga dating pangulo na sina Manuel L. Quezon, Jose P. Laurel, at Manuel Roxas.

Maliban sa COVID-19, dapat ding mag-ingat ang publiko laban sa ibang sakit gaya ng Dengue.

Ito, ayon kay Dr. Ted Herbosa, Medical Adviser ng National Task Force against COVID-19, ngayong karaniwan ang nasabing sakit dahil panahon na ng tag-ulan.

Sinabi pa ni Herbosa na dapat na panatilihin ng publiko ang malinis na kapaligiran.

Isang sunog ang sumiklab sa isang residential area sa Sta. Mesa, Maynila.

Naganap ang sunog sa V. Mapa Street, na nag-umpisa bandang 4:30 ng madaling araw at idineklara itong fire out dakong 5:53 ng madaling araw.

Ayon sa Bureau of Fire Protection, isang lalaking edad 60-anyos ang nasawi sa insidente.

Sa pagtaya ng BFP, umabot sa P500-K ang halaga ng pinsala ng sunog.

Patuloy na inaalam ng mga otoridad ang sanhi ng sunog.  —ulat mula kay Aya Yupangco (Patrol 5)

Isiniwalat ni COMELEC Commissioner George Garcia na malaking halaga ng pera ang i-winidraw sa Ilocos Sur, batay sa vote buying report ng Anti-Money Laundering Council.

Inihayag ito ni Garcia sa pagdinig ng Senate Electoral Reforms Committee hinggil sa mga reklamong natanggap ng poll body sa umano’y pamimili ng boto noong May 9 elections.

Gayunman, hindi idinetalye ng poll official kung gaano kalaking halaga ng pera ang winidraw sa Ilocos Sur.

Sa kalagitnaan ng pagdinig ay nagbiro pa si Senador Imee Marcos, chairperson ng nasabing kumite at dating Ilocos Norte Governor, sa pagsasabing hindi siya ang nag-withdraw at kapit-bahay lamang nila ang Ilocos Sur.

Samantala, nasa 940 sumbong anya ang natanggap ng “task force kontra bigay” sa kanilang facebook page habang 171 sa e-mail at 105 mula sa kanilang law department.

Ipinanukala naman ni COMELEC Chairman Saidamen Pangarungan ang mas mabigat na multa laban sa mapapatunayang guilty sa vote buying, bagay na sinang-ayunan ng senadora.

Inilarga na ang malakihang rollback ng Petron Corporation, Solane at Phoenix sa presyo ng LPG.

Aabot sa P5.90 centavos kada kilo ang bawas-presyo ng Petron sa LPG habang P5.18 centavos kada kilo ang Phoenix.

Simula na ang kautusan alas-12:01 kaninang hatinggabi.

Ang AutoLPG naman ng Petron ay may tapyas presyo na P3.30 centavos kada kilo at P2.86 centavos sa Phoenix.

Samantala, epektibo rin ngayong alas-6 ng umaga ang rollback sa LPG ng Solane na nasa P5.91 centavos.

Ang price adjustment sa LPG ay bunsod ng paggalaw ng presyo ng krudo sa International Market.

Bahagyang bumaba ang bilang ng aktibong kaso ng COVID-19 sa Pilipinas.

Sa datos ng Department of Health kahapon, bumaba sa 2, 415 ang active cases mula sa 2, 448 noong Lunes.

Nakapagtala naman ang DOH ng 133 bagong nahawa sa COVID-19.

Sa bilang ng mga nasawi, nananatili pa rin ito sa 60, 455 habang 3, 627, 711 ang mga gumaling sa COVID-19.

Sa kabuuan, nasa 3, 690, 581 na ang total cases ng COVID-19 sa bansa.