HOT STORIES OF THE WEEK

Apat na kandidato pa lang ang nakapagpapasa ng Statement of Contributions and Expenditures (SOCE).

Ayon kay John Rex Laudiangco, acting Spokesperson ng Commission on Elections, ang mga nakapagpasa pa lamang ng SOCE ay sina dating PNP chief Guillermo Eleazar at mga Party-list groups na ABONO, Senior Citizen at Bisaya Gyud.

Hanggang Hunyo a-8 maaaring makapagsumiteng SOCE o 30 araw makalipas ang halalan noong Mayo a-9.

Lahat ng kandidato, talo o panalo ay obligadong maghain ng SOCE sa COMELEC.

Sinumang mabigo ay pagmumultahin ng P1-K hanggang P30-K at maaari pang pigilin sa pag-upo sa anumang pwesto.

Pansamantalang mawawalan ng tubig ang ilang barangay sa Quezon City.

Ayon sa Quezon City Local Government, magsisimula ang water interruption alas-10 bukas na magtatagal hanggang alas-4 ng madaling araw ng Hunyo a-3.

Ang mga lugar na maaapektuhan ay ang Elliptical Road sa harap ng PHILCOA, kanto ng Masaya Street, Commonwealth Avenue at kanto ng P. Tuazon at San Gabriel Street, Barangay Horseshoe.

Payo naman ng LGU sa mga residenteng maaapektuhan na mag-imbak na ng suplay ng tubig.

Umabot na sa 22 ang kabuuang kaso ng Omicron subvariant BA.2.12.1 sa Pilipinas.

Ito ay matapos makapagtala ang Department of Health (DOH) kahapon ng panibagong limang kaso na natukoy sa Western Visayas region.

Kabilang sa bagong kaso ang tatlong Returning Overseas Filipinos galing sa Amerika at dalawang local cases na kapwa bakunado kontra COVID-19.

Sa 22 BA.2.12.1 cases sa bansa, 18 ang acquired habang apat ang Returning OFWs.

Samantala, maliban sa BA.2.12.1 ay nakapagtala rin ang DOH ng isa pang kaso ng BA.4 na bagaman hindi bakunado ay asymptomatic naman at gumaling na matapos ang quarantine.

Problema pa rin sa Pilipinas ang hindi maayos na pagpapatupad ng waste segregation.

Ayon kay acting Environment Secretary Jim Sapulna, maraming LGU ang hindi pa rin sumusunod sa  Republic Act 9003 o ang Ecological Solid Waste Management Act of 2001.

Ito ang batas na nagbibigay mandato sa paghihiwalay ng basura o segregation sa Barangay level.

Binigyang-diin naman ng opisyal na ang responsibilidad sa solid waste ay nakasalalay sa LGU dahil teknikal na tulong at suporta lamang ang kayang ibigay ng pamahalaan.

Pinaalalahan din ni Sapulna ang publiko na gawin ang tamang segregation ng basura tulad ng paghahati sa compostable, recyclable at residual wastes.

Tinanggihan ni Pangulong Rodrigo Duterte ang pinaplanong alok ni President-elect Ferdinand ‘Bongbong’ Marcos Jr. sa kaniya na maging bagong drug czar ng papasok na administrasyon.

Ayon kay Pangulong Duterte, hindi pa panahon upang tanggapin niya ang alok.

Hindi na rin aniya nais ng Pangulo na makisawsaw sa mga magiging programa ni Marcos.

Gayunman, handa naman ang Punong ehekutibo sa oras na humingi ng payo si PBBM kaugnay sa War on Drugs sakaling hindi ito magkaroon ng sariling pamamaraan.

Limang suspek ang inaresto sa ikinasang joint operation ng pinagsanib pwersa ng mga tauhan ng Southern Police District (SPD) Drug Enforcement Unit, District Intel Division at District Mobile Force Battalion sa No. 79 Extension, C6 Service Road, Barangay New Lower Bicutan, Taguig City

Kinilala ang mga suspek na sina Christopher Estillore Oroyan, 47-anyos, maintainer ng drug den; habang kasamang inaresto ang mga users o gumagamit ng ilegal na droga na sina Mark Jacinto Mamonon, 46-anyos na isang land lord; Ronaldo Ocampo Marcelino, 55-anyos; Domingo Tabamo Mata, 49-anyos; at Felizarda Amarillo Imson, 49-anyos.

Ayon kay SPD Dir. B/Gen. Jimili Macaraeg nakumpiska sa mga suspek ang nasa 42 gramo ng hinihinalang shabu na may street value na P285,600 at mga baril kabilang na ang colt caliber .45; punisher caliber .45; pietro beretta caliber .22; tatlong magazines, mga bala ng nabanggit na mga baril, sling bag, eyeglasses case, coin purse, at buybust money na ginamit sa operasyon.

Pansamantalang nakapiit sa SPD Custodial Facility ang limang suspek na nahaharap sa kasong paglabag sa Comprehensive Dangerous Drugs Act of 2002 at Comprehensive of Firearm and Ammunitions Regulatory Act.

Nagbigay ng mensahe si President-elect Ferdinand “Bongbong” Marcos Jr. para sa ika-44 na kaarawan ni Vice President-elect Sara Duterte-Carpio.

Sa Birthday message sinabi ng bagong pangulo na si Inday ang pinaka mahusay at hinihiling ng lahat na makatrabaho.

Nabatid na kamakailan ay nagpasalamat si Inday Sara Kay BBM dahil aniya mahaba raw ang pasensya nito sa kaniya noong panahon ng kampanya.

Iginiit ng Department of Education na patuloy pa ring gagamitin bilang opsyon ng kanilang ahensya ang blended learning para sa darating na pasukan.

Ayon kay Education Secretary Leonor Briones, hindi aalisin ng Pilipinas ang blended learning sa kabila ng paghikayat sa mga pampubliko at pribadong paaralan na magsagawa ng personal na klase para sa darating na School Year 2022- 2023.

Sinabi ni Briones na hindi dapat talikuran ng bansa ang teknolohiya, digitalization, at kasaysayan ng Pilipinas sa gitna ng pandemiya at muling pagbabalik ng Face-to-Face classes.

Iginiit ng kalihim na ang mga mag-aaral ay dapat matuto sa pamamagitan ng electronic at online media gayundin ang tradisyonal na face-to-face instruction.

Umabot na sa 363,571 pasahero ang nabigyan ng serbisyo sa libreng sakay ng MRT-3.

Ito ay matapos palawigin ng isa pang buwan ng MRT-3 Management na tatagal hanggang ika a-30 ng Hunyo.

Ito na ang ikatlong buwan ng implementasyon ng libreng sakay sa MRT-3, na may layuning maipakita sa mga pasahero ang mas pinagandang serbisyo ng linya ng mga tren at matulungan sila sa kanilang mga gastusin sa gitna ng pagtaas ng presyo ng gasolina at mga bilihin.

Walang kailangang bayaran ang sinumang pasaherong sasakay mula 4:40 ng umaga hanggang 10:10 ng gabi kung saan, maaaring gamitin ang Valid Stored Value o Beep Card upang makasakay sa tren na walang mababawas sa card balance ng pasahero.

Samantala, pinalawig rin ang pamamahagi ng libreng Antigen testing ng MRT-3 sa mga pasahero hanggang sa Hunyo a-30 na sinisimulan mula alas-7 ng umaga hanggang alas-8 ng umaga sa mga istasyon ng North Avenue, Shaw Boulevard, at alas-4 ng hapon hanggang alas-5 ng hapon sa mga istasyon ng Cubao at Shaw Boulevard Station.