HOT STORIES OF THE WEEK

Makakatanggap ng karagdagang cash rewards ang mga atletang nakasungkit ng medalya sa 31st Southeast Asian (SEA) Games mula kay Pangulong Rodrigo Duterte.

Ito ang kinumpirma ng Chairman ng Senate Committee on Sports Senator Christopher Lawrence “Bong” Go kung saan, ang additional incentives ay hiwalay pa sa cash reward na binabanggit sa batas alinsunod sa National Athletes and Coaches Incentives and Benefits Act.

Layunin nitong makatulong sa mga atleta at makapagbigay ng inspirasyon upang mas lalo pang magsumikap sa kanilang pagtetraining.

Bukod pa dito, matutulungan din nito ang pamilya ng mga atletang lumahok at nakasungkit ng karangalan sa bansa.

Nangako si Go na mas paiigtingin pa ang mga programa para masuportahan ang atletang Pilipino at mapalakas ang Sports Development Programs ng Pilipinas.

Inihayag ni incoming Department of Social Welfare and Development (DSWD) Secretary Erwin Tulfo na malawak man ang kaniyang magiging serbisyo, kaniyang sisiguraduhin na matutugunan ang mga problema sa kanilang ahensya.

Sa panayam ng DWIZ kumpiyansa ang bagong kalihim na nagkaroon man siya ng bagong posisyon, pareho lang ang kaniyang ginagawang pagtulong sa taumbayan.

Sinabi ni Tulfo na nasa Top 5 list ang DSWD na may pinaka malaking budget o pondo na mayroong P205-B kumpara sa ibang mga ahensya ng gobyerno.

Sa kabila nito, siniguro ni Tulfo na kaniyang matutugunan ang problemang may kaugnayan sa kanilang ahensya partikular na ang pandemic recovery ng bansa.

Dapat umanong buwisan ng 1% hanggang 3% ang mga mayayaman o negosyanteng kumukita ng bilyong pisong halaga ng pera sa Pilipinas.

Ito ang inihayag ng IBON Foundation upang muling makabangon ang bansa sa gitna ng pandemiya.

Sa panayam ng DWIZ sinabi ni IBON Foundation, Executive Director Sonny Africa, base sa kanilang inihaing batas, ang mga mayayamang kumikita ng P1-B ay dapat buwisan ng isang porsyento sa kanilang kita; dalawang porsyento naman ng buwis sa mga kumikita ng P2-B; at tatlong porsyento naman sa mga kumikita ng P3-B.

Sinabi ni Africa na sa ngayon, ay hinihintay pa nila ang desisyon kung aaprubahan ang itinutulak na batas ng susunod na kongreso.

Inihayag ng IBON Foundation na halos 90% o 8 sa 10 Pilipino ang mayroong kalahating milyong piso na pag-aari sa bansa.

Sa panayam ng DWIZ sinabi ni IBON Foundation, Executive Director Sonny Africa na kahit pa mabayaran ng gobyerno ang utang ng Pilipinas sa ibang bansa ay hindi pa rin ito sapat dahil wala umanong matitirang pondo para sa pagkain.

Umaasa si Africa na mapapanindigan ng bagong administrasyon ang kanilang mga pangako na bababa ang presyo ng mga bilihin maging ang pagbabayad ng buwis at masolusyonan ang mga problemang kinakaharap ngayon ng bansa.

Ayon kay Africa, nakakalungkot isipin na ang mga ordinaryong Pilipino ang gumagapang sa kahirapan kumpara sa mga Pilipinong may daan-daang bilyong piso ang kinikita katulad nalang nina dating Senador Manny Villar at magkakapatid na Sy.

Iginiit ni Africa na hindi naman ginusto ng bawat isa na magkaroon ng pandemiya at mapilitang gumastos ang gobyerno laban sa COVID-19 maging ang girian sa pagitan ng Russia at Ukraine dahilan ng mataas na presyo ng langis at pagkain.

Inanunsiyo ng Commission on Higher Education (CHED) na mahigit 2M estudyante ang nakinabang sa Free College Education Law ng Administrasyong Duterte.

Ayon kay CHED chairman Prospero De Vera III, 1.97M na estudyante mula sa State at Local Universities at Colleges, ang nakatanggap ng libreng tuition at miscellaneous fees.

Nasa 364, 168 na estudyante naman mula sa Tertiary Education Subsidy and Tulong Dunong Program ang nakatanggap ng libreng edukasyon sa ilalim ng Universal Access to Quality Tertiary Education Law.

Samantala, binigyang diin ni De Vera na ang mga rehiyon na may pinakamataas na saklaw ng kahirapan ang nakapagtala ng pinakamaraming bilang ng mga benepisyaryo para sa naturang programa.

Kinilala ng Philippine National Police ang 3,226 na pulis na nagsilbi bilang United Nations peacekeepers mula 1992 hanggang sa kasalukuyan kasabay ng paggunita ng 2022 International Day of UN Peacekeepers.

Mismong si PNP officer in charge PLT. General Vicente Danao Jr. ang nanguna sa pagpaparangal sa na nasabing mga pulis na isinagawa sa camp crame kahapon.

“People, peace, progress. The power of partnerships,” ang tema para sa taong ito.

Sa kanyang mensahe, sinabi ni Danao na sa panahon ngayon ay walang mas mahalaga pa sa pagtiyak ng kapayapaan sa bansa, rehiyon, at sa buong daigdig.

Hinimok naman ni Danao ang mga pulis na patuloy na magkaisa sa layuning gawing ligtas at maunlad ang buong mundo para sa lahat.—mula sa ulat ni GILBERT PERDEZ (Patrol 13)

Nasa maayos na kalagayan si Vice President Leni Robredo, halos tatlong linggo makalipas ang presidential elections kung saan siya pumangalawa.

Ayon ito kay Atty. Barry Gutierrez, Spokesperson ni Robredo na nagsabi ring “at peace” na ang bise presidente at tanggap na kung anuman ang magiging resulta ng eleksyon.

Sinabi pa ni Gutierrez na itinuturing ni Robredo na reward ang pagdalo niya sa graduation ng anak sa New York lalo pa’t tuluy-tuloy ang kanilang pagtatrabaho sa nakalipas na anim na taon.

Kasabay nito, inihayag ni Gutierrez na bahala na si Robredo kung pormal na magku-concede bagamat sa tingin niya ay nasabi at nagawa na ng pangalawang pangulo ang mga dapat nitong gawin.

Pangunahing tututukan ni incoming DSWD Secretary Erwin Tulfo ang COVID-19 Pandemic Recovery.

Tiniyak ito ni Tulfo na nagsabi ring ipa-prioritize niya ang mas mabilis na pagbibigay ng financial aid at relief goods sa panahon ng kalamidad.

Sinabi ni Tulfo na marching order sa kaniya ni President Elect Ferdinand Bongbong Marcos, Jr. na tugunan ang problema sa pandemya.

Ipinabatid pa ni Tulfo na sisiguraduhin niyang mabibigyan  ng ayuda ang mga nawalan ng trabaho sa pamamagitan nang naiwalang multi billion peso budget ng DSWD na kabilang sa 10 ahensyang nakakatanggap ng pinakamalaking pondo sa pambansang budget.

Ipinatawag na ng Department of Foreign Affairs ang mga senior official ng Chinese Embassy bilang protesta sa panibagong harrasment ng Chinese Coast Guard sa isa na namang barko ng Pilipinas sa West Philippine Sea.

Ayon sa DFA, nirereview na rin nila ang impormasyon hinggil sa pagharang at pagbuntot ng mga barko ng tsina sa Research vessel ng Bureau of Fisheries and Aquatic Resources sa Ayungin Shoal.

Ito’y upang ikasa ang panibagong diplomatic action laban sa paglabag ng China sa soberanya ng Pilipinas.

Iginiit ng kagawaran na naganap ang insidente sa loob ng Exclusive Economic Zone at Continental Shelf ng Pilipinas.