HOT STORIES OF THE WEEK

Hinarang ng mga barko ng China ang isang Government research vessel ng Pilipinas sa West Philippine Sea.

Batay sa datos ng US-based Asia Maritime Transparency Initiative, binuntutan at hinarang ng mga Chinese vessel ang research vessel ng Bureau of Fisheries and Aquatic Resources habang nasa Ayungin Shoal, noong April 21.

Nakatawag pansin ang aktibidad ng BFAR kaya’t dinikitan at binuntan ito ng Chinese Coast Guard.

Dahil dito, umatras ang barko ng Pilipinas kahit ang Ayungin Shoal ay bahagi ng Philippine Exclusive Economic Zone at Continental Shelf.

Ikinukunsidera ni Pangulong Rodrigo Duterte ang pagtuturo sa Davao City sa oras na matapos ang kanyang termino sa June 30.

Ibinunyag ito ni Executive Secretary Salvador Medialdea sa katatapos lamang na Duterte Legacy Event sa Philippine International Convention Center sa Pasay City, kahapon.

Ayon kay Medialdea, hindi pa niya mabatid kung saang paaralan at anong subject ang ituturo ni Pangulong Duterte.

Sa katunayan anya ay patapos na mag-impake ang punong ehekutibo na noon pang Pebrero o Marso niya sinimulan.

Sa kabila ng mga lumulutang na balitang bukas ang susunod na administrasyon na bigyan ng pwesto ang outgoing president, wala pang pormal na alok kay Pangulong Digong na maging Anti-drug czar sa ilalim ng Marcos Administration.

Aminado naman si Medialdea na hindi pa niya matiyak kung tatanggapin o hindi ni Presidente Duterte ang nasabing alok.

Ipinanawagan ng Department of the Interior and Local Government sa social media giant na Facebook na harangin ang mga iligal na E-sabong o Online Cockfighting pages at accounts.

Umaasa si DILG undersecretary Jonathan Malaya na magiging mabilis din ang aksyon ng META, na parent company ng FB, sa pagsugpo sa mga nasabing pages gaya ng pag-suspinde ng naturang social media platform sa mga lumalabag sa kanilang Community standards.

Isinumite rin ni Malaya ang listahan ng pitong Facebook pages, groups at accounts na tinukoy ng PNP Anti-Cybercrime Group na tuloy pa rin ang E-sabong operations.

Samantala, nagpasalamat naman si DILG secretary Eduardo Año sa Bangko Sentral ng Pilipinas sa kautusan sa Bank-Supervised Financial Institutions na alisin ang E-sabong operators mula sa list of merchants sa kanilang online applications.

Inaasahan ng Bureau of Immigration ang pagtaas ng bilang ng dayuhang bibisita sa Pilipinas sa pagluluwag ng travel restrictions.

Ayon kay BI Commissioner Jaime Morente, ang pag-alis ng RT-PCR requirement para sa mga dumarating na biyahero, na fully vaccinated at kahit na may isang booster shot ay naka e-engganyo sa ilang dayuhang turista na bumisita sa bansa.

Ang Travel Insurance Requirement anya para sa mga paparating na pasahero ay tinanggal na rin at bagaman hindi na hinihingi ay mahigpit pa ring inirerekomenda ang health protocol.

Sa datos anya ng ahensya ay aabot sa 15K ang tourist arrival sa bansa kada araw, noong tag-init.

Naniniwala ang ilang incoming cabinet member na makabubuting ipaubaya na lang kay President-elect Bongbong Marcos ang pagtatalaga ng mga opisyal sa ilang constitutonal commission tulad ng COMELEC, Commission on Audit at Civil Service Commission.

Ito ang inihayag ni Senator Juan Miguel Zubiri matapos ipagpaliban ng senado ang confirmation ng ilang Ad Interim appointments.

Aminado si Zubiri na kumporme siya sa hirit ng ilang incoming cabinet member.

Bukas magpapasya ang Commission on Appointment kung ikukumpirma, iba-bypass o ire-reject ang mga Ad Interim appointment nina COMELEC Chairman Saidamen Pangarungan, Commisioners George Garcia at Aimee Torrefrancia Neri, COA Chairperson Rizalina Justol at Civil Service Chairman Karlo Nograles.

Alinsunod anya sa rules, maaari silang magdesisyon o magbotohan kung iba-bypass na lang ang naturang mga nominee.

Ipinunto nina Zubiri at Minority Leader Franklin Drilon na sa oras na ma-reject ang mga nominee ay hindi na sila maaaring muling i-appoint ng susunod na Pangulo pero kung bypass ay pwede pa silang ire-appoint kung gugustuhin ng susunod na presidente. —ulat mula kay Cely Ortega Bueno (Patrol 19)

Naniniwala si Senate Majority Leader Juan Miguel Zubiri na limitado na lamang sa kanila ni Senator Cynthia Villar ang labanan sa pagka-Pangulo ng Senado.

Ayon kay Zubiri, bagaman sumusubok pa rin si Senator- elect Francis Escudero, may pag-uusap na silang dalawa hinggil sa Senate Presidency.

Sa ngayon naman anya ay wala pa sa kanilang nakakukuha ng siguradong bilang ng boto.

Gayunman, kampante si Zubiri na nasa kanya ang suporta ng majority o karamihan ng magiging majority bloc sa senado pero tumanggi pa siyang ilantad kung ilan ang kaniyang kapanalig.

Batay sa naunang impormasyon, sinasabing mayroon ng 12 senador na nasa panig ni Zubiri kaya isa na lang ang kulang para ito ay maka-13 habang walong senador ang nasa panig ni Villar. —ulat mula kay Cely Ortega Bueno (Patrol 19)

Dapat ikunsidera ng incoming Marcos Administration ang Balik Probinsya Program.

Ito ang inihayag ni National Population Commission chair Juan Antonio Perez bilang isa sa mga solusyon laban sa kahirapan at lumolobong populasyon.

Ayon kay Perez, mahalagang mapag-aralan ang nasabing programa dahil importanteng maipalaganap nang pantay-pantay ang populasyon at oportunidad sa bawat rehiyon.

Nagsisiksikan anya ang lahat sa mga high income region gaya ng Metro Manila at CALABARZON.

Umaasa si Perez na makabubuo ng polisiya na maglilimita sa Rural to Urban Migration ang papasok na Marcos administration.

Bukod dito, kabilang din sa mga iminungkahi ng POPCOM ang paglikha ng polisiya na may kinalaman sa Income Disparity, Good match ng labor skills to education o dapat nakatutok ang edukasyon sa kung ano ang kailangan ng rehiyon.

Makikipag-pulong na ang kampo ni Vice President Leni Robredo sa team ni incoming Vice President Sara Duterte bilang pagtiyak sa maayos na transition of power.

Nakasaad sa liham ni Robredo kay Duterte na kanilang nirerespeto ang natanggap nilang mensahe noong Mayo a – 27 na humihiling ng initial meeting sa pagitan ng kanilang mga kampo.

Handa anya ang Team ni VP Leni na sagutin ang mga tanong ng kampo ng presidential daughter hinggil sa Office of the Vice President.

Inatasan naman ni Robredo ang kanyang Chief of Staff na si Undersecretary Philip Dy na direktang makipag-ugnayan sa Team ni Duterte.

Una nang inihayag ng kampo ng susunod na Bise Presidente na hiniling nila ang isang virtual meeting kay Robredo upang mapag-usapan ang transition process.

Samantala, nagpaabot naman ng pagbati si Robredo kay Duterte matapos ang proklamasyon nito bilang ika-15 Bise Presidente ng bansa.

Suportado ng United Kingdom (UK) kasama na ang UNCLOS ang pagsusulong ng International Maritime Laws ng Pilipinas.

Ayon kay British Ambassador to the Philippines Laure Beaufils, ito ay para mapahupa ang tensyon sa South China Sea at masiguro ang Freedom of Navigation.

Asahan na rin aniya ang pagpapalakas sa presensya ng British carriers sa rehiyon.

Nabatid na isa si Beaufils sa apat na foreign diplomats na humarap kay President-elect Bongbong Marcos kasama sina Singaporean Ambassador Gerard Ho, French Ambassador Michele Boccoz, at European Union Representative Luc Veron.

Inihayag ni Defense spokesperson Director Arseño Andolong na malayo na ang narating ng kakayahan ng Pilipinas sa pagbibigay ng proteksiyon at pagpapatrolya sa West Philippine Sea (WPS) sa ilalim ng Administrasyong Duterte.

Ito ay bunsod ng modernisasyon ng Armed Forces of the Philippines (AFP) na tinutukan ni Pangulong Rodrigo Duterte.

Nabatid na marami ng military equipment ang naibigay sa AFP at marami na rin ang panukala na naisabatas sa ilalim ng Duterte Administration.

Bukod pa dito, bumilis din ang operation time ng sandatahang lakas ng Pilipinas maging ang surveillance at monitoring hanggang sa pagresponde sa mga naitatalang insidente dahil sa nagpapatuloy na AFP Modernization Program ng pamahalaan.