HOT STORIES OF THE WEEK

Tinalakay sa naganap na courtesy call ng apat na mga diplomats kay President-elect Ferdinand “Bongbong” Marcos Jr., kung papaano palalakasin ang Pilipinas sakaling maupo na ito bilang Ika-17 Pangulo ng bansa.

Kabilang sa mga nakausap ni Marcos sina Singaporean Ambassador to the Philippines Gerard Ho, European Union Ambassador to the Philippines Luc Vèron, France Ambassador to the Philippines Michelle Boccoz, at British Ambassador to the Philippines Laure Beaufils.

Umaasa ang apat na diplomats na magkakaroon ng mas maraming economic reforms, maipagpapatuloy ang maritime support at joint maritime exercises.

Asahan din na mas lalago pa ang relasyon sa pagitan ng apat na nabanggit na bansa at nang Pilipinas na kapwa mga co-founders ng ASEAN.

Inihayag ng Philippine National Police (PNP) na 90% ang kabuuang bilang ng mga sibilyan ang nahuli sa gitna ng ipinatutupad na gun ban.

Sa panayam ng DWIZ sinabi ni PNP spokesperson PCOL. Jean Fajardo, patuloy pa rin ang implementasyon ng gun ban sa kanilang ahensya kung saan, 3,478 na ang bilang ng mga lumabag.

Kabilang sa mga lumabag ang 3,338 na sibilyan; 61 security guards; 26 police officers; at 22 military personnel at 31 pang indibidwal kung saan, nangunguna ang Metro Manila sa may pinaka maraming naitalang lumabag kung saan, posible pa itong madagdagan bago matapos ang gun ban sa Hunyo a-8.

Naghahanda na ang Philippine National Police (PNP) para sa Security and Traffic Management sa papalapit na inagurasyon ni President-elect Ferdinand “Bongbong” Marcos Jr.

Ayon kay PNP spokesperson PCOL. Jean Fajardo, nakapagbriefing na ang kanilang ahensya para sa kanilang preparasyon sa inagurasyon kung saan, hinihintay nalang nila ang venue.

Sinabi ni Fajardo na kanila pang binabalangkas ang security plan dahil magkahiwalay na lugar ang inagurasyon ni President-elect BBM at Vice President-elect Sara Duterte Carpio.

Inanunsiyo na ang mga pangalan ng bagong gabinete sa ilalim ng administrasyon ni President-elect Ferdinand “Bongbong” Marcos Jr.

Ayon kay incoming PCOO Secretary at spokesperson Atty. Trixie Cruz-Angeles, gagawing kalihim ng Presidential Management staff si dating Manila Rep. Naida Angping.

Magiging Tourism Secretary naman si Liloan Cebu Mayor Christina Frasco na siya namang tumatayong spokesperson ni Vice President-elect Sara Duterte-Carpio.

Si Bangko Sentral ng Pilipinas Assistant Governor Amenah Pangandaman naman ay inilagay bilang Budget Secretary na dati naring nagsilbi bilang Undersecretary at Assistant Secretary ng DBM.

Samantala, gagawin namang Secretary ng Department of Information and Communications Technology (DICT) ng Marcos administration si Atty. Ivan John Enrile Uy habang ang broadcaster na si Erwin Tulfo naman ay inilagay bilang incoming DSWD Secretary.

Nagpasalamat naman ang mga bagong gabinete sa administrasyong Marcos sa tiwalang ibinigay at nangakong kanilang sisikaping matugunan ang pangangailangan ng bansa maging ng mga mahihirap na Pilipino.

Aabot sa mahigit 34K paaralan ang nominado para sa Face-to-Face classes.

Ayon sa Department of Education (DepEd), sa 34, 238 na eskwelahan, 33,000 dito ay mula sa pampublikong paaralan habang ang natitira ay mula sa pribadong paaralan.

Sa pahayag ni Education Secretary Leonor Briones, nasa 73.28% na ang kabuuang bilang ng mga pampublikong paaralan sa buong bansa ang nominado na magsagawa ng face-to-face classes sa gitna ng pandemya.

Sinabi ni Briones na dapat mayroong clearance galing sa Department of Health (DOH) at consent mula mga magulang ng mga mag-aaral ang bawat paaralan na magkakasa ng face to face classes.

Umaasa ang DepEd na ganap na maipapatupad ng lahat ng paaralan sa pagsasagawa ng face-to-face classes sa susunod na Academic Year pero nakadepende pa rin ito sa mga Paaralan, LGUs, estado ng kalusugan sa lugar, at sa Assessment ng DOH.

Nagbabala sa publiko ang Philippine National Police (PNP) sa mga nais magsagawa ng kilos-protesta sa papalapit na inagurasyon ni President-elect Ferdinand “Bongbong” Marcos Jr.

Ito ay sa kabila ng pagpapatupad ng “Maximum tolerance” ng ahensya para sa kapayapaan at kaligtasan ng bawat isa.

Ayon kay PNP Officer-in-Charge P/LT. Gen. Vicente Danao Jr., kanilang aarestuhin ang mga raliyistang hahambala sa daloy ng trapiko at maninira ng mga property o ari-arian ng pamahalaan.

Matatandaang nitong Mayo a-25, nang iproklama sina BBM at Vice President-elect Inday Sara Duterte-Carpio nang maitala ang ilang kilos protesta kung saan, kinondena ng Anakbayan at Commission on Human Rights (CHR) ang paggamit umano ng mga water cannon ng mga nagprotesta.

Inihayag ng OCTA research group na bumagal ang pagtaas ng kaso ng COVID-19 sa National Capital Region (NCR) nitong nakalipas na linggo.

Ayon kay OCTA research Fellow Prof. Dr. Guido David, nakapagtala ang metro Manila ng “very slow” o pinakamabagal na pagtaas sa kaso ng COVID-19 kung saan, nasa 74 ang daily average ng mga bagong kaso ng sakit na naitala mula Mayo a-23 hanggang Mayo a-29.

Sinabi ni David na mas mataas ito ng 2% kumpara sa 72 lamang na naitala noong Mayo a-16 hanggang Mayo a-22.

Dahil dito, ang one-week Average Daily Attack Rate (ADAR) sa rehiyon ay tumaas din ng mula 0.52 mula sa dating 0.51 habang ang reproduction number naman sa NCR ay nasa moderate category na ngayon matapos na muling tumaas sa 1.08 mula sa dating 1.02 lamang noong nakaraang linggo.

Naglabas na ng memorandum ang Department of Health (DOH) para sa mga dapat gawin sakaling makapasok ang monkeypox virus sa Pilipinas.

Sa panayam ng DWIZ sinabi ni Dr. Jose Rene De Grano, Presidente ng Private Hospitals Association of the Philippines Inc. (PHAPi), na nakapaloob sa nasabing guidelines ang mga sintomas ng nasabing sakit.

Ayon kay De Grano, sakaling makaranas ng lagnat at rashes ang isang indibidwal ay dalhin na agad ito sa ospital upang mabigyan ng treatment o lunas.

Nagpaalala sa publiko ang Private Hospitals Association of the Philippines Inc. (PHAPi) na hindi dapat magpakampante ang publiko sa kabila ng mababang kaso ng COVID-19 at mababang bilang ng mga naa-admit sa mga ospital kada araw.

Sa panayam ng DWIZ sinabi ni PHAPi President Dr. Jose Rene De Grano, na posible pang tumaas ang naitalalang kaso ng COVID-19 dahil sa mga immunocompromized at may comorbidities na mabilis mahawaan ng virus.

Ayon kay De Grano, ang mataas na kaso ngayon sa bansa ay ang mga tinamaan ng Dengue dahil sa pabago bagong panahon.

Sinabi pa ni De Grano na bukod sa mga nabanggit na virus, marami ding tinamaan ng Leptospirosis at Cholera o ang sakit sa bituka  sa Davao Oriental at South Cotabato bunsod na maduming tubig.

Dagdag ni De Grano na sakaling mag-iipon ng tubig, dapat ay mayroong takip ang mga ito at siguraduhing malinis ang inuming tubig.

Aarangkada na ngayong araw ang dagdag-bawas sa presyo ng produktong petrolyo.

Ayon sa Pilipinas Shell Petroleum Corp., Chevron Philippines Inc., Caltex at Seaoil Philippines Inc. Ipatutupad nito ang 1.70 centavos na bawas-singil sa kada litro ng gasolina.

Aabot naman sa 2.45 centavos ang umento sa kada litro ng kerosene habang 1.70 centavos ang dagdag-singil sa kada litro ng diesel.

Ipatutupad rin ng Cleanfuel at Petro Gazz ang nasabing price adjustment maliban sa kerosene na wala sila.

Batay sa datos ng Department of Energy (DOE), umabot na sa P25.55 ang net increase sa year-to-date adjustments sa kada litro ng gasolina, P29.10 sa kada litro ng diesel, at p25.20 naman sa kada litro ng kerosene.