HOT STORIES OF THE WEEK

Mas mahaba pa ang nagiging termino ng mga barangay officials kaysa sa pangulo ng bansa.

Binigyang diin ito ni Senate President Vicente Tito Sotto, III makaraang igiit na dapat nang tuldukan ang paulit ulit na pagpapaliban ng barangay election subalit mabuti ring tanungin si President Elect Ferdinand Bongbong Marcos, Jr. hinggil dito.

Sinabi naman ni Senador Imee Marcos na dahil may bago nang pangulo ng bansa, mas makabubuting ituloy na ang Barangay Election sa Disyembre para may bago ding hatol sa mga nasa baba at magkaroon ng suporta ang bagong administrasyon sa mga bagong barangay officials

Mayroon naman na aniyang budget para sa Barangay at Sangguniang Kabataan Elections. —-sa ulat ni Cely Ortega-Bueno (Patrol 19)

Kinumpirma na ng Commission on Appointments (CA) ang promotion ng 17 opisyal ng AFP.

Kabilang sa mga kumpirmado na ang appointments sina:

1. Adonis Arial Orio sa ranggong Brigadier General
2. Wilbur Mamawag sa ranggong Major General
3. Alberto Cartlos bilang Vice Admiral
4. William Gonzales bilang Liuetenant General
5. Rommel Anthony Reyes bilang Vice Admiral
6. Glenn Jun Calambuhay bilang Brigadier General
7. Fermin Carangan bilang Brigadier General
8. Araus Robert Musico, Ignatius Patrimonio at Charlton Sean Gaerlan pawang sa ranggong Major General.

Bukod pa ito kina:

1. Renato David bilang Rear Admiral
2. Jonas Lumawag bilang Major General
3. Francisco Tagamolia Jr. bilang Commodore
4. Marvin Licudine bilang Brigadier General
5. Camilo Ligayo bilang Major General
6. Consolito Yecla bilang Brigadier General
7. Romulo Manuel, Jr. bilang Major General

Matapos ang pag apruba sa promotion ng mga nasabing AFP officials, inamiyendahan ng mga mambabatas ang isang section ng CA Rules at ipinakilala ang probisyong nagsasabing lahat ng appointments sa Department of Migrant Workers ay i-e-endorso sa Committee on Labor, Employment and Social Welfare. —sa ulat ni Cely Ortega-Bueno (Patrol 19)

Hihimukin ng Commission on Elections (COMELEC) ang Kongreso na magpasa ng batas laban sa paggamit ng social media trolls sa panahon ng kampanya.

Ayon kay COMELEC Commissioner George Garcia, “mahirap” na ipatupad ang Cybercrime Prevention Act of 2012 laban sa mga pekeng user na nagpo-post ng mga libelous comments o disinformation sa mga online platforms.

Inamin din niya na dahil sa kawalan ng batas na kumokontrol sa social media sa bansa ay “walang kapangyarihan” ang poll body na i-monitor ang online campaign expenditures ng mga kandidato.

Sa pagdinig ng Senado noong Pebrero, sinabi ng isang fact-checking group sa mga mambabatas na si Bise Presidente Leni Robredo ang pangunahing target ng disinformation sa social media.

Iniimbestigahan na ng Commission on Elections (COMELEC) ang halos 1,000 kaso ng vote buying.

Ayon kay Commissioner George Garcia, naglabas na ang ahensya ng subpoenas sa mga respondents para ipaliwanag ang umano’y vote buying incidents.

Tiniyak naman ng kinatawan sa halalan na magiging transparent ito sa publiko sa pag-iimbestiga sa umano’y iba pang kaso ng pandaraya sa eleksyon.

Una nang kinumpirma ng COMELEC ang data breach sa system ng Smartmatic, ang election technology provider nito, pero iginiit na walang kinalaman sa botohan ang nag-leak na impormasyon.

Nag-courtesy visit kay President-Elect Ferdinand Marcos Jr., ang envoys ng United Kingdom, Singapore at European Union upang personal na batiin ito bilang ika-labingpitong pangulo ng Pilipinas.

Bumisita kay Marcos sina British Ambassador Laure Beaufils, Singaporean Ambassador Gerard Ho Wei Hong at European Union Representative Luc Véron.

Una nang inimbita ni Singaporean President Halimah Yacob si Marcos para sa isang state visit.

Matatandaang nag-courtesy call naman kay Marcos ang envoys ng Estados Unidos, Japan, South Korea at India noong nakaraang linggo.

Tiniyak ng Duterte administration ang maayos na transition sa papasok na administrasyon ni President-Elect Ferdinand “Bongbong” Marcos Jr.

Sa panayam ng DWIZ, sinabi ni Acting Deputy Presidential Spokesperson at Communications Undersecretary Michel Kristian Ablan, na inactivate na ng bawat departamento ang kani-kanilang transition team.

Samantala, sinabi pa ni Ablan na wala siyang nakikitang problema kung magkaroon pa ng posisyon sa gobyerno si Pangulong Rodrigo Duterte.

Bukod aniya sa posibleng pagiging drug czar ng punong ehekutibo, may posibilidad rin na alukin ito ng ibang pwesto sa gabinete.

Naniniwala si Senador Sherwin Gatchalian na mataaas ang magiging kumpiyansa ng business sector sa Economic Team ng susunod na administrasyon.

Ito ayon kay Gatchalian ay dahil kilala na ng business sector ang magiging miyembro ng Economic Team ni President Elect Ferdinand Bongbong Marcos at pamilyar ang kanilang direksyon para sa ekonomiya at pananalapi bilang mga naging bahagi na ng mga dating administrasyon.

Una nang sinabi ni BBM na kaniyang napili si Bangko Sentral Governor Benjamin Diokno bilang kalihim ng Department of Finance kung saan unang naging Budget Secretary si Diokno ng Duterte at Estrada administrations.

Itatalaga naman si Secretary Arsenio Balisacan sa NEDA at ito rin ang puwesto ng opisyal noong Aquino administration samantalang inappoint naman bilang Bangko Sentral Governor si dating Secretary Felipe Medalla na naging kalihim ng NEDA nung Estrada administration.

Magiging kalihim naman ng DPWH si San Miguel Tollways Corporation  Chief Executive Manuel Bonoan na DPWH official na sa Ramos, Estrada at Arroyo administrations

Binigyang diin ni Gatchalian na kailangan ng certainty at continuity sa mga polisiya sa ekonomiya ngayong nahaharap ang bansa sa pandemya, krisis sa Ukraine, mataas na presyo ng petrolyo at mga bilihin.

Tiyak naman ni Gatchalian na madaling makakalusot sa Commission on Appointments ang mga itatalaga sa Marcos administration na mayruong mahusay na track record. —sa ulat ni Cely Ortega-Bueno (Patrol 19)

Nakansela sa ikalawang pagkakataon ang nakatakda sanang pagsalang sa Commission on Appointments (CA) ng ilang opisyal ng COMELEC, Commission on Audit (COA) at Civil Service Commission (CSC).

Kabilang dito sina COMELEC Chairman Saldamen Pangarungan, COMELEC Commissioner George Garcia, COMELEC Commissioner Aimee Torrefrancia Neri, COA Chairperson Rizalina Noval Justol at  CSC Chairman Karlo Alexei Bendigo Nograles.

Nagtakda ng panibagong hearing ang CA Commmittte on Constitutional Commission  na pinamumunuan ni Senador Cynthia  Villar subalit nag mosyon si Senate Majority Leader Juan Miguel Zubiri na ipagliban ito sa Miyerkules, June 1 na siyang pinakahuling araw ng sesyon ng Kongreso.

Sinabi ni Zubiri na sa nasabing araw ay walang miembro ng CA ang  makakapag invoke ng CA Section 20 para harangin ang kumpirmasyon ng isang nominee at mayruon aniyang mga oppositor sa kumpirmasyon nina Pangarungan, Garcia at Neri.

Samantala, sa pagsisimula ng hearing ay binanggit din ni Zubiri ang nangyari noong February 2016 kung saan ay ini-invoke ni dating Senador Juan Ponce Enrile ang Section 20 at sinabi na makabubuti na ipaubaya na lang sa susunod na mauupong pangulo ang pagtatalaga ng posisyon sa ilang Constitutional Office. —sa ulat ni Cely Ortega-Bueno (Patrol 19)

Hindi pa matukoy ng Pasig City Police ang dahilan nang pagkasawi ng walong-taong gulang na lalaki sa Pasig City matapos bugbugin ng kaniyang ina at amain.

Ayon kay Pasig City Police Chief, Colonel Roman Arugay, isinailalim pa sa autopsy ang labi ng bata na nagkaroon ng Hematoma o pamumuo ng dugo sa kaniyang binti at braso.

Naaresto na rin ang amain ng biktima na si Germarc Villadolid, 39 anyos at ina nitong si Kimberly, 29 anyos na pawang Call Center Agents at nakatira sa Urban Deca Homes.

Nahaharap sila sa kasong Homicide at Parricide in Relation to Republic Act 7610 o Special Protection of Children Against Abuse, Exploitation and Discrimination Act.

Pinarusahan umano ng mga magulang ang biktima dahil hindi pa ito natutulog mag-a-alas tres na ng hapon noong Biyernes.

Pinag-squat ito nang maraming beses at nang hindi nakayanan ay maka-ilang ulit pinalo ng tsinelas hanggang mawalan ng malay.

Isinugod pa ang bata sa Mission Hospital pero idineklarang patay alas-3:51 ng hapon.

Balik-Pilipinas na si outgoing Vice President Leni Robredo matapos dumalo sa graduation ng kanyang bunso na si Jillian sa New York City.

Sa Facebook post ni Robredo, ibinahagi nito ang mga larawan ng kaniyang bakasyon kasama ang tatlong anak.

Humingi naman ng paumanhin ang bise-presidente sa mga imbitasyong napagpasyahang huwag nang ituloy.

Sa ngayon, handa na muling sumabak sa trabaho ang outgoing Vice-President matapos ang dalawang linggong bakasyon na aniya’y pinakamahabang pahinga sa loob ng sampung taon.

Sa Hulyo, sisimulan ni Robredo ang launching ng kanyang Angat Buhay NGO matapos matalo ni President-elect Ferdinand ‘Bongbong’ Marcos Jr.  sa eleksyon.