HOT STORIES OF THE WEEK

Hindi pa kailangang kontrolin ng pamahalaan ang bilang ng anak ng bawat Pamilyang Pilipino.

Ito ang sinabi ni Juan Antonio Perez III, Executive Director ng Commission on Population and Development (POPCOM) sa kabila ng nakitang bahagyang paglobo ng populasyon.

Sa panayam sa DWIZ, sinabi ni Perez na hindi totoo ang ulat na tumaas ang bilang ng mga nanganganak sa gitna ng pandemya.

Batay aniya sa datos, maraming babae ang piniling hindi muna magsilang ng sanggol dahil sa hirap ngayong pandemya.

Hindi anya sapat para kay Perez ang P12-K na minimum na sahod kada pamilya lalo na ang mga naninirahan sa labas ng Metro Manila.

Apektado na rin ngayon ang kalidad ng mga itlog at karneng manok dahil sa limitadong patuka sa mga pamilihan.

Ayon kay Chairperson Gregorio San Diego ng United Broiler Raisers Association at Philippine Egg Board Association, marami sa mga negosyante ang lumipat na sa produksiyon ng itlog dahil sa epekto ng African Swine Fever mula sa mga baboy.

Bukod pa dito, nagkakaroon na rin ng epekto sa importasyon ng manok dahilan para maapektuhan din ang kalidad ng mga itlog bunsod ng mataas na presyo ng mga patuka.

Sinabi ni San Diego na marami sa mga nag-aalaga ng manok ang nahihirapan nang mag-alaga dahil sa limitado at pagtitipid ng mga patuka.

Sa ngayon, mas maliit na ang mga itlog at mga karne ng manok ang ibinibenta ngayon sa mga pamilihan.

Patay ang magkakapatid habang sugatan naman ang tatlo pang indibidwal sa naganap na sunog sa Kaliraya St., Bayanihan Alley, Brgy. Tatalon, Quezon City.

Kinilala ang mga biktima na sina Sofia, 9-anyos, May-May, 7-anyos at Chukoy, 4-anyos habang nagtamo naman ng matitinding paso sa katawan sina Bayani Alimagno, asawang si Marie Santos, 31-anyos at ang isa pa nilang anak na si Akisha, 12-anyos na ngayon ay nagpapagaling na sa East Avenue Medical Center.

Base sa imbestigasyon, mahimbing na natutulog ang mga biktima nang sumiklab ang apoy sa ikatlong palapag na bahay ng mga biktima at mabilis na kumalat dakong alas-4:15 kahapon ng madaling araw.

Sa ngayon, patuloy pang iniimbestigahan ng mga otoridad ang pinagmulan ng sunog.

Samantala, patay din matapos matusta sa sunog ang mag-ama sa kanilang bahay sa Barangay Bagumbayan, Taguig City.

Kinilala ang mag-ama na sina Eduard Carimat, 30-anyos at anak nitong si Maria Eloisa Jazz Fuentes, 7-anyos kung saan, tumagal ng mahigit isang oras ang sunog bago idineklarang fire out ng mga bumbero.

Tinatayang nasa P300,000 ang halaga ng ari- ariang natupok ng apoy.

Nakapagtala din ng sunog sa commercial area malapit sa Quinta Market sa Quiapo Maynila kahapon na umabot sa ika-apat na alarma matapos madamay ang warehouse ng mga cellphone, electronic bike supplies at fabric.

Bukod pa diyan, isa pang sunog ang sumiklab sa isang bodega ng mga kalakal sa Barangay Salinas 1, Bacoor, Cavite na umabot naman sa unang alarma.

Wala namang naitalang nasawi o nasugatan pero patuloy pang inaalam ng mga otoridad ang sanhi ng pagkalat ng apoy maging ang danyos sa naganap na sunog.

Nasa 13 indibidwal ang nareskyu ng mga otoridad habang nawawala at patuloy pang pinaghahanap ang pitong tripulante matapos salpukin ng isang cargo ship ang isang fishing boat sa karagatang sakop ng Agutaya, Palawan.

Base sa imbestigasyon, nangingisda sa lugar ang 20 Pinoy sakay ng FB JOT-18L nang banggain umano ng MV Happy Hiro, isang cargo vessel na nakarehistro sa Republic of the Marshall Islands sa Maracanao Island.

Ayon sa PCG, hindi muna isinapubliko ang mga pangalan ng mga nawawalang biktima dahil hindi pa ito naipapaalam sa kanilang mga pamilya.

Patuloy na nagsasagawa ng search and rescue operation ang mga tauhan ng PCG sa pag-asang matatagpuan ang mga nawawalang mangingisda.

Sa ngayon, binigyang na ng paunang lunas ang mga nareskyu habang nagpapatuloy pa ang imbestigasyon sa naganap na insidente.

Asahan na mas tataas pa ang jackpot prize sa Lotto 6/55 matapos bigong mapanalunan ang mahigit P136-M.

Ayon sa Philippine Charity Sweepstakes Office (PCSO), hindi nahulaan ang six-digit winning combination ng Grand Lotto 6/55 na 02-03-41-15-33-46 na may katumbas na P136, 876, 472 na jackpot prize.

Sinabi ng PCSO na may tatlong bettor na nagwagi ng second prize na tig- ₱100, 000 matapos mahulaan ang limang tamang numero habang 562 naman ang nanalo ng tig-₱1,500 matapos naman mahulaan ang tig-apat na tamang numero.

Nasa 15, 271 naman ang nanalo ng tig-P60 o balik-taya matapos na makahula ng tig-tatlong tamang numero.

Dahil diyan, asahan na madadagdagan pa ang presyo ng mapapanalunan sa Lotto 6/55 sa susunod na Lotto draw ngayong araw.

Naging emosyonal si President-elect Ferdinand “Bongbong” Marcos Jr. nang kaniyang i-abot ang resolusyon ng Kongreso na nagpapatunay o nagpoproklama sa kaniya bilang Ika-17 Pangulo ng Pilipinas.

Ayon kay Marcos, nagulat siya nang maka-akyat ang kaniyang ina sa platform ng Batasan Complex noong araw ng proklamasyon, Mayo a-25.

Sa video vlog ni Marcos, sinabi niya na isasakay na sana sa wheelchair ang kaniyang ina pero pinilit nitong makapaglakad nang nakangiti papunta sa kaniya.

Natuwa naman si BBM nang banggitin ng dating first lady na mayroon siyang dalawang pangulo.

Matatandaang nanungkulan bilang Pangulo ang yumaong ama ni BBM na si dating Pangulong Ferdinand Marcos Sr. mula noong 1965 hanggang sa mapatalsik ito noong 1986

Samantala, nakatakda namang umupo sina President-elect Ferdinand “Bongbong” Marcos Jr. at Vice President-elect Sara Duterte-Carpio sa June 30, 2022.

Asahan na bukas, Martes, ang paggalaw sa presyo ng mga produktong petrolyo na tatagal hanggang Hunyo a-6.

Ayon sa kumpaniyang UniOil Petroleum Philippines, magpapatupad ng piso hanggang P1.20 ang dagdag singil sa kada litro ng diesel.

Maglalaro naman sa P1.50 hanggang P1.60 ang bawas singil sa presyo ng kada litro ng gasolina.

Ang price adjustment ng mga kumpaniya ng langis ay inaanunsiyo tuwing Lunes at ipinatutupad naman tuwing Martes.

Magiging maulap pa rin ang kalangitan sa bahagi ng Luzon, partikular na sa bahagi ng Palawan, bunsod ng Southwest monsoon o Hanging habagat.

Magiging maaliwalas naman ang panahon sa iba pang bahagi ng Luzon kaya’t asahan ang mainit na panahon sa umaga hanggang tanghali pero malaki ang tiyansa ng pag-ulan sa hapon hanggang sa gabi.

Ayon sa PAGASA, makakaranas din ng maaliwalas na panahon ang malaking bahagi ng Visayas dahil wala pang direktang epekto ang Low Pressure Area (LPA) maging ang Hanging habagat sa bansa.

Asahan naman ang maulap na kalangitan sa bahagi ng Mindanao kabilang na diyan ang Caraga, Davao Region at SOCCSKSARGEN dahil sa epekto ng LPA na binabantayan sa silangang bahagi ng Mindanao.

Maaliwalas na panahon naman sa Western Mindanao maliban nalang sa mga isolated rain showers and thunderstorm sa hapon hanggang sa gabi.

Agwat ng temperatura sa Metro Manila ay maglalaro sa 25°C hanggang 32°C  habang sisikat naman ang haring araw mamayang 5:26 ng umaga at lulubog naman ito mamayang 6:21 ng hapon.

Bumagsak ang isang Unmanned Aerial Vehicle (UAV) ng Philippine Air Force (PAF) sa Cagayan De Oro kahapon.

Ayon sa ulat ng PAF, 9:30 ng umaga nang paliparin ang Hermes 900 drone para magsagawa ng functional check flight o FCFsa Lumbria airport.

Lumipad ang UAV sa taas na 10,000ft.

Pagkatapos ng satisfactory FCF procedure, nagpasya ang mga piloto na ibaba sa 5,000ft. Sa 1.5 miles East of Lumbria airport ang nabanggit na UAV.

Pero nawalan ang piloto ng komunikasyon dito bandang 11:46 ng umaga.

Wala namang nasaktan o ari-ariang napinsala.

Samantala, patuloy na iniimbestigahan ng paf ang dahilan ng naturang insidente.