HOT STORIES OF THE WEEK

Tama lamang na panatilihin sa ilalim ng Alert Level 1 status ang Metro Manila

Ayon kay Health reform advocate at dating special adviser ng National Task Force (NTF) against Covid-19 Dr. Anthony Leachon, pabor siya sa desisyon ng Inter-Agency Task Force for the Management of Emerging Infectious Diseases’ (IATF) na huwag nang ibaba pa ang umiiral na restriksyon.

Aniya, may posibilidad kasi na magkaroon ng panibagong COVID-19 surge sakaling magluwag pa dahil na rin sa mga pagpasok ng ilang mga subvariant sa bansa.

Bagama’t napanatili aniyang mababa ang mga kaso ng COVID-19 kahit na may omicron surge hindi pa rin  daw dapat makampante ang publiko at  pamahalaan.

Pero maaari na raw magluwag ng restriksyon ang gobyerno kung mapapataas pa ang bilang ng mga Pilipinong makatatanggap ng booster shot kontra COVID-19.

Bubuksan na ng Civil Service Commission (CSC) ang aplikasyon para sa Career Service Examination-Pen and Paper Test (CSE-PPT) sa susunod na buwan.

Sa abiso ng CSC, tatanggap sila ng aplikasyon para sa mga interesadong kumuha ng eligibility examination sa Hunyo a-2 hanggang a-16.

Ang mga matatanggap na aplikasyon ay nakatakdang sumalang sa pen and paper test sa darating na August 7, 2022.

Maliban dito, magkakasa rin ang CSC ng Intermediate Competency on Local Treasury Examination (ICLTE) sa kaparehong petsa.

Sa mga interesadong indibidwal, makipag-ugnayan lamang sa CSC Regional Office o sa mga field office o bisitahin ang kanilang website na www.csc.gov.ph.

Binigyang-diin ng Department of Transportation (DOTr) ang malaking pagbabago sa Ninoy Aquino International Airport (NAIA) sa ilalim ng administrasyon ni Pangulong Rodrigo Duterte.

Ito ang naging pahayag ng DOTr matapos ilarawan ng Bounce Luggage Storage sa kanilang pag-aaral ang NAIA bilang ‘worst business class airport’ sa buong mundo.

Ayon sa ahensya, ang pag-aaral na ito ay negatibo at walang katibayan.

Sa katunayan aniya, sa ginawang pagsasaliksik ng DOTr, wala naman silang nakitang kahit anong review o rating sa businessclass.com na may kinalaman sa NAIA.

Maliban dito, sa ilalim din ng pamumuno ni Transportation Secretary Arthur Tugade, nawakasan nito ang matagal nang isyu ng “Laglag-Bala” extortion scheme at ‘’bukas-bagahe’’ na siyang sumira ng reputasyon ng nasabing paliparan.

Giit ng DOTr, hindi dapat ipinasasawalang bahala ang mga remarkable developments na nagawa sa NAIA para mapabuti pa ang kanilang serbisyo sa publiko.

Muling nagpaalala ang Commission on Elections (COMELEC) sa mga kumandidato sa lokal at nasyonal na posisyon nitong nakalipas na eleksyon tungkol sa kanilang Statement of Contribution and Expenditures (SOCE).

Ayon kay Commissioner George Garcia, hanggang Hunyo a-8 na lamang ang pagpa-file ng SOCE at hindi na nila tatanggapin ang mga dokumentong magpapasa nang lagpas sa ibinigay na palugit.

Aniya, sakop ng pagpapasa ng SOCE ang mga kandidatong nag-withdraw, natalo at nanalo sa tinakbuhang posisyon.

Giit ni Garcia, hindi na nila papalawigin pa ang itinakdang deadline.

Ang sinuman aniyang bigo o hindi nagsumite ng SOCE ay mahaharap sa kaso at multa habang perpetual disqualification to hold public office ang parusa kung dalawang beses nang hindi nag-file ng SOCE.

Dagdag pa niya, maaaring matanggal sa tungkulin ang mga lumabag sa SOCE regulations kahit pa nanalo na ito sa eleksyon.

Nabatid na aabot sa 500 kandidato mula sa mga nagdaang eleksyon ang nahaharap sa posibleng perpetual disqualification sa anumang posisyon sa gobyerno.

Naibalik na ng Kamara sa Senado ang mga balota na ginamit nitong Canvassing of Votes para sa proklamasyon ng mananalo pagkapangulo at pangalawang pangulo.

Dakong alas-9 ng umaga noong Biyernes ibiniyahe ang 630 ballot boxes na naglalaman ng 447 box ng Election Returns at 188 box ng Certificates of Canvass (COCs).

Naiturn-over ang mga balota sa tulong ni Plenary Security Unit Chief Policarpio Acoba Jr. at Perimeter Security Chief Juanito Tan Jr. na ibinigay sa Senado sa pamamagitan ni  Ronel Manalo ng Senate Office of Sergeant-at-Arms Security Enforcement Service.

Sa kabuuan, naging maayos at mapayapa ang turn-over ng mga balota na mas mabilis kumpara noong nakaraang eleksyon.

Pormal nang nagsimula ang transition of powers sa pagitan nina Vice President Leni Robredo at Vice President-elect Sara Duterte-Carpio.

Ayon kay Liloan Mayor Christina Frasco na tagapagsalita ni Sara Duterte, ginawa ito para matiyak na magiging maayos, organisado at comprehensive ang transition.

Sinabi naman ni Frasco na maliban sa OVP ay pormal na ring nakipag-ugnayan si Sara Duterte sa Office of the Secretary sa Department of Education.

Ito ay para matiyak ang maayos na transition bilang susunod na DepEd Secretary matapos i-tap ni President-elect Ferdinand ‘Bongbong’ Marcos Jr.

Sa June 19 magaganap ang inauguration ni Mayor Sara sa San Pedro Square sa Davao City.

Lumabas sa isang report na itinuturing na pinaka-worst airport sa buong mundo ang Ninoy Aquino International Airport (NAIA).

Batay sa United Kingdom Based Authority on Airline and Airport Review, nakakuha ng overall score na 0.88 out of 10 ang NAIA.

Ibinase ang pagtataya sa 14 na lounges, 101 destinasyon at 59.6% on-time flights ng NAIA.

Sumunod sa NAIA ang Gatwick Airport sa United Kingdom at Newark Liberty International Airport sa Estados Unidos.

Ang tatlong pinaka-best airlines sa mundo batay sa report ay ang; Singapore Airlines, Qatar Airways at Cathay Pacific.

Aminado ang Department of Health (DOH) na limitado pa rin ang suplay ng bakuna kontra monkeypox sa buong mundo.

Ayon kay Health Secretary Francisco Duque III, maging sa Estados Unidos ay kakaunti ang suplay ng bakuna na nakareserba lamang para sa kanilang mga sundalo.

Sa kasalukuyan, wala pang inilalabas na Emergency Use Authorization (EUA) para sa antiviral drugs kontra monkeypox.

Iginiit naman ng kalihim na mahalaga pa rin ang paghihigpit sa mga borders at patuloy na pagsunod sa health public standards laban sa pagkahawa sa sakit.

Una nang ikinabahala ng World Health Organization ang pagkalat ng nasabing virus at sinabing nasa ‘peak of iceberg’ pa lamang ang naitatalang kaso.