HOT STORIES OF THE WEEK

Naparalisa ang kalahati ng katawan ng isang mangingisda sa Ragay, Camarines Sur matapos tumalon sa bangin upang makatakas sa mga pulis.

Ayon sa mga otoridad, naaktuhan nila ang suspek kasama ang iba pa nitong kasamahan sa iligal na tupadahan.

Pero nagtakbuhan ang mga ito nang tangkain ng arestuhin ng pulisya.

Dinakip ang lalaki at kapatid nito na tumalon din sa bangin at napilayan.

Sa kulungan naman ang bagsak ng iba pa nilang kasamahan, ngunit may ilan pang nakatakas.

Nakuha sa tupadahan ang dalawang manok, tari at pera sa tayaan.

Tumaas ang antas ng bakunahan kontra COVID-19 sa Pilipinas matapos ang halalan noong Mayo a-9.

Ayon kay Department of Health (DOH) undersecretary Myrna Cabotaje na Chairperson din ng National Vaccination Operation Center (NVOC), umabot sa 200K ang bakunang naituturok sa bansa kada araw.

Mula ito sa 100K bago magsimula ang eleksyon.

Kumpiyansa naman ang opisyal na maaabot ng pamahalaan ang target na 77M Pilipinong kailangang bakunahan, bago matapos ang termino ni Pangulong Rodrigo Duterte.

Sa huling datos, nasa 69.1M ang fully-vaccinated sa buong bansa, katumbas ng 76.87% ng populasyon.

Para sa mga nagpaturok ng second booster, umaabot na ito sa 171, 848.

Tiwala ang Department of Information and Communications Technology (DICT) na tututukan din ng Administrasyon ni President-elect Ferdinand ‘Bongbong’ Marcos Jr. ang digital transformation ng bansa.

Ayon kay DICT acting Sec. Emmanuel Caintic, suportado ng departamento ang mga plano ng susunod na administrasyon.

Kasama na rito ang pagpapaganda sa digital infrastructure ng bansa.

Sinabi naman ng DICT official na tuloy-tuloy lamang sila sa pagganap ng tungkulin na bigyan ng mabilis, episyente at maayos na serbisyo ang mga Pilipino.

Sa ngayon, hinihintay na lang ang desisyon ni BBM kung sino ang itatalaga nitong bagong secretary ng DICT.

Nagbaba na ng kautusan ang National Telecommunications Commission (NTC) sa mga telecommunications companies na maglabas ng paalala laban sa mga kumakalat na spam text messages.

Ang spam text messages na ito ay nag-aalok ng mga trabaho na may mataas na sahod.

Batay sa ipinalabas ng NTC, inatasan nito ang mga kompanyang Globe, Smart at DITO na magpakalat ng text blasts sa kanilang mga subscribers na may mensaheng “Babala: Huwag pong maniwala sa text na naga-alok ng trabaho na may pangako ng malaking sweldo, ito po ay scam.”

Anila, isasagawa ang text blasts mula Mayo 28 hanggang Hunyo 4, 2022.

Habang bibigyan naman ng hanggang Hunyo 8, 2022 ang bawat Telcos na isumite ang kanilang compliance report.

Maliban dito, inatasan din ng NTC ang mga regional directors at officers-in-charge ng local radio at Television stations na mag-abiso sa publiko laban sa mapanlokong text messages.

Mayroon naman silang hanggang Hunyo 15, 2022 para magpasa ng compliance report.

Tulungan at koordinasyon ang papairalin sa pagitan ng Mababa at Mataas na kapulungan sa pagpasok ng 19th Congress.

Ito ang tiniyak ni House Majority Leader Martin Romualdez bilang susunod na lider ng Kamara.

Ayon kay Romualdez, maganda ang magiging ugnayan at samahan ng Kamara at Senado sa ilalim ng administrasyon ni President-elect Ferdinand Marcos Jr.

Aniya, ito na rin ay bilang tugon sa napawagan ng tambalang Marcos at Sara Duterte na pagkakaisa at kooperasyon noong panahon ng kampanya.

Nabatid na isa raw sa bibigyang-atensyon ng 19th Congress ang mga panukala at batas na may kaugnayan sa pagbangon ng ekonomiya mula sa epekto ng pandemya.

Muling magkakaroon ng dagdag-bawas sa produktong petrolyo sa susunod na linggo.

Batay sa pagtataya ng mga oil companies, P1.00 hanggang P1.20 ang dagdag sa presyo ng kada litro ng diesel.

Habang mababawasan naman ng P1.50 hanggang P1.60 ang presyo ng kada litro ng gasolina.

Inaasahang epektibo ang nasabing paggalaw sa presyo ng produktong petrolyo simula May 31 hanggang June 6.

Naniniwala ang World Health Organization (WHO) na posibleng ito pa lamang ang simula ng pagkalat ng monkeypox virus.

Ayon kay WHO Epidemic and Pandemic Preparedness and Prevention Chief Sylvie Briand, ito ay matapos na makapagtala ng mahigit 200 kaso sa iba’t ibang bahagi ng mundo.

Aniya, hindi normal ang nagaganap na pagkalat ng naturang virus na nadetect sa ibang bansa tulad ng US, Australia, United Arab Emirates at ilang bansa sa Europa.

Ginagawan naman ng WHO ang kanilang makakaya para mabantayan ang pagkalat ng monkeypox virus.

Nanawagan din ito na huwag magpanic ang publiko.

Wala pang inaaprubahang bakuna ang Food and Drug Administration (FDA) laban sa monkeypox virus.

Ayon kay Health Secretary Francisco Duque III, wala pa rin kasing Emergency Use Authorization (EUA) ang mga lumalabas na bakuna na siyang batayan para makapagpasok ng antivirals laban sa nasabing sakit.

Pero, pinag-uusapan na raw ng DOH at World Health Organization (WHO) kung saang bansa maaaring bumili ng monkeypox antivirals sakaling magkaroon ng outbreak sa bansa.

Aniya, posibleng gamitin ng bansa ang MVAMUNE o IMVANEX vaccine mula sa United States para mapigilan ang pagkalat ng monkeypox or smallpox.

Sa kabila nito, iginiit ng kalihim na  bukod sa bakuna, marami pang paraan para maiwasan ang nasabing virus gaya ng strict border control, mas mahigpit na symptoms screening at pagsunod sa minimum public health standards.

Matatandaang una nang sinabi ni Duque na sa ngayon ay wala pang pangangailangan sa pagsasara ng borders ng bansa.

Tiwala ang pamahalaan na babalik agad sa normal ang presyo ng asukal.

Ayon sa Sugar Regulatory Administration (SRA), mangyayari ito sa oras na umangkat pa ng asukal ang pamahalaan mula sa ibang bansa.

Maliban dito, inaasahang darating na rin ang 200 metric tons o 4M bags ng asukal na mula sa mga bansang China at Vietnam sa susunod na buwan.

Matatandaang pumalo kasi sa halos P3,000 ang presyo ng kada sako ng puting asukal mula sa dating P1,700 at P2,700 sa kada sako ng pulang asukal na mula sa dating P2,000.

Paliwanag ng mga nasa industriya, nasira kasi ng nagdaang bagyong Odette ang isa sa pinakamalaking sugar refinery sa Negros.

Naniniwala ang isang financial analyst na magiging maayos ang pamamalakad ng administrasyon ni President-elect Ferdinand ‘Bongbong’ Marcos Jr.

Sa panayam ng DWIZ, sinabi ni Astro Del Castillo, Managing Director ng First Grade Finance Inc. na tiwala siyang kayang solusyunan ni Marcos ang napakalaking utang ng Pilipinas sa tulong ng itinalagang Economic Managers.

Malaki naman ang tulong ng pagkakaroon ng malakas na pundasyon mula sa administrasyon ni Pangulong Rodrigo Duterte upang maipagpatuloy ang kasalukuyang reporma.