HOT STORIES OF THE WEEK

Hindi pa tiyak kung makakadalo si Pangulong Rodrigo Duterte sa inagurasyon ng anak na si Vice President-elect Sara Duterte-Carpio sa Davao.

Ito ang kinumpirma ni Acting Deputy Presidential Spokesperson Kris Ablan,  wala pa aniyang impormasyon kung makakadalo ang pangulo o hindi.

Nakatakda ang inagurasyon ng incoming Vice President sa June 19 sa Davao City para maging bahagi nito ang mga Davaoeño.

Una nang sinabi ng Commission on Election (Comelec) na walang magiging paglabag kung magdadaos ng inagurasyon si Duterte-Carpio bago ang June 30 kung saan magtatapos ang termino ng incumbent officials.

Samantala, nilinaw ng poll body na magiging epektibo ang pagsisimula ng termino ni Inday Sara Duterte sa June 30.

Makikipagtulungan ang Department of the Interior and Local Government (DILG) sa papasok na bagong administrasyong Marcos-Duterte.

Inihayag ni Interior Secretary Eduardo Año ang kanyang pagbati kay President-elect Ferdinand “Bongbong” Marcos Jr., at kay Vice President-elect Sara Duterte-Carpio.

Ani Año, patuloy na makikipagtulungan ang DILG sa pagkamit ng pagkakaisa para matamo ang pag-unlad.

Umaasa naman ang kalihim sa pag-upo ni Benhur Abalos bilang incoming DILG chief na titiyakin nito na magagabayan nito ang mga Local Government Unit sa kanilang mandato at sa pagpapanatili ng peace and order sa bansa.

Inihayag ng Department of Energy  (DOE) na kayang magtayo ng nuclear power plant sa bansa.

Ito ang sinabi ni Energy Undersecretary Gerardo Erguiza Jr. sa gitna ng nabubuhay na usapin hinggil sa posibilidad na paggamit ng nuclear energy dito sa Pilipinas.

Ani Erguiza ang tawag umano dito ay Small Modular Reactors na aniya’y trend sa buong mundo at kayang ilagay lamang ang sukat na 5 meters by 5 meters.

Dagdag pa ng DOE official na kaya itong  gawin ng gobyerno gayung ang National Power Corporation aniya ay maaaring magpatayo ng mga power generation sa missionary areas o mga lugar na hindi konektado sa grid natin.

Ipapaubaya na sa susunod na administrasyon kung lilikha ng panibagong ahensiya kapalit ng Inter Agency Task Force (IATF) o itutuloy lang nito ang kasalukyang structure task force.

Ayon kay DOH Undersecretary Myrna Cabotaje, naghihintay lamang sila ng direktiba mula sa Marcos Administration sa pamamagitan ng itatalaga nitong bagong kalihim.

Ani Cabotaje, handa umano silang i-turn over ang lahat ng mga dokumento na may kinalaman sa COVID response ng Duterte Administration.

Maliban dito, preparado na din sila na magbigay ng detalyadong impormasyon sa kung sinoman ang susunod na Health Secretary na magsisilbing overall in charge sa pagtugon ng pamahalaan sa COVID-19 pandemic.

Mananatili ang National Capital Region (NCR) at ilang lugar sa bansa sa Alert level 1 mula 1 hanggang 15 ng Hunyo.

Ayon kay Deputy Presidential Spokesperson Kris Ablan, nakasailalim ito sa Inter Agency Task Force (IATF) resolution 168-A.

Maliban sa Metro Manila, nakasailalim rin sa Alert level 1 ang Abra,  Ilocos Norte, Batanes, Aurora, Bataan, Bulacan, Nueva Ecija, Pampanga, Tarlac, Angeles City, Olongapo City, Batangas, Cavite, Laguna, Rizal, Lucena City, Marinduque, Albay, Aklan, Siquijor, Biliran, Zamboanga City, Bukidnon, Iligan City, Surigao Del Sur, at Butuan City.

Sa ilalim ng Alert level 1, pinapayagan na rin ang intrazonal at interzonal travel sa mga may comorbidities man o wala.

Maaari na rin mag-operate ng Full On-site Capacity ang mga establisimyento sa ilalim ng minimum public health standards.

Nasa dalawang milyong COVID-19 vaccine doses ang inaasahang mag-e-expire sakaling hindi magamit sa June 30.

Ito ang sinabi ni Department of Health undersecretary Myrna Cabotaje pero sa katapusan ng buwang ito pa malalaman ang kabuuang bilang ng mga bakunang masasayang.

Dagdag pa niya na nagsumite na ang kagawaran ng demand forecast ng mahigit 30 milyong doses ng bakuna.

Ito aniya ay ang mga pamalit sa mga nag-expire at mag-e-expire pa lamang na bakuna kabilang ang brand na Sinovac, Aztrazeneca at Pfizer.

Samantala, sinabi ni Cabotaje na mahigit 73.7 milyong indibidwal ang nabakunahan ng unang dose habang 69.1 milyon ang nakatanggap na ng kumpletong bakuna laban sa COVID-19.

Prayoridad ng nagbabalik na pinuno ng National Economic and Development Authority (NEDA) ang pagpapalakas ng sektor ng paggawa para maibsan ang kahirapan at pasiglahin ang paglago ng ekonomiya.

Ito ang inihayag ni returning NEDA chief Arsenio Balisacan na sa ilalim ng administrayon ni president-elect Ferdinand “Bongbong” Marcos Jr. ay pagtutuunan nito ang nabanggit na sektor.

Binigyang-diin din ni Balisacan na ang pag-alis ng potential Concerns of Investors kabilang na rito ang lagging digitization ay dapat ding nangunguna sa mga hakbang ng bansa para sa pag-unlad ng ekonomiya.

Tututukan ni incoming Migrant Workers chief Susan “Toots” Ople kung ano ang maaaring ibigay na tulong sa mga Overseas Filipino Workers (OFW) sa gitna ng COVID-19 pandemic.

Ayon kay Ople, hindi lamang kaso ng COVID-19 ang tumataas kundi maging ang monkeypox infections sa iba’t ibang mga bansa.

Magsasagawa rin aniya sila ng systems review para sa mga OFW na nahihirapang makakuha ng Overseas Employment Certificate at tutugunan rin ang mga isyu sa One Health Pass.

Mababatid na kinumpirma ni Ople nitong Martes na tinanggap niya ang alok ni presumptive president Ferdinand “Bongbong” Marcos Jr. na pamunuan ang departamento.

Muling pinalawig ng Department of Transportation (DOTr) ang libreng sakay sa Metro Rail Transit (MRT) line -3.

Maaaring i-avail ng mga pasahero ang Free Ride Program hanggang sa Hunyo a-30, mula 4:40 ng umaga hanggang 10:10 ng gabi.

Ayon kay Transportation Secreary Arthur Tugade, napagdesisyunan nilang i-extend ang nasabing programa upang mas maraming mananakay ang makinabang at matulungan nito.

Unang ipinatupad ang libreng sakay sa MRT-3 noong March 28, 2022 hanggang April 30, 2022, at pinalawig hanggang May 30, 2022, upang makatulong sa publiko sa epekto ng mataas na presyo ng produktong petrolyo at bilihin, at bilang selebrasyon na rin sa nakumpletong rehabilitasyon ng tren.