HOT STORIES OF THE WEEK

Tiniyak ni ACT Teachers party-list Representative France Castro na makakatanggap ng P2-K na karagdagang honoraria ang lahat ng mga nagsilbi sa eleksyon na nag-Overtime.

Sa panayam ng DWIZ, sinabi ni Castro na nakausap niya si COMELEC commissioner Marlon Casquejo at sinabing mayroon nang budget para dito at isinasapinal na ng COMELEC ang listahan.

Mababatid na inaprubahan ng poll body ang nasabing additional honorarium para sa mga miyembro ng Electoral Board, Department of Education Supervisor officials at Support staff na nagtrabaho ng lampas sa oras.

Aminado si Castro na maliit ang nasabing dagdag-honoraria, kaya’t ihihirit nila ang Additional Service Credits.

Target ng Department of Health-CALABARZON na mabigyan ng COVID-19 vaccine ang mahigit 1.5M batang edad 5 hangang 11 sa rehiyon.

Ayon sa DOH-CALABARZON, ikakasa ang “Bidang Bulilit, Protektado sa COVID! Let’s Resbakulit” sa rehiyon mula Mayo a-23 hanggang Hunyo a-30, kung saan unang tututukan ang lalawigan ng Quezon.

Batay sa datos ng Regional Vaccination Operations Center hanggang nitong Mayo a-19, nasa 1, 541, 791 mga batang edad 5 hanggang 11 ang hindi pa nababakunahan sa rehiyon.

Habang aabot sa 337,633 na mga bata sa nasabing age group ang fully vaccinated na laban sa COVID-19 sa CALABARZON.

Nakarekober na ang kauna-unahang nagpositibo sa bagong subvariant ng Omicron na BA.4 sa Pilipinas.

Ito ang inihayag ng Department of Health (DOH) matapos makumpleto ng naturang pasiyente ang kaniyang mandatory quarantine.

Ayon kay Dra. Alethea De Guzman, Hepe ng Epidemiology Bureau ng Deparment of Health, hindi umano bakunado at asymptomatic ang naturang pasiyente ng mahawaan ng COVID-19.

Napag-alaman din na tapos na ang naturang pasiyente sa kaniyang mandatory isolation nang matukoy ang tatlong household contacts nito na ngayon ay asymptomatic at fully vaccinated na rin.

Matatandaang ang unang kaso ng BA.4 subvariant sa Pilipinas ay isang Returning Overseas Filipino mula sa Qatar na nanggaling din umano sa South Africa kung saan, kinumpirma ng European CDC na ang BA.4 subvariant ay mabilis makahawa kung ikukumpara sa iba pang variant ng Omicron.

Bantay-sarado na ng mga pulis ang paligid ng Batasang Pambansa Complex sa Quezon City sa gitna ng canvassing ng mga boto para sa May 9 Presidential at Vice Presidential Race.

Ayon kay Quezon City Police District Spokesperson, Maj. Wennie Ann Cale, mahigit 3,000 pulis ang ipinakalat upang magbantay sa paligid ng batasan.

Nasa 2,100 anya ay mula sa QCPD  habang ang iba pa ay mula naman sa iba pang distrito ng pulisya.

Sarado pa rin sa daloy ng trapiko ang IBP Road upang matiyak ang seguridad at maaari namang dumaan ang mga motorista sa Litex Road bilang alternatibong ruta.

Nagdeploy din ng mga pulis sa kahabaan ng Commonwealth Avenue upang bantayan ang mga nagbabalak na mag-kilos protesta.

Samantala, pinayuhan naman ng Philippine National Police ang mga nais magsagawa ng rally na kumuha muna ng permit mula sa local government unit maging sa mga pulis.

Sinuspinde muna ng Kongreso, na nagsisilbing National Board of Canvassers (NBOC), pagbibilang ng mga boto para sa pagka-pangulo at pangalawang pangulo, sa unang araw ng canvassing.

Aabot sa 60.69% o 105 mula sa 173 Certificates of Canvass na ang nabilang, simula kahapon.

Dakong alas-11 kagabi nang suspendehin ng Kongreso ang Joint Committee Session matapos ang labingtatlong oras simula nang ilarga ang canvassing dakong alas-10 ng umaga.

Ayon kay NBOC Member, Ako-Bicol Party-List Rep. Alfredo Garbin, naging maayos ang canvassing, lalo’t walang tumutol na mga kinatawan ng presidential at vice-presidential candidates sa mga resulta.

Gayunman, tatlong COC ang natuklasang nawawala sa kalagitnaan ng canvassing.

Ito ay ang mga COC ng Surigao Del Sur, Pampanga at Sultan Kudarat, na pawang hindi natagpuan sa ballot boxes na inilipat ng mga election officer sa Senado, kaya’t ipinagpaliban ng NBOC pagka-canvass hangga’t hindi nahahanap ang mga dokumento.

Samantala, mag-re-resume ang canvassing mamayang alas-9 ng umaga. —sa ulat ni Tina Nolasco (Patrol 11)

Kinatigan ng COMELEC ang pahayag ni House Majority Leader Martin Romualdez na makatitipid ng malaking pera ang gobyerno kung ipagpapaliban ang Barangay at SK Elections na nakatakda sa Disyembre.

Aminado si COMELEC Commissioner George Garcia na aabot sa 8.6 billion pesos ang matitipid ng pamahalaan sakaling muling ipostpone ang 2022 Barangay at SK Polls.

Gayunman, nilinaw ni Garcia na Kongreso pa rin ang magpapasya kung itutuloy o ipagpapaliban ang nasabing halalan at tatalima naman ang poll body kung ano ang sasabihin o ipag-uutos ng Kongreso.

Sakaling ipagpaliban ang halalan, ito na ang magiging ika-apat na beses na ipo-postpone ng Kongreso ang Barangay at SK Elections simula noong October 2016.

Unang ini-atras ang October 2016 Barangay at SK Polls sa October 2017 at mula noon, ipinagpaliban ito sa may 2018 at muling na-reset sa May 2022.

Samantala, nilinaw ni Garcia na hindi naman automated ang Barangay at SK Elections dahil magiging manual pa rin ito.

Aminado ang kampo ni Presumptive President Ferdinand “Bongbong” Marcos na ikinagulat nila ang manipestasyon ng kampo ni Vice President Leni Robredo na kumikilala sa integridad ng resulta ng halalan.

Ayon kay Atty. Vic Rodriguez, Spokesman ni Marcos at Incoming Executive Secretary, nasorpresa sila sa manipestasyon ni Atty. Macalintal, Election Counsel ni Robredo na tanggapin ang resulta ng halalan.

Isa anya itong patunay ng pagiging makabayan at tumutugon ang lahat sa mensaheng pagkakaisa ng Uniteam noong kampanya.

Dakong alas-2 kahapon nang payagang magbigay ng manipestasyon ang mga abogado ng bawat kandidato kung saan inihayag ni Macalintal na hindi sila tututol sa resulta ng canvassing ng mga Certificates of Canvass.

Ipinabatid pa ni Macalintal sa National Board of Canvassers na wini-waive ng kampo ni Robredo ang pagdalo sa canvassing para sa ikabibilis na rin ng proseso ng bilangan.

Samantala, idinagdag ni Rodriguez na mayroon ng mga lugar na maaaring pagdausan ng oath taking ni BBM pero hindi ito gagawin sa Luneta, Maynila dahil ang nabanggit na lugar ay nagsisilbing COVID-19 field hospital.

Tuluy-tuloy ang preprasyon ng COMELEC para sa Barangay at Sangguniang Kabataan Elections sa Disyembre.

Ito, ayon kay COMELEC Commissioner George Garcia, ay hangga’t walang utos mula sa Kongreso na muling ipagpaliban ngayong taon ang nasabing halalan.

Aminado si Garcia na mahirap i-assume na muling ipo-postpone ang eleksyon sa Barangay at SK kaya’t hindi mauudlot ang kanilang mga preparasyon, tulad ng voters registration.

Sa hulyo anya ay muling bubuksan ng COMELEC ang voter registration para sa mga bagong botante at nais magpa-activate.

Magugunitang isinusulong ng ilang mambabatas na ipagpaliban muna ulit ang Barangay at SK Polls sa Disyembre upang makatipid sa gastos ang gobyerno at magamit na lamang ang pondo sa COVID-19 pandemic response.