HOT STORIES OF THE WEEK

Aabot sa 5.268 trillion pesos na national budget ang posibleng hingin ng susunod na administrasyon ni Ferdinand “Bongbong” Marcos Junior para sa taong 2023.

Kumpara ito sa 5.024 trillion pesos na pondo ng pamahalaan ngayong 2022 na hiningi ni Pangulong Rodrigo Duterte.

Inihayag ng Department of Budget and Management (DBM) matapos ang 181^st Meeting ng Inter-Agency Development Budget Coordination Committee na binubuo ng mga economic manager ng bansa.

Ayon kay DBM Officer-In-Charge Tina Rose Marie Canda, ang naturang proposed national budget ay katumbas ng 22.1% ng Gross Domestic Product ng bansa.

Lampas din ito sa “budget ceiling” na itinakda ng economic managers na 5.242 trillion pesos noong December 2021.

Nagtakda anya ang economic team ng National Budget Cap para sa taong 2023 dahil sa inaasahang mas mataas na revenue collections sa susunod na taon.

Pinayuhan naman ni Canda ang incoming administration ni Marcos na manatili lamang sa budget ceiling para sa tinatawag na “Prudent Fiscal Management.”

Kinumpirma na ng Department of Agriculture (DA) ang malawakang shortage ng Patatas sa mundo na pangunahing sangkap sa French fries.

Ayon kay Agriculture Secretary Kristine Evangelista, ramdam ang epekto nito sa mga Fast Food chain sa bansa.

Nabatid na ilang Fast Food chain na ang nagpatupad ng limitasyon sa kanilang French fries at inalis na rin ang malakihang serving nito.

Tanging table potatoes o mga pang-ulam ang itinatanim ng mga magsasakang Pilipino, na hindi naman makatutulong sa problema sa kakulangan ng supply.

Sa huling tala, tumaas na rin ang presyo ng patatas sa Metro Manila na aabot na sa P70 kada kilo mula sa dating P40 hanggang P50.

Naging mapayapa ang ginanap na special elections kahapon sa 12 barangay sa Tubaran, Lanao del Sur.

Ayon kay Commission on Elections (COMELEC) commissioner George Garcia, wala silang naitalang untoward incident dalawang oras bago isara ang mga polling precints.

Patuloy naman ang pakikipag-ugnayan ni COMELEC acting spokesperson John Rex Laudiangco sa Director ng COMELEC- BARMM na si Ray Sumalipao para sa report.

Kung tagumpay na maita-transmit ang resulta ngayong araw ay posibleng bukas i-proklama ang magwawaging Party-list groups.

Aabot sa 6, 921 rehistradong botante ang bumoto sa lalawigan na mahigpit na binantayan ng PNP at AFP.

Humingi na ng sorry sa pamilya ng pitong nasawing pasahero ang pamunuan ng MERCRAFT Shipping Corporation na nagmamay-ari sa nasunog na MV MERCRAFT 2 sa Real, Quezon.

Ayon kay Michelle Avanica, kinatawan ng MERCRAFT, tatanggapin ng kanilang kumpanya ang anumang ihahaing kaso ng pamilya ng mga nasawi.

Pansamantala nang sinuspinde ang operasyon ng ilan pang vessel ng MERCRAFT habang pinag-aaralan pa kung babawiin ang prangkisa nito.

Natuklasan naman na noong 2017 ay isa ring barko ng MERCRAFT ang tumaob na ikinasawi ng limang pasahero.

Susundin ng Malacañang ang tradisyunal na inauguration rites para sa susunod na pangulo.

Ayon kay Acting Presidential spokesman Martin Andanar, bagaman desisyon ng presumptive president kung saan gaganapin ang inagurasyon, may itinakdang protocols na kailangang sundin.

Kabilang na rito ang pag-welcome ng bababang pangulo sa papasok na bagong presidente ng bansa.

Sa ngayon, wala pang pinal na venue sa inagurasyon ni incoming President Ferdinand “Bongbong” Marcos Jr.

Mas mataas ang case fatality rate ng monkeypox kumpara sa COVID-19 fatality rate ng Pilipinas.

Ayon kay Dr. Ted Herbosa, special adviser ng National Task Force Against COVID-19 ito’y sa gitna ng pagdami ng mga bansang mayroon nang kaso ng monkeypox.

Anya, 3% ang fatality rate ng monkeypox sa Africa na mas mataas kumpara sa 2.5% ng COVID-19 death rate sa Pilipinas.

Mas nakahahawa anya ang nabanggit na virus kaysa COVID na naililipat sa pamamagitan ng close contact, hayop at sa mga kontaminadong bagay.

Ang naturang sakit ay isang viral disease na nagmumula sa mga hayop kung saan ilan sa sintomas nito ay lagnat, pamamantal at pamamaga ng lymph nodes.

Aabot sa 30 electoral protests ang natanggap ng Commission on Elections (COMELEC) na may kaugnayan sa May 9 elections.

Ayon kay John Rex Laudiangco, tagapagsalita ng COMELEC, binubuo ang mga protesta para sa City, Municipal, Provincial at Regional positions.

Agad na ni-review ng Electoral Contest and Adjudication Department ang isinampang protesta na gugulong alinsunod sa mga panuntunan.

Paliwanag naman ni Laudiangco na hinihintay na lang nila ang report mula sa Komisyon para sa impormasyon kung may Party-list groups na mahaharap sa kaso.

Anuman anya ang resulta ng eleksyon, magpapatuloy ang pending cases dahil isinampa na ito bago pa ang botohan.

Welcome sa kampo ni presumptive president Ferdinand ‘Bongbong’ Marcos Jr. ang pag-concede ng kampo ni Vice President Leni Robredo.

Ayon kay Atty. Vic Rodriguez, tagapagsalita ni Marcos, hindi nila inaasahan ang pag-concede ng kanilang pinakamahigpit na katunggali sa halalan.

Nagpasalamat naman ang kampo ni BBM kay Robredo at maging kay Manila Mayor Isko Moreno na una na rin nag-concede, dahil sa kanilang pagkilala sa integridad ng election at electoral process.

Dahil hindi na ku-kwestiyunin ni Robredo ang bilangan ng boto, inaasang mas bibilis pa ang proseso ng canvassing.

Tiyak namang dadalo si Marcos sa gagawing proklamasyon na magaganap bukas ng hapon.

Ipinagpaliban ng National Board of Canvassers (NBOC) ang canvassing ng boto para sa presidential at vice-presidential candidate mula sa Pampanga at Sultan Kudarat.

Sa unang araw ng bilangan kahapon sa Kongreso, dismayado si Senate Majority Leader Juan Miguel Zubiri sa nangyari.

Nang buksan ni Negros Occidental 4th District Rep. Juliet Marie De Leon ang COC mula sa Pampanga, hindi nakita ang mga dokumento.

Dahil dito, agad nagpasya ang NBOC na ipagpaliban muna ang pagbibilang ng boto sa lalawigan.

Natuloy lamang ito nang ipasa ng Pampanga via Viber ang nawawalang COC.

Samantala, kahalintulad din ng nangyari sa Pampanga ang naganap sa Sultan Kudarat matapos mawala ang kanilang COC para sa pambansang posisyon.

Agad pinatawag via Zoom ang Election officer ng Surigao del Sur na si Atty. April Joy Balanon na umamin namang naiwan sa kanilang opisina ang Manually Counted COC.

Sa ngayon, ipinadala na rin via Viber ng Sultan Kudarat ang nawawalang COC na tinanggap naman ng panel.

Agad namang binigyan ng 24- oras ng NBOC ang COMELEC Surigao upang ipadala ang orihinal na dokumento.

Pinaghahandaan na ng Commission on Elections (COMELEC) ang pagdaraos ng Barangay at SK Elections sa Disyembre.

Ito ay sa gitna ng mga panukalang ipagpaliban muli ang nasabing halalan upang makatipid sa gastos at sa halip ay magamit na lamang ang pondo sa pagtugon ng COVID-19 pandemic.

Sinabi ni COMELEC Commissioner George Garcia, bahagi ng demokrasya ng bansa na maghalal ng bagong opisyal ng Barangay at Sangguniang Kabataan pero handa naman sila kung ipagpapaliban ang eleksyon.

Paliwanag pa ni Garcia na manual ang isasagawang eleksyon kung saan nasa walong bilyong piso ang ilalaan na budget para rito.

Samantala, nakatakdang buksan muli ng COMELEC ang voter registration sa Hulyo.