HOT STORIES OF THE WEEK

Target na masimulan ng Department of Transportation (DOTr) ang partial operation ng Metro Rail Transit Line 7 (MRT-7).

Sinabi ni DOTr Undersecretary Timothy Batan, nasa 65% na ang progress rate ng mahigit 68 billion pesos MRT-7 project na inaasahan na maging fully operational sa susunod na taon.

Dagdag ni Batan, tatakbo ang MRT-7 mula North Avenue, Quezon City hanggang San Jose Del Monte Bulacan.

Samantala, naniniwala naman si Batan na malaking tulong ang proyekto sa pagpapabilis ng biyahe dahil mula sa dating dalawang oras ay aabot na lamang ng 30 minutes mula QC hanggang Bulacan.

Aabot naman sa mahigit 300,000 pasahero kada araw sa unang taon ang inaasahan ng DOTr na pagsisilbihan ng MRT-7.

Nag convene na ang Kamara at Senado bilang National Board of Canvassers (NBOC) para magbilang ng mga boto sa pagka-Pangulo at pangalawang pangulo.

Pinangunahan nina Senate President Vicente Sotto, III at House Speaker Lord Allan Velasco ang pagbubukas ng joint session kaninang alas-10 ng umaga.

Ang Senate Contingent ay binubuo nina Senate Majority Leader Juan Miguel Zubiri, Senate President Protempore Ralph Recto, Senate Minority Floorleader Franklin Drilon at Senators Nancy Binay, Imee Marcos, Grace Poe at Pia Cayetano.

Samantala, ang House Contingent ay binubuo naman nina Majority Leader Martin Romualdez, Cavite Congressmen Jesus Crispin Boying Remulla at Abraham Tolentino, Pampanga Congressman Juan Bondoc, Marikina Representative Stella Quimbo, Ilocos Sur Representative Kristine Singson-Meehan at Aambis-Owa Party List Representative Sharon Garin.

Sinabi ni Zubiri na target ng NBOC na makapagdeklara ng bagong presidente at bise presidente bukas matapos magkasundo ang mga lider ng dalawang kapulungan na tapusin sa loob ng dalawang araw ang Canvassing of Votes. —sa ulat ni Tina Nolasco (Patrol 11) at Cely Ortega-Bueno (Patrol 19)

Inanunsiyo ng Office of the Vice President (OVP) na kanila nang ititigil ang ilang programa sa Hunyo.

Ayon tanggapan ng Bise-presidente, kabilang sa kanilang ihihinto ang Bayanihan E-Konsulta sa Martes, Mayo 31.

Ihihinto narin ang pagtanggap ng aplikasyon para sa Medical at Burial Assistance simula Hunyo a-1.

Ayon sa OVP, ito ay para masiguro na magiging maayos ang pag turn-over ng programa sa susunod na uupong Pangalawang Pangulo na si Davao City Mayor Sara Duterte-Carpio.

Nagpaabot naman ng pasasalamat ang OVP sa mga nagbigay ng tiwala at nakiisa para isakatuparan ang ilan nilang programa sa panahon ng COVID-19 pandemic.

Aminado si Presidential Adviser for Entrepreneurship Joey Concepcion na malabo nang ipatupad ng gobyerno sa Hunyo ang isinusulong niyang “no booster shot card, no entry” policy sa mga papasok sa mga “enclosed establishment” laban sa pagtaas ng COVID-19 cases.

Ayon kay Concepcion, marami ang tutol na gawing mandatory ang pagpapakita ng booster shot card dahil kaunti lamang ang nagpapaturok at mababawasan ang mga papasok sa mga establisimyento.

Gayunman, ipinaalala ng opisyal na nababawasan na ang bisa ng primary vaccines batay na rin sa kanyang naging karanasan makaraang kumuha ng antibody test.

Bagaman naging “over confident” na anya ang mga Filipino dahil mahina na ang nai-infect, naka-aalarma pa rin ang posibleng panibagong COVID-19 surge.

Umapela naman si Concepcion sa mga mamamayan na magpabakuna na ng primary dose at magpaturok na ng booster, lalo’t marami namang stock ang gobyerno, para maibangon nang tuluyan ang ekonomiya ng bansa.

Nagsorry sa publiko si Pangulong Rodrigo Duterte dahil sa kaniyang naging pagkukulang sa pamumuno sa bansa.

Sa naganap na inagurasyon ng bagong Metropolitan Manila Development Authority (MMDA) Head Office Building sa Pasig City, aminado si Duterte na hindi naging sapat ang anim na taon para kaniyang ibigay ang kabuuang serbisyo sa taumbayan.

Sa kabila nito, iginiit ng Pangulo na ginawa niya ang kaniyang makakaya at pinakamahusay na trabaho upang maibigay ang nararapat sa bansa.

Samantala, pinasalamatan naman ni Duterte ang lahat ng sumuporta at tumulong sa kaniyang administrasyon upang magampanan ang kanilang tungkulin sa Pilipinas.

Inihihirit ng grupo ng mga manggagawa ang agarang pagpasa ng P750 na minimum wage bill.

Ayon sa Kilusang Mayo Uno (KMU), ang pagpasa sa House Bill 246, ay malaking tulong para sa mga Pilipino sa gitna ng patuloy na pagtaas ng presyo ng mga bilihin at produktong petrolyo.

Sinabi ng KMU, ang ginagawang pagharang ng mga kapulisan sa kanilang ginagawang mapayapang pagkilos sa harap ng kongreso ay kawalan ng karapatan sa malayang pamamahayag at mapayapang demonstrasyon sa bansa.

Bukod pa diyan, isinusulong din ng KMU ang pagtanggal ng Excise Tax dahil  isa ito sa dahilan ng pagtaas ng presyo ng produktong petrolyo.

Wait and see pa ang COMELEC sa kahilingan ng Chinese Government hinggil sa pagsasagawa ng Overseas Special Elections sa Shanghai.

Sa gitna na rin ito ng mahigpit na pagpapatupad ng lockdown sa China dahil sa mataas na kaso ng COVID-19.

Ipinabatid ni COMELEC Acting Spokesperson John Rex Laudiangco, hiniling na nila sa China ang go signal para maituloy ang botohan sa Shanghai na hindi pa naman tinutugunan ng nasabing bansa.

Nasa halos 2,000 Filipino Overseas Voters ang nasa Shanghai.

Wala pang venue para sa inagurasyon ni presumptive president Ferdinand Bongbong Marcos, Jr.

Ayon ito sa kampo ni BBM na unang tinatarget ang Quirino Grandstand kung saan tradisyunal na ginagawa ang inagurasyon para sa kanyang sariling inagurasyon  subalit may mga COVID-19 programs na ginagawa pa rito.

Magugunitang June 19 planong idaos ni presumptive vice president Sara Duterte-Carpio ang kanyang Inauguration Ceremony sa kanyang baluwarteng Davao City.

Nilinaw ni Dr. Maricar limpin, President ng Philippine College of Physicians na ang monkeypox virus ay nagmula sa sakit ng hayop na naipasa sa isang tao dahilan kaya nagkaroon ng human to human transmission.

Sa panayam ng DWIZ sinabi ni Limpin na ang panibagong virus ay kamag-anak ng smallpox at chicken pox pero hindi ito mabilis makahawa kung ikukumpara sa COVID-19.

Ayon kay Limpin, malaki ang tiyansa na mahawa ang isang indibidwal na makakalanghap ng particles mula sa isang indibidwal na positibo sa monkeypox.

Sinabi ni Limpin na ang bakuna sa COVID-19, ay iba pa sa bakuna laban sa smallpox, chicken pox at iba pang virus.

Dagdag pa ni Limpin na kailangan pa rin ng publiko ng dobleng pag-iingat laban sa ibat-ibang uri ng sakit na kumakalat ngayon sa Pilipinas at sa iba pang bansa.

Sisimulan na mamayang alas-2 ng hapon ng National Board of Canvassers ang Marathon of Canvassing ng mga boto at Election Returns (ERs) na dumating sa Batasang Pambansa Complex.

Sa panayam ng DWIZ sinabi ni Mark Llandro Mendoza, Secretary General ng House of Representantives na magkakaroon ng joint session ang Kamara at Senado na magsisimula mamayang alas-10 ng umaga.

Ayon kay Mendoza, target na matapos ang Canvassing bukas, Miyerkules ng gabi o Huwebes ng umaga kung saan, posibleng ianunsyo ang mga mananalo sa pagka-presidente at bise-presidente.